معاذ بن عبد الرحمن اپنے والد کا یہ بیان نقل کرتے ہیں کہ ہم لوگ سیدنا طلحہ بن عبید اللہ رضی اللہ عنہ کے ساتھ تھے، ہم نے احرام باندھا ہوا تھا، ہمیں ایک پرندے (کا گوشت) تحفے کے طور پر دیا گیا، سیدنا طلحہ رضی اللہ عنہ اس وقت سو رہے تھے، ہم میں سے کچھ لوگوں نے اسے کھا لیا اور کچھ نے پرہیز کیا، جب سیدنا طلحہ رضی اللہ عنہ بیدار ہوئے تو انہوں نے ان لوگوں کا ساتھ دیا جنہوں نے اس کا گوشت کھا لیا تھا اور انہوں نے یہ بات بیان کی کہ ہم نے نبی اکرم صلی اللہ علیہ وسلم کے ہمراہ اس (پرندے کا گوشت) کھایا ہے۔ [صحیح ابن حبان/كتاب الأطعمة/حدیث: 5256]

سیدنا ابن ابی اوفیٰ رضی اللہ عنہما بیان کرتے ہیں: ہم نے نبی اکرم صلی اللہ علیہ وسلم کے ہمراہ سات (راوی کو شک ہے شاید یہ الفاظ ہیں) چھ ایسے غزوات میں شرکت کی ہے جس میں ہم نبی اکرم صلی اللہ علیہ وسلم کے ہمراہ ٹڈی کھاتے رہے ہیں۔ [صحیح ابن حبان/كتاب الأطعمة/حدیث: 5257]

سیدنا ابوہریرہ رضی اللہ عنہ بیان کرتے ہیں کہ ایک شخص نے نبی اکرم صلی اللہ علیہ وسلم سے سوال کیا، اس نے عرض کی: یا رسول اللہ! ہم سمندری سفر کرتے ہیں، ہم اپنے ساتھ تھوڑا سا پانی لے جاتے ہیں، اگر ہم اس کے ذریعے وضو کریں تو خود پیاسے رہ جائیں، کیا ہم سمندر کے پانی کے ذریعے وضو کر لیا کریں؟ نبی اکرم صلی اللہ علیہ وسلم نے ارشاد فرمایا: ”اس کا پانی پاک ہے اور اس کا مردار حلال ہے۔“ [صحیح ابن حبان/كتاب الأطعمة/حدیث: 5258]

سیدنا جابر بن عبداللہ رضی اللہ عنہما بیان کرتے ہیں: نبی اکرم صلی اللہ علیہ وسلم نے ہم تین سو سواروں کو (ایک مہم پر) روانہ کیا، ہمارے امیر سیدنا ابوعبیدہ بن جراح رضی اللہ عنہ تھے، ہم قریش کے قافلے کی گھات میں تھے، ہم نے پندرہ دن تک ساحل پر قیام کیا۔ ہمیں شدید بھوک لاحق ہو گئی یہاں تک کہ ہم پتے کھانے لگے۔ اسی وجہ سے اس لشکر کا نام پتوں والا لشکر رکھا گیا تھا، پھر سمندر نے ایک بڑے سے جانور کو باہر پھینک دیا جس کا نام عنبر تھا۔ ہم نے پندرہ دن تک اس کا گوشت کھایا یہاں تک کہ ہمارے جسم مضبوط ہو گئے۔ ہم نے اس کی چربی کو تیل کے طور پر استعمال کیا، پھر سیدنا ابوعبیدہ بن جراح رضی اللہ عنہ نے اس کی ایک پسلی کو لیا۔ انہوں نے لشکر میں موجود سب سے اونچے اونٹ اور سب سے لمبے آدمی کا انتخاب کیا، اسے اس اونٹ پر سوار کیا تو وہ آدمی اس پسلی کے نیچے سے گزر گیا۔ ایک اور سند کے ساتھ یہ منقول ہے، سیدنا جابر رضی اللہ عنہ بیان کرتے ہیں: نبی اکرم صلی اللہ علیہ وسلم نے ہمیں ایک تھیلا دیا تھا جس میں کھجوریں موجود تھیں، جب وہ ختم ہو گئیں تو ہمیں ان کی غیر موجودگی محسوس ہوئی، پھر کوئی آدمی کوئی چیز لے آیا کرتا تھا۔ اس روایت میں یہ الفاظ بھی ہیں: ہم نے اس (سمندری جانور) کی آنکھوں سے اتنی اتنی چربی نکالی، جب ہم نبی اکرم صلی اللہ علیہ وسلم کی خدمت میں حاضر ہوئے تو آپ صلی اللہ علیہ وسلم نے ہم سے دریافت فرمایا: ”کیا تمہارے پاس اس کا کچھ (گوشت) ہے؟“ [صحیح ابن حبان/كتاب الأطعمة/حدیث: 5259]

