عمر بن عبید اللہ کے بارے میں یہ بات منقول ہے کہ انہوں نے احرام کے دوران نکاح کرنے کا ارادہ کیا، انہوں نے ابان بن عثمان کو پیغام بھجوایا تو ابان نے کہا: سیدنا عثمان غنی رضی اللہ عنہ نے یہ بات بیان کی ہے کہ نبی اکرم صلی اللہ علیہ وسلم نے ارشاد فرمایا ہے: ”احرام والا شخص نکاح نہیں کر سکتا، وہ نکاح کا پیغام نہیں بھیج سکتا اور کسی کا نکاح نہیں کروا سکتا۔“ (امام ابن حبان رحمہ اللہ فرماتے ہیں:) یہ روایت ایوب بن موسیٰ نے نبیہ بن وہب کے حوالے سے بذاتِ خود سنی ہے اور انہوں نے یہ روایت ایوب سختیانی کے حوالے سے، نافع کے حوالے سے، نبیہ بن وہب سے سنی ہے، تو اس کے دونوں طرق محفوظ ہیں۔ [صحیح ابن حبان/كتاب النكاح/حدیث: 4126]

سیدنا عثمان غنی رضی اللہ عنہ روایت کرتے ہیں کہ نبی اکرم صلی اللہ علیہ وسلم نے ارشاد فرمایا ہے: ”احرام والا شخص نکاح نہیں کر سکتا اور وہ کسی کا نکاح نہیں کروا سکتا۔“ [صحیح ابن حبان/كتاب النكاح/حدیث: 4127]

سیدنا عثمان غنی رضی اللہ عنہ سے روایت ہے کہ نبی اکرم صلی اللہ علیہ وسلم نے ارشاد فرمایا: ”احرام والا شخص نکاح نہیں کر سکتا اور نہ ہی وہ کسی کا نکاح کروا سکتا ہے۔“ [صحیح ابن حبان/كتاب النكاح/حدیث: 4128]

سیدنا عبداللہ بن عباس رضی اللہ عنہما بیان کرتے ہیں کہ نبی اکرم صلی اللہ علیہ وسلم نے جب سیدہ میمونہ رضی اللہ عنہا کے ساتھ شادی کی تھی تو اس وقت آپ صلی اللہ علیہ وسلم حالتِ احرام میں تھے۔ (امام ابن حبان رحمہ اللہ فرماتے ہیں:) سیدنا عبداللہ بن عباس رضی اللہ عنہما کا یہ کہنا کہ نبی اکرم صلی اللہ علیہ وسلم نے جب سیدہ میمونہ رضی اللہ عنہا کے ساتھ شادی کی تھی آپ اس وقت حالتِ احرام میں تھے، اس کے ذریعے ان کی مراد یہ ہے کہ آپ صلی اللہ علیہ وسلم حرم کی حدود کے اندر تھے، اس سے مراد یہ نہیں ہے کہ نبی اکرم صلی اللہ علیہ وسلم اس وقت احرام باندھے ہوئے تھے جس طرح عرب اپنے محاورے میں یہ لفظ استعمال کرتے ہیں؛ چناں چہ جو شخص نجد کی حدود میں داخل ہو اس کے لیے وہ لفظ استعمال کرتے ہیں کہ وہ نجد میں داخل ہو گیا، جو شخص تاریکی میں داخل ہو جائے اس کے لیے وہ لفظ استعمال کرتے ہیں کہ وہ تاریکی میں داخل ہو گیا، اور جو شخص تہامہ کی حدود میں داخل ہو وہ اس کے لیے لفظ استعمال کرتے ہیں کہ وہ تہامہ کی حدود میں آ گیا، اس کے ذریعے ان کی مراد یہ تھی کہ نبی اکرم صلی اللہ علیہ وسلم حرم کی حدود کے اندر تھے، اس سے یہ مراد نہیں ہے کہ نبی اکرم صلی اللہ علیہ وسلم نے اس وقت احرام بھی باندھا ہوا تھا، اور اس تاویل کے صحیح ہونے کی دلیل وہ روایات ہیں جو ہم پہلے ذکر کر چکے ہیں اور وہ روایت جو ان دونوں کے درمیان فصل پیدا کرتی ہے وہ آگے آ رہی ہے۔ [صحیح ابن حبان/كتاب النكاح/حدیث: 4129]

