ابنِ ابی ملیکہ رحمہ اللہ بیان کرتے ہیں کہ سیدنا عبداللہ بن عباس رضی اللہ عنہما، سیدنا عبداللہ بن عمر رضی اللہ عنہما کے پاس آئے، انہوں نے انہیں سلام کیا اور دریافت کیا: کیا آپ سیدنا اسامہ رضی اللہ عنہ پر الزام عائد کرتے ہیں؟ راوی بیان کرتے ہیں، تو سیدنا عبداللہ بن عمر رضی اللہ عنہما نے فرمایا: جی نہیں، انہوں نے بتایا کہ انہوں نے مجھے یہ حدیث بیان کی ہے: ”سود صرف اُدھار میں ہوتا ہے۔“ (امام ابن حبان رحمہ اللہ فرماتے ہیں:) اس روایت کا مطلب یہ ہے کہ حدیث میں مذکور چھ چیزیں جب ان کی جنس کے عوض میں فروخت کی جائیں اور ان کے درمیان اضافی ادائیگی ہو، تو یہ سود ہوگا، لیکن جب ان کی جنس کے علاوہ کے عوض میں فروخت کی جائے اور پھر جو چیز اضافی ہو تو یہ جائز ہوگی جبکہ وہ لین دین دست بدست ہو، لیکن اگر وہ ادھار کا لین دین ہو، تو پھر یہ سود ہوگا۔ [صحیح ابن حبان/كتاب البيوع/حدیث: 5023]

سیدنا ابوسعید خدری رضی اللہ عنہ بیان کرتے ہیں کہ نبی اکرم صلی اللہ علیہ وسلم کے زمانہ اقدس میں ہم عمدہ کھجوروں کے ایک صاع کے عوض میں عام سی کھجوریں دو صاع فروخت کر دیا کرتے تھے، تو نبی اکرم صلی اللہ علیہ وسلم نے ارشاد فرمایا: ”کھجور کے دو صاع کھجور کے ایک صاع کے عوض میں (فروخت) نہیں کیے جا سکتے اور گندم کے دو صاع، گندم کے ایک صاع کے عوض میں (فروخت) نہیں کیے جا سکتے اور دو درہم ایک درہم کے عوض میں (فروخت) نہیں کیے جا سکتے۔“ [صحیح ابن حبان/كتاب البيوع/حدیث: 5024]

سیدنا عبداللہ بن مسعود رضی اللہ عنہ فرماتے ہیں: ”ایک سودے میں دو سودے جائز نہیں ہیں۔“ نبی اکرم صلی اللہ علیہ وسلم نے ”سود کھانے والے، اسے کھلانے والے، اس کے گواہوں اور اسے تحریر کرنے والے پر لعنت کی ہے۔“ [صحیح ابن حبان/كتاب البيوع/حدیث: 5025]

سیدنا جابر بن عبداللہ رضی اللہ عنہما بیان کرتے ہیں کہ نبی اکرم صلی اللہ علیہ وسلم نے ”غیر متعین پیمائش والے کھجور کے ڈھیر کو متعین پیمائش والی کھجور کے عوض میں فروخت کرنے سے منع کیا ہے۔“ [صحیح ابن حبان/كتاب البيوع/حدیث: 5026]

سیدنا جابر رضی اللہ عنہ بیان کرتے ہیں کہ ایک غلام آیا، اس نے نبی اکرم صلی اللہ علیہ وسلم کے دستِ اقدس پر ہجرت کی بیعت کر لی، نبی اکرم صلی اللہ علیہ وسلم کو یہ پتہ نہیں تھا کہ وہ غلام ہے، پھر اس کا آقا اسے تلاش کرتا ہوا آ گیا تو نبی اکرم صلی اللہ علیہ وسلم نے فرمایا: ”تم اسے مجھے فروخت کر دو“، تو نبی اکرم صلی اللہ علیہ وسلم نے دو سیاہ فام غلاموں کے عوض میں اسے خرید لیا، اس کے بعد آپ صلی اللہ علیہ وسلم جب بھی کسی سے بیعت لیتے تھے تو پہلے اس سے دریافت کر لیتے تھے: ”کیا وہ غلام تو نہیں ہے؟“ [صحیح ابن حبان/كتاب البيوع/حدیث: 5027]

