مالک بن ابومریم بیان کرتے ہیں کہ ہم «الطِّلَاء» کے بارے میں بات چیت کر رہے تھے، اسی دوران عبدالرحمن بن غنم ہمارے پاس آئے، ہم نے یہ گفتگو شروع کی تو انہوں نے بتایا: سیدنا ابومالک اشعری رضی اللہ عنہ نے مجھے یہ حدیث بیان کی ہے کہ انہوں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے: ”میری امت کے کچھ لوگ شراب پئیں گے، لیکن وہ اس کا نام دوسرا رکھ دیں گے، ان کے سرہانے آلاتِ موسیقی بجائے جائیں گے اور گانے والیاں ہوں گی، اللہ تعالیٰ ان لوگوں کو زمین میں دھنسا دے گا اور ان میں سے کچھ لوگوں کو بندروں اور خنزیروں کی شکل میں تبدیل کر دے گا۔“ (امام ابن حبان رحمہ اللہ فرماتے ہیں:) سیدنا ابومالک اشعری رضی اللہ عنہ کا نام حارث بن مالک ہے اور ایک قول کے مطابق سیدنا ابومالک اشعری رضی اللہ عنہ کا نام کعب بن عاصم ہے۔ [صحیح ابن حبان/كتاب التاريخ/حدیث: 6758]

سیدنا ابوہریرہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”قیامت اس وقت تک قائم نہیں ہو گی جب تک میری امت میں زمین میں دھنسائے جانے، شکلیں تبدیل ہونے اور پتھر برسائے جانے (کا عذاب نازل نہیں ہو گا)۔“ [صحیح ابن حبان/كتاب التاريخ/حدیث: 6759]

سیدنا انس بن مالک رضی اللہ عنہ روایت کرتے ہیں، نبی اکرم صلی اللہ علیہ وسلم نے ارشاد فرمایا: ”قیامت اس وقت تک قائم نہیں ہوگی جب تک لوگ مساجد (کی تعمیر) میں ایک دوسرے کے مقابلے میں فخر کا اظہار نہیں کریں گے۔“ [صحیح ابن حبان/كتاب التاريخ/حدیث: 6760]

سیدنا عبداللہ رضی اللہ عنہ روایت کرتے ہیں کہ نبی اکرم صلی اللہ علیہ وسلم نے ارشاد فرمایا: ”آخری زمانے میں کچھ لوگ ہوں گے جو مساجد میں دنیاوی گفتگو کریں گے، ان کا اللہ تعالیٰ کے ساتھ کوئی واسطہ نہیں ہو گا۔“ (امام ابن حبان رحمہ اللہ فرماتے ہیں:) ابوتقی نامی راوی ابوتقی کبیر ہے، اس کا نام عبدالحمید بن ابراہیم ہے، یہ حمص سے تعلق رکھتا ہے، جب کہ ابوتقی صغیر کا نام ہشام بن عبدالملک یزنی ہے اور یہ دونوں راوی حمص سے تعلق رکھتے ہیں، یہ دونوں ثقہ ہیں۔ [صحیح ابن حبان/كتاب التاريخ/حدیث: 6761]

سیدنا حذیفہ رضی اللہ عنہ بیان کرتے ہیں: نبی اکرم صلی اللہ علیہ وسلم نے ہمیں دو باتیں بتائی تھیں، ان میں سے ایک میں نے دیکھ لی ہے اور دوسری کا انتظار کر رہا ہوں۔ نبی اکرم صلی اللہ علیہ وسلم نے ہمیں یہ بتایا کہ امانت لوگوں کے دلوں کے اندر نازل ہوئی اور قرآن نازل ہوا تو انہوں نے قرآن کا علم حاصل کیا اور سنت کا علم حاصل کیا، پھر نبی اکرم صلی اللہ علیہ وسلم نے ہمیں اس کے اٹھائے جانے کے بارے میں بتایا۔ آپ صلی اللہ علیہ وسلم نے فرمایا: ”ایک شخص سوئے گا تو اس کے دل سے امانت کو قبض کر لیا جائے گا، یہاں تک کہ اس کا تھوڑا سا نشان باقی رہ جائے گا، جو دھبے کے نشان کی مانند ہو گا، پھر وہ شخص سوئے گا تو اس کے دل سے امانت کو اٹھا لیا جائے گا، یہاں تک کہ اس کا اتنا نشان باقی رہ جائے گا جتنا اس آبلے کا ہوتا ہے جو کسی انگارے کے تمہارے پاؤں پر لگنے کی وجہ سے ہوتا ہے، تمہیں وہ پھولا ہوا محسوس ہوتا ہے لیکن اس کے اندر کچھ نہیں ہوتا، لوگ ایک دوسرے کے ساتھ خرید و فروخت کریں گے، لیکن کوئی بھی شخص امانت ادا نہیں کرے گا، یہاں تک کہ یہ بات کہی جائے گی کہ بنو فلاں میں ایک امین آدمی ہے، یہاں تک کہ ایک شخص کے بارے میں یہ کہا جائے گا کہ وہ کتنا تیز، کتنا سمجھ دار، کتنا عقل مند ہے، حالانکہ اس کے دل میں رائی کے دانے کے برابر بھی بھلائی نہیں ہو گی۔“
(سیدنا حذیفہ رضی اللہ عنہ نے فرمایا:) مجھ پر ایک ایسا زمانہ آیا کہ میں اس کی پرواہ نہیں کرتا تھا کہ میں کس کے ساتھ خرید و فروخت کر رہا ہوں، کیونکہ اگر وہ مومن ہو گا تو اس کا دین میرے ساتھ دھوکہ دہی سے باز رکھے گا اور اگر وہ یہودی یا عیسائی ہو گا تو کوتوال اسے (ایسا کرنے سے) باز رکھے گا، لیکن اب تو میں صرف فلاں اور فلاں کے ساتھ لین دین کرتا ہوں۔ [صحیح ابن حبان/كتاب التاريخ/حدیث: 6762]

