سیدنا ذی مخبر رضی اللہ عنہ، جو نجاشی کے بھتیجے ہیں، وہ بیان کرتے ہیں کہ انہوں نے نبی اکرم صلی اللہ علیہ وسلم کو یہ ارشاد فرماتے ہوئے سنا: ”تم لوگ اہل روم کے ساتھ صلح کرو گے جو امن والی ہو گی، یہاں تک کہ تم اور وہ لوگ مل کر ایک ایسے دشمن کے ساتھ جنگ کرو گے جو ان کے علاوہ ہو گا، تو تم لوگوں کی مدد کی جائے گی، تم لوگ مال غنیمت حاصل کرو گے، پھر تم لوگ واپس آؤ گے یہاں تک کہ تم ٹیلوں والی چراگاہ میں پڑاؤ کرو گے، تو اہل روم میں سے ایک شخص کہے گا: صلیب غالب آئی ہے، اور مسلمانوں میں سے ایک شخص کہے گا: بلکہ اللہ تعالیٰ نے غلبہ عطا کیا ہے، تو وہ مسلمان ان کی صلیب کی طرف بڑھے گا جو اس سے زیادہ دور نہیں ہو گی اور وہ اسے توڑ دے گا، تو رومی اپنے صلیب کو توڑنے والے شخص کی طرف بڑھیں گے اور اس کی گردن اڑا دیں گے، مسلمان اپنے اسلحے کی طرف جائیں گے اور لڑائی شروع کر دیں گے، تو مسلمانوں کے گروہ کو اللہ تعالیٰ شہادت کے ذریعے عزت عطا کرے گا۔ اہل روم رومیوں کے بادشاہ سے کہیں گے ہم عربوں کے ساتھ مقابلہ کرنے کے لیے کافی ہیں، پھر وہ زبردست جنگ کے لیے اکٹھے ہوں گے اور 80 جھنڈوں کے نیچے اکٹھے ہو کر تمہاری طرف آئیں گے، جن میں سے ہر جھنڈے کے نیچے بارہ ہزار لوگ ہوں گے۔“ [صحیح ابن حبان/كتاب التاريخ/حدیث: 6708]

سیدنا ذی مخبر رضی اللہ عنہ جو نجاشی کے بھتیجے ہیں، وہ بیان کرتے ہیں کہ انہوں نے نبی اکرم صلی اللہ علیہ وسلم کو یہ ارشاد فرماتے ہوئے سنا: ”تم لوگ عنقریب اہل روم کے ساتھ امن والی صلح کرو گے، یہاں تک کہ تم اور وہ مل کر ایسے دشمن کے ساتھ جنگ کریں گے جو ان سے پرے ہوگا، تو تم لوگوں کی مدد کی جائے گی، تم لوگ سلامت رہو گے اور مالِ غنیمت حاصل کرو گے، یہاں تک کہ تم لوگ ایک چراگاہ میں پڑاؤ کرو گے، تو اہل روم میں سے ایک شخص یہ کہے گا: صلیب غالب آئی ہے۔ مسلمانوں میں سے ایک شخص کہے گا: بلکہ اللہ تعالیٰ نے غلبہ عطا کیا ہے، تو وہ لوگ آپس میں لڑ پڑیں گے۔ ان لوگوں کی صلیب مسلمانوں سے زیادہ دور نہیں ہوگی۔ مسلمانوں کا ایک شخص اس کی طرف بڑھے گا اور اسے توڑ دے گا، تو وہ لوگ صلیب کو توڑنے والے شخص کی طرف بڑھیں گے اور اس کی گردن اڑا دیں گے، تو مسلمان اپنے اسلحے کی طرف آئیں گے اور پھر لڑائی شروع کردیں گے، تو اللہ تعالیٰ ان لوگوں کو شہادت سے سرفراز کرے گا، وہ رومی اپنے بادشاہ کے پاس آئیں گے اور کہیں گے: جزیرۂ عرب پر (حملہ کرنے کے لیے) ہم آپ کا ساتھ دینے کے لیے کافی ہیں۔ پھر وہ جنگ کے لیے اکٹھے ہوں گے اور جھنڈوں تلے (اکٹھے ہو کر) آئیں گے، جن میں سے ہر جھنڈے کے نیچے بارہ ہزار لوگ ہوں گے۔“ [صحیح ابن حبان/كتاب التاريخ/حدیث: 6709]

