سیدنا سلمہ بن اکوع رضی اللہ عنہما بیان کرتے ہیں: ہم لوگ نبی اکرم صلی اللہ علیہ وسلم کے ہمراہ خیبر کی طرف روانہ ہوئے، حاضرین میں سے ایک صاحب نے کہا: اے عامر! اگر آپ اپنے نغمے کے ذریعے ہمیں لطف اٹھانے کا موقع دیں (تو یہ مناسب ہو گا) تو سیدنا عامر رضی اللہ عنہما لوگوں کو حدی سنانے کے لیے سواری سے نیچے اتر آئے۔ انہوں نے اللہ تعالیٰ کا ذکر کیا پھر ایک شعر ذکر کیا جو مجھے یاد نہیں رہا، تو نبی اکرم صلی اللہ علیہ وسلم نے دریافت کیا: ”جانور کو لے کر چلنے والا شخص کون ہے؟“ لوگوں نے بتایا: یہ عامر بن اکوع ہے، نبی اکرم صلی اللہ علیہ وسلم نے فرمایا: «يَرْحَمُهُ اللَّهُ» ”اللہ تعالیٰ اس پر رحم کرے۔“ حاضرین میں سے ایک صاحب نے عرض کی: یا رسول اللہ صلی اللہ علیہ وسلم ! اگر آپ ہمیں اس سے (لطف اندوز ہونے کا موقع دیں تو عنایت ہو گی)۔ جب ان لوگوں نے دشمنوں پر حملہ کیا اور ان کے ساتھ لڑائی کی تو سیدنا عامر رضی اللہ عنہما زخمی ہو گئے، جب شام کا وقت ہوا تو انہوں نے ڈھیر ساری آگ جلا لی، نبی اکرم صلی اللہ علیہ وسلم نے دریافت کیا: ”یہ آگ کس وجہ سے ہے اور یہ کیا چیز پکائی جا رہی ہے؟“ لوگوں نے بتایا: گدھے کا گوشت پکایا جا رہا ہے۔ نبی اکرم صلی اللہ علیہ وسلم نے ارشاد فرمایا: ”ہانڈیوں میں موجود چیزوں کو انڈیل دو اور انہیں توڑ دو۔“ ایک صاحب نے عرض کی: یا رسول اللہ صلی اللہ علیہ وسلم ! کیا ہم ایسا نہ کریں کہ ان میں موجود چیز کو انڈیل کر ان کو دھو لیں؟ نبی اکرم صلی اللہ علیہ وسلم نے فرمایا: ”ایسا کر لو۔“ (امام ابن حبان رحمہ اللہ فرماتے ہیں:) نبی اکرم صلی اللہ علیہ وسلم کا یہ فرمان: «أَهْرِيقُوهَا» ”اس میں جو کچھ موجود ہے اسے بہا دو“ یہ ایک لازمی حکم ہے، اور نبی اکرم صلی اللہ علیہ وسلم کا یہ فرمان: «وَاكْسِرُوهَا» ”تم اسے توڑ دو“ یہ شدت اور سختی ظاہر کرنے کا حکم ہے، لازمی حکم نہیں ہے۔ کیا آپ صلی اللہ علیہ وسلم نے یہ بات ملاحظہ نہیں کی کہ جسے نبی اکرم صلی اللہ علیہ وسلم نے ہانڈی توڑنے کا حکم دیا تھا، اس شخص نے عرض کی: یا رسول اللہ صلی اللہ علیہ وسلم ! کیا ہم اس موجود چیز کو بہا کر انہیں دھو نہ لیں؟ تو نبی اکرم صلی اللہ علیہ وسلم نے فرمایا: ”ایسا ہی کر لو۔“ [صحیح ابن حبان/كتاب الأطعمة/حدیث: 5276]

