سیدنا عبد الرحمن بن حسنہ مہری رضی اللہ عنہ بیان کرتے ہیں: ہم نے نبی اکرم صلی اللہ علیہ وسلم کے ہمراہ ایک غزوہ میں شرکت کی، ہم نے ایک ایسی جگہ پر پڑاؤ کیا جہاں گوہ بہت زیادہ تھیں، ہم لوگ ضرورت مند تھے، ہم نے انہیں پکڑا تو ہنڈیا میں وہ پکنے لگی، نبی اکرم صلی اللہ علیہ وسلم نے دریافت کیا: ”یہ کیا چیز ہے؟“ ہم نے عرض کی: یہ گوہ ہے جو ہم نے پکڑی ہے، نبی اکرم صلی اللہ علیہ وسلم نے ارشاد فرمایا: ”بنی اسرائیل کے ایک گروہ کو مسخ کر دیا گیا تھا، مجھے یہ اندیشہ ہے کہ شاید یہ وہی نہ ہوں“ پھر نبی اکرم صلی اللہ علیہ وسلم نے ہمیں حکم دیا تو ہم نے ہنڈیاؤں کو الٹ دیا حالانکہ ہم بھوکے تھے۔ (امام ابن حبان رحمہ اللہ فرماتے ہیں:) ان ہنڈیاؤں کو الٹانے کا حکم دینا جن میں گوہ پک رہی تھی، یہ ایک ایسا حکم ہے جس کے ذریعے گوہ کھانے کی ممانعت مقصود ہے اور اس میں علت یہ ہے کہ نبی اکرم صلی اللہ علیہ وسلم اس سے بچتے تھے، اس سے یہ مراد نہیں ہے کہ اسے کھانا حرام قرار دیا گیا ہے۔ [صحیح ابن حبان/كتاب الأطعمة/حدیث: 5266]

سیدنا عبداللہ بن عباس رضی اللہ عنہما بیان کرتے ہیں: میں اور سیدنا خالد بن ولید رضی اللہ عنہ نبی اکرم صلی اللہ علیہ وسلم کے ہمراہ سیدہ میمونہ بنت حارث رضی اللہ عنہا کے گھر میں داخل ہوئے تو وہاں گوہ بھنی ہوئی تھی۔ نبی اکرم صلی اللہ علیہ وسلم نے اپنا دست مبارک اس کی طرف بڑھایا تو سیدہ میمونہ رضی اللہ عنہا کے گھر میں موجود خواتین نے کہا: نبی اکرم صلی اللہ علیہ وسلم کو یہ تو بتا دو کہ آپ کیا کھانے لگے ہیں۔ انہوں نے نبی اکرم صلی اللہ علیہ وسلم کو اس بارے میں بتایا تو نبی اکرم صلی اللہ علیہ وسلم نے اپنا دست مبارک کھینچ لیا۔ راوی بیان کرتے ہیں: میں نے دریافت کیا: یا رسول اللہ صلی اللہ علیہ وسلم ! کیا یہ حرام ہے؟ نبی اکرم صلی اللہ علیہ وسلم نے ارشاد فرمایا: ”جی نہیں، لیکن یہ میرے علاقے کی خوراک نہیں ہے اس لیے میں اس سے پرہیز کرتا ہوں۔“ سیدنا خالد رضی اللہ عنہ بیان کرتے ہیں: میں نے اسے اپنی طرف کھینچ لیا (اور کھانا شروع کیا) جب کہ نبی اکرم صلی اللہ علیہ وسلم ملاحظہ فرما رہے تھے۔ [صحیح ابن حبان/كتاب الأطعمة/حدیث: 5267]

