سیدہ عائشہ صدیقہ رضی اللہ عنہا بیان کرتی ہیں: ہم لوگ پہلی کا ایک چاند دیکھ لیتے تھے، پھر اگلی پہلی کا چاند دیکھ لیتے تھے، پھر اگلی پہلی کا چاند دیکھ لیتے تھے، یعنی دو مہینوں میں تین چاند دیکھ لیتے تھے، لیکن اس دوران نبی اکرم صلی اللہ علیہ وسلم کے گھروں میں آگ نہیں جلتی تھی۔ راوی کہتے ہیں: میں نے دریافت کیا: خالہ جان! آپ لوگوں کا گزارا کیسے ہوتا تھا؟ انہوں نے جواب دیا: دو سیاہ چیزوں پر؛ کھجوروں اور پانی پر، البتہ نبی اکرم صلی اللہ علیہ وسلم کے کچھ انصاری پڑوسی تھے جو بہت اچھے پڑوسی تھے۔ ان لوگوں کے پاس دودھ دینے والے جانور تھے، وہ ان کا دودھ نبی اکرم صلی اللہ علیہ وسلم کی خدمت میں تحفے کے طور پر بھجوا دیتے تھے تو ہم وہ پی لیا کرتے تھے۔ [صحیح ابن حبان/كتاب التاريخ/حدیث: 6348]

سیدنا انس رضی اللہ عنہ بیان کرتے ہیں: ایک دن نبی اکرم صلی اللہ علیہ وسلم نے ارشاد فرمایا: ”(آج) محمد کے گھر میں نہ تو گندم کا ایک صاع ہے اور نہ ہی کھجوروں کا ایک صاع ہے۔“ راوی کہتے ہیں: اس زمانے میں نبی اکرم صلی اللہ علیہ وسلم کی نو ازواج تھیں۔ [صحیح ابن حبان/كتاب التاريخ/حدیث: 6349]

سیدنا ابوہریرہ رضی اللہ عنہ بیان کرتے ہیں کہ نبی اکرم صلی اللہ علیہ وسلم نے ارشاد فرمایا ہے: ”اس ذات کی قسم! جس کے دستِ قدرت میں محمد کی جان ہے، اگر میرے پاس احد پہاڑ جتنا سونا ہو تو مجھے یہ بات پسند ہوگی کہ تین دن گزرنے سے پہلے میرے پاس ان میں سے ایک دینار بھی باقی نہ رہے، سوائے اس دینار کے، جسے میں نے قرض کی ادائیگی کے لیے سنبھال کر رکھا ہو۔“ [صحیح ابن حبان/كتاب التاريخ/حدیث: 6350]

