سیدنا ابوسعید خدری رضی اللہ عنہ بیان کرتے ہیں کہ نبی اکرم صلی اللہ علیہ وسلم کے زمانہ اقدس میں ایک شخص کو ان پھلوں میں نقصان ہو گیا جو اس نے خریدے تھے اور اس کا قرض زیادہ ہو گیا۔ نبی اکرم صلی اللہ علیہ وسلم نے ارشاد فرمایا: ”تم لوگ اس کو صدقہ دو۔“ اس شخص کو صدقہ دیا گیا، لیکن وہ پھر بھی اس کے قرض کی پوری ادائیگی تک نہیں پہنچ سکا تو نبی اکرم صلی اللہ علیہ وسلم نے ارشاد فرمایا (یعنی قرض خواہوں سے فرمایا): ”تمہیں جو مل رہا ہے وہ حاصل کر لو، تمہیں صرف یہی ملے گا۔“ [صحیح ابن حبان/كتاب البيوع/حدیث: 5033]

سیدنا جابر بن عبداللہ رضی اللہ عنہما بیان کرتے ہیں کہ نبی اکرم صلی اللہ علیہ وسلم نے ارشاد فرمایا: ”اگر تم اپنے کسی بھائی سے پھل خریدتے ہو اور اسے آفت لاحق ہو جاتی ہے، تو تمہارے لیے اس میں سے کچھ بھی لینا جائز نہیں ہے۔ تم ناحق طور پر اپنے بھائی کے مال میں سے کس بنیاد پر حاصل کرو گے؟“ راوی بیان کرتے ہیں کہ میں نے اپنے استاد ابوزبیر سے دریافت کیا: کیا تمہارے استاد نے تمہارے سامنے لاحق ہونے والی آفت کا نام لیا تھا؟ انہوں نے جواب دیا: جی نہیں۔ [صحیح ابن حبان/كتاب البيوع/حدیث: 5034]

سیدنا جابر بن عبداللہ رضی اللہ عنہما بیان کرتے ہیں: نبی اکرم صلی اللہ علیہ وسلم نے ارشاد فرمایا: ”اگر تم اپنے بھائی سے کوئی پھل خریدتے ہو اور اسے آفت لاحق ہو جاتی ہے تو تمہارے لیے اس میں سے کچھ بھی لینا جائز نہیں ہے، تم حق کے بغیر اپنے بھائی کے مال کو کس بنیاد پر حاصل کرو گے؟“ راوی بیان کرتے ہیں: میں نے اپنے استاد ابوزبیر سے دریافت کیا: کیا سیدنا جابر رضی اللہ عنہ نے تمہارے سامنے آفت کا نام ذکر کیا تھا؟ انہوں نے جواب دیا: جی نہیں۔ [صحیح ابن حبان/كتاب البيوع/حدیث: 5035]

سیدنا ابوہریرہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”جو شخص مفلس ہو جائے اور پھر کوئی شخص اپنا مال اس کے پاس پائے تو وہ اس مال کے بارے میں دوسروں سے زیادہ حق دار ہو گا۔“ [صحیح ابن حبان/كتاب البيوع/حدیث: 5036]

سیدنا ابوہریرہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”جب کوئی شخص کوئی سامان خریدے اور پھر وہ مفلس ہو جائے اور وہ سامان بعینہ اس کے پاس ہو تو (اسے فروخت کرنے والا) دیگر قرض خواہوں کی بہ نسبت اسے لینے کا زیادہ حق دار ہو۔“ [صحیح ابن حبان/كتاب البيوع/حدیث: 5037]

سیدنا ابوہریرہ رضی اللہ عنہ، نبی اکرم صلی اللہ علیہ وسلم کا یہ فرمان نقل کرتے ہیں: ”جب کوئی شخص مفلس ہو جائے اور اپنے سامان کو فروخت کرنے والا شخص بعینہ اپنا سامان اس کے پاس پائے تو باقی قرض خواہوں کی بہ نسبت وہ اس سامان کا زیادہ حق دار ہوگا۔“ [صحیح ابن حبان/كتاب البيوع/حدیث: 5038]

