ابوعیاش زید رحمہ اللہ بیان کرتے ہیں کہ انہوں نے سیدنا سعد بن ابی وقاص رضی اللہ عنہ سے جو کی ایک قسم کے عوض میں دوسری قسم کے لین دین کے بارے میں دریافت کیا، تو انہوں نے دریافت کیا کہ ان دونوں میں سے کون زیادہ فضیلت رکھتا ہے؟ انہوں نے جواب دیا: سفید والا، تو سیدنا سعد بن ابی وقاص رضی اللہ عنہ نے انہیں اس سے منع کر دیا اور یہ بات بتائی کہ میں نے نبی اکرم صلی اللہ علیہ وسلم کو سنا کہ آپ صلی اللہ علیہ وسلم سے تر کھجور کے عوض میں خشک کھجور کو فروخت کرنے کے بارے میں دریافت کیا گیا تو نبی اکرم صلی اللہ علیہ وسلم نے دریافت کیا: «أَيَنْقُصُ الرُّطَبُ إِذَا يَبِسَ؟» ”کیا تر کھجور خشک ہو کر کم ہو جاتی ہے؟“ سائل نے جواب دیا: جی ہاں، تو نبی اکرم صلی اللہ علیہ وسلم نے اسے اس سے منع کر دیا۔ [صحیح ابن حبان/كتاب البيوع/حدیث: 5003]

سیدنا عبداللہ بن عمر رضی اللہ عنہما، سیدنا زید بن ثابت رضی اللہ عنہ کے حوالے سے یہ بات نقل کرتے ہیں کہ نبی اکرم صلی اللہ علیہ وسلم نے ”عرایا کو اندازے کے تحت (فروخت کرنے) کی اجازت دی ہے۔“ [صحیح ابن حبان/كتاب البيوع/حدیث: 5004]

سیدنا عبداللہ بن عمر رضی اللہ عنہما، سیدنا زید بن ثابت رضی اللہ عنہ کے حوالے سے نبی اکرم صلی اللہ علیہ وسلم کے بارے میں یہ بات نقل کرتے ہیں کہ ”آپ صلی اللہ علیہ وسلم نے عرایا کو اندازے کے تحت فروخت کرنے کی اجازت دی ہے۔“ [صحیح ابن حبان/كتاب البيوع/حدیث: 5005]

سیدنا ابوہریرہ رضی اللہ عنہ بیان کرتے ہیں کہ نبی اکرم صلی اللہ علیہ وسلم نے عرایا کو فروخت کرنے کی اجازت دی ہے کہ ”وہ پانچ وسق سے کم ہو“ (راوی کو شک ہے یا شاید یہ الفاظ ہیں) ”وہ پانچ وسق ہو۔“ (امام ابن حبان رحمہ اللہ فرماتے ہیں:) ان دونوں میں سے کسی ایک عدد کے بارے میں یہ شک داؤد بن حصین نامی راوی کو ہے۔ [صحیح ابن حبان/كتاب البيوع/حدیث: 5006]

سیدنا ابوہریرہ رضی اللہ عنہ بیان کرتے ہیں کہ نبی اکرم صلی اللہ علیہ وسلم نے ” «عَرَايَا» کو فروخت کرنے کی اجازت دی ہے، جب کہ وہ پانچ «وَسْق» سے کم ہو (راوی کو شک ہے یا شاید یہ الفاظ ہیں) پانچ «وَسْق» ہو۔“ [صحیح ابن حبان/كتاب البيوع/حدیث: 5007]

سیدنا جابر بن عبداللہ رضی اللہ عنہما بیان کرتے ہیں: میں نے نبی اکرم صلی اللہ علیہ وسلم کو سنا، جب آپ نے عرایا کے بارے میں اجازت دی کہ اسے اندازے کے تحت فروخت کر سکتے ہیں، تو نبی اکرم صلی اللہ علیہ وسلم نے فرمایا: ”(اسے اس وقت فروخت کر سکتے ہیں) جب کہ وہ ایک وسق ہو یا دو وسق ہو، یا تین ہو یا چار ہو۔“ [صحیح ابن حبان/كتاب البيوع/حدیث: 5008]

سیدنا زید بن ثابت رضی اللہ عنہ بیان کرتے ہیں کہ نبی اکرم صلی اللہ علیہ وسلم نے ”عرایا کو (اندازے کے تحت) فروخت کرنے کی اجازت دی ہے، آپ صلی اللہ علیہ وسلم نے اس کے علاوہ کے بارے میں اجازت نہیں دی ہے۔“ [صحیح ابن حبان/كتاب البيوع/حدیث: 5009]