سیدنا جابر رضی اللہ عنہما بیان کرتے ہیں: نبی اکرم صلی اللہ علیہ وسلم نے ہمیں ایک مہم پر روانہ کیا۔ آپ نے سیدنا ابوعبیدہ بن جراح رضی اللہ عنہ کو ہمارا امیر مقرر کیا۔ ہمارا ارادہ قریش کے قافلے کو روکنے کا تھا۔ نبی اکرم صلی اللہ علیہ وسلم نے زاد راہ کے طور پر کھجوروں کا ایک تھیلا ہمیں دے دیا۔ ہمیں اس کے علاوہ اور کوئی چیز نہیں ملی۔ سیدنا ابوعبیدہ رضی اللہ عنہ اس میں سے ایک ایک کھجور ہمیں کھانے کے لیے دیا کرتے تھے۔ (راوی بیان کرتے ہیں) میں نے دریافت کیا آپ لوگ اس کا کیا کیا کرتے تھے؟ انہوں نے فرمایا: ہم اسے یوں چوستے تھے جس طرح کوئی بچہ چوستا ہے، پھر اس کے بعد ہم پانی پی لیا کرتے تھے تو وہ ہمارے لیے پورے دن کے لیے کافی ہوتی تھی۔ سیدنا جابر رضی اللہ عنہما بیان کرتے ہیں: ہم لوگ اپنے عصا کے ذریعے پتے اتارا کرتے تھے، انہیں پانی میں بھگویا کرتے تھے اور پھر انہیں کھا لیا کرتے تھے۔ سیدنا جابر رضی اللہ عنہما بیان کرتے ہیں: ہم لوگ چلتے رہے یہاں تک کہ ساحل سمندر پر ہمارے سامنے بڑی چٹان جیسی کوئی چیز آ گئی، ہم اس کے پاس آئے تو وہ ایک جانور تھا جسے «الْعَنْبَرُ» ”عنبر“ کہا جاتا تھا۔ سیدنا ابوعبیدہ رضی اللہ عنہ نے کہا: یہ مردار ہے، پھر انہوں نے فرمایا: جی نہیں، ہم اللہ کے رسول کے بھیجے ہوئے لوگ ہیں اور اللہ کی راہ میں ہیں، تم لوگ اضطراری حالت میں ہو، تو تم لوگ اسے کھا لو۔ سیدنا جابر رضی اللہ عنہما کہتے ہیں: ہم ایک ماہ وہاں مقیم رہے۔ ہم تین سو افراد تھے یہاں تک کہ ہم (اسے کھا کر) موٹے تازے ہو گئے۔ مجھے اپنے بارے میں یہ بات یاد ہے ہم نے اس کی آنکھوں سے چربی کے کئی مٹکے نکالے تھے اور ہم نے اس سے خشک گوشت کاٹ لیا۔ سیدنا ابوعبیدہ رضی اللہ عنہ نے ہم میں سے تیرہ آدمیوں کو لیا تو وہ اس کی آنکھ کے سوراخ میں بیٹھ گئے، پھر سیدنا ابوعبیدہ رضی اللہ عنہ نے اس کی ایک پسلی کو لے کر کھڑا کیا اور سب سے اونچے اونٹ پر آدمی کو سوار کیا تو وہ اس کے نیچے سے گزر گیا۔ سیدنا جابر رضی اللہ عنہما بیان کرتے ہیں: پھر ہم نے اس کے گوشت کو زاد راہ کے طور پر ساتھ رکھ لیا، جب ہم مدینہ منورہ آئے، نبی اکرم صلی اللہ علیہ وسلم کی خدمت میں حاضر ہوئے تو ہم نے آپ کے سامنے اس بات کا ذکر کیا۔ نبی اکرم صلی اللہ علیہ وسلم نے ارشاد فرمایا: ”یہ وہ رزق ہے جو اللہ تعالیٰ نے تمہارے لیے نکالا تھا، کیا تمہارے پاس اس کے گوشت میں سے کوئی چیز ہے جو تم ہمیں بھی کھلاؤ؟“ ہم نے نبی اکرم صلی اللہ علیہ وسلم کی خدمت میں اس کا گوشت بھجوایا تو آپ نے اسے کھا لیا۔ [صحیح ابن حبان/كتاب الأطعمة/حدیث: 5260]