سیدنا عبداللہ بن عمر رضی اللہ عنہما روایت کرتے ہیں، نبی اکرم صلی اللہ علیہ وسلم نے ارشاد فرمایا: ”جب کوئی شخص دیوالیہ ہو جائے اور فروخت کرنے والا اپنے سامان کو بعینہ اس کے پاس پائے تو وہ اس سامان کا زیادہ حق دار ہوگا۔“ [صحیح ابن حبان/كتاب البيوع/حدیث: 5039]

ابراہیم نخعی بیان کرتے ہیں کہ اسود بن یزید ایک تاجر سے قرض لیا کرتے تھے، جب ان کی تنخواہ آتی تھی تو وہ ادائیگی کر دیا کرتے تھے۔ اسود نے کہا: اگر تم چاہو، تو میں تمہیں ایک مرتبہ تاخیر سے ادائیگی کروں گا کیونکہ اس مرتبہ اس تنخواہ میں مجھے کچھ دیگر اخراجات بھی پورے کرنے ہیں۔ تاجر نے ان سے کہا: میں ایسا نہیں کروں گا، تو اسود نے پانچ سو درہم اسے نقد ادا کر دیے یہاں تک کہ اس تاجر نے وہ اپنے قبضے میں لے لیے۔ پھر تاجر نے ان سے کہا: یہ آپ کے حوالے ہیں، آپ انہیں لے لیں۔ اسود نے اس سے دریافت کیا: پہلے جب میں نے تم سے یہ درخواست کی تھی، تو تم نے میری یہ بات نہیں مانی تھی؟ تاجر نے ان سے کہا: میں نے آپ کو یہ بیان کرتے ہوئے سنا ہے، آپ نے ہمیں سیدنا عبداللہ بن مسعود رضی اللہ عنہ کے حوالے سے یہ حدیث بیان کی تھی کہ نبی اکرم صلی اللہ علیہ وسلم نے یہ بات ارشاد فرمائی ہے: ”جو شخص اللہ کے نام پر کسی کو دو مرتبہ قرض دیتا ہے، تو اسے ان دو میں سے ایک مرتبہ صدقہ کرنے کا اجر ملتا ہے۔“ (امام ابن حبان رحمہ اللہ فرماتے ہیں:) فضیل ابومعاذ نامی راوی فضیل بن میسرہ ہیں، یہ اہل بصرہ سے تعلق رکھتے ہیں۔ ابوحریز نامی راوی عبداللہ بن حصین ہیں، یہ سجستان کے قاضی تھے اور انہوں نے بصرہ میں حدیثیں بیان کی ہیں۔ [صحیح ابن حبان/كتاب البيوع/حدیث: 5040]

عمران بن حذیفہ نامی راوی بیان کرتے ہیں کہ سیدہ میمونہ رضی اللہ عنہا اکثر قرض لیا کرتی تھیں، ان کے گھر والوں نے ان کے ساتھ اس بارے میں بات چیت کی اور ناراضگی کا اظہار کیا، تو سیدہ میمونہ رضی اللہ عنہا نے کہا: میں اسے ترک نہیں کروں گی کیونکہ میں نے نبی اکرم صلی اللہ علیہ وسلم کو یہ بات ارشاد فرماتے ہوئے سنا ہے: ”جو شخص کوئی قرض لیتا ہے اور اللہ تعالیٰ کو اس بات کا علم ہو کہ وہ اسے ادا کرنے کا ارادہ رکھتا ہے، تو اللہ تعالیٰ دنیا میں اس کا وہ قرض ادا کروا دیتا ہے۔“ [صحیح ابن حبان/كتاب البيوع/حدیث: 5041]

سیدنا ابوہریرہ رضی اللہ عنہ بیان کرتے ہیں کہ نبی اکرم صلی اللہ علیہ وسلم نے ارشاد فرمایا: ”پہلے (زمانے میں) ایک تاجر تھا جو لوگوں کو قرض دیا کرتا تھا، وہ جب کسی تنگ دست کی تنگدستی دیکھتا تو اپنے نمائندے سے کہتا: اس سے درگزر کرو تاکہ اللہ تعالیٰ ہم سے بھی درگزر کرے۔“ نبی اکرم صلی اللہ علیہ وسلم ارشاد فرماتے ہیں: ”جب وہ اللہ تعالیٰ کی بارگاہ میں حاضر ہوا، تو اللہ تعالیٰ نے اس سے درگزر فرمایا۔“ [صحیح ابن حبان/كتاب البيوع/حدیث: 5042]