سیدنا جابر بن عبداللہ رضی اللہ عنہما بیان کرتے ہیں کہ نبی اکرم صلی اللہ علیہ وسلم نے ارشاد فرمایا ہے: ”مجھے پانچ ایسی چیزیں عطا کی گئی ہیں جو مجھ سے پہلے کسی کو نہیں دی گئیں۔ ایک مہینے کے فاصلے سے (طاری ہونے والے) رعب کے ذریعے میری مدد کی گئی۔ میرے لیے تمام روئے زمین کو جائے نماز اور طہارت کے حصول کا ذریعہ بنایا گیا۔ میری امت کے جس بھی فرد کو نماز کا وقت ہو جائے وہ (وہیں) نماز ادا کر لے۔ میرے لیے مال غنیمت کو حلال قرار دیا گیا جو مجھ سے پہلے کسی کے لیے حلال قرار نہیں دیا گیا تھا اور مجھے شفاعت عطا کی گئی اور ہر نبی کو اپنی مخصوص قوم کی طرف مبعوث کیا گیا اور مجھے تمام لوگوں کی طرف مبعوث کیا گیا۔“ [صحیح ابن حبان/كتاب التاريخ/حدیث: 6398]

سیدنا عوف بن مالک رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”مجھے چار ایسی چیزیں عطا کی گئی ہیں جو ہم سے پہلے کسی کو بھی نہیں عطا کی گئیں۔ میں نے اپنے پروردگار سے پانچویں چیز کی درخواست کی، تو اس نے مجھے وہ بھی عطا کر دی، پہلے کسی نبی کو اس کی مخصوص بستی کی طرف مبعوث کیا جاتا تھا۔ وہ اس بستی سے آگے نہیں جاتا تھا، لیکن مجھے تمام بنی نوع انسان کی طرف مبعوث کیا گیا اور ہمارا دشمن ایک ماہ کی مسافت کے فاصلے سے بھی ہم سے مرعوب ہو جاتا ہے اور میرے لیے تمام روئے زمین کو طہارت کے حصول کا ذریعہ اور جائے نماز قرار دیا گیا اور ہمارے لیے خمس کو حلال قرار دیا گیا ہے، جو ہم سے پہلے کسی کے لیے حلال نہیں ہوا تھا اور میں نے اپنے پروردگار سے پانچویں چیز یہ مانگی، میں نے اس سے یہ درخواست کی کہ میری امت کا جو فرد اس کی بارگاہ میں ایسی حالت میں حاضر ہو کہ وہ اس کی وحدانیت کا اعتراف کرتا ہو تو اللہ تعالیٰ اسے جنت میں داخل کر دے، تو اللہ تعالیٰ نے یہ چیز بھی مجھے عطا کر دی۔“ [صحیح ابن حبان/كتاب التاريخ/حدیث: 6399]

سیدنا حذیفہ رضی اللہ عنہ روایت کرتے ہیں کہ نبی اکرم صلی اللہ علیہ وسلم نے ارشاد فرمایا: ”مجھے لوگوں پر تین حوالے سے فضیلت دی گئی ہے: ہماری صفوں کو فرشتوں کی صفوں کی مانند قرار دیا گیا، ہمارے لیے تمام روئے زمین کو جائے نماز قرار دیا گیا اور اس کی مٹی کو ہمارے لیے طہارت کے حصول کا ذریعہ قرار دیا گیا جب ہمیں پانی نہیں ملتا، اور مجھے سورہ بقرہ کی آخری آیات عرش کے نیچے موجود خزانے سے عطا کی گئی ہیں، اس جیسی آیات مجھ سے پہلے اور میرے بعد کسی کو عطا نہیں کی جائیں گی۔“ [صحیح ابن حبان/كتاب التاريخ/حدیث: 6400]