سیدنا جابر بن عبداللہ رضی اللہ عنہما بیان کرتے ہیں کہ نبی اکرم صلی اللہ علیہ وسلم نے جہینہ کی سرزمین کی طرف ایک مہم روانہ کی اور ایک شخص کو ان لوگوں کا امیر مقرر کیا۔ جب ان لوگوں کا زادِ راہ ختم ہو گیا تو ان کے امیر نے حکم دیا کہ باقی بچ جانے والا زادِ راہ جمع کیا جائے، وہ جمع کر دیا گیا تو امیر ہمیں روزانہ ایک ایک کھجور دیا کرتے تھے۔ راوی کہتے ہیں کہ میں نے دریافت کیا: ایک کھجور سے آپ کا کیا بنتا تھا؟ انہوں نے کہا: اللہ کی قسم! جب وہ بھی ختم ہو گئی تو ہمیں اس کے ختم ہونے کا شدید احساس ہوا۔ ہم میں سے کوئی ایک شخص اسے اپنے دانتوں کے درمیان رکھ کر چوس لیا کرتا تھا، ہمیں درختوں کے پتے ملتے اور زمین کی نباتات اس کے ساتھ مل جاتی تھیں، یہاں تک کہ ہم سمندر کے ساحل تک آئے تو اللہ تعالیٰ نے ہمارے لیے ایک مچھلی کو نکالا جسے سمندر نے باہر پھینک دیا تھا۔ ہم نے اسے کھایا اور اس کی چربی استعمال کی، جب ہم وہاں سے روانہ ہونے لگے تو ہمارے امیر نے حکم دیا کہ اس کی ایک پسلی کو زمین پر کھڑا کیا جائے، پھر ان کے حکم کے تحت ایک اونٹ پر سامان رکھا گیا تو وہ اونٹ اس کے نیچے سے گزر گیا۔ [صحیح ابن حبان/كتاب الأطعمة/حدیث: 5261]

سیدنا جابر بن عبداللہ رضی اللہ عنہما بیان کرتے ہیں کہ نبی اکرم صلی اللہ علیہ وسلم نے ساحل کی سمت ایک مہم روانہ فرمائی اور آپ صلی اللہ علیہ وسلم نے سیدنا ابوعبیدہ بن الجراح رضی اللہ عنہ کو ہمارا امیر مقرر فرمایا۔ ہم تین سو افراد تھے اور میں بھی ان میں شامل تھا۔ سیدنا جابر رضی اللہ عنہ بیان کرتے ہیں کہ ہم لوگ روانہ ہوئے، راستے میں ہمارا زادِ سفر ختم ہو گیا تو سیدنا ابوعبیدہ رضی اللہ عنہ نے اس لشکر کے تمام زادِ راہ کے بارے میں حکم دیا، ان سب کو جمع کیا گیا تو وہ کھجوروں کا ایک تھیلا بنا، تو سیدنا ابوعبیدہ رضی اللہ عنہ اس میں سے روزانہ تھوڑی تھوڑی سی کھجوریں ہمیں دیا کرتے تھے یہاں تک کہ وہ بھی ختم ہو گئیں تو ہمیں ایک کھجور ملا کرتی تھی۔ (راوی کہتے ہیں:) ایک کھجور سے آپ کا کیا بنتا تھا؟ انہوں نے فرمایا: جب وہ بھی ختم ہو گئی تو پھر ہمیں اس کی غیر موجودگی محسوس ہوئی۔ سیدنا جابر رضی اللہ عنہ بیان کرتے ہیں کہ پھر ہم لوگ سمندر تک پہنچ گئے تو وہاں چھوٹے ٹیلے کی طرح ایک مچھلی تھی، اس لشکر نے گیارہ دن تک اس کا گوشت کھایا، پھر سیدنا ابوعبیدہ رضی اللہ عنہ کے حکم کے تحت اس کی دو پسلیوں کو کھڑا کیا گیا، پھر ایک اونٹ تیار کیا گیا تو وہ اونٹ ان پسلیوں کے نیچے سے گزر گیا اور اس نے انہیں چھوا نہیں۔ [صحیح ابن حبان/كتاب الأطعمة/حدیث: 5262]

