سیدنا مالک بن اوس رضی اللہ عنہ بیان کرتے ہیں کہ انہوں نے ایک سو دینار کی بیعِ صرف کرنا چاہی، وہ کہتے ہیں کہ سیدنا طلحہ بن عبید اللہ رضی اللہ عنہ نے مجھے بلوایا، ہم دونوں نے سودا طے کر لیا، انہوں نے میرے ساتھ بیعِ صرف کر لی اور سونا حاصل کر لیا، وہ اسے اپنے ہاتھ میں الٹ پلٹ رہے تھے، انہوں نے کہا: میرا منشی غابہ (جنگل) سے آتا ہے (تو میں تمہیں ادائیگی کرتا ہوں)۔ سیدنا عمر بن خطاب رضی اللہ عنہ نے یہ بات سن لی، سیدنا عمر رضی اللہ عنہ نے کہا: اللہ کی قسم! تم اس سے اس وقت تک جدا نہیں ہو گے جب تک تم اس سے وصولی نہیں کر لیتے، پھر سیدنا عمر رضی اللہ عنہ نے بتایا کہ نبی اکرم صلی اللہ علیہ وسلم نے یہ بات ارشاد فرمائی ہے: ”چاندی کے عوض میں سونے کا لین دین سود ہے ماسوائے اس کے جو دست بدست ہو، گندم کے عوض میں گندم کا لین دین سود ہے ماسوائے اس کے جو دست بدست ہو، کھجور کے عوض میں کھجور کا لین دین سود ہے ماسوائے اس کے جو دست بدست ہو، اور جو کے عوض میں جو کا لین دین سود ہے ماسوائے اس کے جو دست بدست ہو۔“ [صحیح ابن حبان/كتاب البيوع/حدیث: 5013]

سیدنا ابوبکرہ رضی اللہ عنہ بیان کرتے ہیں کہ نبی اکرم صلی اللہ علیہ وسلم نے اس بات سے منع فرمایا ہے کہ ”چاندی کے عوض میں چاندی کو یا سونے کے عوض میں سونے کو فروخت کیا جائے، البتہ برابر برابر (لین دین ہو، تو جائز ہے)“ اور نبی اکرم صلی اللہ علیہ وسلم نے یہ حکم دیا ہے کہ ”سونے کے عوض میں چاندی کو جیسے چاہے فروخت کر دیا جائے یا چاندی کے عوض سونے کو جیسے چاہے فروخت کر دیا جائے“۔ (امام ابن حبان رحمہ اللہ فرماتے ہیں:) نبی اکرم صلی اللہ علیہ وسلم کا یہ فرمان: ”جیسے چاہے“ اس سے مراد یہ ہے کہ جب وہ لین دین دست بدست ہو۔ [صحیح ابن حبان/كتاب البيوع/حدیث: 5014]

ابو اشعث بیان کرتے ہیں کہ پہلے لوگ مالِ غنیمت میں سے چاندی کے کسی برتن کی، تنخواہ ملنے تک خرید و فروخت کر لیتے تھے، تو سیدنا عبادہ رضی اللہ عنہ نے بتایا کہ نبی اکرم صلی اللہ علیہ وسلم نے ”سونے کے عوض میں سونے، چاندی کے عوض میں چاندی، گندم کے عوض میں گندم، جو کے عوض میں جو، کھجور کے عوض میں کھجور اور نمک کے عوض میں نمک کا لین دین کرنے سے منع کیا ہے، ماسوائے اس کے جو برابر برابر ہو اور دست بدست ہو؛ جو شخص زیادہ ادائیگی کرے یا زیادہ ادائیگی کا طلب گار ہو، وہ سود کا کام کرے گا۔“ [صحیح ابن حبان/كتاب البيوع/حدیث: 5015]

سیدنا ابو سعید خدری رضی اللہ عنہ بیان کرتے ہیں کہ نبی اکرم صلی اللہ علیہ وسلم نے ارشاد فرمایا: ”سونے کے عوض سونے کو صرف برابر برابر فروخت کرو، تم اس میں سے کسی ایک پہلو کو دوسرے کے مقابلے میں کم نہ کرو، چاندی کے عوض چاندی کو صرف برابر برابر فروخت کرو، تم اس میں سے کسی ایک طرف سے کم ادائیگی نہ کرو اور تم ان میں سے کسی موجود چیز کو غیر موجود کے عوض میں فروخت نہ کرو۔“ [صحیح ابن حبان/كتاب البيوع/حدیث: 5016]

