حزر بیان کرتے ہیں کہ ایک شخص نے سیدہ عائشہ رضی اللہ عنہا سے نبی اکرم صلی اللہ علیہ وسلم کی وراثت کے بارے میں دریافت کیا تو سیدہ عائشہ رضی اللہ عنہا نے فرمایا: کیا تم نبی اکرم صلی اللہ علیہ وسلم کی وراثت کے بارے میں مجھ سے سوال کر رہے ہو؟ تمہارا باپ نہ رہے، اللہ کی قسم! نبی اکرم صلی اللہ علیہ وسلم نے وراثت میں کوئی دینار یا درہم یا غلام یا کنیز یا بکری یا اونٹ نہیں چھوڑا تھا۔ [صحیح ابن حبان/كتاب التاريخ/حدیث: 6368]

سیدنا انس رضی اللہ عنہ کے بارے میں یہ بات منقول ہے، انہوں نے نبی اکرم صلی اللہ علیہ وسلم کا ذکر کرتے ہوئے یہ بات بتائی کہ آپ صلی اللہ علیہ وسلم سب سے بہتر تھے، سب سے زیادہ سخی تھے اور سب سے زیادہ بہادر تھے۔ ایک مرتبہ اہل مدینہ خوف کا شکار ہوئے، لوگ آواز کی سمت گئے تو ان کی ملاقات نبی اکرم صلی اللہ علیہ وسلم سے ہوئی، آپ صلی اللہ علیہ وسلم ان لوگوں سے پہلے ہی آواز کی طرف چلے گئے تھے۔ آپ صلی اللہ علیہ وسلم سیدنا ابوطلحہ رضی اللہ عنہ کے گھوڑے کی ننگی پیٹھ پر سوار تھے، اس پر زین موجود نہ تھی اور نبی اکرم صلی اللہ علیہ وسلم کی گردن میں تلوار تھی۔ آپ صلی اللہ علیہ وسلم نے لوگوں سے فرمایا: ”تم لوگ گھبراؤ نہیں“، آپ صلی اللہ علیہ وسلم نے ان لوگوں کو واپس کیا، پھر آپ صلی اللہ علیہ وسلم نے اس گھوڑے کے بارے میں فرمایا: ”ہم نے اسے «بَحْرًا» ”سمندر“ پایا، بے شک یہ «بَحْرٌ» ”سمندر“ ہے“ (یعنی یہ انتہائی تیز رفتار ہے)۔ [صحیح ابن حبان/كتاب التاريخ/حدیث: 6369]

سیدنا عبداللہ بن عباس رضی اللہ عنہما بیان کرتے ہیں کہ نبی اکرم صلی اللہ علیہ وسلم سب سے زیادہ سخی تھے اور رمضان کے مہینے میں آپ صلی اللہ علیہ وسلم اور زیادہ سخی ہو جاتے تھے، جب آپ صلی اللہ علیہ وسلم کی ملاقات سیدنا جبرائیل علیہ السلام سے ہوتی تھی، سیدنا جبرائیل علیہ السلام روزانہ رات کے وقت آپ صلی اللہ علیہ وسلم کی خدمت میں حاضر ہوتے تھے اور آپ صلی اللہ علیہ وسلم کے ساتھ قرآن کا دور کیا کرتے تھے، جب سیدنا جبرائیل علیہ السلام آپ صلی اللہ علیہ وسلم کی خدمت میں (قرآن کا دور کرنے کے لیے) حاضر ہوتے تھے تو نبی اکرم صلی اللہ علیہ وسلم اس وقت چلتی ہوئی ہوا سے بھی زیادہ سخی ہوتے تھے۔ [صحیح ابن حبان/كتاب التاريخ/حدیث: 6370]

سیدہ عائشہ صدیقہ رضی اللہ عنہا بیان کرتی ہیں: نبی اکرم صلی اللہ علیہ وسلم نے اپنے وصال تک کبھی بھی ایک دن میں دو مرتبہ سیر ہو کر کھانا نہیں کھایا تھا۔ [صحیح ابن حبان/كتاب التاريخ/حدیث: 6371]

