سیدنا ابوہریرہ رضی اللہ عنہ، نبی اکرم صلی اللہ علیہ وسلم کا یہ فرمان نقل کرتے ہیں: ”ایک شخص نے کبھی کوئی نیک کام نہیں کیا تھا۔ وہ لوگوں کو قرض دیا کرتا تھا وہ اپنے نمائندوں سے یہ کہتا تھا، جو شخص خوشحال ہو اس سے قرض واپس لے لینا اور جو تنگ دست ہو اسے چھوڑ دینا اور درگزر کرنا تاکہ اللہ تعالیٰ بھی ہم سے درگزر کرے۔ نبی اکرم صلی اللہ علیہ وسلم فرماتے ہیں جب اس کا انتقال ہوا تو اللہ تعالیٰ نے دریافت کیا: کیا تم نے کبھی کوئی نیکی کی؟ اس نے جواب دیا: جی نہیں، البتہ میرا ایک غلام تھا میں لوگوں کو قرض دیا کرتا تھا۔ جب میں اس غلام کو تقاضا کرنے کے لیے بھیجتا تھا، تو میں اس سے یہ کہتا تھا جو شخص آسانی سے دے دے اس سے وصول کر لینا اور جو شخص تنگ دست ہو اسے چھوڑ دینا اور اس سے درگزر کرنا تاکہ اللہ تعالیٰ بھی ہم سے درگزر کرے، تو اللہ تعالیٰ نے ارشاد فرمایا: تحقیق میں نے بھی تم سے درگزر کیا۔“ (امام ابن حبان رحمہ اللہ فرماتے ہیں:) نبی اکرم صلی اللہ علیہ وسلم کا یہ فرمان: ”اس نے کبھی کوئی نیکی نہیں کی تھی“ اس سے مراد یہ ہے: اسلام قبول کرنے کے علاوہ اور کوئی نیکی نہیں کی تھی۔ [صحیح ابن حبان/كتاب البيوع/حدیث: 5043]

عبادہ بن ولید بیان کرتے ہیں: میں اور میرے والد علم کے حصول کے لیے انصار کے پاس آئے، اس سے پہلے کہ وہ لوگ انتقال کر جائیں تو ہماری ملاقات سب سے پہلے سیدنا ابویسر رضی اللہ عنہ سے ہوئی جو نبی اکرم صلی اللہ علیہ وسلم کے صحابی ہیں۔ ان کے ساتھ ان کا غلام بھی تھا۔ سیدنا ابویسر رضی اللہ عنہ نے ایک چادر اور ایک معافری چادر پہنی ہوئی تھی، ان کے غلام نے بھی ایک چادر اور ایک معافری چادر پہنی ہوئی تھی۔ میرے والد نے ان سے کہا: مجھے آپ کے چہرے پر غصے کے آثار نظر آ رہے ہیں۔ انہوں نے جواب دیا: جی ہاں! میں نے فلاں بن فلاں سے کچھ رقم لینی تھی، میں اس کے گھر آیا، میں نے دریافت کیا: کیا وہ یہاں ہے؟ گھر والوں نے جواب دیا: جی نہیں، پھر اس کا بیٹا نکل کر میرے پاس آیا، میں نے دریافت کیا: تمہارا باپ کہاں ہے؟ اس نے کہا: اس نے آپ کی آواز سن لی تھی، وہ اندر چلا گیا ہے۔ میں نے (اس آدمی کو مخاطب کر کے) کہا: تم نکل کر میرے پاس آؤ، مجھے پتہ ہے تم کہاں ہو، وہ نکل کر میرے پاس آیا، میں نے دریافت کیا: تم کس وجہ سے چھپنے پر مجبور ہوئے؟ اس نے کہا: اللہ کی قسم! میں آپ کو بتاتا ہوں، میں آپ کے ساتھ غلط بیانی نہیں کروں گا۔ اللہ کی قسم! مجھے اس بات کا اندیشہ تھا کہ اگر (میں آپ کے سامنے آیا) اور میں نے آپ کے ساتھ بات چیت کی تو مجھے آپ کے ساتھ جھوٹ بولنا پڑے گا، میں آپ کے ساتھ کوئی وعدہ کر لوں گا پھر اس کی خلاف ورزی کرنی پڑے گی۔ آپ نبی اکرم صلی اللہ علیہ وسلم کے صحابی ہیں (اب میں آپ کے ساتھ اس طرح کرتا ہوا اچھا تو نہیں لگتا)، اللہ کی قسم! میں ایک تنگ دست شخص ہوں۔ سیدنا ابویسر رضی اللہ عنہ بیان کرتے ہیں: میں نے دریافت کیا: کیا اللہ کی قسم! ایسا ہی ہے؟ اس نے کہا: اللہ کی قسم! ایسا ہی ہے۔ سیدنا ابویسر رضی اللہ عنہ بیان کرتے ہیں: پھر انہوں نے اپنا صحیفہ لیا اور اسے مٹا دیا اور بولے: اگر تمہیں ادائیگی کی گنجائش مل جائے تو ادا کر دینا ورنہ میری طرف سے یہ معاف ہے، میں اس بات کی گواہی دیتا ہوں کہ میری ان دونوں آنکھوں نے (اسے) دیکھا، میرے کانوں نے سنا اور میرے دل نے اس بات کو محفوظ رکھا (انہوں نے اپنے دل کی طرف اشارہ کر کے یہ بات کہی) کہ میں نے نبی اکرم صلی اللہ علیہ وسلم کو یہ بات ارشاد فرماتے ہوئے سنا ہے: ”جو شخص کسی تنگ دست کو مہلت دیتا ہے یا اسے ادائیگی (مکمل یا جزوی طور پر) معاف کر دیتا ہے تو اللہ تعالیٰ اسے اپنا خاص سایہ عطا کرے گا۔“ (امام ابن حبان رحمہ اللہ فرماتے ہیں:) سیدنا ابویسر رضی اللہ عنہ کا نام کعب بن عمرو ہے۔ [صحیح ابن حبان/كتاب البيوع/حدیث: 5044]

