سیدنا انس بن مالک رضی اللہ عنہ بیان کرتے ہیں: نبی اکرم صلی اللہ علیہ وسلم کل کے لیے کوئی چیز ذخیرہ کر کے نہیں رکھتے تھے۔ [صحیح ابن حبان/كتاب التاريخ/حدیث: 6378]

سیدنا عمرو بن عاص رضی اللہ عنہ نے لوگوں کو خطبہ دیتے ہوئے بیان کیا: اے لوگو! تمہارے نبی صلی اللہ علیہ وسلم دنیا سے سب سے زیادہ بے رغبت تھے اور اب تم دنیا کی طرف سب سے زیادہ راغب ہو۔ [صحیح ابن حبان/كتاب التاريخ/حدیث: 6379]

سیدنا انس بن مالک رضی اللہ عنہ بیان کرتے ہیں: سیدہ ام سلیم رضی اللہ عنہا نے میرے ذریعے ایک برتن میں کچھ تازہ کھجوریں نبی اکرم صلی اللہ علیہ وسلم کو بھجوائیں، میں نے آپ صلی اللہ علیہ وسلم کو گھر میں نہیں پایا۔ لوگوں نے بتایا: نبی اکرم صلی اللہ علیہ وسلم قریب ہی تشریف لے گئے ہیں، تو آپ صلی اللہ علیہ وسلم ایک درزی کے ہاں تھے جو آپ صلی اللہ علیہ وسلم کا آزاد کردہ غلام تھا، اس نے آپ صلی اللہ علیہ وسلم کے لیے کھانا تیار کیا تھا، جس میں کدو اور گوشت تھا، راوی کہتے ہیں: میں نے دیکھا کہ نبی اکرم صلی اللہ علیہ وسلم کو کدو اچھے لگے ہیں، تو میں نے وہ نبی اکرم صلی اللہ علیہ وسلم کے آگے کرنا شروع کر دیے۔ پھر نبی اکرم صلی اللہ علیہ وسلم اپنے گھر واپس تشریف لائے تو میں نے وہ برتن آپ صلی اللہ علیہ وسلم کے آگے رکھا۔ نبی اکرم صلی اللہ علیہ وسلم انہیں کھاتے بھی رہے اور تقسیم بھی کرتے رہے۔ یہاں تک کہ اس برتن میں کوئی چیز باقی نہیں رہی۔ [صحیح ابن حبان/كتاب التاريخ/حدیث: 6380]

سیدنا ابوہریرہ رضی اللہ عنہ بیان کرتے ہیں: نبی اکرم صلی اللہ علیہ وسلم تحفہ قبول کر لیتے تھے، البتہ صدقہ قبول نہیں کرتے تھے۔ [صحیح ابن حبان/كتاب التاريخ/حدیث: 6381]

سیدنا ابوہریرہ رضی اللہ عنہ بیان کرتے ہیں کہ نبی اکرم صلی اللہ علیہ وسلم کی خدمت میں جب کوئی کھانا آتا تو آپ صلی اللہ علیہ وسلم اس کے بارے میں دریافت کر لیتے تھے، اگر یہ بتایا جاتا کہ یہ تحفہ ہے تو آپ صلی اللہ علیہ وسلم اور ہم اسے کھا لیتے تھے اور اگر یہ بتایا جاتا کہ یہ صدقہ ہے تو آپ صلی اللہ علیہ وسلم یہ فرماتے تھے: ”تم لوگ اسے کھا لو“، نبی اکرم صلی اللہ علیہ وسلم خود اسے نہیں کھاتے تھے۔ [صحیح ابن حبان/كتاب التاريخ/حدیث: 6382]

سیدنا ابوہریرہ رضی اللہ عنہ روایت کرتے ہیں، نبی اکرم صلی اللہ علیہ وسلم نے ارشاد فرمایا: ”میں نے یہ طے کیا ہے کہ اب میں کوئی تحفہ قبول نہیں کروں گا، صرف کسی قریشی یا انصاری یا ثقفی یا دوسی شخص (کا تحفہ قبول کروں گا)۔“ [صحیح ابن حبان/كتاب التاريخ/حدیث: 6383]

سیدنا عبداللہ بن عباس رضی اللہ عنہما بیان کرتے ہیں: ایک دیہاتی نے نبی اکرم صلی اللہ علیہ وسلم کو تحفے کے طور پر کوئی چیز دی، نبی اکرم صلی اللہ علیہ وسلم نے اس کے بدلے کے طور پر کوئی چیز اسے دے دی اور دریافت کیا: ”کیا تم راضی ہو؟“ اس نے جواب دیا: جی نہیں، نبی اکرم صلی اللہ علیہ وسلم نے اسے مزید عطا کیا اور دریافت کیا: ”کیا تم راضی ہو؟“ اس نے جواب دیا: جی ہاں، تو نبی اکرم صلی اللہ علیہ وسلم نے ارشاد فرمایا: ”میں نے طے کیا ہے اب میں صرف قریشی یا انصاری یا ثقفی شخص سے تحفہ قبول کروں گا۔“ [صحیح ابن حبان/كتاب التاريخ/حدیث: 6384]

سیدہ عائشہ صدیقہ رضی اللہ عنہا بیان کرتی ہیں: میں نے عرض کی: یا رسول اللہ صلی اللہ علیہ وسلم ! کیا آپ وتر ادا کیے بغیر سونے لگے ہیں؟ میں نے وتر کی اہمیت کا اظہار کرتے ہوئے یہ سوال کیا، تو نبی اکرم صلی اللہ علیہ وسلم نے ارشاد فرمایا: ”اے عائشہ! میری آنکھیں سو جاتی ہیں لیکن میرا دل نہیں سوتا ہے۔“ [صحیح ابن حبان/كتاب التاريخ/حدیث: 6385]

سیدنا ابوہریرہ رضی اللہ عنہ، نبی اکرم صلی اللہ علیہ وسلم کا یہ فرمان نقل کرتے ہیں: ”میری آنکھیں سو جاتی ہیں، لیکن میرا دل نہیں سوتا ہے۔“ [صحیح ابن حبان/كتاب التاريخ/حدیث: 6386]

سیدنا انس بن مالک رضی اللہ عنہ بیان کرتے ہیں کہ نبی اکرم صلی اللہ علیہ وسلم نہ بہت زیادہ لمبے تھے اور نہ ہی بہت زیادہ چھوٹے قد کے تھے، آپ صلی اللہ علیہ وسلم نہ تو زیادہ گورے تھے اور نہ ہی گندمی رنگت کے تھے، آپ کے بال نہ تو بالکل گھنگھریالے تھے اور نہ بالکل سیدھے تھے۔ اللہ تعالیٰ نے آپ کو چالیس برس کی عمر میں مبعوث فرمایا، آپ صلی اللہ علیہ وسلم نے دس سال مکہ میں گزارے اور دس سال مدینہ منورہ میں گزارے، ساٹھ سال کی عمر میں اللہ تعالیٰ نے آپ کو وفات دی، اس وقت آپ کے سر مبارک اور داڑھی مبارک میں بیس سفید بال بھی نہ تھے (یعنی ان سے کم تھے)۔ [صحیح ابن حبان/كتاب التاريخ/حدیث: 6387]