سیدنا براء بن عازب رضی اللہ عنہ بیان کرتے ہیں کہ وہ لوگ نبی اکرم صلی اللہ علیہ وسلم کے ساتھ تھے، انہیں کچھ گدھے ملے، انہوں نے انہیں ذبح کر لیا تو نبی اکرم صلی اللہ علیہ وسلم نے ارشاد فرمایا: ”ہنڈیاؤں کو الٹ دو۔“ [صحیح ابن حبان/كتاب الأطعمة/حدیث: 5277]

سیدنا ابوہریرہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”ہر نوکیلے دانت والے درندے (کا گوشت کھانا) حرام ہے۔“ [صحیح ابن حبان/كتاب الأطعمة/حدیث: 5278]

سیدنا ابوثعلبہ خشنی رضی اللہ عنہ بیان کرتے ہیں کہ نبی اکرم صلی اللہ علیہ وسلم نے ”ہر نوکیلے دانت والے درندے (کا گوشت کھانے) سے منع کیا ہے۔“ [صحیح ابن حبان/كتاب الأطعمة/حدیث: 5279]

سیدنا عبداللہ بن عباس رضی اللہ عنہما بیان کرتے ہیں کہ نبی اکرم صلی اللہ علیہ وسلم نے ”ہر نوکیلے دانت والے درندے اور نوکیلے پنجوں والے پرندے (کا گوشت کھانے) سے منع کیا ہے۔“ (امام ابن حبان رحمہ اللہ فرماتے ہیں:) نیل، واسط میں ایک بستی ہے۔ [صحیح ابن حبان/كتاب الأطعمة/حدیث: 5280]

سیدنا ابوسعید خدری رضی اللہ عنہ بیان کرتے ہیں کہ نبی اکرم صلی اللہ علیہ وسلم نے ارشاد فرمایا ہے: ”جب کوئی شخص اونٹوں کے چرواہے (یعنی چرنے والے اونٹوں) کے پاس آئے تو بلند آواز میں تین مرتبہ پکارے: اے اونٹوں کے چرواہے! اگر وہ اسے جواب دے دے تو ٹھیک ہے، ورنہ ان کا دودھ دوہ کر پی لے، اور جب کوئی شخص کسی باغ کے پاس آئے تو تین مرتبہ بلند آواز میں پکارے: اے باغ والو! اگر وہ اس کا جواب دیں تو ٹھیک ہے، ورنہ وہ (اس باغ میں سے کھجوریں) کھا لے، لیکن وہ اٹھا کر ہرگز نہ لے جائے۔“ راوی بیان کرتے ہیں کہ نبی اکرم صلی اللہ علیہ وسلم نے یہ ارشاد فرمایا ہے: ”مہمان نوازی تین دن ہوتی ہے، جو اس سے زیادہ ہو وہ صدقہ ہوتا ہے۔“ (امام ابن حبان رحمہ اللہ کہتے ہیں:) اس روایت میں اس حکم کی علت پوشیدہ ہے اور وہ آدمی کا اضطراری حالت میں مبتلا ہونا اور ان چیزوں کا حاجت مند ہونا ہے تاکہ اس کی جان ضائع نہ ہو، اگر آدمی کے پاس قدرت اور گنجائش ہو (تو پھر وہ مالکان کی اجازت کے بغیر ان چیزوں کو حاصل نہیں کر سکتا۔) [صحیح ابن حبان/كتاب الأطعمة/حدیث: 5281]

سیدنا عبداللہ بن عمر رضی اللہ عنہما بیان کرتے ہیں کہ نبی اکرم صلی اللہ علیہ وسلم نے ارشاد فرمایا: ”کوئی بھی شخص کسی دوسرے کے جانور کو اس کی اجازت کے بغیر ہرگز نہ دوہ لے، کیا کوئی شخص یہ بات پسند کرے گا کہ اس کے گودام کے پاس کوئی آئے، اس کا خزانہ توڑ کر اس کا اناج منتقل کر لے؟ لوگوں کے جانوروں کے تھن اور ان کی خوراک (ایک ہی طرح قابل احترام ہے) تو کوئی شخص کسی دوسرے کے جانور کا دودھ اس کی اجازت کے بغیر ہرگز نہ دوہ لے۔“ [صحیح ابن حبان/كتاب الأطعمة/حدیث: 5282]

