سیدنا ابوہریرہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”قیامت اس وقت تک قائم نہیں ہو گی جب تک علم کو قبض نہ کر لیا جائے، فتنے ظاہر نہ ہوں، جھوٹ کی کثرت نہ ہو، زمانہ سمٹ نہ جائے، (بازار) قریب نہ ہو جائیں اور «الْهَرْجُ» ”ہرج“ کثرت سے نہ ہو۔“ عرض کی گئی: ہرج سے مراد کیا ہے؟ نبی اکرم صلی اللہ علیہ وسلم نے فرمایا: ” «الْقَتْلُ» ”قتل“۔“ [صحیح ابن حبان/كتاب التاريخ/حدیث: 6718]

سیدنا عبداللہ بن عمرو رضی اللہ عنہما روایت کرتے ہیں کہ نبی اکرم صلی اللہ علیہ وسلم نے ارشاد فرمایا: ”بے شک اللہ تعالیٰ علم کو یوں قبض نہیں فرمائے گا کہ اسے لوگوں سے اٹھا لے گا، بلکہ وہ علما کو ان کے علم سمیت قبض کر لے گا، یہاں تک کہ جب کوئی عالم باقی نہیں رہے گا تو لوگ جاہلوں کو پیشوا بنا لیں گے، ان سے مسائل دریافت کیے جائیں گے تو وہ علم نہ ہونے کے باوجود جواب دیں گے، وہ خود بھی گمراہ ہوں گے اور دوسروں کو بھی گمراہ کریں گے۔“ [صحیح ابن حبان/كتاب التاريخ/حدیث: 6719]

سیدنا عوف بن مالک اشجعی رضی اللہ عنہ بیان کرتے ہیں: نبی اکرم صلی اللہ علیہ وسلم نے آسمان کی طرف دیکھا اور فرمایا: ”یہ وہ وقت ہے جس میں علم کو اٹھا لیا جائے گا۔“ انصار سے تعلق رکھنے والے ایک صاحب جن کا نام لبید بن زیاد تھا، انہوں نے آپ کی خدمت میں عرض کی: یا رسول اللہ! کیا علم کو اٹھا لیا جائے گا، حالانکہ یہ ثابت ہو چکا ہے اور ذہنوں نے اسے محفوظ کر لیا ہے؟ نبی اکرم صلی اللہ علیہ وسلم نے فرمایا: ”میں تو تمہارے بارے میں یہ سمجھتا تھا کہ تم اہل مدینہ کے سب سے سمجھدار شخص ہو“، پھر نبی اکرم صلی اللہ علیہ وسلم نے اس بات کا ذکر کیا کہ یہودیوں اور عیسائیوں کے پاس اللہ کی کتاب موجود تھی (لیکن اس کے باوجود وہ گمراہ ہو گئے)۔ راوی کہتے ہیں: پھر میری ملاقات سیدنا شداد بن اوس رضی اللہ عنہ سے ہوئی تو میں نے انہیں سیدنا عوف بن مالک رضی اللہ عنہ کی نقل کردہ حدیث سنائی تو انہوں نے فرمایا: سیدنا عوف رضی اللہ عنہ نے سچ بیان کیا ہے، کیا میں تمہاری رہنمائی اس چیز کی طرف کروں کہ سب سے پہلے کون سا علم اٹھایا جائے گا؟ سب سے پہلے خشوع و خضوع کو اٹھایا جائے گا اور پھر تمہیں ایک بھی شخص ایسا نہیں ملے گا، جو خشوع و خضوع والا ہو۔ [صحیح ابن حبان/كتاب التاريخ/حدیث: 6720]

سیدنا انس بن مالک رضی اللہ عنہ روایت کرتے ہیں کہ نبی اکرم صلی اللہ علیہ وسلم نے ارشاد فرمایا: ”دنیا اس وقت تک ختم نہیں ہوگی جب تک وہ کمینوں کی اولاد کمینوں کے پاس نہیں ہوگی۔“ [صحیح ابن حبان/كتاب التاريخ/حدیث: 6721]

