ابواسحاق بیان کرتے ہیں: میں نے ایک شخص کو اسود بن یزید سے سوال کرتے ہوئے سنا، وہ اس وقت مسجد میں قرآن کی تعلیم دے رہے تھے۔ (سوال یہ تھا) آپ یہ آیت کیسے پڑھتے ہیں؟ ﴿فَهَلْ مِن مُّدَّكِرٍ﴾ [سورة القمر: 17] اس میں دال پڑھتے ہیں یا ذال پڑھتے ہیں؟ تو انہوں نے فرمایا: دال پڑھتا ہوں کیونکہ میں نے سیدنا عبداللہ بن مسعود رضی اللہ عنہ کو یہ بیان کرتے ہوئے سنا ہے کہ نبی اکرم صلی اللہ علیہ وسلم نے ” «فَهَلْ مِنْ مُدَّكِرٍ» “ تلاوت کی یعنی دال کے ساتھ پڑھا۔ [صحیح ابن حبان/كتاب التاريخ/حدیث: 6328]

سیدنا عبداللہ رضی اللہ عنہ بیان کرتے ہیں کہ نبی اکرم صلی اللہ علیہ وسلم نے مجھے یہ آیت یوں پڑھنا سکھائی: ” «إِنِّي أَنَا الرَّزَّاقُ ذُو الْقُوَّةِ الْمَتِينُ» ﴿إِنِّي أَنَا الرَّزَّاقُ ذُو الْقُوَّةِ الْمَتِينُ﴾ [سورة الذاريات: 58] ”بے شک میں ہی رزق دینے والا، بڑی قوت والا اور نہایت مضبوط ہوں۔“” [صحیح ابن حبان/كتاب التاريخ/حدیث: 6329]

علقمہ رحمہ اللہ بیان کرتے ہیں: میں شام آیا، سیدنا ابودرداء رضی اللہ عنہ کو اس کی اطلاع ملی تو وہ ہمارے پاس تشریف لے آئے، تو انہوں نے دریافت کیا: ”تم میں سے کون شخص میرے سامنے ”ابنِ امِ عبد“ کے طریقے کے مطابق تلاوت کر سکتا ہے؟“ راوی کہتے ہیں: ہم نے جواب دیا: ”ہم سب کر سکتے ہیں۔“ انہوں نے دریافت کیا: ”تم میں قرأت کا سب سے زیادہ علم کس کو ہے؟“ راوی کہتے ہیں: میرے ساتھیوں نے میری طرف اشارہ کیا۔ سیدنا ابودرداء رضی اللہ عنہ نے دریافت کیا: ”تمہیں یاد ہے؟“ میں نے جواب دیا: ”جی ہاں۔“ انہوں نے دریافت کیا: ”سیدنا عبداللہ رضی اللہ عنہ سورۃ اللیل کیسے پڑھتے تھے؟“ میں نے کہا: یوں پڑھتے تھے: ﴿وَاللَّيْلِ إِذَا يَغْشٰى وَالنَّهَارِ إِذَا تَجَلّٰى وَالذَّكَرِ وَالْأُنثٰى﴾ [سورة الليل: 1-3] انہوں نے فرمایا: ”کیا تمہیں یہ الفاظ سیدنا عبداللہ رضی اللہ عنہ کی زبانی یاد ہیں؟“ میں نے جواب دیا: ”جی ہاں۔“ انہوں نے فرمایا: ”اس ذات کی قسم! جس کے علاوہ کوئی معبود نہیں ہے، میں نے بھی یہ الفاظ اسی طرح نبی اکرم صلی اللہ علیہ وسلم کی زبانی سیکھے ہیں، لیکن یہ لوگ چاہتے ہیں کہ میں (دوسرے الفاظ کے ذریعے تلاوت کروں) اللہ کی قسم! میں تو ان کی بات کبھی نہیں مانوں گا۔“ [صحیح ابن حبان/كتاب التاريخ/حدیث: 6330]