عبداللہ ہوزنی بیان کرتے ہیں: میری ملاقات نبی اکرم صلی اللہ علیہ وسلم کے مؤذن سیدنا بلال رضی اللہ عنہ سے ہوئی۔ میں نے کہا: اے بلال! آپ مجھے بتائیے کہ نبی اکرم صلی اللہ علیہ وسلم کا خرچ کیسے چلتا تھا؟ تو سیدنا بلال رضی اللہ عنہ نے بتایا: نبی اکرم صلی اللہ علیہ وسلم کے پاس کوئی چیز نہیں ہوتی تھی، جب سے اللہ تعالیٰ نے آپ کو مبعوث کیا اس دن سے آپ کے وصال تک میں نبی اکرم صلی اللہ علیہ وسلم کے ساتھ رہا ہوں؛ جب کوئی مسلمان آپ کی خدمت میں حاضر ہوتا اور آپ دیکھتے کہ اس کے پاس مناسب کپڑے نہیں ہیں، تو آپ مجھے حکم دیتے، میں جاتا، آپ کے نام پر قرض لیتا، اس کے ذریعے کپڑا یا چادر خریدتا اور اس شخص کو پہننے کے لیے دے دیتا اور اس شخص کو کھانا کھلا دیتا، یہاں تک کہ ایک مشرک شخص میرے پاس آیا اور بولا: اے بلال! میرے پاس گنجائش ہے، تم صرف مجھ سے قرض لیا کرو۔ میں نے ایسا ہی کیا۔ ایک دن میں نے وضو کیا، میں نماز کے لیے اذان دینے کے لیے اٹھنے لگا تو وہ مشرک شخص کچھ تاجروں کے ساتھ آیا، جب اس نے مجھے دیکھا تو بولا: اے حبشی! میں نے کہا: کیا ہے؟ تو اس نے مجھے برا بھلا کہا اور میرے بارے میں سختی سے کام لیا۔ اس نے دریافت کیا: کیا تم یہ بات جانتے ہو کہ مہینہ ختم ہونے میں کتنے دن رہ گئے ہیں؟ میں نے جواب دیا: جی ہاں، تھوڑا ہی وقت ہے۔ اس نے مجھ سے کہا: مہینہ ختم ہونے میں چار دن باقی رہ گئے ہیں، پھر میں نے تم سے وہ وصولی کر لینی ہے جو تمہارے ذمے لازم ہے، میں نے تمہیں قرض اس لیے نہیں دیا تھا کہ تم میرے نزدیک معزز ہو یا تمہارے آقا میرے نزدیک معزز ہیں، میں نے تمہیں قرض اس لیے دیا تھا تاکہ مجھے (قرض وصول نہ ہونے کی صورت میں) غلام حاصل ہو جائے، تو میں تم سے بکریاں چرواؤں گا، جس طرح تم پہلے چرایا کرتے تھے۔ سیدنا بلال رضی اللہ عنہ کہتے ہیں: میں بھی پریشان ہو گیا جس طرح لوگ پریشان ہوتے ہیں۔ خیر میں گیا، میں نے نماز کے لیے اذان دی، یہاں تک کہ جب میں نے عشاء کی نماز ادا کر لی، نبی اکرم صلی اللہ علیہ وسلم اپنے گھر واپس تشریف لے گئے تو میں نے آپ کے ہاں اندر آنے کی اجازت مانگی۔ آپ نے مجھے اجازت عطا کی۔ میں نے عرض کی: یا رسول اللہ صلی اللہ علیہ وسلم ! میرے والد آپ پر قربان ہوں، وہ مشرک جس کا میں نے آپ کے سامنے ذکر کیا تھا کہ میں اس سے قرض لیتا ہوں، اس نے مجھے اس اس طرح کی باتیں کی ہیں اور آپ کے پاس کوئی ایسی چیز بھی نہیں ہے جو آپ میری طرف سے ادا کر دیں اور میرے پاس بھی نہیں ہے اور وہ شخص مجھے رسوا کر دے گا۔ آپ مجھے اجازت دیجیے تاکہ میں ان قبائل کی طرف جاؤں جنہوں نے اسلام قبول کیا ہے تاکہ اللہ تعالیٰ اپنے رسول کو اتنا رزق عطا کر دے کہ وہ میرا قرض ادا کر دیں؟ نبی اکرم صلی اللہ علیہ وسلم نے ارشاد فرمایا: ”اگر تم یہ چاہتے ہو تو ایسا کر لو۔“ سیدنا بلال رضی اللہ عنہ کہتے ہیں: میں وہاں سے نکل کر اپنے گھر آیا، میں نے اپنی تلوار، اپنا ترکش، اپنی ڈھال، اپنے جوتے اپنے سرہانے رکھ لیے۔ میں نے اپنا رخ افق کی طرف کیا۔ میں جب بھی تھوڑی دیر کے لیے سوتا تھا، تو فوراً بیدار ہو جاتا تھا، لیکن اس رات میں ایسا سویا کہ صبح صادق ہو گئی۔ میں نے اٹھنے کا ارادہ کیا، اسی دوران ایک شخص دوڑتا ہوا آیا، وہ کہہ رہا تھا: نبی اکرم صلی اللہ علیہ وسلم کے پاس جاؤ۔ میں اٹھا اور آپ کی خدمت میں حاضر ہوا۔ وہاں چار سواریاں موجود تھیں جن پر ان کے پالان وغیرہ بندھے ہوئے تھے۔ میں نبی اکرم صلی اللہ علیہ وسلم کی خدمت میں حاضر ہوا، میں نے اندر آنے کی اجازت مانگی۔ آپ نے مجھ سے فرمایا: ”تمہارے لیے خوشخبری ہے، اللہ تعالیٰ نے تمہارے قرض کی ادائیگی کا بندوبست کر دیا ہے۔“ تو میں نے اس بات پر اللہ تعالیٰ کی حمد بیان کی۔ نبی اکرم صلی اللہ علیہ وسلم نے دریافت کیا: ”کیا تمہارا گزر ان چار سواریوں کے پاس نہیں ہوا جو باندھی ہوئی تھیں؟“ میں نے جواب دیا: جی ہاں! نبی اکرم صلی اللہ علیہ وسلم نے فرمایا: ”وہ سواریاں اور ان پر موجود کپڑے اور کھانا تمہارے ہوئے، یہ سب چیزیں مجھے فدک کے امیر نے تحفے کے طور پر بھیجی ہیں، تم انہیں حاصل کر لو اور اپنا قرض ادا کر دو۔“ سیدنا بلال رضی اللہ عنہ کہتے ہیں: میں نے ایسا ہی کیا۔ میں نے ان کے اوپر سے پالان اتار لیا اور پھر انہیں باندھ دیا، پھر میں صبح کی نماز کے لیے اذان دینے گیا، یہاں تک کہ جب نبی اکرم صلی اللہ علیہ وسلم نے نماز ادا کر لی تو میں نکل کر بقیع کے میدان میں آیا۔ میں نے اپنی انگلیاں کانوں میں دیں اور بلند آواز میں اعلان کیا: جس نے نبی اکرم صلی اللہ علیہ وسلم سے قرض واپس لینا تھا وہ آ جائے، اس کے بعد میں خرید و فروخت کرتا رہا اور قرض ادا کرتا رہا، یہاں تک کہ میرے ہاتھ میں دو اوقیہ یا ڈیڑھ اوقیہ باقی بچ گئے۔ میں مسجد کی طرف آیا، دن کا زیادہ حصہ رخصت ہو چکا تھا، نبی اکرم صلی اللہ علیہ وسلم مسجد میں اکیلے تشریف فرما تھے۔ میں نے آپ کو سلام کیا۔ نبی اکرم صلی اللہ علیہ وسلم نے دریافت کیا: ”تمہاری کیا صورت حال ہے؟“ میں نے عرض کی: اللہ تعالیٰ نے ہر وہ چیز ادا کروا دی ہے جو نبی اکرم صلی اللہ علیہ وسلم کے ذمے لازم تھی، کوئی بھی چیز (یعنی قرض) باقی نہیں رہا۔ نبی اکرم صلی اللہ علیہ وسلم نے فرمایا: ”کیا کوئی چیز باقی بچی ہے؟“ میں نے عرض کی: جی ہاں۔ نبی اکرم صلی اللہ علیہ وسلم نے فرمایا: ”تم دیکھو کہ اس کے ذریعے مجھے آرام پہنچانا۔“ پھر جب نبی اکرم صلی اللہ علیہ وسلم نے عشاء کی نماز ادا کر لی تو آپ نے مجھے بلایا، آپ نے دریافت کیا: ”تمہاری کیا صورت حال ہے؟“ میں نے عرض کی: وہ چیز میرے پاس ہے، ہمارے پاس کوئی بھی نہیں آیا۔ نبی اکرم صلی اللہ علیہ وسلم نے وہ رات مسجد میں گزاری، یہاں تک کہ صبح ہو گئی، آپ اگلا دن بھی مسجد میں رہے، یہاں تک کہ دن کا آخری حصہ آ گیا تو دو سوار آئے، میں ان دونوں کو ساتھ لے کر گیا، میں نے ان دونوں کو پہننے کے لیے کپڑے لے کر دیے، انہیں کھانا کھلایا، یہاں تک کہ جب نبی اکرم صلی اللہ علیہ وسلم نے عشاء کی نماز ادا کر لی، تو آپ نے مجھے بلایا۔ نبی اکرم صلی اللہ علیہ وسلم نے دریافت کیا: ”کیا صورت حال ہے؟“ میں نے عرض کی: یا رسول اللہ صلی اللہ علیہ وسلم ! اللہ تعالیٰ نے آپ کو اس چیز کی طرف سے راحت پہنچا دی ہے (یعنی وہ بقیہ مال بھی اللہ کی راہ میں خرچ ہو گیا ہے) تو نبی اکرم صلی اللہ علیہ وسلم نے اللہ تعالیٰ کی کبریائی بیان کی اور اللہ تعالیٰ کی حمد بیان کی، اس اندیشے کے تحت کہ آپ کو کہیں ایسی حالت میں موت نہ آ جائے کہ وہ مال آپ کے پاس موجود ہو، پھر میں نبی اکرم صلی اللہ علیہ وسلم کے ساتھ چلتا ہوا آیا۔ نبی اکرم صلی اللہ علیہ وسلم اپنی تمام ازواج کے پاس تشریف لے گئے، آپ نے ہر ایک زوجہ محترمہ کو سلام کیا، یہاں تک کہ آپ اس گھر میں آئے جہاں آپ نے رات بسر کرنی تھی۔ (سیدنا بلال رضی اللہ عنہ نے فرمایا) یہ وہ صورت حال تھی جس کے بارے میں تم نے مجھ سے دریافت کیا تھا۔ [صحیح ابن حبان/كتاب التاريخ/حدیث: 6351]

