ربیع بن سبرہ جہنی اپنے والد (سیدنا سبرہ جہنی رضی اللہ عنہ) کا یہ بیان نقل کرتے ہیں کہ نبی اکرم صلی اللہ علیہ وسلم نے فتحِ مکہ کے سال ہمیں نکاحِ متعہ کرنے کی اجازت دی، میں اور ایک دوسرا شخص ایک نوجوان عورت کے پاس گئے جو کنواری محسوس ہوتی تھی، ہم اس کے ساتھ نکاحِ متعہ کرنا چاہتے تھے، ہم اس کے سامنے بیٹھ گئے، میرے ساتھی کے جسم پر بھی ایک چادر تھی اور میرے جسم پر بھی ایک چادر تھی، ہم نے اس عورت کے ساتھ بات چیت کی، مہر کے بارے میں بات چیت کی کہ ہم اسے چادریں دیں گے، میں اپنے ساتھی کے مقابلے میں زیادہ نوجوان تھا، لیکن اس کی چادر میری چادر سے زیادہ عمدہ تھی، وہ عورت ایک دفعہ میری طرف دیکھتی تھی اور ایک مرتبہ اس کی چادر کی طرف دیکھتی تھی، پھر اس عورت نے مجھے اختیار کر لیا تو میں نے اس کے ساتھ نکاح کر لیا، میں تین دن تک اس کے ساتھ ٹھہرا رہا، پھر نبی اکرم صلی اللہ علیہ وسلم نے اس (نکاحِ متعہ سے) منع کر دیا تو میں نے اس عورت سے علیحدگی اختیار کر لی۔ [صحیح ابن حبان/كتاب النكاح/حدیث: 4146]

سیدنا ربیع بن سبرہ جہنی رحمہ اللہ اپنے والد (سیدنا سبرہ بن معبد رضی اللہ عنہ) کا یہ بیان نقل کرتے ہیں: ہم لوگ نبی اکرم صلی اللہ علیہ وسلم کے ہاں روانہ ہوئے، جب ہم نے عمرہ ادا کر لیا تو نبی اکرم صلی اللہ علیہ وسلم نے فرمایا: ”تم خواتین کے ساتھ نکاحِ متعہ کر لو۔“ راوی بیان کرتے ہیں: ہمارے نزدیک ان دنوں میں متعہ کرنا شادی کے مترادف تھا، ہم نے خواتین کو اس کی پیشکش کی کہ ہم متعین مدت کے لیے ان کے ساتھ شادی کر لیتے ہیں۔ راوی کہتے ہیں: ہم نے اس بات کا تذکرہ نبی اکرم صلی اللہ علیہ وسلم سے کیا تو آپ صلی اللہ علیہ وسلم نے ارشاد فرمایا: ”تم لوگ ایسا کر لو۔“ میں اور میرا چچازاد بھائی نکلے، میرے پاس بھی ایک چادر تھی اور اس کے پاس بھی ایک چادر تھی، اس کی چادر میری چادر سے اچھی تھی اور میں اس کے مقابلے میں زیادہ نوجوان تھا، ہم ایک عورت کے پاس آئے، ہم نے اس عورت کو نکاح کی پیشکش کی، اسے میری جوانی پسند آئی اور میرے چچازاد کی چادر پسند آئی، وہ بولی: چادر تو چادر کی طرح ہوتی ہے، تو میں نے اس عورت کے ساتھ شادی کر لی، میرے اور اس عورت کے درمیان دس دن ساتھ رہنے کا معاہدہ ہوا تھا، اس رات میں اس کے پاس رہا، پھر اگلے دن میں نبی اکرم صلی اللہ علیہ وسلم کی خدمت میں حاضر ہوا تو نبی اکرم صلی اللہ علیہ وسلم حجرِ اسود اور خانہ کعبہ کے درمیان کھڑے ہوئے لوگوں سے خطاب کر رہے تھے، آپ صلی اللہ علیہ وسلم ارشاد فرما رہے تھے: ”اے لوگو! میں نے تمہیں خواتین کے ساتھ نکاحِ متعہ کرنے کی اجازت دی تھی، خبردار! بے شک اللہ تعالیٰ نے اسے قیامت کے دن تک حرام قرار دے دیا ہے، تو جس شخص نے ایسا کوئی معاہدہ کیا ہو تو اسے ان عورتوں کو چھوڑ دینا چاہیے اور تم نے انہیں جو ادائیگی کی تھی اس میں سے کچھ بھی واپس نہ لینا۔“ [صحیح ابن حبان/كتاب النكاح/حدیث: 4147]

