سیدنا عبداللہ بن زبیر رضی اللہ عنہما بیان کرتے ہیں کہ نبی اکرم صلی اللہ علیہ وسلم نے سیدنا سعد رضی اللہ عنہ کے ہاں افطاری کی تو ارشاد فرمایا: «أَفْطَرَ عِنْدَكُمُ الصَّائِمُونَ، وَصَلَّتْ عَلَيْكُمُ الْمَلَائِكَةُ، وَأَكَلَ طَعَامَكُمُ الْأَبْرَارُ» ”تمہارے ہاں روزہ داروں نے افطاری کی ہے اور فرشتوں نے تمہارے لیے دعائے رحمت کی ہے اور نیک لوگوں نے تمہارا کھانا کھایا ہے۔“ [صحیح ابن حبان/كتاب الأطعمة/حدیث: 5296]

سیدنا عبداللہ بن بسر سلمی رضی اللہ عنہ بیان کرتے ہیں کہ نبی اکرم صلی اللہ علیہ وسلم میرے والد کے ہمراہ تشریف لائے، آپ نے وہاں قیام کیا۔ آپ کی خدمت میں کھانا، حیس، ستو اور کھجور پیش کیے گئے، پھر نبی اکرم صلی اللہ علیہ وسلم کی خدمت میں مشروب پیش کیا گیا تو آپ نے اسے اپنے دائیں طرف والے شخص کی طرف بڑھا دیا۔ راوی بیان کرتے ہیں کہ نبی اکرم صلی اللہ علیہ وسلم کھجور کھاتے تھے اور گٹھلی کو اپنی شہادت کی انگلی اور درمیان والی انگلی کے درمیان رکھ دیتے تھے، پھر آپ اسے پھینک دیتے تھے، پھر آپ نے ان لوگوں کے لیے دعائے رحمت فرمائی اور یہ دعا کی: «اللَّهُمَّ بَارِكْ لَهُمْ فِيمَا رَزَقْتَهُمْ، وَاغْفِرْ لَهُمْ وَارْحَمْهُمْ» ”اے اللہ! جو رزق تو نے انہیں عطا کیا ہے اس میں ان کے لیے برکت رکھ دے، ان کی مغفرت کر اور ان پر رحم کر دے۔“ [صحیح ابن حبان/كتاب الأطعمة/حدیث: 5297]

سیدنا عبداللہ بن بسر رضی اللہ عنہ بیان کرتے ہیں کہ ایک مرتبہ نبی اکرم صلی اللہ علیہ وسلم میرے والد کے پاس سے گزرے، آپ صلی اللہ علیہ وسلم اس وقت سفید خچر پر سوار تھے۔ میرے والد نے اس کی لگام پکڑ لی اور عرض کی: یا رسول اللہ صلی اللہ علیہ وسلم ! آپ میرے ہاں قیام کریں، تو نبی اکرم صلی اللہ علیہ وسلم ان کے ہاں ٹھہر گئے۔ راوی بیان کرتے ہیں کہ وہ نبی اکرم صلی اللہ علیہ وسلم کی خدمت میں حیس لے کر آئے، ان لوگوں نے اسے کھا لیا، پھر وہ کھجوریں لے کر آئے تو نبی اکرم صلی اللہ علیہ وسلم کھجوریں کھانے لگے اور اس کی گٹھلیوں کو یوں الٹنے لگے۔ یہاں شعبہ نامی راوی نے دو انگلیوں کو ملا کر یہ دکھایا، پھر ان کی خدمت میں مشروب پیش کیا گیا تو نبی اکرم صلی اللہ علیہ وسلم نے اسے پی لیا، پھر آپ صلی اللہ علیہ وسلم نے اپنے دائیں طرف موجود شخص کی طرف اسے بڑھا دیا، پھر آپ صلی اللہ علیہ وسلم نے دعا فرمائی: «اللّٰهُمَّ بَارِكْ لَهُمْ فِي مَا رَزَقْتَهُمْ، وَاغْفِرْ لَهُمْ، وَارْحَمْهُمْ» ”اے اللہ! جو رزق تو نے انہیں عطا کیا ہے اس میں ان کے لیے برکت رکھ دے، ان کی مغفرت کر دے اور ان پر رحم کر دے۔“ [صحیح ابن حبان/كتاب الأطعمة/حدیث: 5298]