نافع بیان کرتے ہیں کہ ایک شخص نے سیدنا عبداللہ بن عمر رضی اللہ عنہما کو بتایا کہ سیدنا ابوسعید خدری رضی اللہ عنہ نے یہ حدیث نبی اکرم صلی اللہ علیہ وسلم کے حوالے سے بیان کی ہے۔ نافع بیان کرتے ہیں کہ پھر سیدنا عبداللہ بن عمر رضی اللہ عنہما اور وہ شخص تشریف لے گئے اور میں بھی ان کے ساتھ تھا۔ یہاں تک کہ ہم سیدنا ابوسعید خدری رضی اللہ عنہ کی خدمت میں حاضر ہوئے تو سیدنا عبداللہ بن عمر رضی اللہ عنہما نے سیدنا ابوسعید خدری رضی اللہ عنہ سے کہا: کیا آپ اس حدیث سے واقف ہیں جو اس شخص نے مجھے بیان کی ہے؟ کیا آپ نے وہ روایت نبی اکرم صلی اللہ علیہ وسلم کے حوالے سے نقل کی ہے؟ کیا آپ نے نبی اکرم صلی اللہ علیہ وسلم کی زبانی یہ بات سنی ہے؟ سیدنا ابوسعید خدری رضی اللہ عنہ نے دریافت کیا کہ وہ کیا بات ہے؟ تو سیدنا عبداللہ بن عمر رضی اللہ عنہما نے فرمایا: سونے کے عوض میں سونے اور چاندی کے عوض میں چاندی کو فروخت کرنے والی روایت۔ تو سیدنا ابوسعید خدری رضی اللہ عنہ نے اپنی انگلیوں کے ذریعے اپنی آنکھوں اور کانوں کی طرف اشارہ کیا اور یہ بات بیان کی کہ میری آنکھوں نے یہ بات دیکھی اور میرے کانوں نے نبی اکرم صلی اللہ علیہ وسلم کو سنا جب آپ نے یہ بات ارشاد فرمائی: ”سونے کے عوض میں سونے کو صرف برابر برابر فروخت کرو، ان میں سے کسی ایک طرف سے کم ادائیگی نہ کرو اور چاندی کے عوض میں چاندی کو صرف برابر برابر فروخت کرو، ان میں کسی ایک طرف سے کم ادائیگی نہ کرو اور تم ان میں سے کسی بھی غیر موجود کو موجود چیز کے عوض میں فروخت نہ کرو۔“ [صحیح ابن حبان/كتاب البيوع/حدیث: 5017]

سیدنا عبادہ بن صامت رضی اللہ عنہ روایت کرتے ہیں، نبی اکرم صلی اللہ علیہ وسلم نے ارشاد فرمایا: ”سونے کے عوض میں سونا، چاندی کے عوض میں چاندی، گندم کے عوض میں گندم، جو کے عوض میں جو (کا لین دین) صرف برابر برابر اور دست بدست ہوگا، جب ان کی اصناف میں اختلاف ہو، تو پھر جیسے تم چاہو اسے فروخت کرو، البتہ جبکہ وہ دست بدست لین دین ہو۔“ [صحیح ابن حبان/كتاب البيوع/حدیث: 5018]