سیدنا ابوہریرہ رضی اللہ عنہ روایت کرتے ہیں، نبی اکرم صلی اللہ علیہ وسلم نے ارشاد فرمایا: ”جو شخص کسی تنگ دست کو آسانی فراہم کرے، اللہ تعالیٰ اسے دنیا اور آخرت میں آسانی فراہم کرے گا۔“ [صحیح ابن حبان/كتاب البيوع/حدیث: 5045]

سیدنا ابوہریرہ رضی اللہ عنہ بیان کرتے ہیں، میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے: ”ایک شخص لوگوں کو قرض دیا کرتا تھا، جب وہ کسی تنگ دست شخص کو پاتا تو اپنے اہلکاروں سے یہ کہتا: تم اس سے درگزر کرو تاکہ اللہ تعالیٰ بھی ہم سے درگزر کرے، جب وہ اللہ تعالیٰ کی بارگاہ میں حاضر ہوا تو اللہ تعالیٰ نے اس سے درگزر کیا۔“ [صحیح ابن حبان/كتاب البيوع/حدیث: 5046]

سیدنا ابومسعود انصاری رضی اللہ عنہ روایت کرتے ہیں، نبی اکرم صلی اللہ علیہ وسلم نے ارشاد فرمایا: ”تم سے پہلے لوگوں میں سے ایک شخص سے حساب لیا گیا تو اس کے حق میں کوئی بھی نیکی نہیں ملی، صرف یہ نیکی تھی کہ وہ ایک خوشحال شخص تھا، لوگوں سے لین دین کیا کرتا تھا، وہ اپنے غلام سے یہ کہتا تھا: تم تنگ دست شخص سے درگزر کرنا، تو اللہ تعالیٰ نے اپنے فرشتوں سے فرمایا: ہم اس بات کے زیادہ حق دار ہیں، تم لوگ اس سے درگزر کرو۔“ [صحیح ابن حبان/كتاب البيوع/حدیث: 5047]

عبداللہ بن کعب بن مالک اپنے والد (سیدنا کعب بن مالک رضی اللہ عنہ) کا یہ بیان نقل کرتے ہیں کہ انہوں نے ابن ابوحدرد رضی اللہ عنہ سے قرض کا تقاضا کیا جس کی ادائیگی ان کے ذمے تھی، یہ نبی اکرم صلی اللہ علیہ وسلم کے زمانہ اقدس کی بات ہے اور یہ مسجد کا واقعہ ہے۔ ان دونوں کی آواز بلند ہو گئی یہاں تک کہ نبی اکرم صلی اللہ علیہ وسلم نے اپنے گھر میں موجود رہتے ہوئے ان کی آواز سن لی، نبی اکرم صلی اللہ علیہ وسلم ان دونوں کے پاس تشریف لائے، آپ صلی اللہ علیہ وسلم نے اپنے حجرے کا پردہ ہٹایا اور آپ صلی اللہ علیہ وسلم نے سیدنا کعب بن مالک رضی اللہ عنہ کو بلند آواز میں پکارا: ”اے کعب بن مالک!“ انہوں نے عرض کی: یا رسول اللہ صلی اللہ علیہ وسلم ! میں حاضر ہوں، نبی اکرم صلی اللہ علیہ وسلم نے اپنے دست اقدس کے ذریعے اشارہ کیا کہ ”تم اپنے قرض کا نصف حصہ معاف کر دو۔“ سیدنا کعب رضی اللہ عنہ نے عرض کی: یا رسول اللہ صلی اللہ علیہ وسلم ! میں نے ایسا ہی کیا، تو نبی اکرم صلی اللہ علیہ وسلم نے (دوسرے فریق سے فرمایا): ”تم اٹھو اور (باقی رہ جانے والی رقم) ادا کر دو۔“ [صحیح ابن حبان/كتاب البيوع/حدیث: 5048]