سیدنا براء رضی اللہ عنہ بیان کرتے ہیں: میں نے نبی اکرم صلی اللہ علیہ وسلم کو تلاوت کرتے ہوئے سنا ہے، میں نے آپ صلی اللہ علیہ وسلم کی تلاوت سے زیادہ خوبصورت کوئی چیز نہیں سنی۔ [صحیح ابن حبان/كتاب التاريخ/حدیث: 6318]

سیدنا عبداللہ بن مسعود رضی اللہ عنہ بیان کرتے ہیں کہ میں نے نبی اکرم صلی اللہ علیہ وسلم کو یہ ارشاد فرماتے ہوئے سنا: ”میں نے گزشتہ رات حجون کے مقام پر کچھ جنات کے سامنے تلاوت کی جو ایک دوسرے کے ساتھی تھے۔“ (امام ابن حبان رحمہ اللہ فرماتے ہیں:) سیدنا عبداللہ بن مسعود رضی اللہ عنہ کا یہ کہنا کہ میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے: ”گزشتہ رات میں نے جنوں کے سامنے تلاوت کی“، یہ اس بات کا واضح بیان ہے کہ سیدنا عبداللہ بن مسعود رضی اللہ عنہ اس رات موجود نہیں تھے۔ اگر وہ اس رات موجود ہوتے تو وہ اس واقعے کو نبی اکرم صلی اللہ علیہ وسلم سے حکایت کے طور پر نقل نہ کرتے کہ آپ صلی اللہ علیہ وسلم نے جنات کے سامنے تلاوت کی تھی، بلکہ وہ اس بات کی اطلاع دیتے کہ وہ اس وقت وہاں موجود تھے جب نبی اکرم صلی اللہ علیہ وسلم نے جنات کے سامنے تلاوت کی تھی۔ [صحیح ابن حبان/كتاب التاريخ/حدیث: 6319]

علقمہ بیان کرتے ہیں: میں نے سیدنا عبداللہ بن مسعود رضی اللہ عنہ سے دریافت کیا کہ جنات سے ملاقات کی رات آپ لوگوں میں سے کوئی ایک نبی اکرم صلی اللہ علیہ وسلم کے ساتھ تھا؟ انہوں نے جواب دیا: ہم میں سے کوئی بھی نبی اکرم صلی اللہ علیہ وسلم کے ساتھ نہیں تھا۔ ایک رات ہم نے نبی اکرم صلی اللہ علیہ وسلم کو مکہ میں غیر موجود پایا تو ہم نے سوچا شاید آپ صلی اللہ علیہ وسلم کو دھوکے سے (شہید کر دیا گیا ہے) یا نقصان پہنچایا گیا ہے۔ وہ رات ہم نے ایسی حالت میں گزاری جو کسی بھی قوم نے بدترین حالت میں گزاری ہو، جب سحری کا وقت ہوا (راوی کو شک ہے شاید یہ الفاظ ہیں) صبح کا وقت ہوا تو ہم اسی حالت میں تھے کہ آپ صلی اللہ علیہ وسلم حرا پہاڑ کی طرف سے تشریف لائے، ہم نے عرض کی: یا رسول اللہ صلی اللہ علیہ وسلم ! پھر ہم نے آپ صلی اللہ علیہ وسلم کے سامنے اپنی اس حالت کا ذکر کیا جو ہم نے گزاری تھی۔ نبی اکرم صلی اللہ علیہ وسلم نے فرمایا: ”جنات کا نمائندہ میرے پاس آیا تھا، میں ان کے پاس چلا گیا، میں نے ان کے سامنے تلاوت کی۔“ (راوی بیان کرتے ہیں) پھر نبی اکرم صلی اللہ علیہ وسلم تشریف لے گئے اور آپ صلی اللہ علیہ وسلم نے ہمیں ان جنات کے اور ان کی آگ کے نشانات دکھائے۔ [صحیح ابن حبان/كتاب التاريخ/حدیث: 6320]

عمرو بن مرہ بیان کرتے ہیں: میں نے ابوعبیدہ کو یہ بیان کرتے ہوئے سنا، میں نے مسروق کو یہ کہتے ہوئے سنا کہ تمہارے والد (سیدنا عبداللہ بن مسعود رضی اللہ عنہ) نے مجھے یہ حدیث سنائی ہے: ”جنوں سے ملاقات کی رات ایک درخت نے نبی اکرم صلی اللہ علیہ وسلم کو جنات کے بارے میں خبر دی تھی۔“ [صحیح ابن حبان/كتاب التاريخ/حدیث: 6321]