ربیع بن سبرہ اپنے والد (سیدنا سبرہ رضی اللہ عنہ) سے روایت کرتے ہیں کہ انہوں نے نبی اکرم صلی اللہ علیہ وسلم کے ساتھ ایک غزوہ میں شرکت کی، وہ بیان کرتے ہیں: میں اور میری قوم سے تعلق رکھنے والا ایک شخص نکلے، خوبصورتی کے اعتبار سے مجھے اس پر فضیلت حاصل تھی اور وہ شخص بدصورت ہونے کے قریب تھا، ہم میں سے ہر ایک کے پاس چادر موجود تھی، جہاں تک میری چادر کا تعلق تھا تو وہ پرانی تھی اور جہاں تک میرے چچازاد کی چادر کا تعلق تھا وہ بالکل نئی چادر تھی، یہاں تک کہ ہم مکہ کے زیریں علاقے میں (راوی کو شک ہے شاید یہ الفاظ ہیں) بالائی علاقے میں آئے، ہماری ملاقات ایک نوجوان عورت سے ہوئی جو کنواری محسوس ہوتی تھی، ہم نے کہا: ”کیا ہم تمہارے ساتھ نکاحِ متعہ کر سکتے ہیں؟“ اس نے جواب دیا: ”تم کیا خرچ کرو گے (یعنی کیا مہر دو گے)؟“ تو ہم میں سے ہر ایک نے اپنی چادر کو پھیلا دیا، اس عورت نے اس دوسرے شخص کی طرف دیکھا (جو بدصورت تھا)، پھر جب اس مرد نے یہ دیکھا کہ وہ عورت میری طرف دلچسپی کے ساتھ دیکھ رہی ہے تو وہ بولا: ”اس کی چادر تو پرانی ہے، میری چادر بالکل نئی ہے“، اس عورت نے کہا: ”اس چادر میں بھی کوئی حرج نہیں ہے“، چنانچہ میں نے اس کے ساتھ نکاحِ متعہ کر لیا، پھر میں اس عورت سے اس وقت الگ ہوا جب نبی اکرم صلی اللہ علیہ وسلم نے اسے (یعنی نکاحِ متعہ کو) حرام قرار دے دیا تھا۔ [صحیح ابن حبان/كتاب النكاح/حدیث: 4148]

سیدنا ابوہریرہ رضی اللہ عنہ بیان کرتے ہیں: جب نبی اکرم صلی اللہ علیہ وسلم روانہ ہوئے تو آپ صلی اللہ علیہ وسلم نے ثنیۃ الوداع کے مقام پر پڑاؤ کیا، وہاں آپ صلی اللہ علیہ وسلم نے کچھ چراغ دیکھے اور کچھ خواتین کے رونے کی آواز سنی تو دریافت کیا: ”کیا معاملہ ہے؟“ لوگوں نے عرض کی: یا رسول اللہ صلی اللہ علیہ وسلم ! یہ کچھ خواتین ہیں جن کے ساتھ ان کے شوہروں نے نکاح متعہ کیا تھا، تو نبی اکرم صلی اللہ علیہ وسلم نے ارشاد فرمایا: ”متعہ نکاح، طلاق، عدت اور وراثت کو منہدم کر دیتا ہے (راوی کو شک ہے شاید یہ الفاظ ہیں) حرام کر دیتا ہے۔“ [صحیح ابن حبان/كتاب النكاح/حدیث: 4149]

ربیع بن سبرہ جہنی اپنے والد رضی اللہ عنہ کا یہ بیان نقل کرتے ہیں کہ نبی اکرم صلی اللہ علیہ وسلم نے متعہ سے منع کر دیا، آپ صلی اللہ علیہ وسلم نے ارشاد فرمایا: ”یہ تمہارے آج کے دن سے لے کر قیامت کے دن تک کے لیے حرام ہے اور جس شخص نے کوئی چیز (کسی عورت کو) دی ہو وہ اسے واپس نہ لے۔“ [صحیح ابن حبان/كتاب النكاح/حدیث: 4150]

ایاس بن سلمہ اپنے والد رضی اللہ عنہ کا یہ بیان نقل کرتے ہیں: غزوہ اوطاس کے سال نبی اکرم صلی اللہ علیہ وسلم نے ”ہمیں تین دن تک نکاحِ متعہ کرنے کی رخصت دی“ پھر آپ صلی اللہ علیہ وسلم نے ”ہمیں اس سے منع کر دیا“۔ (امام ابن حبان رحمہ اللہ فرماتے ہیں:) غزوہ اوطاس اور فتح مکہ ایک ہی سال میں ہوئے تھے۔ [صحیح ابن حبان/كتاب النكاح/حدیث: 4151]

سیدنا عبداللہ بن عمر رضی اللہ عنہما بیان کرتے ہیں کہ نبی اکرم صلی اللہ علیہ وسلم نے ”شغار“ سے منع کیا ہے۔ [صحیح ابن حبان/كتاب النكاح/حدیث: 4152]

عبدالرحمن بن ہرمز بیان کرتے ہیں کہ عباس بن عبداللہ نے عبدالرحمن بن حکم کے ساتھ اپنی بیٹی کی شادی کر دی اور عبدالرحمن نے بھی اپنی بیٹی کی شادی ان کے ساتھ کر دی اور ان دونوں صاحبان نے اس نکاح کو ہی مہر قرار دے دیا، تو سیدنا معاویہ بن ابوسفیان رضی اللہ عنہ اس وقت خلیفہ تھے، انہوں نے (مدینہ کے گورنر) مروان کو خط لکھا اور اسے یہ ہدایت کی کہ وہ ان دونوں کے درمیان علیحدگی کروا دے، انہوں نے اپنے خط میں یہ بات تحریر کی کہ ”یہ «الشِّغَارُ» (شغار) ہے، جس سے نبی اکرم صلی اللہ علیہ وسلم نے منع فرمایا ہے۔“ [صحیح ابن حبان/كتاب النكاح/حدیث: 4153]

سیدنا انس رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”اسلام میں شغار کی (کوئی حیثیت) نہیں ہے۔“ [صحیح ابن حبان/كتاب النكاح/حدیث: 4154]

ضحاک بن فیروز اپنے والد (رضی اللہ عنہ) کا یہ بیان نقل کرتے ہیں، انہوں نے عرض کی: یا رسول اللہ صلی اللہ علیہ وسلم ! جب میں نے اسلام قبول کیا اس وقت دو بہنیں میرے نکاح میں تھیں، نبی اکرم صلی اللہ علیہ وسلم نے ارشاد فرمایا: ”تم ان دونوں میں سے جسے چاہو طلاق دے دو۔“ [صحیح ابن حبان/كتاب النكاح/حدیث: 4155]