سیدنا عبداللہ بن بسر رضی اللہ عنہ بیان کرتے ہیں: میرے والد نے میری والدہ سے کہا: اگر تم نبی اکرم صلی اللہ علیہ وسلم کے لیے کھانا تیار کرو (تو یہ مناسب ہو گا)۔ اس خاتون نے ثرید تیار کیا۔ راوی نے اپنے ہاتھ کے ذریعے اشارہ کر کے بتایا: وہ تھوڑا سا تھا۔ میرے والد گئے اور نبی اکرم صلی اللہ علیہ وسلم کو بلا کر لائے۔ نبی اکرم صلی اللہ علیہ وسلم نے اپنا دست مبارک برتن کے اوپر رکھا، پھر آپ صلی اللہ علیہ وسلم نے فرمایا: ”اللہ کا نام لے کر اسے حاصل کرو۔“ لوگوں نے اطراف سے اسے حاصل کرنا شروع کیا۔ جب ان لوگوں نے کھانا کھا لیا تو نبی اکرم صلی اللہ علیہ وسلم نے ان کے لیے دعا کی۔ نبی اکرم صلی اللہ علیہ وسلم نے فرمایا: «اللَّهُمَّ اغْفِرْ لَهُمْ وَارْحَمْهُمْ وَبَارِكْ لَهُمْ فِيمَا رَزَقْتَهُمْ» ”اے اللہ! ان کی مغفرت کر دے، ان پر رحم کر اور ان کے رزق میں برکت عطا کر۔“ [صحیح ابن حبان/كتاب الأطعمة/حدیث: 5299]

سیدنا ابومسعود رضی اللہ عنہ بیان کرتے ہیں کہ انصار سے تعلق رکھنے والا ایک شخص جس کا نام ابوشعیب تھا، اس کا ایک غلام تھا جو گوشت بنایا کرتا تھا، اس نے نبی اکرم صلی اللہ علیہ وسلم کو دیکھا تو اسے نبی اکرم صلی اللہ علیہ وسلم کے چہرے پر بھوک محسوس ہوئی، اس نے اپنے غلام سے کہا: تم ہمارے پانچ آدمیوں کے لیے کھانا تیار کرو، میں یہ چاہتا ہوں کہ میں نبی اکرم صلی اللہ علیہ وسلم سمیت پانچ آدمیوں کی دعوت کروں۔ راوی کہتے ہیں: اس شخص نے کھانا تیار کیا، پھر نبی اکرم صلی اللہ علیہ وسلم پانچ آدمیوں سمیت تشریف لائے، ایک اور شخص بھی آپ کے پیچھے آ گیا، جب نبی اکرم صلی اللہ علیہ وسلم دروازے پر پہنچے تو نبی اکرم صلی اللہ علیہ وسلم نے فرمایا: ”یہ شخص ہمارے پیچھے آ گیا ہے، اگر تم چاہو تو تم اسے اجازت دو اور اگر چاہو تو یہ واپس چلا جائے۔“ انہوں نے عرض کی: یا رسول اللہ صلی اللہ علیہ وسلم ! میں اسے اجازت دیتا ہوں۔ [صحیح ابن حبان/كتاب الأطعمة/حدیث: 5300]