ابراہیم بیان کرتے ہیں کہ علقمہ رحمہ اللہ شام گئے، وہ وہاں مسجد میں آئے، وہاں انہوں نے دو رکعات ادا کیں، پھر دعا کی: «اللَّهُمَّ يَسِّرْ لِي جَلِيسًا صَالِحًا» ”اے اللہ! مجھے نیک ہم نشین عطا کر۔“ پھر وہ سیدنا ابودرداء رضی اللہ عنہ کی خدمت میں حاضر ہوئے تو انہوں نے دریافت کیا: ”تم کہاں سے تعلق رکھتے ہو؟“ انہوں نے جواب دیا: ”کوفہ سے۔“ انہوں نے دریافت کیا: ”کیا تمہارے درمیان نبی اکرم صلی اللہ علیہ وسلم کے خاص راز دان موجود نہیں ہیں کہ اس راز کا ان کے علاوہ کسی کو پتا نہیں ہوتا تھا اور وہ سیدنا حذیفہ رضی اللہ عنہ ہیں؟ کیا تمہارے درمیان وہ صاحب موجود نہیں ہیں جنہیں اللہ تعالیٰ نے اپنے نبی صلی اللہ علیہ وسلم کی زبانی شیطان سے محفوظ قرار دیا اور وہ سیدنا عمار بن یاسر رضی اللہ عنہ ہیں؟ کیا تمہارے درمیان سیاہی والے شخص سیدنا عبداللہ بن مسعود رضی اللہ عنہ نہیں ہیں؟“ سیدنا ابودرداء رضی اللہ عنہ نے دریافت کیا: ”تم یہ آیت ﴿وَاللَّيْلِ إِذَا يَغْشَى * وَالنَّهَارِ إِذَا تَجَلَّى﴾ [سورة الليل: 1-2] کیسے پڑھتے ہو؟“ میں نے کہا: ﴿وَالذَّكَرِ وَالْأُنْثَى﴾ [سورة الليل: 3] ۔ سیدنا ابودرداء رضی اللہ عنہ نے فرمایا: ”یہ لوگ مسلسل مجھے اس بارے میں شبہ کا شکار کرتے رہے ہیں حالانکہ میں نے نبی اکرم صلی اللہ علیہ وسلم کی زبانی خود یہ آیت ” ﴿وَالذَّكَرِ وَالْأُنْثَى﴾ “ [سورة الليل: 3] سنی ہے۔“ [صحیح ابن حبان/كتاب التاريخ/حدیث: 6331]

سیدنا جابر بن عبداللہ رضی اللہ عنہما بیان کرتے ہیں کہ نبی اکرم صلی اللہ علیہ وسلم نے یہ آیت تلاوت فرمائی: ﴿يَحْسَبُ أَنَّ مَالَهُ أَخْلَدَهُ﴾ [سورة الهمزة: 3] ”وہ یہ گمان کرتا ہے کہ اس کا مال اسے ہمیشہ رکھے گا۔“ [صحیح ابن حبان/كتاب التاريخ/حدیث: 6332]

سیدنا واثلہ بن اسقع رضی اللہ عنہ روایت کرتے ہیں، نبی اکرم صلی اللہ علیہ وسلم نے ارشاد فرمایا: ”بے شک اللہ تعالیٰ نے سیدنا اسماعیل علیہ السلام کی اولاد میں سے کنانہ کو منتخب کیا، کنانہ میں سے قریش کو منتخب کیا۔ قریش میں سے بنو ہاشم کو منتخب کیا اور بنو ہاشم میں سے مجھے منتخب کیا۔“ [صحیح ابن حبان/كتاب التاريخ/حدیث: 6333]

