سیدنا ابوہریرہ رضی اللہ عنہ نبی اکرم صلی اللہ علیہ وسلم کے بارے میں یہ بات نقل کرتے ہیں: آپ نے ”ایک بیع میں دو بیع کرنے“ سے منع کیا ہے۔ [صحیح ابن حبان/كتاب البيوع/حدیث: 4973]

سیدنا ابوہریرہ رضی اللہ عنہ سے روایت ہے کہ نبی اکرم صلی اللہ علیہ وسلم نے ارشاد فرمایا: ”جو شخص ایک ہی سودے میں دو سودے کر لیتا ہے، تو اس کے حصے میں یا تو نقصان آئے گا یا سود آئے گا۔“ [صحیح ابن حبان/كتاب البيوع/حدیث: 4974]

سیدنا ابوہریرہ رضی اللہ عنہ بیان کرتے ہیں کہ نبی اکرم صلی اللہ علیہ وسلم نے ”ملامسہ اور منابذہ سے منع کیا ہے“۔ [صحیح ابن حبان/كتاب البيوع/حدیث: 4975]

سیدنا ابوسعید خدری رضی اللہ عنہ بیان کرتے ہیں کہ نبی اکرم صلی اللہ علیہ وسلم نے دو طرح کی بیع سے منع کیا ہے: ” «الْمُلَامَسَةُ» ”ملامسہ“ اور «الْمُنَابَذَةُ» ”منابذہ““۔ (راوی کہتے ہیں:) «الْمُنَابَذَةُ» ”منابذہ“ یہ ہے کہ آدمی یہ کہے کہ جب میں تمہاری طرف یہ کپڑا پھینکوں گا، تو سودا طے ہو جائے گا۔ «الْمُلَامَسَةُ» ”ملامسہ“ یہ ہے کہ آدمی اپنے ہاتھ کے ذریعے اسے چھوئے، اسے کھولے نہیں، اسے پلٹے نہیں اور یہ کہے کہ جیسے ہی اسے چھو لیا تو سودا لازم ہو جائے گا۔ (امام ابن حبان رحمہ اللہ فرماتے ہیں:) «الْمُنَابَذَةُ» ”منابذہ“ یہ ہے کہ خریدار کپڑے کو فروخت کرنے والے کی طرف پھینکے اور فروخت کرنے والا کپڑے کو خریدار کی طرف پھینکے تاکہ ان دونوں کا آپس میں سودا طے ہو جائے، اس شرط پر کہ جب وہ اس کے بعد کپڑے کی لمبائی اور چوڑائی پر واقف ہوں تو انہیں سودا ختم کرنے کا کوئی اختیار نہ ہو، صرف یہ پھینکنا ہی (سودا طے ہونے کی نشانی ہو)۔ «الْمُلَامَسَةُ» ”ملامسہ“ یہ ہے کہ خریدار کپڑے کو چھو لے تو پھر اسے خریدے اس شرط پر کہ اس کے بعد اس کے پاس اختیار باقی نہیں رہے گا، یعنی جب وہ اسے کھولے گا اور جب اسے الٹائے گا (تو اختیار نہیں ہو گا)، صرف چھونا کافی ہو گا۔ [صحیح ابن حبان/كتاب البيوع/حدیث: 4976]

سیدنا ابوہریرہ رضی اللہ عنہ بیان کرتے ہیں: نبی اکرم صلی اللہ علیہ وسلم نے ”کنکریوں والی بیع کرنے سے منع کیا ہے“۔ (امام ابن حبان رحمہ اللہ فرماتے ہیں:) کنکریوں والی بیع یہ ہے، آدمی بکریوں کے ریوڑ کے پاس یا کچھ جانوروں کے گروہ کے پاس آتا ہے اور پھر وہ فروخت کرنے والے سے کہتا ہے: ”میں یہ کنکری پھینکوں گا، تو جس پر بھی یہ کنکری گری وہ اتنی، اتنی رقم کے عوض میں میرا ہو گا“۔ [صحیح ابن حبان/كتاب البيوع/حدیث: 4977]