سیدنا ضرار بن ازور رضی اللہ عنہ بیان کرتے ہیں کہ میرے اہل خانہ نے ایک حاملہ اونٹنی کے ہمراہ مجھے نبی اکرم صلی اللہ علیہ وسلم کی خدمت میں بھیجا۔ راوی بیان کرتے ہیں کہ میں اسے ساتھ لے کر نبی اکرم صلی اللہ علیہ وسلم کی خدمت میں حاضر ہوا تو آپ نے مجھے حکم دیا کہ میں اس کا دودھ دوہ لوں۔ میں نے اس کا دودھ دوہ لیا تو نبی اکرم صلی اللہ علیہ وسلم نے مجھ سے فرمایا: ”دودھ کے داعی کے لیے (تھوڑا سا دودھ) چھوڑ دو۔“ [صحیح ابن حبان/كتاب الأطعمة/حدیث: 5283]

سیدنا ابوہریرہ رضی اللہ عنہ روایت کرتے ہیں کہ نبی اکرم صلی اللہ علیہ وسلم نے ارشاد فرمایا: ”مہمان نوازی تین دن تک ہوتی ہے، جو اس سے زیادہ ہو وہ صدقہ ہو گی۔“ [صحیح ابن حبان/كتاب الأطعمة/حدیث: 5284]