سیدنا ابوموسیٰ اشعری رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”قیامت سے پہلے ہرج ہوگا۔“ لوگوں نے عرض کی: یا رسول اللہ صلی اللہ علیہ وسلم ! ہرج سے مراد کیا ہے؟ نبی اکرم صلی اللہ علیہ وسلم نے فرمایا: ”قتل و غارت کرنا۔“ لوگوں نے عرض کی: اس سے زیادہ ہوگا، جو ہم نے قتل کیے ہیں؟ نبی اکرم صلی اللہ علیہ وسلم نے فرمایا: ”یہ تمہارا مشرکین کو قتل کرنا نہیں ہے، بلکہ ایک دوسرے کو قتل کرنا ہوگا۔“ لوگوں نے دریافت کیا: (اس وقت) کیا ہماری عقلیں ہمارے پاس ہوں گی؟ نبی اکرم صلی اللہ علیہ وسلم نے فرمایا: ”اس زمانے کے لوگوں کی عقلیں الگ کر لی جائیں گی۔“ [صحیح ابن حبان/كتاب التاريخ/حدیث: 6710]

سیدنا ابوہریرہ رضی اللہ عنہ روایت کرتے ہیں، نبی اکرم صلی اللہ علیہ وسلم نے ارشاد فرمایا: ”زمانہ سمٹ جائے گا، علم کم ہو جائے گا، فتنے ظاہر ہوں گے، بخل عام ہو گا اور «الْهَرْجُ» ”ہرج“ کثرت سے ہو گا۔“ لوگوں نے دریافت کیا: یا رسول اللہ! «الْهَرْجُ» ”ہرج“ سے کیا مراد ہے؟ نبی اکرم صلی اللہ علیہ وسلم نے فرمایا: ”قتل، قتل۔“ [صحیح ابن حبان/كتاب التاريخ/حدیث: 6711]

سیدنا ابوہریرہ رضی اللہ عنہ روایت کرتے ہیں کہ نبی اکرم صلی اللہ علیہ وسلم نے ارشاد فرمایا: ”میری امت کی ہلاکت قریش کے بے وقوف لڑکوں کے ذریعے ہو گی۔“ (راوی بیان کرتے ہیں: سیدنا ابوہریرہ رضی اللہ عنہ کی یہ حدیث سن کر) مروان نے کہا: لڑکے تو پھر یہی لوگ ہیں (جو آج کل کے حکمران ہیں)۔ [صحیح ابن حبان/كتاب التاريخ/حدیث: 6712]

مالک بن ظالم بیان کرتے ہیں: میں نے سیدنا ابوہریرہ رضی اللہ عنہ کو مروان بن حکم سے یہ کہتے ہوئے سنا: میرے محبوب سیدنا ابوالقاسم صادق مصدوق صلی اللہ علیہ وسلم نے مجھے یہ بات بتائی ہے: ”میری امت میں فساد قریش کے بے وقوف لڑکوں کے ذریعے ہو گا۔“ [صحیح ابن حبان/كتاب التاريخ/حدیث: 6713]