سیدنا عبداللہ بن عباس رضی اللہ عنہما بیان کرتے ہیں: میں اور سیدنا خالد بن ولید رضی اللہ عنہ نبی اکرم صلی اللہ علیہ وسلم کے ہمراہ سیدہ میمونہ رضی اللہ عنہا بنت حارث کے پاس آئے (جو میری اور سیدنا خالد رضی اللہ عنہ کی خالہ بھی تھیں) بھنی ہوئی گوہ لائی گئی، نبی اکرم صلی اللہ علیہ وسلم نے اپنا دستِ مبارک اس کی طرف بڑھایا تو گھر میں موجود خواتین میں سے کسی نے کہا: نبی اکرم صلی اللہ علیہ وسلم کو یہ بات تو بتا دو کہ آپ کیا کھانے لگے ہیں؟ (جب نبی اکرم صلی اللہ علیہ وسلم کو یہ بات بتائی گئی کہ یہ گوہ کا گوشت ہے) تو نبی اکرم صلی اللہ علیہ وسلم نے ہاتھ کھینچ لیا۔ راوی کہتے ہیں: میں نے دریافت کیا: یا رسول اللہ! کیا یہ حرام ہے؟ نبی اکرم صلی اللہ علیہ وسلم نے ارشاد فرمایا: ”جی نہیں، لیکن یہ میرے علاقے کی خوراک نہیں ہے، اس لیے میں اس سے بچتا ہوں۔“ سیدنا خالد بن ولید رضی اللہ عنہ بیان کرتے ہیں: میں نے اسے اپنی طرف کھینچ لیا اور میں نے کھا لیا، جبکہ نبی اکرم صلی اللہ علیہ وسلم ملاحظہ فرما رہے تھے۔ [صحیح ابن حبان/كتاب الأطعمة/حدیث: 5263]

سیدنا عبداللہ بن عمر رضی اللہ عنہما بیان کرتے ہیں: نبی اکرم صلی اللہ علیہ وسلم کے ہمراہ آپ کے کچھ اصحاب بھی تھے جن میں سیدنا سعد رضی اللہ عنہ بھی تھے۔ گوہ کا گوشت پیش کیا گیا، تو نبی اکرم صلی اللہ علیہ وسلم کی ازواج میں سے ایک خاتون نے عرض کی: یہ گوہ کا گوشت ہے، تو نبی اکرم صلی اللہ علیہ وسلم نے ارشاد فرمایا: ”تم لوگ اسے کھا لو یہ حلال ہے، لیکن یہ میری خوراک نہیں ہے۔“ [صحیح ابن حبان/كتاب الأطعمة/حدیث: 5264]

سیدنا عبداللہ بن عمر رضی اللہ عنہما بیان کرتے ہیں: نبی اکرم صلی اللہ علیہ وسلم سے گوہ کے بارے میں دریافت کیا گیا تو آپ صلی اللہ علیہ وسلم نے ارشاد فرمایا: ”میں اسے کھاتا بھی نہیں ہوں اور اسے حرام بھی قرار نہیں دیتا۔“ [صحیح ابن حبان/كتاب الأطعمة/حدیث: 5265]