سیدنا عبداللہ بن عباس رضی اللہ عنہما بیان کرتے ہیں: سیدنا عمر بن خطاب رضی اللہ عنہ نبی اکرم صلی اللہ علیہ وسلم کی خدمت میں حاضر ہوئے، آپ صلی اللہ علیہ وسلم اس وقت چٹائی پر لیٹے ہوئے تھے جس کا نشان آپ صلی اللہ علیہ وسلم کے پہلو پر لگ چکا تھا، سیدنا عمر رضی اللہ عنہ نے عرض کی: یا رسول اللہ صلی اللہ علیہ وسلم ! اگر آپ اس سے زیادہ نرم بچھونا استعمال کرتے (تو یہ مناسب ہوتا)؛ نبی اکرم صلی اللہ علیہ وسلم نے فرمایا: ”میرا دنیا سے کیا واسطہ اور دنیا کا مجھ سے کیا واسطہ؟ اس ذات کی قسم! جس کے دستِ قدرت میں میری جان ہے، میری اور دنیا کی مثال یوں ہے جیسے کوئی سوار شخص تیز گرم دن میں سفر کرتے ہوئے گھڑی بھر کے لیے کسی درخت کے سائے میں آئے اور پھر وہ اسے وہیں چھوڑ کر آگے روانہ ہو جائے۔“ [صحیح ابن حبان/كتاب التاريخ/حدیث: 6352]