سیدنا انس رضی اللہ عنہ بیان کرتے ہیں کہ ایک فارسی نبی اکرم صلی اللہ علیہ وسلم کا پڑوسی تھا، اس کا شوربہ انتہائی خوشبودار ہوتا تھا، اس نے کھانا تیار کیا پھر وہ نبی اکرم صلی اللہ علیہ وسلم کی خدمت میں حاضر ہوا اور آپ کو اشارہ کیا کہ آپ تشریف لے آئیں، سیدہ عائشہ رضی اللہ عنہا اس وقت نبی اکرم صلی اللہ علیہ وسلم کے پاس موجود تھیں، نبی اکرم صلی اللہ علیہ وسلم نے دریافت فرمایا: ”یہ بھی میرے ساتھ آئے؟“ نبی اکرم صلی اللہ علیہ وسلم نے سیدہ عائشہ رضی اللہ عنہا کی طرف اشارہ کیا تو اس نے جواب دیا: جی نہیں، پھر اس نے نبی اکرم صلی اللہ علیہ وسلم کی طرف اشارہ کیا تو نبی اکرم صلی اللہ علیہ وسلم نے فرمایا: ”یہ میرے ساتھ ہے؟“ اس نے پھر عرض کی: جی نہیں، پھر اس نے تیسری مرتبہ نبی اکرم صلی اللہ علیہ وسلم کو اشارہ کیا تو نبی اکرم صلی اللہ علیہ وسلم نے فرمایا: ”یہ میرے ساتھ ہے؟“ نبی اکرم صلی اللہ علیہ وسلم نے سیدہ عائشہ رضی اللہ عنہا کی طرف اشارہ کیا تھا تو اس نے کہا: ٹھیک ہے (یعنی یہ بھی تشریف لے آئیں)۔ [صحیح ابن حبان/كتاب الأطعمة/حدیث: 5301]

سیدنا ابومسعود رضی اللہ عنہ بیان کرتے ہیں کہ ایک شخص نے کھانا تیار کیا، اس نے نبی اکرم صلی اللہ علیہ وسلم کو پیغام بھجوایا اور عرض کی کہ آپ سمیت پانچ آدمی میرے ہاں تشریف لے آئیں، تو نبی اکرم صلی اللہ علیہ وسلم نے اسے پیغام بھجوایا: ”کیا تم میرے ساتھ چھٹے آدمی کو بھی شریک ہونے کی اجازت دو گے؟“ [صحیح ابن حبان/كتاب الأطعمة/حدیث: 5302]

سیدنا جابر رضی اللہ عنہ روایت کرتے ہیں کہ نبی اکرم صلی اللہ علیہ وسلم نے ارشاد فرمایا: ”جب کسی شخص کو دعوت میں بلایا جائے تو اسے دعوت کو قبول کرنا چاہیے، اگر وہ چاہے تو کھائے اور اگر چاہے تو نہ کھائے۔“ [صحیح ابن حبان/كتاب الأطعمة/حدیث: 5303]

سیدنا ابوہریرہ رضی اللہ عنہ فرماتے ہیں: ”سب سے برا کھانا ولیمے کا ہوتا ہے جس میں خوشحال لوگوں کو بلا لیا جاتا ہے اور غریبوں کو چھوڑ دیا جاتا ہے اور جو شخص دعوت قبول نہیں کرتا وہ اللہ اور اس کے رسول صلی اللہ علیہ وسلم کی نافرمانی کرتا ہے۔“ (امام ابن حبان رحمہ اللہ فرماتے ہیں:) ابن قتیبہ نے ہمیں یہ بات بیان کی کہ یہ روایت سیدنا ابوہریرہ رضی اللہ عنہ کے حوالے سے نبی اکرم صلی اللہ علیہ وسلم سے منقول ہے۔ میں نے اس کو مختصر طور پر ذکر کر دیا ہے کیونکہ زہری کے تمام شاگردوں نے اس روایت کو اسی طرح موقوف روایت کے طور پر نقل کیا ہے۔ مسند روایت دوسری ہے: ”جو شخص دعوت قبول نہیں کرتا۔“ [صحیح ابن حبان/كتاب الأطعمة/حدیث: 5304]

سیدنا ابوہریرہ رضی اللہ عنہ بیان کرتے ہیں کہ نبی کریم صلی اللہ علیہ وسلم نے فرمایا: ”سب سے برا کھانا ولیمے کا کھانا ہے، جس میں خوشحال لوگوں کو دعوت دی جاتی ہے اور غریبوں کو چھوڑ دیا جاتا ہے، اور جو شخص دعوت قبول نہیں کرتا وہ اللہ اور اس کے رسول صلی اللہ علیہ وسلم کی نافرمانی کرتا ہے۔“ [صحیح ابن حبان/كتاب الأطعمة/حدیث: 5305]