سیدنا عبداللہ بن عمرو رضی اللہ عنہما سے روایت ہے کہ نبی اکرم صلی اللہ علیہ وسلم نے فرمایا: ”جب تمہارے لیے فارس اور روم کے خزانے فتح کر دیے جائیں تو تم لوگ کیسی حالت میں ہو گے؟“ سیدنا عبدالرحمن بن عوف رضی اللہ عنہ نے عرض کی: ہم ویسے ہی ہوں گے جیسے اللہ تعالیٰ نے ہمیں حکم دیا ہے۔ نبی اکرم صلی اللہ علیہ وسلم نے ارشاد فرمایا: ”تم لوگ ایک دوسرے کے مقابلے میں آ جاؤ گے، ایک دوسرے سے حسد رکھو گے، ایک دوسرے سے پیٹھ پھیرو گے، ایک دوسرے سے بغض رکھو گے، پھر تم عنقریب غریب مہاجرین کی طرف جاؤ گے اور ان میں سے کچھ کو دوسروں کی گردنوں پر سوار کر دو گے۔“ [صحیح ابن حبان/كتاب التاريخ/حدیث: 6688]

سیدنا ابوہریرہ رضی اللہ عنہ، نبی اکرم صلی اللہ علیہ وسلم کا یہ فرمان نقل کرتے ہیں: ”جب کسریٰ مر جائے گا تو اس کے بعد کوئی کسریٰ نہیں ہو گا، جب قیصر مر جائے گا تو اس کے بعد کوئی قیصر نہیں ہو گا۔ اس ذات کی قسم! جس کے دستِ قدرت میں میری جان ہے، تم لوگ ان دونوں کے خزانے اللہ کی راہ میں ضرور خرچ کرو گے۔“ (امام ابن حبان رحمہ اللہ فرماتے ہیں:) نبی اکرم صلی اللہ علیہ وسلم کا یہ فرمان ”جب کسریٰ مر جائے گا تو اس کے بعد کوئی کسریٰ نہیں ہو گا۔“ اس کے ذریعے آپ کی مراد اس کی سرزمین ہے، وہ عراق کی سرزمین ہے۔ نبی اکرم صلی اللہ علیہ وسلم کا یہ فرمان ”جب قیصر مر جائے گا تو اس کے بعد کوئی قیصر نہیں ہو گا۔“ اس سے آپ کی مراد یہ ہے کہ اس کی سرزمین میں ایسا نہیں ہو گا اور وہ سرزمینِ شام ہے۔ اس سے یہ مراد نہیں ہے کہ ان کے بعد کوئی کسریٰ یا کوئی قیصر نہیں ہو گا۔ [صحیح ابن حبان/كتاب التاريخ/حدیث: 6689]

سیدنا جابر بن سمرہ رضی اللہ عنہ روایت کرتے ہیں کہ نبی اکرم صلی اللہ علیہ وسلم نے ارشاد فرمایا ہے: ”جب کسریٰ مر جائے گا تو اس کے بعد کبھی کسریٰ نہیں ہو گا، جب قیصر مر جائے گا تو اس کے بعد کبھی قیصر نہیں ہو گا۔ اللہ کی قسم! ان دونوں کے خزانے اللہ کی راہ میں ضرور خرچ کیے جائیں گے۔“ [صحیح ابن حبان/كتاب التاريخ/حدیث: 6690]

سیدنا ابوہریرہ رضی اللہ عنہ روایت کرتے ہیں کہ نبی اکرم صلی اللہ علیہ وسلم نے ارشاد فرمایا: ”عنقریب تم پر ایسا زمانہ آئے گا جب دریائے فرات سونے کے پہاڑ کو ظاہر کرے گا جس پر لوگوں کی جنگ ہوگی، اس میں ہر سو میں سے ننانوے لوگ مارے جائیں گے۔“ (راوی کہتے ہیں: اے میرے بیٹے! اگر تم اس زمانے کو پاؤ تو تم ان لوگوں میں شامل ہرگز نہ ہونا جو اس کے لیے لڑائی کریں گے۔) [صحیح ابن حبان/كتاب التاريخ/حدیث: 6691]

سیدنا ابوہریرہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”قیامت اس وقت تک قائم نہیں ہو گی جب تک دریائے فرات سے سونے کا پہاڑ نمودار نہیں ہو گا جس پر لوگ ایک دوسرے سے جنگ کریں گے، تو ہر دس میں سے نو آدمی مارے جائیں گے۔“ [صحیح ابن حبان/كتاب التاريخ/حدیث: 6692]

سیدنا ابوہریرہ رضی اللہ عنہ روایت کرتے ہیں، نبی اکرم صلی اللہ علیہ وسلم نے ارشاد فرمایا ہے: ”عنقریب دریائے فرات سونے کے خزانے کو ظاہر کرے گا، تو جو شخص وہاں موجود ہو، وہ اس میں سے کچھ نہ لے۔“ [صحیح ابن حبان/كتاب التاريخ/حدیث: 6693]

سیدنا ابوہریرہ رضی اللہ عنہ سے روایت ہے، نبی اکرم صلی اللہ علیہ وسلم نے ارشاد فرمایا ہے: ”عنقریب دریائے فرات سونے کے خزانے کو ظاہر کرے گا، جو شخص وہاں موجود ہو وہ اس میں سے کچھ بھی نہ لے۔“ [صحیح ابن حبان/كتاب التاريخ/حدیث: 6694]

یہی روایت ایک اور سند کے ہمراہ سیدنا ابوہریرہ رضی اللہ عنہ کے حوالے سے منقول ہے، تاہم اس میں یہ الفاظ ہیں: نبی اکرم صلی اللہ علیہ وسلم نے فرمایا: ”سونے کے پہاڑ کو ظاہر کرے گا۔“ [صحیح ابن حبان/كتاب التاريخ/حدیث: 6695]

سیدنا ابی بن کعب رضی اللہ عنہ روایت کرتے ہیں، نبی اکرم صلی اللہ علیہ وسلم نے ارشاد فرمایا ہے: ”قیامت اس وقت تک قائم نہیں ہوگی جب تک دریائے فرات سونے کے ٹیلے کو ظاہر نہیں کرے گا جس پر لوگ ایک دوسرے سے جنگ کریں گے، اور ہر دس میں سے نو آدمی مارے جائیں گے۔“ [صحیح ابن حبان/كتاب التاريخ/حدیث: 6696]

سیدنا ابوہریرہ رضی اللہ عنہ روایت کرتے ہیں کہ نبی اکرم صلی اللہ علیہ وسلم نے ارشاد فرمایا: ”زمین اپنے جگر کے ٹکڑوں کو اگل دے گی، جیسے وہ سونے اور چاندی کے ستون ہوں گے۔“ نبی اکرم صلی اللہ علیہ وسلم فرماتے ہیں: ”پھر ایک چور آئے گا اور کہے گا: اس کی وجہ سے میرا ہاتھ کاٹا گیا، ایک قاتل آئے گا اور کہے گا: اس وجہ سے میں نے قتل کیا، رشتہ داری کے حقوق کو پامال کرنے والا آئے گا اور کہے گا: اسی وجہ سے میں نے رشتہ داری کے حقوق کو پامال کیا، لیکن وہ لوگ اسے چھوڑ دیں گے اور اس میں سے کچھ بھی نہیں لیں گے۔“ [صحیح ابن حبان/كتاب التاريخ/حدیث: 6697]