سیدنا عبداللہ بن عمر رضی اللہ عنہما بیان کرتے ہیں کہ نبی اکرم صلی اللہ علیہ وسلم سیدہ فاطمہ رضی اللہ عنہا کے ہاں تشریف لائے، آپ صلی اللہ علیہ وسلم نے ان کے دروازے پر پردہ لٹکا ہوا دیکھا تو گھر کے اندر تشریف نہیں لائے۔ آپ صلی اللہ علیہ وسلم جب بھی گھر میں تشریف لاتے تھے تو سب سے پہلے سیدہ فاطمہ رضی اللہ عنہا کے پاس تشریف لاتے تھے۔ جب سیدنا علی رضی اللہ عنہ گھر آئے اور انہوں نے سیدہ فاطمہ رضی اللہ عنہا کو پریشان دیکھا تو دریافت کیا: کیا ہوا؟ سیدہ فاطمہ رضی اللہ عنہا نے بتایا: نبی اکرم صلی اللہ علیہ وسلم میرے ہاں تشریف لائے، لیکن آپ صلی اللہ علیہ وسلم گھر کے اندر نہیں آئے۔ سیدنا علی رضی اللہ عنہ نبی اکرم صلی اللہ علیہ وسلم کی خدمت میں حاضر ہوئے، انہوں نے عرض کی: یا رسول اللہ! فاطمہ اس بات پر پریشان ہیں کہ آپ صلی اللہ علیہ وسلم ان کے ہاں آئے لیکن گھر کے اندر تشریف نہیں لائے۔ نبی اکرم صلی اللہ علیہ وسلم نے فرمایا: ”میرا اور دنیا کا کیا واسطہ؟ میرا اور نقش و نگار کا کیا واسطہ؟“ سیدنا علی رضی اللہ عنہ، سیدہ فاطمہ رضی اللہ عنہا کے پاس تشریف لے گئے اور انہیں نبی اکرم صلی اللہ علیہ وسلم کے اس فرمان کے بارے میں بتایا، تو سیدہ فاطمہ رضی اللہ عنہا نے فرمایا: آپ صلی اللہ علیہ وسلم سے دریافت کیجیے کہ آپ مجھے کیا حکم دیتے ہیں۔ نبی اکرم صلی اللہ علیہ وسلم نے فرمایا: ”تم اس سے کہو کہ اس (پردے کو) بنو فلاں کو بھجوا دے۔“ [صحیح ابن حبان/كتاب التاريخ/حدیث: 6353]