سیدنا خباب رضی اللہ عنہ بیان کرتے ہیں: میں مکہ میں لوہار تھا، میں نے عاص بن وائل کے لیے تلوار بنائی، میں اس کے پاس (اس کی قیمت کا) تقاضا کرنے کے لیے آیا، تو اس نے کہا: میں تمہیں اس وقت تک ادائیگی نہیں کروں گا جب تک تم محمد صلی اللہ علیہ وسلم کا انکار نہیں کرتے۔ میں نے کہا: میں اس وقت تک محمد صلی اللہ علیہ وسلم کا انکار نہیں کروں گا، جب تک اللہ تعالیٰ تمہیں موت دے کر دوبارہ زندگی نہیں دیتا۔ اس نے کہا: جب اللہ تعالیٰ مجھے موت دے کر دوبارہ زندگی دے گا اس وقت میرے پاس مال بھی ہو گا اور اولاد بھی ہو گی، تو میں تمہیں ادائیگی کر دوں گا۔ (سیدنا خباب رضی اللہ عنہ بیان کرتے ہیں) میں نے اس بات کا تذکرہ نبی اکرم صلی اللہ علیہ وسلم سے کیا تو اللہ تعالیٰ نے یہ آیت نازل فرمائی: ﴿أَفَرَأَيْتَ الَّذِي كَفَرَ بِآيَاتِنَا وَقَالَ لَأُوتَيَنَّ مَالًا وَوَلَدًا﴾ [سورة مريم: 77] ”کیا تم نے اس شخص کو دیکھا ہے جو ہماری آیات کا انکار کرتا ہے اور یہ کہتا ہے: مجھے عنقریب مال اور اولاد دیے جائیں گے۔“ (امام ابن حبان رحمہ اللہ فرماتے ہیں:) اگر ان الفاظ کو سننے والے افراد کا دل اس طرف چلا جائے یعنی یہ الفاظ کہ میں نے عاص بن وائل کے لیے تلوار بنائی اور پھر میں اس کے پاس (اس کے معاوضے کا) تقاضا کرنے کے لیے آیا (تو اس کو سننے والا یہ سمجھے) کہ دار الحرب میں تجارت کرنا مباح ہے اور مسلمان کا حربی کے ساتھ خرید و فروخت کرنا مباح ہے جبکہ وہ اس کی قیمت کے ذریعے مسلمانوں کو فائدہ پہنچائے، تو یہ بات جان لینی چاہیے کہ یہ کمزور استنباط اور نقصان دہ استدلال ہو گا؛ اس کی وجہ یہ ہے کہ جب سیدنا خباب رضی اللہ عنہ نے عاص بن وائل کے لیے یہ کام تلوار بنائی تھی اس وقت اللہ تعالیٰ نے قتال کے حکم سے متعلق آیت نازل نہیں کی تھی اور جہاد کو فرض قرار نہیں دیا تھا۔ اس کی وجہ یہ ہے کہ جہاد کی فرضیت اور مشرکین سے قتال کرنے کا حکم نبی اکرم صلی اللہ علیہ وسلم کے مکہ مکرمہ سے تشریف لے جانے کے بعد نازل ہوا تھا جیسا کہ ہم پہلے اس بات کا ذکر کر چکے ہیں اور (سیدنا خباب رضی اللہ عنہ کا) یہ واقعہ مکہ کا ہے، جو اللہ تعالیٰ کے لوگوں پر جہاد کو فرض کرنے سے پہلے کا ہے۔ [صحیح ابن حبان/كتاب البيوع/حدیث: 5010]

سیدنا معمر بن عبد اللہ رضی اللہ عنہ بیان کرتے ہیں کہ انہوں نے اپنے غلام کو جو کے ایک صاع کے ہمراہ بھیجا اور فرمایا: تم اسے فروخت کرو اور اس کے بدلے میں جو خرید کر لے آؤ۔ وہ لڑکا گیا، اس نے ایک صاع اور ایک صاع سے کچھ زیادہ جو حاصل کر لیے۔ جب وہ معمر رضی اللہ عنہ کے پاس آیا اور انہیں اس بارے میں بتایا تو معمر رضی اللہ عنہ نے اس سے کہا: تم نے ایسا کیوں کیا؟ تم جاؤ اور انہیں واپس کرو اور صرف برابر وصول کرنا کیونکہ میں نے نبی اکرم صلی اللہ علیہ وسلم کو یہ بات ارشاد فرماتے ہوئے سنا ہے: ”اناج کے عوض میں اناج کا لین دین برابر ہو گا۔“ اور اس زمانے میں ہمارا اناج جو ہوا کرتا تھا۔ [صحیح ابن حبان/كتاب البيوع/حدیث: 5011]

سیدنا ابوہریرہ رضی اللہ عنہ، نبی اکرم صلی اللہ علیہ وسلم کا یہ فرمان نقل کرتے ہیں: ”دینار کے عوض میں دینار، درہم کے عوض میں درہم (کا لین دین کرتے ہوئے) کوئی اضافی ادائیگی نہیں ہو گی۔“ [صحیح ابن حبان/كتاب البيوع/حدیث: 5012]