سیدنا ابوہریرہ رضی اللہ عنہ روایت کرتے ہیں، نبی اکرم صلی اللہ علیہ وسلم نے ارشاد فرمایا: ”مسلسل سوالات پوچھے جاتے رہیں گے، یہاں تک کہ ایک شخص یہ کہے گا: اللہ تعالیٰ نے تو مخلوق کو پیدا کیا ہے، تو اللہ تعالیٰ کو کس نے پیدا کیا؟“ [صحیح ابن حبان/كتاب التاريخ/حدیث: 6722]

سیدنا عبداللہ بن عمرو رضی اللہ عنہما، نبی اکرم صلی اللہ علیہ وسلم کا یہ فرمان نقل کرتے ہیں: ”بے شک اللہ تعالیٰ لوگوں سے علم کو یوں جدا نہیں کرے گا کہ ان سے علم کو اٹھا لے، جبکہ اس نے ان لوگوں کو علم عطا کیا ہو بلکہ وہ علماء (کی روحوں) کو قبض کرنے کے ذریعے (علم کو اٹھائے گا) یہاں تک کہ جب کوئی عالم باقی نہیں رہے گا تو لوگ جاہلوں کو پیشوا بنا لیں گے، وہ ان سے مسائل دریافت کریں گے تو وہ علم نہ ہونے کے باوجود جواب دیں گے، وہ لوگ دوسروں کو بھی گمراہ کریں گے اور خود بھی گمراہ ہوں گے۔“ [صحیح ابن حبان/كتاب التاريخ/حدیث: 6723]

سیدنا عبداللہ بن عباس رضی اللہ عنہما نے منبر پر یہ بات بیان کی کہ نبی اکرم صلی اللہ علیہ وسلم نے ارشاد فرمایا ہے: ”اس امت کا معاملہ ہمیشہ میانہ روی کے ساتھ (یہاں ایک لفظ کے بارے میں راوی کو شک ہے) چلتا رہے گا، جب تک وہ بچوں اور تقدیر کے بارے میں بحث نہیں کریں گے۔“ (امام ابن حبان رحمہ اللہ فرماتے ہیں:) یہاں بچوں سے مراد مشرکین کے بچے ہیں (یعنی یہ بحث کہ آخرت میں ان کا انجام کیا ہو گا)۔ [صحیح ابن حبان/كتاب التاريخ/حدیث: 6724]

سیدنا سہل بن سعد رضی اللہ عنہ بیان کرتے ہیں: نبی اکرم صلی اللہ علیہ وسلم ہمارے پاس تشریف لائے، ہم تلاوت کر رہے تھے، نبی اکرم صلی اللہ علیہ وسلم نے ارشاد فرمایا: ”ہر طرح کی حمد و ثناء اللہ تعالیٰ کے لیے مخصوص ہے، اللہ تعالیٰ کی کتاب ایک ہی ہے، تمہارے اندر سرخ، سفید اور سیاہ لوگ موجود ہیں، تم لوگ اس کی تلاوت کرتے رہو اس سے پہلے کہ وہ لوگ اس کو پڑھنا شروع کر دیں جو اس کی یوں قیمت لگائیں گے جس طرح حصے کی قیمت لگائی جاتی ہے۔“ [صحیح ابن حبان/كتاب التاريخ/حدیث: 6725]

سیدنا ابوہریرہ رضی اللہ عنہ روایت کرتے ہیں، نبی اکرم صلی اللہ علیہ وسلم نے ارشاد فرمایا: ”عنقریب ایسا زمانہ آئے گا جب آدمی اس بات کی پرواہ نہیں کرے گا کہ اس نے کس طرح سے مال حاصل کیا ہے، حلال طور پر یا حرام طور پر۔“ [صحیح ابن حبان/كتاب التاريخ/حدیث: 6726]

سیدنا نعمان بن بشیر رضی اللہ عنہ سے روایت ہے کہ نبی اکرم صلی اللہ علیہ وسلم نے ارشاد فرمایا: ”سب سے بہترین لوگ میرے زمانے کے ہیں، پھر ان کے بعد والے ہیں، پھر ان کے بعد والے ہیں، پھر وہ لوگ آئیں گے جن کی قسم، گواہی سے پہلے ہو گی اور گواہی، قسم سے پہلے ہو گی۔“ [صحیح ابن حبان/كتاب التاريخ/حدیث: 6727]