سیدنا سفینہ رضی اللہ عنہ بیان کرتے ہیں: نبی اکرم صلی اللہ علیہ وسلم ایسے گھر میں داخل نہیں ہوتے تھے جہاں نقش و نگار بنے ہوئے ہوں۔ [صحیح ابن حبان/كتاب التاريخ/حدیث: 6354]

قتادہ بیان کرتے ہیں: ہم لوگ سیدنا انس بن مالک رضی اللہ عنہ کے پاس آئے۔ ان کا نانبائی کھڑا ہوا (روٹیاں لگا رہا تھا) تو سیدنا انس رضی اللہ عنہ نے فرمایا: تم لوگ کھانا کھاؤ کیونکہ میں نے نبی اکرم صلی اللہ علیہ وسلم کو کبھی بھی پتلی (یعنی چھنے ہوئے آٹے کی) روٹی کھاتے ہوئے اور بھنی ہوئی بکری کھاتے ہوئے نہیں دیکھا، یہاں تک کہ آپ صلی اللہ علیہ وسلم اللہ تعالیٰ کی بارگاہ میں حاضر ہو گئے۔ [صحیح ابن حبان/كتاب التاريخ/حدیث: 6355]

سیدنا انس رضی اللہ عنہ بیان کرتے ہیں کہ نبی اکرم صلی اللہ علیہ وسلم کل کے لیے کوئی چیز ذخیرہ کر کے نہیں رکھتے تھے۔ [صحیح ابن حبان/كتاب التاريخ/حدیث: 6356]

سیدنا عمر بن خطاب رضی اللہ عنہ نے فرمایا: بنو نضیر کی زمینیں وہ ہیں جو اللہ تعالیٰ نے اپنے رسول کو مالِ فے کے طور پر عطا فرمائی تھیں۔ مسلمانوں نے ان کے حصول کے لیے گھوڑے اور سواریاں نہیں دوڑائے تھے، تو یہ نبی اکرم صلی اللہ علیہ وسلم کے لیے مخصوص تھیں؛ آپ صلی اللہ علیہ وسلم ان میں سے اپنے اہل خانہ کے سال بھر کا خرچ حاصل کرتے تھے اور جو باقی بچ جاتا تھا، وہ اللہ کی راہ میں ساز و سامان اور اسلحے کے لیے استعمال فرماتے تھے۔ [صحیح ابن حبان/كتاب التاريخ/حدیث: 6357]