سیدنا انس بن مالک رضی اللہ عنہ بیان کرتے ہیں کہ سیدنا ابوطلحہ رضی اللہ عنہ نے نبی اکرم صلی اللہ علیہ وسلم کو بھوک کے عالم میں دیکھا تو وہ سیدہ ام سلیم رضی اللہ عنہا کے پاس آئے اور بولے: تمہارے پاس کچھ کھانے کے لیے ہے؟ انہوں نے عرض کی: میرے پاس تو صرف جو کے آٹے کا ایک مد ہے۔ سیدنا ابوطلحہ رضی اللہ عنہ نے کہا: تم اسے گوندھ لو اور اسے تیار کر لو، ہم نبی اکرم صلی اللہ علیہ وسلم کی دعوت کرتے ہیں تاکہ نبی اکرم صلی اللہ علیہ وسلم ہمارے پاس کھانا کھائیں؟ سیدنا انس رضی اللہ عنہ بیان کرتے ہیں: اس خاتون نے آٹا گوندھ لیا اور روٹی پکا لی، پھر سیدنا ابوطلحہ رضی اللہ عنہ روٹیوں کے پاس آئے اور بولے: نبی اکرم صلی اللہ علیہ وسلم کو میرے ہاں بلا لاؤ۔ راوی بیان کرتے ہیں: میں نبی اکرم صلی اللہ علیہ وسلم کی خدمت میں حاضر ہوا، آپ کے ہمراہ کچھ لوگ بھی تھے۔ یہاں مبارک بن فضالہ نامی راوی نے یہ الفاظ نقل کیے ہیں: میرا خیال ہے وہ 80 سے زیادہ لوگ تھے۔ میں نے عرض کی: یا رسول اللہ صلی اللہ علیہ وسلم ! سیدنا ابوطلحہ رضی اللہ عنہ نے آپ کو بلایا ہے۔ نبی اکرم صلی اللہ علیہ وسلم نے اپنے اصحاب سے کہا: ”ابوطلحہ کی دعوت کو قبول کرو“۔ (سیدنا انس رضی اللہ عنہ کہتے ہیں) میں تیزی سے چلتا ہوا آیا اور سیدنا ابوطلحہ رضی اللہ عنہ کو اس بارے میں بتایا کہ نبی اکرم صلی اللہ علیہ وسلم اور آپ کے اصحاب تشریف لا رہے ہیں۔ یہاں بکر نامی راوی نے یہ الفاظ نقل کیے ہیں: میں تیزی سے چلتا ہوا آیا، اور ثابت نامی راوی نے یہ الفاظ نقل کیے ہیں: سیدنا ابوطلحہ رضی اللہ عنہ نے کہا: اللہ کے رسول صلی اللہ علیہ وسلم اس بارے میں مجھ سے زیادہ بہتر جانتے ہیں جو کچھ میرے گھر میں ہے۔ پھر اس کے بعد دونوں راویوں نے سیدنا انس رضی اللہ عنہ کے حوالے سے یہ بات نقل کی ہے کہ سیدنا ابوطلحہ رضی اللہ عنہ نے نبی اکرم صلی اللہ علیہ وسلم کا استقبال کیا۔ انہوں نے عرض کی: ہمارے پاس تو صرف ایک تھال (جتنا) کھانا ہے، میں نے آپ کو بھوکا دیکھا تھا تو میں نے ام سلیم سے کہا، اس نے یہ کھانا تیار کر دیا۔ راوی بیان کرتے ہیں: نبی اکرم صلی اللہ علیہ وسلم نے وہ تھال منگوایا اور آپ صلی اللہ علیہ وسلم نے ایک پیالہ منگوا کر وہ روٹی اس میں رکھی۔ آپ صلی اللہ علیہ وسلم نے دریافت کیا: ”کیا تمہارے پاس گھی ہے؟“ سیدنا ابوطلحہ رضی اللہ عنہ نے عرض کی: ایک کپی میں تھوڑا سا ہے، وہ اسے لے کر آگئے۔ نبی اکرم صلی اللہ علیہ وسلم اور سیدنا ابوطلحہ رضی اللہ عنہ اسے نچوڑنے لگے یہاں تک کہ تھوڑا سا گھی نکل آیا۔ نبی اکرم صلی اللہ علیہ وسلم نے اسے اپنی شہادت کی انگلی کے ذریعے لگایا اور اسے روٹی پر لگا دیا تو وہ پھول گئی۔ نبی اکرم صلی اللہ علیہ وسلم نے «بِسْمِ اللّٰهِ» ”اللہ کے نام سے“ پڑھا تو روٹی اور پھول گئی۔ اس کے بعد مسلسل نبی اکرم صلی اللہ علیہ وسلم ایسا ہی کرتے رہے یہاں تک کہ وہ روٹی پھولتی ہوئی اس پوری پرات کے اوپر غالب آگئی۔ نبی اکرم صلی اللہ علیہ وسلم نے فرمایا: ”میرے اصحاب میں سے دس آدمیوں کو بلاؤ“۔ میں نے دس آدمیوں کو بلوایا، نبی اکرم صلی اللہ علیہ وسلم نے اپنا دستِ مبارک روٹی کے درمیان میں رکھا۔ آپ صلی اللہ علیہ وسلم نے فرمایا: ”اللہ تعالیٰ کے نام سے برکت حاصل کرتے ہوئے کھانا شروع کرو“۔ انہوں نے اطراف سے روٹی کھانا شروع کی یہاں تک کہ وہ سیر ہو گئے، پھر نبی اکرم صلی اللہ علیہ وسلم نے فرمایا: ”میرے پاس دس آدمیوں کو بلا کر لاؤ“۔ اس کے بعد سیدنا ابوطلحہ رضی اللہ عنہ دس کر کے آدمیوں کو بلاتے رہے یہاں تک کہ ان سب لوگوں نے، جو 80 سے زیادہ افراد تھے، روٹی کے اطراف میں سے کھا لیا، یہاں تک کہ وہ سب سیر ہوگئے اور روٹی کا درمیان کا وہ حصہ جہاں نبی اکرم صلی اللہ علیہ وسلم نے اپنا دستِ مبارک رکھا ہوا تھا، وہ اسی طرح تھا جیسے پہلے تھا۔ [صحیح ابن حبان/كتاب الأطعمة/حدیث: 5285]