سیدنا ابوبکرہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”میری امت کے کچھ لوگ ایک باغ میں پڑاؤ کریں گے جس کا نام بصرہ ہوگا، اس کے پاس ایک دریا ہوگا جس کا نام دجلہ ہوگا، اس پر ایک پل ہوگا، وہاں کے رہنے والے لوگ زیادہ ہوں گے اور وہ مہاجرین کے شہروں میں سے ہوگا، جب آخری زمانہ آئے گا تو بنو قنطوراء آئیں گے، یہ وہ قوم ہے جن کے چہرے چوڑے ہوں گے، یہاں تک کہ وہ دریا کے ایک کنارے پر پڑاؤ کریں گے، تو وہاں کے لوگ تین حصوں میں تقسیم ہو جائیں گے؛ ایک گروہ اونٹوں کی دم اور جانوروں کی دم پکڑے گا، وہ لوگ ہلاکت کا شکار ہو جائیں گے، ایک گروہ اپنے آپ کو بچانے کی کوشش کرے گا اور کفر کرے گا، اور ایک گروہ اپنے بال بچوں کو اپنی پشت کے پیچھے رکھے گا اور وہ ان کے ساتھ لڑائی کرے گا، یہ لوگ شہداء ہوں گے۔“ [صحیح ابن حبان/كتاب التاريخ/حدیث: 6748]

سیدنا ابوہریرہ رضی اللہ عنہ روایت کرتے ہیں کہ نبی اکرم صلی اللہ علیہ وسلم نے ارشاد فرمایا: ”قیامت اس وقت تک قائم نہیں ہوگی جب تک دوس قبیلے کی عورتوں کی سرین ذوالخلصہ کے اردگرد گھومے گی نہیں۔“ (راوی کہتے ہیں:) یہ ایک بت تھا، زمانہ جاہلیت میں دوس قبیلے کے لوگ اس کی عبادت کرتے تھے، یہ بت تبالہ کے مقام پر تھا۔ معمر نامی راوی کہتے ہیں: اب اس جگہ پر ایک عمارت تعمیر ہوئی ہے جو بند ہے۔ [صحیح ابن حبان/كتاب التاريخ/حدیث: 6749]

سیدنا ابوسعید خدری رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”قیامت اس وقت تک قائم نہیں ہو گی جب تک حج ختم نہیں ہو جائے گا۔“ [صحیح ابن حبان/كتاب التاريخ/حدیث: 6750]

سیدنا ابوہریرہ رضی اللہ عنہ روایت کرتے ہیں، نبی اکرم صلی اللہ علیہ وسلم نے ارشاد فرمایا: ”حبشہ سے تعلق رکھنے والا دو چادروں والا شخص خانہ کعبہ کو ڈھا دے گا۔“ (امام ابن حبان رحمہ اللہ فرماتے ہیں:) «السُّوَيْقَتَيْنِ» سے مراد دو چادریں ہیں۔ [صحیح ابن حبان/كتاب التاريخ/حدیث: 6751]

سیدنا عبداللہ بن عباس رضی اللہ عنہما روایت کرتے ہیں کہ نبی اکرم صلی اللہ علیہ وسلم نے ارشاد فرمایا: ”گویا کہ میں اس وقت بھی اس سیاہ فام شخص کی طرف دیکھ رہا ہوں جس کے دونوں زانوؤں کے درمیان فاصلہ ہو گا جو خانہ کعبہ کا ایک پتھر اکھاڑ رہا ہے“ (راوی کہتے ہیں:) اس سے مراد خانہ کعبہ ہے۔ [صحیح ابن حبان/كتاب التاريخ/حدیث: 6752]

سیدنا عبداللہ بن عمر رضی اللہ عنہما روایت کرتے ہیں کہ نبی اکرم صلی اللہ علیہ وسلم نے ارشاد فرمایا: ”اس گھر سے نفع حاصل کر لو، کیونکہ اسے دو مرتبہ منہدم کیا جائے گا اور تیسری مرتبہ اٹھا لیا جائے گا۔“ [صحیح ابن حبان/كتاب التاريخ/حدیث: 6753]

سیدنا ابوعامر اور سیدنا ابومالک اشعری رضی اللہ عنہما بیان کرتے ہیں کہ انہوں نے نبی اکرم صلی اللہ علیہ وسلم کو یہ ارشاد فرماتے ہوئے سنا: ”میری امت میں ایسے لوگ ضرور ہوں گے جو ریشم، شراب اور آلاتِ موسیقی کو حلال قرار دیں گے۔“ [صحیح ابن حبان/كتاب التاريخ/حدیث: 6754]

