سیدنا جابر رضی اللہ عنہ روایت کرتے ہیں کہ نبی اکرم صلی اللہ علیہ وسلم نے ارشاد فرمایا: ”کوئی شہری کسی دیہاتی کے لیے ہرگز سودا نہ کرے، تم لوگوں کو (ان کے حال پر) رہنے دو، انہیں ایک دوسرے کے ذریعے رزق ملتا رہے گا۔“ [صحیح ابن حبان/كتاب البيوع/حدیث: 4963]

سیدنا جابر رضی اللہ عنہ روایت کرتے ہیں، نبی اکرم صلی اللہ علیہ وسلم نے ارشاد فرمایا: ”کوئی شہری کسی دیہاتی کے لیے سودا نہ کرے، تم لوگوں کو (ان کے حال پر) رہنے دو، اللہ تعالیٰ انہیں ایک دوسرے کے ذریعے رزق عطا کرے گا۔“ [صحیح ابن حبان/كتاب البيوع/حدیث: 4964]

سیدنا عبداللہ بن عمر رضی اللہ عنہما، نبی اکرم صلی اللہ علیہ وسلم کا یہ فرمان نقل کرتے ہیں: ”کوئی شخص کسی دوسرے کے سودے پر سودا نہ کرے۔“ [صحیح ابن حبان/كتاب البيوع/حدیث: 4965]

سیدنا عبداللہ بن عمر رضی اللہ عنہما نبی کریم صلی اللہ علیہ وسلم کا یہ فرمان نقل کرتے ہیں: ”کوئی شخص اپنے بھائی کے سودے پر سودا نہ کرے، البتہ اس کی اجازت کے ساتھ کر سکتا ہے۔“ [صحیح ابن حبان/كتاب البيوع/حدیث: 4966]

سیدنا ابوسعید خدری رضی اللہ عنہ بیان کرتے ہیں کہ نبی اکرم صلی اللہ علیہ وسلم کے زمانہ اقدس میں ایک یہودی تئیس اونٹوں پر لاد کر جو اور کھجوریں لے آیا، اس نے ایک مد کی قیمت نبی اکرم صلی اللہ علیہ وسلم کے مد سے زیادہ مقرر کر دی، ان دنوں لوگوں کے پاس اس کے علاوہ اناج حاصل کرنے کا اور کوئی ذریعہ نہیں تھا، اس سے پہلے وہ بھوک کا شکار ہو چکے تھے، انہیں اس دوران اناج نہیں ملتا تھا، وہ نبی اکرم صلی اللہ علیہ وسلم کی خدمت میں حاضر ہوئے اور آپ کے سامنے اس بات کی شکایت کی کہ قیمت زیادہ ہو گئی ہے۔ نبی اکرم صلی اللہ علیہ وسلم منبر پر چڑھے، آپ نے اللہ تعالیٰ کی حمد و ثناء بیان کی پھر آپ نے ارشاد فرمایا: ”میں اللہ تعالیٰ کی بارگاہ میں ایسی حالت میں ہرگز حاضر نہیں ہوں گا کہ میں نے کسی کا مال اس کی ناپسندیدگی کے ساتھ کسی دوسرے کو دیا ہو۔ خرید و فروخت باہمی رضامندی سے ہوتی ہے، تاہم تمہاری خرید و فروخت میں کچھ چیزیں ہیں جن کے حوالے سے میں تمہیں نصیحت کرنا چاہتا ہوں: تم ایک دوسرے کے لیے کینہ نہ رکھو، ایک دوسرے کے مقابلے میں بولی نہ لگاؤ، آپس میں ایک دوسرے سے حسد نہ رکھو اور کوئی شخص اپنے بھائی کی بولی پر بولی نہ لگائے اور شہری شخص دیہاتی کے لیے ہرگز (کوئی چیز) فروخت نہ کرے۔ خرید و فروخت باہمی رضامندی سے ہوتی ہے، تم اللہ کے بندے اور بھائی بھائی بن کے رہو۔“ [صحیح ابن حبان/كتاب البيوع/حدیث: 4967]

سیدنا عبداللہ بن عمر رضی اللہ عنہما بیان کرتے ہیں کہ نبی اکرم صلی اللہ علیہ وسلم نے ”مصنوعی بولی لگانے سے منع کیا ہے“۔ [صحیح ابن حبان/كتاب البيوع/حدیث: 4968]

سیدنا ابوہریرہ رضی اللہ عنہ روایت کرتے ہیں کہ نبی اکرم صلی اللہ علیہ وسلم نے ارشاد فرمایا: ”جب کوئی شخص اونٹنی یا بکری کو فروخت کرنے لگے، تو وہ اس کا تصریہ نہ کرے۔“ [صحیح ابن حبان/كتاب البيوع/حدیث: 4969]

سیدنا ابوہریرہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”اونٹنیوں اور بکریوں کا «تَصْرِيَة» (تھنوں میں دودھ روکنا) نہ کرو، اور جو شخص اس کے بعد اسے خرید لے، اسے دو میں سے ایک چیز کا اختیار ہوگا؛ اس کا دودھ دوہ لینے کے بعد اگر وہ پسند کرے تو اس جانور کو اپنے پاس رہنے دے اور اگر ناپسند کرے تو اسے واپس کر دے اور کھجور کا ایک صاع بھی دے۔“ [صحیح ابن حبان/كتاب البيوع/حدیث: 4970]

سیدنا جابر رضی اللہ عنہ بیان کرتے ہیں کہ نبی اکرم صلی اللہ علیہ وسلم نے ”(غیر متعین) استثناء سے منع کیا ہے، البتہ جب اس کے بارے میں تعین کر لیا جائے (تو حکم مختلف ہے)۔“ (امام ابن حبان رحمہ اللہ فرماتے ہیں:) سفیان بن حصین نامی راوی زہری کے علاوہ نقل کرنے میں ثبت ہے، تاہم زہری کے صحیفے کے حوالے سے وہ اختلاط کا شکار ہو گیا تھا، اس میں سے نقل کرتے ہوئے وہ وہم کا شکار ہو جاتا ہے۔ [صحیح ابن حبان/كتاب البيوع/حدیث: 4971]

سیدنا عبداللہ بن عمر رضی اللہ عنہما بیان کرتے ہیں: نبی اکرم صلی اللہ علیہ وسلم نے ”دھوکے کی بیع سے منع کیا ہے۔“ [صحیح ابن حبان/كتاب البيوع/حدیث: 4972]