سیدنا ابوسعید خدری رضی اللہ عنہ بیان کرتے ہیں کہ نبی اکرم صلی اللہ علیہ وسلم پردے میں موجود کنواری لڑکیوں سے بھی زیادہ حیا والے تھے، جب آپ صلی اللہ علیہ وسلم کوئی ایسی چیز دیکھتے جو آپ کو ناپسند ہوتی تو ہمیں اس کا اثر آپ کے چہرے پر محسوس ہو جاتا تھا۔ [صحیح ابن حبان/كتاب التاريخ/حدیث: 6308]

سیدنا ابوہریرہ رضی اللہ عنہ فرماتے ہیں: میں نے ایسی کوئی چیز نہیں دیکھی جو نبی اکرم صلی اللہ علیہ وسلم سے زیادہ خوبصورت ہو، یوں محسوس ہوتا تھا جیسے سورج آپ کے چہرے میں چلتا ہے اور میں نے نبی اکرم صلی اللہ علیہ وسلم سے زیادہ تیز چلنے والا کوئی شخص نہیں دیکھا، یوں لگتا تھا جیسے آپ کے لیے زمین کو لپیٹ لیا گیا، ہم مشکل سے (اتنی تیز رفتاری سے) چلتے تھے اور آپ کسی تکلف کے بغیر (اتنی تیز رفتاری سے چلتے تھے)۔ [صحیح ابن حبان/كتاب التاريخ/حدیث: 6309]

سیدنا انس رضی اللہ عنہ بیان کرتے ہیں کہ نبی اکرم صلی اللہ علیہ وسلم کا رنگ چمک دار تھا اور آپ کا پسینہ موتیوں جیسا تھا، جب آپ چلتے تھے تو تیز رفتاری سے اور ذرا آگے کی طرف جھک کر چلتے تھے۔ [صحیح ابن حبان/كتاب التاريخ/حدیث: 6310]

سیدنا علی بن ابی طالب رضی اللہ عنہ جب نبی اکرم صلی اللہ علیہ وسلم کا حلیہ بیان کرتے تھے تو یہ بیان کرتے تھے: آپ صلی اللہ علیہ وسلم بھرپور جسم کے مالک تھے، آپ کا رنگ سفید تھا جس میں سرخی ملی ہوئی تھی، آپ کی داڑھی گھنی تھی، آپ کے سینے سے ناف تک بالوں کی پتلی سی لکیر تھی، آپ صلی اللہ علیہ وسلم کے دونوں ہاتھ اور دونوں پاؤں پرگوشت تھے، جب آپ صلی اللہ علیہ وسلم چلتے تھے تو یوں محسوس ہوتا جیسے بلندی سے تیزی سے نیچے کی طرف آ رہے ہیں، میں نے آپ صلی اللہ علیہ وسلم سے پہلے اور آپ صلی اللہ علیہ وسلم کے بعد آپ صلی اللہ علیہ وسلم جیسا کوئی نہیں دیکھا۔ [صحیح ابن حبان/كتاب التاريخ/حدیث: 6311]

سیدنا جابر بن عبداللہ رضی اللہ عنہما بیان کرتے ہیں کہ نبی اکرم صلی اللہ علیہ وسلم کے اصحاب جب آپ کے ہمراہ کہیں جاتے تھے تو وہ آپ کے آگے چلا کرتے تھے اور وہ نبی اکرم صلی اللہ علیہ وسلم کی پشت کو فرشتوں کے لیے چھوڑ دیتے تھے۔ [صحیح ابن حبان/كتاب التاريخ/حدیث: 6312]

سیدنا جبیر بن مطعم رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”میرے کچھ نام ہیں، میں «مُحَمَّدٌ» ”محمد“ ہوں، «أَحْمَدُ» ”احمد“ ہوں، میں «الْمَاحِي» ”ماحی (یعنی مٹانے والا)“ ہوں، میرے ذریعے اللہ تعالیٰ نے کفر کو مٹا دیا ہے اور میں «الْحَاشِرُ» ”حاشر“ ہوں تمام لوگوں کا حشر جس کے قدموں پر کیا جائے گا اور میں «الْعَاقِبُ» ”عاقب“ ہوں، جس کے بعد کوئی اور نبی نہیں آئے گا۔“ (راوی کہتے ہیں:) اللہ تعالیٰ نے آپ کا نام «رَؤُوفٌ» ”رؤف“ اور «رَحِیمٌ» ”رحیم“ بھی بیان کیا ہے۔ [صحیح ابن حبان/كتاب التاريخ/حدیث: 6313]

سیدنا ابو موسیٰ اشعری رضی اللہ عنہ بیان کرتے ہیں کہ نبی اکرم صلی اللہ علیہ وسلم نے ہمارے سامنے اپنے کچھ اسماء بیان کیے، آپ صلی اللہ علیہ وسلم نے فرمایا: ”میں محمد صلی اللہ علیہ وسلم ہوں، احمد صلی اللہ علیہ وسلم ہوں، مقفی صلی اللہ علیہ وسلم ہوں، حاشر ہوں، نبی الرحمہ ہوں، نبی الملحمہ ہوں۔“ [صحیح ابن حبان/كتاب التاريخ/حدیث: 6314]

سیدنا حذیفہ بن یمان رضی اللہ عنہ بیان کرتے ہیں: میں نے نبی اکرم صلی اللہ علیہ وسلم کو مدینہ منورہ کی گلی میں یہ بات ارشاد فرماتے ہوئے سنا: ”میں «مُحَمَّدٌ» ”محمد“ ہوں، «أَحْمَدُ» ”احمد“ ہوں، میں «الْحَاشِرُ» ”حاشر“ ہوں، «الْمُقَفِّي» ”مقفی“ ہوں اور «نَبِيُّ الرَّحْمَةِ» ”نبی الرحمت“ ہوں۔“ [صحیح ابن حبان/كتاب التاريخ/حدیث: 6315]

قتادہ بیان کرتے ہیں: میں نے سیدنا انس بن مالک رضی اللہ عنہ سے نبی اکرم صلی اللہ علیہ وسلم کی قرأت کے بارے میں دریافت کیا، تو انہوں نے بتایا کہ نبی اکرم صلی اللہ علیہ وسلم آواز کو کھینچا کرتے تھے۔ [صحیح ابن حبان/كتاب التاريخ/حدیث: 6316]

سیدنا انس بن مالک رضی اللہ عنہ بیان کرتے ہیں کہ نبی اکرم صلی اللہ علیہ وسلم کی قرأت کھینچ کر ہوتی تھی، آپ صلی اللہ علیہ وسلم «بِسْمِ اللّٰهِ» کو کھینچ کر پڑھتے تھے، لفظ «الرَّحْمٰنِ» کو کھینچ کر پڑھتے تھے اور لفظ «الرَّحِيْمِ» کو کھینچ کر پڑھتے تھے۔ [صحیح ابن حبان/كتاب التاريخ/حدیث: 6317]