سیدنا انس بن مالک رضی اللہ عنہ بیان کرتے ہیں: نبی اکرم صلی اللہ علیہ وسلم کے پاس سیدنا جبرائیل علیہ السلام آئے۔ نبی اکرم صلی اللہ علیہ وسلم اس وقت بچوں کے ساتھ کھیل رہے تھے۔ (یعنی یہ نبی اکرم صلی اللہ علیہ وسلم کے بچپن کا واقعہ ہے) انہوں نے نبی اکرم صلی اللہ علیہ وسلم کو پکڑا، آپ صلی اللہ علیہ وسلم کو لٹایا، آپ صلی اللہ علیہ وسلم کے دل کو چیرا اور اس میں سے جما ہوا خون نکالا اور بولے: یہ آپ کے اندر شیطان کا حصہ تھا، پھر انہوں نے نبی اکرم صلی اللہ علیہ وسلم کا قلب مبارک سونے سے بنے ہوئے طشت میں رکھ کر آبِ زم زم کے ذریعے دھویا پھر اسے واپس اس کی جگہ پر رکھ دیا۔ بچے دوڑتے ہوئے آپ کی والدہ یعنی آپ کی دائی اماں کے پاس آئے اور انہوں نے کہا: سیدنا محمد صلی اللہ علیہ وسلم کو قتل کر دیا گیا، وہ لوگ آپ صلی اللہ علیہ وسلم کے پاس آئے تو آپ کی رنگت تبدیل ہو چکی تھی، سیدنا انس رضی اللہ عنہ بیان کرتے ہیں: میں نے نبی اکرم صلی اللہ علیہ وسلم کے سینہ مبارک میں سیے جانے کا نشان دیکھا ہے۔ (امام ابن حبان رحمہ اللہ بیان کرتے ہیں:) نبی اکرم صلی اللہ علیہ وسلم کے سینہ مبارک کو شق کرنے کا واقعہ (پہلی مرتبہ) اس وقت ہوا جب آپ بچے تھے اور بچوں کے ساتھ کھیل رہے تھے۔ تو آپ کے اندر سے جما ہوا خون نکالا گیا۔ پھر جب اللہ تعالیٰ نے آپ صلی اللہ علیہ وسلم کو معراج پر لے جانے کا ارادہ کیا تو اس نے سیدنا جبرائیل علیہ السلام کو حکم دیا، انہوں نے دوسری مرتبہ آپ صلی اللہ علیہ وسلم کا شق صدر کیا۔ آپ صلی اللہ علیہ وسلم کے دل کو نکال کر دوبارہ اسے دھویا اور پھر اسے اس کی جگہ پر رکھ دیا، تو ایسا دو مرتبہ ہوا اور دو مختلف موقعوں پر ہوا۔ ان دونوں روایات میں کوئی تضاد نہیں ہے۔ [صحیح ابن حبان/كتاب التاريخ/حدیث: 6334]

عبداللہ بن جعفر رضی اللہ عنہما سیدہ حلیمہ سعدیہ رضی اللہ عنہا کا یہ بیان نقل کرتے ہیں جو نبی اکرم صلی اللہ علیہ وسلم کی رضاعی ماں تھیں۔ وہ بیان کرتی ہیں: میں بنو سعد بن بکر کی کچھ خواتین کے ہمراہ مکہ آئی تاکہ دودھ پلانے کے لیے کوئی بچہ حاصل کروں، میں اپنی گدھی پر سوار ہو کر آئی تھی جو کہ قحط سالی کی وجہ سے انتہائی کمزور ہو چکی تھی۔ میرے ساتھ میرا شوہر بھی تھا۔ ہمارے ساتھ ہماری ایک اونٹنی بھی تھی، اللہ کی قسم! اس کا دودھ بہت کم نکلتا تھا۔ میرے ساتھ میرا چھوٹا سا بچہ بھی تھا۔ اس کے رونے کی وجہ سے ہم رات کو سو نہیں پاتے تھے کیونکہ میرے سینے میں اتنا دودھ نہیں تھا جو اس کی کفایت کر سکے، جب ہم لوگ مکہ آئے تو ہم میں سے ہر عورت کو پیش کش کی گئی کہ وہ نبی اکرم صلی اللہ علیہ وسلم کو دودھ پلانے کے لیے لے جائے، لیکن کسی بھی عورت نے اسے قبول نہیں کیا کیونکہ خواتین کو یہ لالچ ہوتا تھا کہ دودھ پلانے کا معاوضہ بچے کے باپ سے وصول کریں گی اور نبی اکرم صلی اللہ علیہ وسلم یتیم تھے، ہم لوگ یہ کہا کرتے تھے: کسی یتیم کے بارے میں اس کی ماں کیا کر سکتی ہے۔ میرے ساتھ آنے والی خواتین میں سے ہر ایک نے کوئی نہ کوئی بچہ گود میں لے لیا۔ مجھے یہ بات پسند نہیں تھی کہ میں ایسی حالت میں واپس جاؤں کہ مجھے کوئی بچہ نہ ملا ہو جبکہ میری ساتھی خواتین بچہ لے چکی ہوں۔ میں نے اپنے شوہر سے کہا: اللہ کی قسم! میں اس یتیم بچے کو لے کر چلی جاؤں گی، ہم اسے ضرور حاصل کریں گے۔ میں نبی اکرم صلی اللہ علیہ وسلم کے گھر آئی، میں نے آپ کو حاصل کر لیا۔ میں اپنی رہائشی جگہ پر واپس آئی تو میرے شوہر نے کہا: تم نے اسے حاصل کر لیا ہے؟ میں نے جواب دیا: جی ہاں! اللہ کی قسم! اس کی وجہ یہ ہے کہ مجھے ان کے علاوہ اور کوئی بچہ نہیں ملا۔ شوہر نے کہا: تم نے ٹھیک کیا ہے، ہو سکتا ہے اللہ تعالیٰ اس میں ہمارے لیے کوئی بھلائی رکھ دے۔ سیدہ حلیمہ رضی اللہ عنہا بیان کرتی ہیں: اللہ کی قسم! نبی اکرم صلی اللہ علیہ وسلم میری گود میں تھے کہ اسی دوران میری چھاتی میں اللہ تعالیٰ نے اتنا دودھ پیدا کر دیا کہ نبی اکرم صلی اللہ علیہ وسلم نے اسے پیا اور سیر ہو کر پیا۔ آپ کے رضاعی بھائی نے بھی اسے پی لیا یعنی سیدہ حلیمہ رضی اللہ عنہا کے بیٹے نے بھی اسے پی لیا، یہاں تک کہ وہ بھی سیر ہو گیا۔ رات کے وقت میرا شوہر ہماری اونٹنی کے پاس گیا تو اس کا بھی دودھ اترا ہوا تھا۔ میرے شوہر نے اس کا اتنا دودھ دوہ لیا جتنا ہم چاہتے تھے۔ اس نے پیا اور سیر ہو کر پیا، میں نے بھی پیا اور سیر ہو گئی۔ اس رات ہم نے پیٹ بھر کر اور سیر ہو کر رات گزاری۔ ہمارے بچے بھی سوتے رہے۔ بچے کے باپ یعنی سیدہ حلیمہ رضی اللہ عنہا کے شوہر نے کہا: اللہ کی قسم! اے حلیمہ میرا یہ خیال ہے کہ تمہیں ایک مبارک وجود ملا ہے۔ ہمارے بچے آرام سے سو رہے ہیں اور وہ سیر ہیں۔ سیدہ حلیمہ رضی اللہ عنہا بیان کرتی ہیں: پھر ہم لوگ وہاں سے روانہ ہوئے، اللہ کی قسم! میری گدھی سب سے زیادہ آگے چل رہی تھی، یہاں تک کہ میرے ساتھی یہ کہتے تھے کہ تمہارا ستیاناس ہو تم اس کو آرام سے لے کر چلو، کیا یہ تمہاری وہی گدھی نہیں ہے جس پر سوار ہو کر تم آئی تھی؟ تو میں جواب دیتی: جی ہاں! اللہ کی قسم وہی ہے، لیکن وہ بدستور آگے چلتی رہی، یہاں تک کہ ہم بنو سعد بن بکر کے علاقے میں اپنے گھر آ گئے۔ ہم ایک ایسی جگہ پر آئے تھے جو سب سے زیادہ خشک تھی۔ اس ذات کی قسم جس کے دستِ قدرت میں حلیمہ کی جان ہے! دوسرے لوگ صبح کے وقت اپنی بکریوں کو چرنے کے لیے بھیج دیتے تھے اور میری بکریوں کا چرواہا بھی میری بکریاں لے جاتا تھا، تو میری بکریاں جب شام کو واپس آتی تھیں تو دودھ سے بھری ہوئی ہوتی تھیں جبکہ ان کی بکریاں جب واپس آتی تھیں تو بھوکی ہوتی تھیں، ہلاکت کے قریب ہوتی تھیں اور ان میں دودھ بھی نہیں ہوتا تھا۔ سیدہ حلیمہ رضی اللہ عنہا بیان کرتی ہیں: ہم جتنا چاہتے تھے دودھ پی لیتے تھے جبکہ باقی قبیلے میں کسی کو ایک قطرہ بھی دودھ دوہنے کے لیے اور پینے کے لیے نہیں ملتا تھا، تو وہ لوگ اپنے چرواہوں سے یہ کہتے تھے کہ تمہارا ستیاناس ہو، کیا تم اپنی بکریاں اس جگہ نہیں چراتے جہاں حلیمہ کا چرواہا چراتا ہے؟ پھر وہ لوگ بھی اپنی بکریاں اسی گھاٹی میں چراتے تھے جس میں میری بکریاں چرتی تھیں، لیکن اس کے باوجود ان کی بکریاں بھوکی آتی تھیں، ان میں دودھ نہیں ہوتا تھا جبکہ میری بکریاں دودھ سے بھری ہوئی آتی تھیں۔ نبی اکرم صلی اللہ علیہ وسلم کی نشوونما ایک دن میں اتنی ہو رہی تھی جتنی کسی عام بچے کی ایک مہینے میں ہوتی ہے اور آپ کی نشوونما ایک ماہ میں اتنی ہو گئی جتنی کسی بچے کی ایک سال میں ہوتی ہے، جب آپ کی عمر ایک سال ہوئی تو آپ بھرپور صحت مند لگتے تھے۔ سیدہ حلیمہ رضی اللہ عنہا بیان کرتی ہیں: پھر ہم لوگ نبی اکرم صلی اللہ علیہ وسلم کی والدہ کی خدمت میں آئے۔ میں نے ان سے یہ درخواست کی اور میرے شوہر نے بھی ان سے یہ درخواست کی کہ آپ اس بچے کو ہمیں دے دیں تاکہ ہم اسے واپس لے جائیں کیونکہ ہمیں اس کے بارے میں یہ اندیشہ ہے کہ یہ مکہ میں وبا کا شکار نہ ہو جائے۔ سیدہ حلیمہ رضی اللہ عنہا بیان کرتی ہیں: ہم نے نبی اکرم صلی اللہ علیہ وسلم کی جو برکت دیکھی تھی، ہمیں اس کا لالچ تھا، تو ہم مسلسل ان کے ساتھ بات چیت کرتے رہے، یہاں تک کہ انہوں نے یہ فرمایا: تم اسے ساتھ لے جاؤ۔ ہم نبی اکرم صلی اللہ علیہ وسلم کو ساتھ لے کر واپس آ گئے، نبی اکرم صلی اللہ علیہ وسلم دو ماہ ہمارے پاس ٹھہرے رہے۔ ایک مرتبہ آپ صلی اللہ علیہ وسلم اپنے بھائی کے ساتھ گھروں کے پیچھے کھیل رہے تھے، وہ دونوں ہماری بکری کے بچے کے ساتھ کھیل رہے تھے۔ اس دوران نبی اکرم صلی اللہ علیہ وسلم کا رضاعی بھائی تیزی سے دوڑتا ہوا ہمارے پاس آیا اور مجھ سے اور اپنے والد سے بولا: میرے قریشی بھائی کے پاس جائیں، اس کے پاس دو آدمی آئے ہیں انہوں نے اسے لٹا دیا ہے اور اس کا پیٹ چیر دیا ہے۔ سیدہ حلیمہ رضی اللہ عنہا بیان کرتی ہیں: ہم لوگ دوڑتے ہوئے نبی اکرم صلی اللہ علیہ وسلم کے پاس آئے تو آپ صلی اللہ علیہ وسلم کھڑے ہوئے تھے، آپ کے چہرے کی رنگت تبدیل تھی۔ آپ کے والد نے آپ کو گلے سے لگا لیا، میں نے بھی آپ کو گلے سے لگا لیا، پھر ہم نے دریافت کیا: اے میرے بیٹے! تمہیں کیا ہوا ہے؟ آپ صلی اللہ علیہ وسلم نے بتایا: ”میرے پاس دو آدمی آئے، انہوں نے سفید کپڑے پہنے ہوئے تھے، انہوں نے مجھے لٹا لیا پھر انہوں نے میرے پیٹ کو چیر دیا، اللہ کی قسم! مجھے اندازہ نہیں ہوا کہ انہوں نے کیا کیا۔“ سیدہ حلیمہ رضی اللہ عنہا بیان کرتی ہیں: ہم نے آپ کو گود میں اٹھا لیا اور آپ کو لے کر واپس آ گئے۔ سیدہ حلیمہ رضی اللہ عنہا بیان کرتی ہیں: آپ کے رضاعی والد نے کہا: اے حلیمہ! مجھے لگتا ہے اس لڑکے کے ساتھ کوئی نہ کوئی خاص معاملہ ہے، تم چلو ہم اسے اس کے گھر والوں کے سپرد کر آتے ہیں، اس سے پہلے کہ اس کی طرف سے کوئی ایسی صورت حال سامنے آئے جس کا ہمیں اندیشہ ہے۔ سیدہ حلیمہ رضی اللہ عنہا بیان کرتی ہیں: ہم آپ کو لے کر واپس آئے تو سیدہ آمنہ رضی اللہ عنہا نے دریافت کیا: تم لوگ اسے واپس لے کر کیوں آ گئے ہو؟ تم تو اسے اپنے پاس رکھنا چاہ رہے تھے۔ سیدہ حلیمہ رضی اللہ عنہا بیان کرتی ہیں: میں نے عرض کی: جی نہیں، اللہ کی قسم! ہم نے اس کی کفالت کر لی ہے اور ہمارے ذمے جو حق لازم تھا وہ ہم نے ادا کر دیا ہے، پھر ہمیں اس کے بعد کسی مشکل پیش آنے کا اندیشہ ہوا (تو ہم نے یہ سوچا کہ یہ اپنے گھر میں ہی ٹھیک رہے گا)۔ سیدہ آمنہ رضی اللہ عنہا نے کہا: اس کے ساتھ کیا معاملہ پیش آیا ہے؟ اللہ کی قسم! تم دونوں مجھے بتاؤ۔ سیدہ آمنہ رضی اللہ عنہا مسلسل ہمارے ساتھ اصرار کرتی رہیں، یہاں تک کہ ہم نے انہیں اصل واقعہ بتا دیا۔ سیدہ آمنہ رضی اللہ عنہا نے دریافت کیا: کیا تمہیں اس کے بارے میں خوف ہے؟ ہرگز نہیں! میرے اس بیٹے کی بڑی شان ہو گی، میں تمہیں اس بارے میں بتاتی ہوں؛ جب مجھے اس کا حمل ہوا تو مجھے حمل کی کوئی پریشانی محسوس نہیں ہوئی، یہ میرے لیے انتہائی آسان اور زیادہ برکت والی صورت حال تھی، پھر مجھے ایک نور دکھائی دیا جو انتہائی چمکدار تھا، جب میں نے اسے جنم دیا تو وہ نور میرے اندر سے نکلا اور اس نور کی وجہ سے بصریٰ میں موجود اونٹوں کی گردنیں میرے سامنے روشن ہو گئیں (یعنی مجھے نظر آنے لگیں) پھر میں نے اسے جنم دیا تو یہ اس طرح باہر نہیں آیا جس طرح عام طور پر بچے باہر آتے ہیں، بلکہ جب یہ باہر آیا تو اس نے اپنے ہاتھ زمین پر رکھے اور اپنا سر آسمان کی طرف اٹھایا اور دعا مانگی، تو تم (اس واقعہ کو) اپنے والے واقعے کے ساتھ ملا کر دیکھ لو۔ امام ابن حبان رحمہ اللہ فرماتے ہیں: وہب بن جریر نے اپنی سند کے ساتھ یہ روایت نقل کی ہے اور عبداللہ بن محمد نے بھی یہ روایت اپنی سند کے ساتھ نقل کی ہے۔ [صحیح ابن حبان/كتاب التاريخ/حدیث: 6335]

سیدنا انس رضی اللہ عنہ بیان کرتے ہیں کہ سیدنا جبرائیل علیہ السلام نبی اکرم صلی اللہ علیہ وسلم کے پاس آئے (یہ نبی اکرم صلی اللہ علیہ وسلم کے بچپن کی بات ہے)، نبی اکرم صلی اللہ علیہ وسلم اس وقت بچوں کے ساتھ کھیل رہے تھے۔ سیدنا جبرائیل علیہ السلام نے نبی اکرم صلی اللہ علیہ وسلم کو پکڑا، آپ کو لٹایا اور آپ کے قلب مبارک کو چیر دیا، اس میں سے خون کا ایک لوتھڑا نکالا اور بولے: «هَذَا حَظُّ الشَّيْطَانِ مِنْكَ» ”یہ آپ کے اندر شیطان کا حصہ تھا“، پھر انہوں نے سونے کے بنے ہوئے طشت میں آبِ زم زم کے ذریعے آپ کے قلب مبارک کو دھویا اور پھر اسے دوبارہ اس کی جگہ رکھ دیا۔ بچے دوڑتے ہوئے نبی اکرم صلی اللہ علیہ وسلم کی والدہ یعنی دائی ماں کے پاس آئے اور بولے: ”سیدنا محمد صلی اللہ علیہ وسلم کو قتل کر دیا گیا ہے“۔ وہ لوگ نبی اکرم صلی اللہ علیہ وسلم کے پاس آئے تو آپ کے چہرے کی رنگت بدلی ہوئی تھی۔ سیدنا انس رضی اللہ عنہ بیان کرتے ہیں کہ نبی اکرم صلی اللہ علیہ وسلم کے سینہ مبارک میں اس سیون (ٹانکوں کے نشان) کو میں نے دیکھا ہے۔ [صحیح ابن حبان/كتاب التاريخ/حدیث: 6336]

سیدنا ابوہریرہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”کیا تم سمجھتے ہو کہ میری توجہ صرف قبلہ کی طرف ہوتی ہے؟ اللہ کی قسم! تمہارا خشوع اور تمہارا رکوع کرنا مجھ سے مخفی نہیں رہتا، میں اپنی پشت کے پیچھے سے بھی تمہیں دیکھ لیتا ہوں۔“ [صحیح ابن حبان/كتاب التاريخ/حدیث: 6337]