سیدنا ابوہریرہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”مجھے دیگر انبیاء پر چھ حوالوں سے فضیلت عطا کی گئی: مجھے جامع کلمات عطا کیے گئے، رعب کے ذریعے میری مدد کی گئی، میرے لیے مالِ غنیمت کو حلال قرار دیا گیا، میرے لیے زمین کو طہارت کے حصول کا ذریعہ اور جائے نماز بنایا گیا، مجھے تمام مخلوق کی طرف مبعوث کیا گیا اور میرے ذریعے انبیاء کے سلسلے کو ختم کر دیا گیا۔“ [صحیح ابن حبان/كتاب التاريخ/حدیث: 6401]

سیدنا عبداللہ رضی اللہ عنہ بیان کرتے ہیں کہ سیدنا محمد صلی اللہ علیہ وسلم کو کلام کا آغاز کرنے والے اور اس کا اختتام کرنے والے (یعنی جامع و مانع) کلمات عطا کیے گئے (راوی کو شک ہے شاید یہ الفاظ ہیں) بھلائی کی جامع اور اختتامی باتیں عطا کی گئیں۔ ہمیں یہ بات معلوم نہیں تھی کہ جب ہم نماز کے دوران بیٹھے ہوئے ہوں تو ہمیں کیا پڑھنا چاہیے، یہاں تک کہ نبی اکرم صلی اللہ علیہ وسلم نے ہمیں اس بات کی تعلیم دی۔ آپ صلی اللہ علیہ وسلم نے ارشاد فرمایا: ”تم یہ پڑھو: «التَّحِيَّاتُ لِلّٰهِ وَالصَّلَوَاتُ وَالطَّيِّبَاتُ، السَّلَامُ عَلَيْكَ أَيُّهَا النَّبِيُّ وَرَحْمَةُ اللّٰهِ وَبَرَكَاتُهُ، السَّلَامُ عَلَيْنَا وَعَلَى عِبَادِ اللّٰهِ الصَّالِحِينَ، أَشْهَدُ أَنْ لَا إِلَهَ إِلَّا اللّٰهُ وَحْدَهُ لَا شَرِيكَ لَهُ وَأَشْهَدُ أَنَّ مُحَمَّدًا عَبْدُهُ وَرَسُولُهُ» ”ہر طرح کی زبانی، جسمانی اور مالی عبادات اللہ تعالیٰ کے لیے مخصوص ہیں۔ اے نبی! آپ پر سلام ہو، اللہ تعالیٰ کی رحمتیں اور برکتیں نازل ہوں۔ ہم پر اور اللہ تعالیٰ کے تمام نیک بندوں پر بھی سلام ہو۔ میں اس بات کی گواہی دیتا ہوں کہ اللہ تعالیٰ کے علاوہ اور کوئی معبود نہیں ہے۔ وہی ایک معبود ہے۔ اس کا کوئی شریک نہیں ہے اور میں اس بات کی گواہی دیتا ہوں کہ سیدنا محمد صلی اللہ علیہ وسلم اس کے بندے اور اس کے رسول ہیں۔““ [صحیح ابن حبان/كتاب التاريخ/حدیث: 6402]

سیدنا ابوہریرہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”مجھے دیگر انبیاء پر چھ حوالوں سے فضیلت عطا کی گئی ہے: مجھے جامع کلمات عطا کیے گئے ہیں، رعب کے ذریعے میری مدد کی گئی ہے، میرے لیے مالِ غنیمت کو حلال قرار دیا گیا ہے، میرے لیے تمام روئے زمین کو طہارت کے حصول کا ذریعہ اور جائے نماز قرار دیا گیا ہے، مجھے تمام مخلوق کی طرف مبعوث کیا گیا ہے اور میرے ذریعے انبیاء کے سلسلے کو ختم کیا گیا ہے۔“ [صحیح ابن حبان/كتاب التاريخ/حدیث: 6403]

