سیدنا حکیم بن حزام رضی اللہ عنہ بیان کرتے ہیں کہ میں نے عرض کی: یا رسول اللہ صلی اللہ علیہ وسلم ! میں ایک ایسا شخص ہوں جو کوئی سامان خریدتا ہے تو اس میں سے کیا چیز میرے لیے حلال ہے اور کیا چیز مجھ پر حرام ہے؟ نبی اکرم صلی اللہ علیہ وسلم نے فرمایا: ”اے میرے بھتیجے! جب تم کوئی چیز خریدو تو اسے اس وقت تک آگے فروخت نہ کرو جب تک اسے اپنے قبضے میں نہ لے لو۔“ (امام ابن حبان رحمہ اللہ فرماتے ہیں:) یہ روایت یوسف بن مالک کے حوالے سے سیدنا حکیم بن حزام رضی اللہ عنہ سے منقول ہونے کے طور پر مشہور ہے، اس میں عبداللہ بن عصمہ نامی راوی کا ذکر نہیں ہے اور یہ روایت ”غریب“ ہے۔ [صحیح ابن حبان/كتاب البيوع/حدیث: 4983]

سیدنا عبداللہ بن عمر رضی اللہ عنہما بیان کرتے ہیں کہ شام سے ایک شخص زیتون کا تیل لے کر آیا، جن تاجروں نے اس کی قیمت لگائی تھی ان کے ساتھ میں نے بھی بولی میں حصہ لیا، یہاں تک کہ میں نے وہ تیل اس سے خرید لیا۔ پھر ایک شخص میرے پاس آ کر کھڑا ہوا اور مجھے زیادہ معاوضہ دینے لگا، یہاں تک کہ اس نے مجھے راضی کر لیا۔ میں اپنا ہاتھ اس پر مارنے ہی لگا تھا (یعنی سودا طے کرنے ہی لگا تھا) کہ اسی دوران میرے پیچھے سے کسی نے میری کلائی پکڑ لی، میں نے مڑ کر دیکھا تو وہ سیدنا زید بن ثابت رضی اللہ عنہ تھے۔ انہوں نے مجھ سے فرمایا: ”تم اسے اس وقت تک فروخت نہ کرو جب تک تم اسے اپنی مخصوص جگہ تک منتقل نہیں کر دیتے، کیونکہ نبی اکرم صلی اللہ علیہ وسلم نے اس سے منع فرمایا ہے۔“ (سیدنا عبداللہ بن عمر رضی اللہ عنہما کہتے ہیں) تو میں نے اپنے ہاتھ کو روک لیا۔ [صحیح ابن حبان/كتاب البيوع/حدیث: 4984]

سیدنا حکیم بن حزام رضی اللہ عنہ بیان کرتے ہیں: میں نے صدقے کے اناج میں سے کچھ اناج خریدا، اس کو قبضے میں لینے سے پہلے ہی مجھے اس کا منافع ملنے لگا، میں نے اسے فروخت کرنے کا ارادہ کیا، میں نے اس بارے میں نبی اکرم صلی اللہ علیہ وسلم سے دریافت کیا، تو آپ صلی اللہ علیہ وسلم نے ارشاد فرمایا: ”تم اسے اس وقت تک فروخت نہ کرو جب تک اپنے قبضے میں نہیں لیتے۔“ [صحیح ابن حبان/كتاب البيوع/حدیث: 4985]

سیدنا عبداللہ بن عمر رضی اللہ عنہما روایت کرتے ہیں کہ نبی اکرم صلی اللہ علیہ وسلم نے ارشاد فرمایا: ”جو شخص کوئی اناج خریدے وہ اسے اس وقت تک فروخت نہ کرے جب تک اسے پوری طرح قبضے میں نہ لے۔“ راوی بیان کرتے ہیں کہ نبی اکرم صلی اللہ علیہ وسلم نے اس بات سے منع فرمایا ہے کہ آدمی اسے دوسری جگہ منتقل کرنے سے پہلے ہی فروخت کر دے (یہاں ایک لفظ کے بارے میں راوی کو شک ہے)۔ [صحیح ابن حبان/كتاب البيوع/حدیث: 4986]