سیدنا جابر رضی اللہ عنہ بیان کرتے ہیں: ”نبی اکرم صلی اللہ علیہ وسلم نے ہمیں گھوڑوں کا گوشت کھلایا ہے اور آپ نے ہمیں گدھوں کا گوشت کھانے سے منع کیا ہے۔“ (امام ابن حبان رحمہ اللہ فرماتے ہیں:) اس بات کا امکان موجود ہے عمرو بن دینار نے یہ روایت سیدنا جابر رضی اللہ عنہ سے نہ سنی ہو کیونکہ حماد بن زید نے یہ روایت عمرو کے حوالے سے امام محمد باقر رحمہ اللہ کے حوالے سے سیدنا جابر رضی اللہ عنہ سے نقل کی ہے تو اس بات کا احتمال موجود ہے عمرو نے یہ روایت سیدنا جابر رضی اللہ عنہ سے سنی ہو اور یہ روایت امام باقر رحمہ اللہ کے حوالے سے سیدنا جابر رضی اللہ عنہ سے سنی ہو۔ [صحیح ابن حبان/كتاب الأطعمة/حدیث: 5268]

سیدنا جابر رضی اللہ عنہ بیان کرتے ہیں کہ نبی اکرم صلی اللہ علیہ وسلم نے ہمیں ”گھوڑوں کا گوشت کھانے کا حکم دیا (یعنی اجازت دی) اور آپ نے ہمیں پالتو گدھوں کا گوشت کھانے سے منع فرمایا۔“ [صحیح ابن حبان/كتاب الأطعمة/حدیث: 5269]

سیدنا جابر رضی اللہ عنہ بیان کرتے ہیں: نبی اکرم صلی اللہ علیہ وسلم نے ہمیں ”گھوڑوں کا گوشت کھانے کی اجازت دی ہے اور آپ نے ہمیں پالتو گدھوں کا گوشت کھانے سے منع کیا ہے۔“ [صحیح ابن حبان/كتاب الأطعمة/حدیث: 5270]

سیدہ اسماء رضی اللہ عنہا بیان کرتی ہیں: نبی اکرم صلی اللہ علیہ وسلم کے زمانہ اقدس میں ہم نے گھوڑا قربان کیا اور اس کا (گوشت) کھا لیا۔ [صحیح ابن حبان/كتاب الأطعمة/حدیث: 5271]

سیدنا جابر رضی اللہ عنہ بیان کرتے ہیں: غزوہ خیبر کے موقع پر ان لوگوں نے گھوڑے، خچر اور گدھے ذبح کیے تو نبی اکرم صلی اللہ علیہ وسلم نے خچروں اور گدھوں سے منع کر دیا، البتہ آپ صلی اللہ علیہ وسلم نے گھوڑوں سے منع نہیں کیا۔ [صحیح ابن حبان/كتاب الأطعمة/حدیث: 5272]

سیدنا جابر بن عبداللہ رضی اللہ عنہما بیان کرتے ہیں کہ نبی اکرم صلی اللہ علیہ وسلم نے غزوہ خیبر کے موقع پر گدھوں کا گوشت کھانے سے منع کر دیا تھا، البتہ آپ صلی اللہ علیہ وسلم نے گھوڑوں کا گوشت کھانے کی اجازت دی تھی۔ [صحیح ابن حبان/كتاب الأطعمة/حدیث: 5273]

سیدنا انس بن مالک رضی اللہ عنہ بیان کرتے ہیں کہ نبی اکرم صلی اللہ علیہ وسلم کے منادی نے یہ اعلان کیا: ”بیشک اللہ اور اس کا رسول تم لوگوں کو گدھوں کا گوشت کھانے سے منع کرتے ہیں کیونکہ یہ ناپاک ہے۔“ [صحیح ابن حبان/كتاب الأطعمة/حدیث: 5274]

سیدنا عبداللہ بن عمر رضی اللہ عنہما بیان کرتے ہیں کہ نبی اکرم صلی اللہ علیہ وسلم نے غزوہ خیبر کے موقع پر ”گدھوں کا گوشت کھانے سے منع کر دیا تھا“ حالانکہ لوگوں کو اس کی (شدید ترین) ضرورت تھی۔ [صحیح ابن حبان/كتاب الأطعمة/حدیث: 5275]