سیدنا عبداللہ بن مغفل رضی اللہ عنہ سے منقول ہے کہ انہوں نے اپنے بیٹے کو یہ کہتے ہوئے سنا: «اللَّهُمَّ إِنِّي أَسْأَلُكَ الْقَصْرَ الْأَبْيَضَ عَنْ يَمِينِ الْجَنَّةِ إِذَا دَخَلْتُهَا» ”اے اللہ! میں تجھ سے جنت کے دائیں طرف محل کا سوال کرتا ہوں،“ تو سیدنا عبداللہ رضی اللہ عنہ نے فرمایا: اے میرے بیٹے! جب تم نے مانگنا ہو، تو اللہ تعالیٰ سے جنت مانگو اور جہنم سے اس کی پناہ مانگو، کیونکہ میں نے نبی اکرم صلی اللہ علیہ وسلم کو یہ بات ارشاد فرماتے ہوئے سنا ہے: ”عنقریب ایسے لوگ آئیں گے جو دعا مانگنے اور طہارت کے حصول میں حد سے تجاوز کریں گے۔“ [صحیح ابن حبان/كتاب التاريخ/حدیث: 6763]

سیدنا عبداللہ بن مغفل رضی اللہ عنہ کے بارے میں یہ بات منقول ہے کہ انہوں نے اپنے ایک بیٹے کو دعا میں یہ کہتے ہوئے سنا: ”اے اللہ! میں تجھ سے یہ سوال کرتا ہوں کہ جب میں جنت میں داخل ہوں تو مجھے جنت کے دائیں طرف سفید محل ملے۔“ تو سیدنا عبداللہ بن مغفل رضی اللہ عنہ نے فرمایا: اے میرے بیٹے! تم اللہ تعالیٰ سے جنت مانگو اور جہنم سے اس کی پناہ مانگو، کیونکہ میں نے نبی اکرم صلی اللہ علیہ وسلم کو یہ بات ارشاد فرماتے ہوئے سنا ہے: ”عنقریب اس امت میں ایسے لوگ آئیں گے جو دعا مانگنے اور طہارت حاصل کرنے میں حد سے تجاوز کریں گے۔“ (امام ابن حبان رحمہ اللہ فرماتے ہیں:) یہ روایت جریری نے یزید بن عبداللہ کے حوالے سے اور ابونعامہ کے حوالے سے سنی ہے، تو یہ دونوں طرق محفوظ ہیں۔ [صحیح ابن حبان/كتاب التاريخ/حدیث: 6764]

سیدنا ابوہریرہ رضی اللہ عنہ سے روایت ہے کہ نبی اکرم صلی اللہ علیہ وسلم نے ارشاد فرمایا: ”اس ذات کی قسم! جس کے دستِ قدرت میں میری جان ہے، تم میں سے کسی ایک شخص پر کوئی ایسا دن ضرور آئے گا جب وہ مجھے نہیں دیکھے گا، حالانکہ اس وقت اس کا میری زیارت کرنا، اس کے نزدیک اس کے اہل خانہ اور مال سے زیادہ محبوب ہو گا۔“ [صحیح ابن حبان/كتاب التاريخ/حدیث: 6765]

سیدنا ابوہریرہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”آخری زمانے میں کچھ لوگ ایسے ہوں گے جو میری امت سے تعلق رکھتے ہوں گے، وہ تمہیں ایسی باتیں بتائیں گے جو نہ تم نے سنی ہوں گی اور نہ تمہارے آباؤ اجداد نے سنی ہوں گی، تو تم اپنا خیال رکھنا اور ان سے بچ کر رہنا۔“ [صحیح ابن حبان/كتاب التاريخ/حدیث: 6766]

سیدنا عبداللہ بن عمرو رضی اللہ عنہما روایت کرتے ہیں کہ نبی اکرم صلی اللہ علیہ وسلم نے ارشاد فرمایا: ”قیامت اس وقت تک قائم نہیں ہو گی جب تک تم لوگ راستے میں اس طرح صحبت نہیں کرو گے، جس طرح گدھا کرتا ہے۔“ (راوی بیان کرتے ہیں) میں نے دریافت کیا: کیا ایسا ہو گا؟ تو انہوں نے جواب دیا: جی ہاں، ایسا ضرور ہو گا۔ [صحیح ابن حبان/كتاب التاريخ/حدیث: 6767]