سیدنا عرباض بن ساریہ فزاری رضی اللہ عنہ بیان کرتے ہیں، میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے: ”میں اللہ تعالیٰ کی بارگاہ میں اس وقت بھی «خَاتَمَ النَّبِيِّينَ» ”خاتم النبیین“ لکھ دیا گیا تھا جب سیدنا آدم علیہ السلام کا خمیر تیار ہو رہا تھا۔ اور میں عنقریب تمہیں اس کے آغاز کے بارے میں بتاؤں گا (میں) اپنے جد امجد سیدنا ابراہیم علیہ السلام کی دعا، سیدنا عیسیٰ علیہ السلام کی بشارت اور اپنی والدہ کے دیکھے ہوئے اس خواب (کا نتیجہ) ہوں جو انہوں نے اس وقت دیکھا تھا جب انہوں نے مجھے جنم دیا تھا کہ ان کے جسم سے ایک نور نکلا جس کے ذریعے شام کے محلات روشن ہو گئے تھے۔“ [صحیح ابن حبان/كتاب التاريخ/حدیث: 6404]

سیدنا ابوہریرہ رضی اللہ عنہ بیان کرتے ہیں کہ نبی اکرم صلی اللہ علیہ وسلم نے ارشاد فرمایا ہے: ”میری اور مجھ سے پہلے والے انبیاء کی مثال ایک ایسے شخص کی مانند ہے جو ایک عمارت تعمیر کرتا ہے اور بہت عمدہ تعمیر کرتا ہے، وہ اسے مکمل کر دیتا ہے لیکن ایک گوشے میں ایک اینٹ کی جگہ چھوڑ دیتا ہے، لوگ اس عمارت کا چکر لگاتے ہیں، اس کو پسند کرتے ہیں اور یہ کہتے ہیں: یہ اینٹ کیوں نہیں رکھی گئی؟“ نبی اکرم صلی اللہ علیہ وسلم فرماتے ہیں: ”میں وہ اینٹ ہوں، میں انبیاء کے سلسلے کو ختم کرنے والا ہوں۔“ اللہ تعالیٰ ان پر درود نازل فرمائے۔ [صحیح ابن حبان/كتاب التاريخ/حدیث: 6405]

سیدنا ابوہریرہ رضی اللہ عنہ بیان کرتے ہیں، میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے: ”میں لوگوں میں سے سب سے زیادہ ابن مریم کے قریب ہوں۔ تمام انبیاء علاتی بھائی ہیں، لیکن میرے اور ان کے درمیان کوئی اور نبی نہیں ہے۔“ راوی کہتے ہیں: سیدنا ابوہریرہ رضی اللہ عنہ یہ بھی بیان کرتے تھے: نبی اکرم صلی اللہ علیہ وسلم نے ارشاد فرمایا ہے: ”میری اور دیگر انبیاء کی مثال ایک ایسے محل کی مانند ہے جس کی تعمیر عمدہ کی گئی ہو لیکن اس میں ایک اینٹ کی جگہ چھوڑ دی گئی ہو، دیکھنے والے لوگ اس کا چکر لگائیں اور اس کی عمدہ تعمیر پر حیران ہوں، لیکن اس ایک اینٹ کی جگہ خالی رہنے پر (حیران ہوتے ہوں) وہ اس کے علاوہ اس عمارت میں کوئی اور عیب نہ نکال سکیں، تو میں اس ایک اینٹ کی جگہ ہوں، میرے ذریعے رسولوں (کی بعثت) کے سلسلے کو ختم کر دیا گیا۔“ [صحیح ابن حبان/كتاب التاريخ/حدیث: 6406]

سیدنا ابوہریرہ رضی اللہ عنہ روایت کرتے ہیں، نبی اکرم صلی اللہ علیہ وسلم نے ارشاد فرمایا: ”میری اور مجھ سے پہلے کے دیگر انبیاء کی مثال ایسے شخص کی مانند ہے جو کوئی عمارت تعمیر کرتے ہوئے اسے خوبصورت، بہترین اور مکمل تعمیر کرتا ہے، لوگ اس کا چکر لگاتے ہیں اور یہ کہتے ہیں: ہم نے اس سے زیادہ خوبصورت عمارت اور کوئی نہیں دیکھی، لیکن یہ ایک اینٹ کی جگہ رہ گئی ہے،“ نبی اکرم صلی اللہ علیہ وسلم فرماتے ہیں: ”میں وہ اینٹ ہوں۔“ [صحیح ابن حبان/كتاب التاريخ/حدیث: 6407]