سیدنا عبداللہ بن عمر رضی اللہ عنہما بیان کرتے ہیں: ”میں نے دیکھا نبی اکرم صلی اللہ علیہ وسلم کے زمانہ اقدس میں اناج والے ان افراد کی پٹائی کی جاتی تھی، جب وہ اندازے کے تحت کوئی اناج خرید کر اسے اپنی مخصوص جگہ تک منتقل کرنے سے پہلے ہی آگے فروخت کر دیتے تھے۔“ [صحیح ابن حبان/كتاب البيوع/حدیث: 4987]

سیدنا عبداللہ بن عباس رضی اللہ عنہما بیان کرتے ہیں کہ نبی اکرم صلی اللہ علیہ وسلم نے ”پھل کو فروخت کرنے سے منع فرمایا ہے جب تک وہ (کھانے کے قابل نہیں ہو جاتا)“۔ [صحیح ابن حبان/كتاب البيوع/حدیث: 4988]

سیدنا عبداللہ بن عباس رضی اللہ عنہما بیان کرتے ہیں کہ نبی اکرم صلی اللہ علیہ وسلم نے ”پھل کو اس وقت تک فروخت کرنے سے منع کیا ہے جب تک اس کی صلاحیت ظاہر نہ ہو جائے۔“ (یعنی وہ پک نہ جائے) [صحیح ابن حبان/كتاب البيوع/حدیث: 4989]

سیدنا انس بن مالک رضی اللہ عنہ بیان کرتے ہیں: نبی اکرم صلی اللہ علیہ وسلم نے پھل کو فروخت کرنے سے منع کیا ہے جب تک وہ بہتر نہ ہو جائے۔ ان سے دریافت کیا گیا بہتر ہونے سے مراد کیا ہے؟ انہوں نے جواب دیا: جب تک وہ سرخ نہ ہو جائے۔ نبی اکرم صلی اللہ علیہ وسلم نے ارشاد فرمایا: ”تمہارا کیا خیال ہے اگر اللہ تعالیٰ اس پھل (کی پیداوار) کو روک لے، تو تم میں سے کوئی ایک شخص کس بنیاد پر اپنے بھائی کے مال کو حاصل کرے گا؟“ [صحیح ابن حبان/كتاب البيوع/حدیث: 4990]

سیدنا عبداللہ بن عمر رضی اللہ عنہما بیان کرتے ہیں کہ نبی اکرم صلی اللہ علیہ وسلم نے ”پھل کی صلاحیت نمودار ہونے سے پہلے اسے فروخت کرنے سے منع کیا ہے۔“ آپ صلی اللہ علیہ وسلم نے ”فروخت کرنے والے اور خریدار (دونوں کو) منع کیا ہے۔“ [صحیح ابن حبان/كتاب البيوع/حدیث: 4991]

سیدنا جابر بن عبداللہ رضی اللہ عنہما نبی اکرم صلی اللہ علیہ وسلم کے بارے میں یہ بات نقل کرتے ہیں کہ ”آپ صلی اللہ علیہ وسلم نے «الْمُحَاقَلَةِ» (محاقلہ)، «الْمُزَابَنَةِ» (مزابنہ)، «الْمُخَابَرَةِ» (مخابرہ) اور درخت پر لگی ہوئی کھجور کو فروخت کرنے سے منع کیا ہے جب تک اس کا رنگ تبدیل نہ ہو جائے، رنگ تبدیل ہونے سے مراد یہ ہے کہ وہ سرخ یا زرد ہو جائے یا کھانے کے قابل ہو جائے۔“ زید بن ابوانیسہ نامی راوی بیان کرتے ہیں: میں نے عطاء بن ابی رباح سے دریافت کیا: ”کیا آپ نے سیدنا جابر بن عبداللہ رضی اللہ عنہما کو یہ بات نبی اکرم صلی اللہ علیہ وسلم کے حوالے سے نقل کرتے ہوئے خود سنا ہے؟“ انہوں نے جواب دیا: ”جی ہاں۔“ شیخ کہتے ہیں: ابوولید نامی یہ راوی سعید بن میناء ہے جس کے حوالے سے امام ابوحنیفہ رحمہ اللہ نے روایات نقل کی ہیں۔ [صحیح ابن حبان/كتاب البيوع/حدیث: 4992]