امام جعفر صادق رضی اللہ عنہ اپنے والد (امام محمد باقر رضی اللہ عنہ) کے حوالے سے سیدنا جابر رضی اللہ عنہ کا یہ بیان نقل کرتے ہیں کہ نبی اکرم صلی اللہ علیہ وسلم نے یہ آیت ﴿وَاتَّخِذُوا مِنْ مَقَامِ إِبْرَاهِيمَ مُصَلًّى﴾ [سورة البقرة: 125] تلاوت کی: ”تم مقام ابراہیم کو جائے نماز بنا لو۔“ [صحیح ابن حبان/كتاب التاريخ/حدیث: 6322]

امام محمد باقر رحمہ اللہ اور نافع بیان کرتے ہیں کہ عمرو بن نافع نے یہ بات بتائی، یہ صاحب نبی اکرم صلی اللہ علیہ وسلم کی ازواج کے عہد میں قرآن کریم کی کتابت کیا کرتے تھے، وہ کہتے ہیں: سیدہ حفصہ رضی اللہ عنہا نے مجھ سے قرآن کریم لکھنے کی فرمائش کی اور انہوں نے فرمایا: جب تم سورۃ البقرہ کی اس آیت ﴿حَافِظُوا عَلَى الصَّلَوَاتِ وَالصَّلَاةِ الْوُسْطَىٰ وَقُومُوا لِلَّهِ قَانِتِينَ﴾ [سورة البقرة: 238] تک پہنچو تو اسے اس وقت تک تحریر نہ کرنا جب تک تم میرے پاس نہیں آتے، میں یہ تمہیں اسی طرح املاء کرواؤں گی جس طرح میں نے نبی اکرم صلی اللہ علیہ وسلم کی زبانی سن کر اسے یاد رکھا ہے۔ راوی کہتے ہیں: جب میں اس آیت پر پہنچا تو میں وہ ورقہ لے کر سیدہ حفصہ رضی اللہ عنہا کی خدمت میں حاضر ہوا جس پر میں قرآن لکھ رہا تھا تو سیدہ حفصہ رضی اللہ عنہا نے فرمایا: تم یوں لکھو: ”تم لوگ نمازوں کی حفاظت کرو اور بطور خاص درمیانی نماز کی (جو عصر کی نماز ہے) اور تم اللہ کی بارگاہ میں عاجزی کے ساتھ کھڑے رہو۔“ [صحیح ابن حبان/كتاب التاريخ/حدیث: 6323]

سیدنا براء بن عازب رضی اللہ عنہما نبی اکرم صلی اللہ علیہ وسلم کا یہ فرمان نقل کرتے ہیں: ”جب مومن قبر میں اس بات کی گواہی دیتا ہے کہ اللہ تعالیٰ کے علاوہ اور کوئی معبود نہیں ہے اور وہ سیدنا محمد صلی اللہ علیہ وسلم کو پہچان لیتا ہے تو اللہ تعالیٰ کے اس فرمان ﴿يُثَبِّتُ اللَّهُ الَّذِينَ آمَنُوا بِالْقَوْلِ الثَّابِتِ فِي الْحَيَاةِ الدُّنْيَا وَفِي الْآخِرَةِ﴾ [سورة إبراهيم: 27] سے یہی مراد ہے: ”اللہ تعالیٰ ایمان والوں کو ثابت قول پر دنیاوی زندگی میں اور آخرت میں ثابت قدم رکھے گا۔“” [صحیح ابن حبان/كتاب التاريخ/حدیث: 6324]

سیدنا ابی بن کعب رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”اگر تم چاہو تو اس پر اجر حاصل کر سکتے ہو۔“ یعنی اس میں لفظ کو تخفیف کے ساتھ پڑھا گیا۔ [صحیح ابن حبان/كتاب التاريخ/حدیث: 6325]

سیدنا عبداللہ بن عباس رضی اللہ عنہما، سیدنا ابی بن کعب رضی اللہ عنہ کا یہ بیان نقل کرتے ہیں کہ نبی اکرم صلی اللہ علیہ وسلم نے فرمایا: ”(سیدنا موسیٰ علیہ السلام نے کہا:) میں نے اس کے بعد آپ سے کوئی سوال کیا تو آپ میرے ساتھ نہ رہیے گا۔“ اس میں لفظ ہمزہ کے ساتھ ہے: ”آپ کو میری طرف سے عذر پہنچ گیا ہے۔“ [سورة الكهف: 76] [صحیح ابن حبان/كتاب التاريخ/حدیث: 6326]

سیدنا عبداللہ رضی اللہ عنہ بیان کرتے ہیں کہ نبی اکرم صلی اللہ علیہ وسلم یہ تلاوت کرتے تھے: ” ﴿فَهَلْ مِنْ مُدَّكِرٍ﴾ [سورة القمر: 15] “۔ [صحیح ابن حبان/كتاب التاريخ/حدیث: 6327]