سیدنا عبداللہ بن عباس رضی اللہ عنہما نبی اکرم صلی اللہ علیہ وسلم کے بارے میں یہ بات نقل کرتے ہیں کہ ”آپ نے جانور کے عوض میں جانور کو ادھار فروخت کرنے سے منع کیا ہے۔“ [صحیح ابن حبان/كتاب البيوع/حدیث: 5028]

سیدنا ابوہریرہ رضی اللہ عنہ سے روایت ہے کہ نبی اکرم صلی اللہ علیہ وسلم نے ارشاد فرمایا: ”جو شخص (کسی) نادم (ہونے والے) کا سودا منسوخ (اقالہ) کرے، اللہ تعالیٰ قیامت کے دن اس کی لغزشوں سے درگزر فرمائے گا۔“ [صحیح ابن حبان/كتاب البيوع/حدیث: 5029]

سیدنا ابوہریرہ رضی اللہ عنہ روایت کرتے ہیں، نبی اکرم صلی اللہ علیہ وسلم نے ارشاد فرمایا: ”جو شخص کسی مسلمان کی لغزش سے درگزر کرتا ہے، اللہ تعالیٰ قیامت کے دن اس کی لغزش سے درگزر فرمائے گا۔“ (امام ابنِ حبان رحمہ اللہ فرماتے ہیں:) اعمش کے حوالے سے یہ روایت صرف حفص بن غیاث اور مالک بن سعیر نے نقل کی ہے اور حفص کے حوالے سے یہ روایت صرف یحییٰ بن معین نے نقل کی ہے اور مالک بن سعیر کے حوالے سے یہ روایت زیاد بن یحییٰ حسانی نے نقل کی ہے۔ یہ بات شیخ نے بیان کی ہے۔ [صحیح ابن حبان/كتاب البيوع/حدیث: 5030]

سیدنا جابر بن عبداللہ رضی اللہ عنہما بیان کرتے ہیں کہ نبی اکرم صلی اللہ علیہ وسلم نے ”آفت زدہ (کی ادائیگی مکمل یا جزوی طور پر) معاف کرنے“ کا حکم دیا ہے۔ [صحیح ابن حبان/كتاب البيوع/حدیث: 5031]

سیدہ عائشہ رضی اللہ عنہا بیان کرتی ہیں کہ ایک خاتون نبی اکرم صلی اللہ علیہ وسلم کی خدمت میں حاضر ہوئیں اور عرض کی: میرے ماں باپ آپ پر قربان ہوں، میں نے اور میرے بیٹے نے فلاں شخص سے اس کے مال (باغ یا زمین) کا پھل خریدا اور ہم نے اسے شمار کیا۔ اس ذات کی قسم! جس نے آپ کو اتنی عظمت و شان عطا کی ہے، ہم نے وہ اپنے پیٹ میں ڈال کر کھا لیا یا برکت کی امید رکھتے ہوئے کسی غریب کو کھلا دیا، پھر ہم آئے اور اپنے ہونے والے نقصان کے حوالے سے اس سے (معاوضے میں) کمی کی درخواست کی تو اس نے اللہ کے نام کی قسم اٹھائی کہ وہ ہمارے لیے کوئی معافی نہیں رکھے گا، تو نبی اکرم صلی اللہ علیہ وسلم نے ارشاد فرمایا: ”اس نے یہ قسم اٹھائی ہے کہ وہ بھلائی نہیں کرے گا۔“ یہ بات آپ صلی اللہ علیہ وسلم نے تین مرتبہ ارشاد فرمائی۔ سیدہ عائشہ رضی اللہ عنہا بیان کرتی ہیں کہ اس بات کی اطلاع اس پھل کے مالک تک پہنچی تو اس نے کہا: میرے ماں باپ آپ پر قربان ہوں، اگر آپ چاہیں تو ان کا جو نقصان ہوا ہے میں اسے معاف کر دیتا ہوں اور اگر آپ چاہیں تو میں تمام ادائیگی معاف کر دیتا ہوں، تو اس شخص نے ان کے نقصان کے حساب سے ادائیگی معاف کر دی۔ [صحیح ابن حبان/كتاب البيوع/حدیث: 5032]