سیدنا جابر رضی اللہ عنہ بیان کرتے ہیں کہ نبی اکرم صلی اللہ علیہ وسلم نے ارشاد فرمایا: ”جب کوئی شخص اناج خریدے، تو وہ اسے اس وقت تک آگے فروخت نہ کرے جب تک اسے پوری طرح (اپنے قبضے میں نہ لے)۔“ (امام ابن حبان رحمہ اللہ فرماتے ہیں:) ہم نے یہ روایت اس قسم میں اس لیے املا کروائی ہے کیونکہ اس میں دو پہلو ہیں، ان میں سے ایک پہلو یہ ہے: آدمی کے لیے یہ بات ہمیشہ کے لیے ممنوع ہے کہ جو سودا اس نے خریدا ہے، اسے قبضے میں لینے سے پہلے آگے فروخت کرے، دوسرا پہلو یہ ہے: آدمی کو اس فعل سے بعض حالتوں میں منع کیا گیا ہے، ہر حالت میں یہ منع نہیں ہے اور اس سے مراد قبضے میں لینے سے پہلے خریدنا ہے، خریدنے سے پہلے ایسا کرنا مراد نہیں ہے۔ [صحیح ابن حبان/كتاب البيوع/حدیث: 4978]

سیدنا عبداللہ بن عمر رضی اللہ عنہما روایت کرتے ہیں، نبی اکرم صلی اللہ علیہ وسلم نے ارشاد فرمایا: ”جو شخص کوئی اناج خریدے وہ اسے اس وقت تک (آگے) فروخت نہ کرے جب تک وہ اسے اپنے قبضے میں نہ لے۔“ [صحیح ابن حبان/كتاب البيوع/حدیث: 4979]

سیدنا عبداللہ بن عباس رضی اللہ عنہما روایت کرتے ہیں کہ نبی اکرم صلی اللہ علیہ وسلم نے ارشاد فرمایا: ”جو شخص اناج خریدے وہ اسے اس وقت تک آگے فروخت نہ کرے، جب تک وہ اسے اپنے قبضے میں نہ لے۔“ سیدنا عبداللہ بن عباس رضی اللہ عنہما فرماتے ہیں: میرا یہ خیال ہے کہ ہر چیز کی حیثیت اناج کی طرح ہے۔ (امام ابن حبان رحمہ اللہ فرماتے ہیں:) عمرو بن دینار نے یہ روایت سیدنا عبداللہ بن عمر رضی اللہ عنہما سے بھی سنی ہے اور انہوں نے یہ روایت طاؤس کے حوالے سے سیدنا عبداللہ بن عباس رضی اللہ عنہما سے بھی سنی ہے، تو اس کے دونوں طرق محفوظ ہیں۔ [صحیح ابن حبان/كتاب البيوع/حدیث: 4980]

سیدنا عبداللہ بن عمر رضی اللہ عنہما روایت کرتے ہیں کہ نبی اکرم صلی اللہ علیہ وسلم نے ارشاد فرمایا: ”پھل کو اس وقت تک فروخت نہ کرو جب تک اس کی صلاحیت ظاہر نہ ہو جائے اور جو شخص کوئی اناج خریدے وہ اسے اس وقت تک آگے فروخت نہ کرے جب تک اسے اپنے قبضے میں نہ لے۔“ [صحیح ابن حبان/كتاب البيوع/حدیث: 4981]

سیدنا عبداللہ بن عمر رضی اللہ عنہما بیان کرتے ہیں: ہم پہلے (تجارتی) سواروں سے اندازے کے تحت ڈھیر خرید لیا کرتے تھے، تو نبی اکرم صلی اللہ علیہ وسلم نے ہمیں اس بات سے منع کیا کہ ”ہم اسے اس وقت تک آگے فروخت نہ کریں جب تک اس کی جگہ سے اسے (دوسری جگہ) منتقل نہ کر دیں۔“ [صحیح ابن حبان/كتاب البيوع/حدیث: 4982]