سیدہ عائشہ صدیقہ رضی اللہ عنہا بیان کرتی ہیں: سیدنا محمد صلی اللہ علیہ وسلم کے گھر والوں کا بعض اوقات کوئی ایسا مہینہ بھی گزرتا کہ اس میں انہیں روٹی نہیں ملتی تھی۔ راوی نے عرض کی: اے ام المؤمنین! نبی اکرم صلی اللہ علیہ وسلم کیا کھایا کرتے تھے؟ سیدہ عائشہ رضی اللہ عنہا نے فرمایا: ہمارے کچھ انصاری پڑوسی تھے، اللہ تعالیٰ انہیں جزائے خیر دے، ان کے پاس دودھ ہوتا تھا وہ نبی اکرم صلی اللہ علیہ وسلم کی خدمت میں تحفے کے طور پر بھیج دیتے تھے۔ [صحیح ابن حبان/كتاب التاريخ/حدیث: 6372]

سیدنا انس رضی اللہ عنہ بیان کرتے ہیں کہ ایک شخص نبی اکرم صلی اللہ علیہ وسلم کی خدمت میں حاضر ہوا تو آپ نے اسے دو پہاڑوں کے درمیان موجود بکریاں عطا کر دیں، وہ شخص اپنی قوم کے پاس آیا اور بولا: ”اے میری قوم! اسلام قبول کر لو، اللہ کی قسم! سیدنا محمد صلی اللہ علیہ وسلم آدمی کو اتنا کچھ عطا کر دیتے ہیں کہ پھر اسے فاقہ کا خوف نہیں رہتا۔“ (سیدنا انس رضی اللہ عنہ بیان کرتے ہیں:) بعض اوقات کوئی شخص (اسلام قبول کرنے کے لیے) نبی اکرم صلی اللہ علیہ وسلم کی خدمت میں حاضر ہوتا تھا، اس کا مقصد صرف دنیاوی فائدے کا حصول ہوتا تھا، لیکن پھر یوں ہوتا کہ اس کا دین اس کے نزدیک دنیا و مافیہا سے زیادہ محبوب ہو جاتا۔ [صحیح ابن حبان/كتاب التاريخ/حدیث: 6373]

سیدنا انس رضی اللہ عنہ بیان کرتے ہیں: ایک شخص نبی اکرم صلی اللہ علیہ وسلم کی خدمت میں حاضر ہوا، نبی اکرم صلی اللہ علیہ وسلم نے اسے دو پہاڑوں کے درمیان موجود تمام بکریاں دینے کا حکم دیا، وہ اپنی قوم کے پاس واپس جا کر بولا: تم لوگ اسلام قبول کر لو، کیونکہ سیدنا محمد صلی اللہ علیہ وسلم آدمی کو اتنا عطا کر دیتے ہیں کہ اسے فاقہ کا خوف نہیں رہتا۔ [صحیح ابن حبان/كتاب التاريخ/حدیث: 6374]

سیدنا انس بن مالک رضی اللہ عنہ بیان کرتے ہیں کہ ایک دن نبی اکرم صلی اللہ علیہ وسلم مسجد میں تشریف لائے، آپ نے موٹی نجرانی چادر اوڑھی ہوئی تھی۔ ایک دیہاتی آپ کے پیچھے سے آیا، اس نے آپ کی چادر کا کنارہ پکڑا اور اسے کھینچا، تو اس چادر کا نشان نبی اکرم صلی اللہ علیہ وسلم کی گردن پر بن گیا، اس نے کہا: اے سیدنا محمد! آپ کے پاس اللہ تعالیٰ کا جو مال ہے اس میں سے ہمیں بھی عطا کریں، نبی اکرم صلی اللہ علیہ وسلم نے اس کی طرف رخ کیا، آپ مسکرائے اور فرمایا: ”اسے کچھ دے دو!“ [صحیح ابن حبان/كتاب التاريخ/حدیث: 6375]

سیدنا جابر بن عبداللہ رضی اللہ عنہما بیان کرتے ہیں کہ نبی اکرم صلی اللہ علیہ وسلم سے جب بھی کوئی چیز مانگی گئی، تو آپ نے کبھی انکار نہیں کیا۔ [صحیح ابن حبان/كتاب التاريخ/حدیث: 6376]

سیدنا جابر رضی اللہ عنہ بیان کرتے ہیں کہ نبی اکرم صلی اللہ علیہ وسلم سے جب بھی کوئی چیز مانگی گئی، تو آپ نے کبھی ”نہ“ نہیں فرمائی۔ [صحیح ابن حبان/كتاب التاريخ/حدیث: 6377]