سیدنا مالک بن اوس رضی اللہ عنہ بیان کرتے ہیں: میں ایک سو دینار لے کر نکلا، میری ملاقات سیدنا طلحہ بن عبیداللہ رضی اللہ عنہ سے ہوئی جو ایک دیوار کے سائے میں موجود تھے، انہوں نے میرے ساتھ اس کا بھاؤ طے کیا اور یہ بات بیان کی کہ جب ان کا خادم غابہ سے آئے گا تو وہ ادائیگی کر دیں گے۔ سیدنا عمر رضی اللہ عنہ نے یہ بات سنی، انہوں نے سیدنا طلحہ رضی اللہ عنہ سے اس بارے میں دریافت کیا، تو انہوں نے بتایا: کچھ دینار ہیں (جو میں خرید رہا ہوں) میں یہ چاہتا ہوں کہ جب میرا خادم غابہ سے آئے گا (تو میں ادائیگی کر دوں گا)۔ تو سیدنا عمر رضی اللہ عنہ نے فرمایا: تم اس سے جدا نہ ہونا، تم اس سے جدا نہ ہونا جب تک تم اسے ادائیگی نہیں کر دیتے۔ نبی اکرم صلی اللہ علیہ وسلم نے یہ بات ارشاد فرمائی ہے: ”چاندی کے عوض میں سونے کا لین دین سود ہے، ماسوائے اس کے جو دست بدست ہو، گندم کے عوض میں گندم کا لین دین سود ہے، ماسوائے اس کے جو دست بدست ہو، جو کے عوض میں جو کا لین دین سود ہے، ماسوائے اس کے جو دست بدست ہو، کھجور کے عوض میں کھجور کا لین دین سود ہے، ماسوائے اس کے جو دست بدست ہو۔“ [صحیح ابن حبان/كتاب البيوع/حدیث: 5019]

سیدنا ابوسعید خدری رضی اللہ عنہ بیان کرتے ہیں: تازہ کھجوریں لائی گئیں، نبی اکرم صلی اللہ علیہ وسلم کی کھجوریں دوسری قسم کی تھیں جن میں کچھ خشک تھیں۔ نبی اکرم صلی اللہ علیہ وسلم نے دریافت کیا: ”یہ کہاں سے آئی ہیں؟“ لوگوں نے بتایا: ہم نے اپنی کھجوروں کے دو صاع کے عوض میں اس کا ایک صاع خریدا ہے، نبی اکرم صلی اللہ علیہ وسلم نے فرمایا: ”تم ایسا نہ کرو یہ درست نہیں ہے بلکہ تم اپنی کھجوروں کو (کسی اور چیز کے عوض میں) فروخت کرو (پھر اس چیز کے عوض میں) اپنی ضرورت کی چیز کو خرید لو۔“ [صحیح ابن حبان/كتاب البيوع/حدیث: 5020]

سیدنا ابوسعید خدری اور سیدنا ابوہریرہ رضی اللہ عنہما بیان کرتے ہیں کہ نبی اکرم صلی اللہ علیہ وسلم نے ایک شخص کو خیبر کا نگران مقرر کیا، وہ شخص عمدہ قسم کی کھجوریں لے کر آیا تو نبی اکرم صلی اللہ علیہ وسلم نے دریافت فرمایا: ”کیا وہاں کی تمام کھجوریں اسی طرح کی ہوتی ہیں؟“ اس نے عرض کی: جی نہیں، یا رسول اللہ صلی اللہ علیہ وسلم ! اللہ کی قسم! ہم نے دو صاع کھجوروں کے عوض میں اس کا ایک صاع حاصل کیا ہے اور تین صاع کے عوض میں دو صاع حاصل کیے ہیں، تو نبی اکرم صلی اللہ علیہ وسلم نے ارشاد فرمایا: ”تم ایسا نہ کرو، تم کھجوروں کو درہم کے عوض میں فروخت کرو اور پھر درہم کے عوض میں اچھی قسم کی کھجوریں خرید لو۔“ [صحیح ابن حبان/كتاب البيوع/حدیث: 5021]

سیدنا ابوسعید خدری رضی اللہ عنہ بیان کرتے ہیں کہ ایک شخص نبی اکرم صلی اللہ علیہ وسلم کی خدمت میں برنی کھجور لے کر آیا، نبی اکرم صلی اللہ علیہ وسلم نے دریافت فرمایا: ”یہ کہاں سے آئی ہیں؟“ اس نے بتایا: میں نے دو صاع کے عوض میں اس کا ایک صاع خریدا ہے، نبی اکرم صلی اللہ علیہ وسلم نے ارشاد فرمایا: ” «أَوِّهْ» ”افوہ!“ یہ تو عین سود ہے، تم ایسا نہ کرو۔“ [صحیح ابن حبان/كتاب البيوع/حدیث: 5022]