سیدہ عائشہ صدیقہ رضی اللہ عنہا بیان کرتی ہیں کہ نبی اکرم صلی اللہ علیہ وسلم نے ارشاد فرمایا: ”ایک لشکر خانہ کعبہ پر حملہ کرنے کے لیے آئے گا، جب وہ کھلے میدان میں پہنچیں گے تو ان کے آگے والے اور پیچھے والے (لوگوں کو) زمین میں دھنسا دیا جائے گا۔“ سیدہ عائشہ رضی اللہ عنہا نے عرض کی: یا رسول اللہ! ان کے درمیان کچھ ایسے لوگ بھی تو ہوں گے جو ان کے علاوہ ہوں گے جن کا ان سے کوئی تعلق نہیں ہو گا، تو نبی اکرم صلی اللہ علیہ وسلم نے ارشاد فرمایا: ”ان سب کو دھنسا دیا جائے گا، پھر ان کی نیت کے مطابق انہیں (قیامت کے دن) زندہ کیا جائے گا۔“ [صحیح ابن حبان/كتاب التاريخ/حدیث: 6755]

ابن قبطیہ بیان کرتے ہیں: میں، عبداللہ بن صفوان اور حارث بن ربیعہ رضی اللہ عنہما، سیدہ ام سلمہ رضی اللہ عنہا کی خدمت میں حاضر ہوئے، ان لوگوں نے کہا: اے سیدہ ام سلمہ رضی اللہ عنہا! آپ ہمیں لوگوں کو زمین میں دھنسائے جانے والی روایت بیان نہیں کریں گی؟ انہوں نے جواب دیا: جی ہاں، نبی اکرم صلی اللہ علیہ وسلم نے ارشاد فرمایا ہے: ”ایک شخص بیت اللہ کی پناہ لے گا پھر اس کی طرف ایک لشکر روانہ کیا جائے گا، یہاں تک کہ جب وہ کھلے میدان میں پہنچیں گے تو انہیں دھنسا دیا جائے گا۔“ سیدہ ام سلمہ رضی اللہ عنہا بیان کرتی ہیں: میں نے عرض کی: اے اللہ کے نبی صلی اللہ علیہ وسلم ! جو شخص مجبوری کے عالم میں (ان کے ساتھ آیا ہوگا)؟ نبی اکرم صلی اللہ علیہ وسلم نے فرمایا: ”انہیں بھی اس کے ساتھ دھنسا دیا جائے گا البتہ قیامت کے دن اسے اسی حالت میں زندہ کیا جائے گا، جو اس کے ذہن میں خیال تھا۔“ عبدالعزیز نامی راوی کہتے ہیں: میں نے ابوجعفر رحمہ اللہ (شاید اس سے مراد امام محمد الباقر رحمہ اللہ ہیں) سے دریافت کیا کہ سیدہ ام سلمہ رضی اللہ عنہا نے کہا ہے: زمین کے کھلے حصے میں، تو امام ابوجعفر رحمہ اللہ نے جواب دیا: اللہ کی قسم! اس سے مراد مدینہ منورہ کا چٹیل میدان ہے۔ [صحیح ابن حبان/كتاب التاريخ/حدیث: 6756]

سیدہ ام سلمہ رضی اللہ عنہا بیان کرتی ہیں کہ نبی اکرم صلی اللہ علیہ وسلم نے ارشاد فرمایا: ”خلیفہ کے انتقال کے وقت اختلاف رونما ہوگا، تو اہل مدینہ میں سے قریش سے تعلق رکھنے والا ایک شخص مکہ کی طرف جائے گا، اہل مکہ سے تعلق رکھنے والے کچھ لوگ ان کے پاس آئیں گے اور وہ اسے نکلنے پر مجبور کریں گے، حالانکہ اسے یہ بات پسند نہیں ہوگی، پھر وہ رکن اور مقام کے درمیان اس سے بیعت لیں گے، پھر اہل شام سے ایک لشکر اس کی طرف بھیجا جائے گا، وہ لوگ بیداء کے مقام پر پہنچیں گے تو انہیں زمین میں دھنسا دیا جائے گا، جب لوگوں تک اس بات کی اطلاع پہنچے گی، تو اہل شام کے ابدال اور اہل عراق کا ایک گروہ ان کے پاس آئیں گے اور اس کی بیعت کریں گے، پھر قریش سے تعلق رکھنے والا ایک شخص نکلے گا، جس کا ننھیال بنو کلب سے ہوگا، وہ ان کی طرف ایک لشکر بھیجے گا، وہ لوگ اسے پسپا کر دیں گے اور اس پر غالب آ جائیں گے، وہ ان کا مال لوگوں کے درمیان تقسیم کرے گا اور ان کے بارے میں اپنے نبی کی سنت کے مطابق عمل کرے گا۔ وہ شخص سات سال تک زمین میں رہے گا۔ وہ دنیا میں اسلام کو مستحکم کر دے گا۔“ [صحیح ابن حبان/كتاب التاريخ/حدیث: 6757]