سیدنا ابورافع رضی اللہ عنہ بیان کرتے ہیں: نبی اکرم صلی اللہ علیہ وسلم نے جب سیدہ میمونہ رضی اللہ عنہا کے ساتھ شادی کی تھی اس وقت آپ صلی اللہ علیہ وسلم حالتِ احرام میں نہیں تھے، جب سیدہ میمونہ رضی اللہ عنہا کی رخصتی ہوئی اس وقت بھی نبی اکرم صلی اللہ علیہ وسلم حالتِ احرام میں نہیں تھے اور میں ان دونوں کے درمیان پیغام رسانی کے فرائض سرانجام دے رہا تھا۔ [صحیح ابن حبان/كتاب النكاح/حدیث: 4130]

سیدنا عبداللہ بن عباس رضی اللہ عنہما بیان کرتے ہیں کہ نبی اکرم صلی اللہ علیہ وسلم نے جب سیدہ میمونہ رضی اللہ عنہا سے شادی کی تھی اس وقت آپ صلی اللہ علیہ وسلم حالتِ احرام میں تھے۔ [صحیح ابن حبان/كتاب النكاح/حدیث: 4131]

سیدہ عائشہ صدیقہ رضی اللہ عنہا بیان کرتی ہیں کہ نبی اکرم صلی اللہ علیہ وسلم نے اپنی ایک زوجہ محترمہ کے ساتھ حالتِ احرام میں شادی کی تھی اور آپ صلی اللہ علیہ وسلم نے حالتِ احرام میں پچھنے بھی لگوائے تھے۔ [صحیح ابن حبان/كتاب النكاح/حدیث: 4132]

سیدنا عبداللہ بن عباس رضی اللہ عنہما بیان کرتے ہیں کہ جب نبی اکرم صلی اللہ علیہ وسلم نے سیدہ میمونہ رضی اللہ عنہا کے ساتھ شادی کی تھی، اس وقت آپ صلی اللہ علیہ وسلم عمرۂ قضا کے موقع پر احرام باندھے ہوئے تھے۔ [صحیح ابن حبان/كتاب النكاح/حدیث: 4133]

سیدہ میمونہ رضی اللہ عنہا بیان کرتی ہیں: نبی اکرم صلی اللہ علیہ وسلم نے جب ان کے ساتھ شادی کی اس وقت آپ صلی اللہ علیہ وسلم حالت احرام میں نہیں تھے، جب ان کی رخصتی ہوئی اس وقت بھی حالت احرام میں نہیں تھے۔ سیدہ میمونہ رضی اللہ عنہا کا انتقال بھی سرف کے مقام پر ہوا تھا، (راوی کہتے ہیں) ہم نے انہیں اسی جگہ پر دفن کیا جہاں ان کی رخصتی ہوئی تھی، (راوی کہتے ہیں) میں اور سیدنا عبداللہ بن عباس رضی اللہ عنہما ان کی قبر میں اترے تھے، جب ہم نے انہیں لحد میں رکھا تو ان کا سر ایک طرف ڈھلک گیا، میں نے اپنی چادر لی اور ان کے سر کے نیچے رکھ دی، سیدنا عبداللہ بن عباس رضی اللہ عنہما نے اس چادر کو کھینچ لیا اور اس کو ایک طرف رکھ دیا۔ انہوں نے حج کے موقع پر اپنا سر منڈوا دیا تھا تو ان کے بال چھوٹے چھوٹے سے تھے۔ [صحیح ابن حبان/كتاب النكاح/حدیث: 4134]

سیدنا ابورافع رضی اللہ عنہ بیان کرتے ہیں کہ نبی اکرم صلی اللہ علیہ وسلم نے جب سیدہ میمونہ رضی اللہ عنہا کے ساتھ نکاح کیا تو آپ صلی اللہ علیہ وسلم اس وقت حالتِ احرام میں نہیں تھے، اور جب سیدہ میمونہ رضی اللہ عنہا کی رخصتی ہوئی تو اس وقت بھی نبی اکرم صلی اللہ علیہ وسلم حالتِ احرام میں نہیں تھے، اور میں ان دونوں کے درمیان پیغام رسانی کے فرائض سر انجام دے رہا تھا۔ [صحیح ابن حبان/كتاب النكاح/حدیث: 4135]