سیدنا ثوبان رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”بے شک اللہ تعالیٰ نے میرے لیے زمین کو لپیٹ دیا، یہاں تک کہ میں نے زمین کے مشرقی اور مغربی حصوں کو دیکھ لیا، اس نے مجھے سرخ اور سفید دو خزانے عطا کیے (اور یہ چیز عطا کی) کہ میری امت کی حکومت وہاں تک پہنچے گی، جہاں تک میرے لیے زمین کو لپیٹا گیا ہے، میں نے اپنے پروردگار سے اپنی امت کے لیے دعا مانگی کہ وہ انہیں عمومی قحط کے ذریعے ہلاکت کا شکار نہ کرے اور ان پر ایسا دشمن مسلط نہ کرے جو دوسری قوم سے تعلق رکھتا ہو کہ وہ دشمن انہیں ہلاکت کا شکار کر دے اور وہ انہیں گروہوں میں تقسیم نہ کرے کہ وہ ایک دوسرے کی گردنیں اڑانے لگیں، تو پروردگار نے فرمایا: اے محمد! جب میں کسی کو کچھ عطا کر دوں، تو اسے روکنے والا کوئی نہیں ہے، میں نے تمہاری امت کو یہ چیز عطا کی کہ وہ عمومی قحط کے ذریعے ہلاکت کا شکار نہیں ہوں گے اور میں ان پر ایسا دشمن مسلط نہیں کروں گا، جو دوسری قوم سے تعلق رکھتا ہوگا، جو انہیں ختم کر دے گا، البتہ میں انہیں مختلف گروہوں میں تقسیم کر دوں گا، یہاں تک کہ زمین سے دور دراز کے لوگ اکٹھے ہوں گے، وہ ایک دوسرے کو ہلاکت کا شکار کریں گے، ایک دوسرے کو فنا کریں گے، ایک دوسرے کو قیدی بنائیں گے، (نبی اکرم صلی اللہ علیہ وسلم نے فرمایا:) میری امت کے کچھ قبائل ترکیوں اور بتوں کی پرستش کرنے والوں کی طرف واپس جائیں گے اور مجھے اپنی امت کے بارے میں سب سے زیادہ اندیشہ گمراہ کرنے والے حکمرانوں کا ہے، جب ان کے درمیان تلوار رکھ دی جائے گی تو پھر وہ قیامت تک ان سے اٹھائی نہیں جائے گی اور عنقریب میری امت میں تیس کے قریب جھوٹے کذاب ظاہر ہوں گے، میں خاتم الانبیاء ہوں میرے بعد کوئی نبی نہیں ہے، میری امت کا ایک گروہ ہمیشہ حق پر گامزن رہے گا اور اس کی مدد کی جاتی رہے گی، یہاں تک کہ اللہ تعالیٰ کا حکم آ جائے گا۔“ (امام ابن حبان رحمہ اللہ فرماتے ہیں:) روایت میں صحیح لفظ ”شرک“ ہے۔ [صحیح ابن حبان/كتاب التاريخ/حدیث: 6714]

سیدنا ابوامامہ رضی اللہ عنہ روایت کرتے ہیں کہ نبی اکرم صلی اللہ علیہ وسلم نے ارشاد فرمایا: ”عنقریب اسلام کی رسیوں کو ایک ایک کر کے توڑ دیا جائے گا، جب بھی ان میں سے کوئی ایک رسی ٹوٹے گی لوگ اس کے بعد والی کو مضبوطی سے تھامیں گے، ان میں ٹوٹنے کے اعتبار سے سب سے پہلی حکم (یعنی فیصلہ کرنا) ہو گی اور سب سے آخری نماز ہو گی۔“ [صحیح ابن حبان/كتاب التاريخ/حدیث: 6715]

سیدہ خولہ بنت قیس رضی اللہ عنہا نبی اکرم صلی اللہ علیہ وسلم کا یہ فرمان نقل کرتی ہیں: ”جب میری امت اتراتے ہوئے چلے گی اور اہل فارس اور اہل روم ان کے خدمت گزار بن جائیں گے تو ان میں سے کسی ایک کو دوسروں پر مسلط کر دیا جائے گا (یعنی امت باہمی اختلافات کا شکار ہو جائے گی)۔“ [صحیح ابن حبان/كتاب التاريخ/حدیث: 6716]

سیدنا ابوہریرہ رضی اللہ عنہ روایت کرتے ہیں کہ نبی اکرم صلی اللہ علیہ وسلم نے ارشاد فرمایا: ”زمانہ سمٹ جائے گا، علم کم ہو جائے گا، فتنے ظاہر ہوں گے اور ہرج کثرت سے ہو گا۔“ لوگوں نے عرض کی: یا رسول اللہ صلی اللہ علیہ وسلم ! ہرج سے مراد کیا ہے؟ نبی اکرم صلی اللہ علیہ وسلم نے فرمایا: ”قتل۔“ [صحیح ابن حبان/كتاب التاريخ/حدیث: 6717]