سیدنا خباب رضی اللہ عنہ بیان کرتے ہیں: ہم نے نبی اکرم صلی اللہ علیہ وسلم کی خدمت میں (قریش کی طرف سے پیش آنے والی مشکل صورت حال) کی شکایت کی۔ نبی اکرم صلی اللہ علیہ وسلم اس وقت خانہ کعبہ کے سائے میں اپنی چادر کے ساتھ ٹیک لگا کر بیٹھے ہوئے تھے۔ ہم نے عرض کی: آپ ہمارے لیے مدد کی دعا کیوں نہیں کرتے؟ آپ ہمارے لیے دعا کیوں نہیں کرتے؟ نبی اکرم صلی اللہ علیہ وسلم نے فرمایا: ”تم سے پہلے کے لوگوں میں سے کسی شخص کو پکڑا جاتا تھا، اس کے لیے زمین کو کھودا جاتا تھا، اس کے بعد اس شخص کو اس میں ڈال دیا جاتا تھا، پھر ایک آرا لایا جاتا تھا، اسے اس کے سر پر رکھا جاتا تھا، اس شخص کو دو حصوں میں تقسیم کر دیا جاتا تھا اور لوہے کی بنی ہوئی کنگھی لا کر اس کی ہڈیوں اور گوشت کے اندر تک پھیری جاتی تھی لیکن یہ چیز بھی ان کو ان کے دین سے نہیں پھیر سکی۔ اللہ کی قسم! یہ معاملہ ضرور مکمل ہو گا یہاں تک کہ ایک سوار شخص صنعاء سے چلے گا اور حضرموت جائے گا، اسے صرف اللہ تعالیٰ کا خوف ہو گا یا اپنی بکریوں کے حوالے سے بھیڑیے کا خوف ہو گا لیکن تم لوگ جلد بازی چاہتے ہو۔“ [صحیح ابن حبان/كتاب التاريخ/حدیث: 6698]

سیدنا مقداد بن اسود رضی اللہ عنہ بیان کرتے ہیں: میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے: ”روئے زمین پر موجود ہر کچے اور پکے گھر کے اندر اللہ تعالیٰ اسلام کو داخل کر دے گا خواہ (اس گھر کے اندر رہنے والا شخص) کوئی طاقتور شخص ہو یا کوئی کم تر شخص ہو۔“ [صحیح ابن حبان/كتاب التاريخ/حدیث: 6699]

سیدنا ابوہریرہ رضی اللہ عنہ روایت کرتے ہیں، نبی اکرم صلی اللہ علیہ وسلم نے ارشاد فرمایا ہے: ”قیامت اس وقت تک قائم نہیں ہوگی جب تک ہرج کی کثرت نہیں ہوگی اور جب تک عرب کی سرزمین پر چراگاہوں اور نہروں (کی کثرت نہیں ہوگی)۔“ [صحیح ابن حبان/كتاب التاريخ/حدیث: 6700]

سیدنا مقداد بن اسود رضی اللہ عنہ بیان کرتے ہیں کہ میں نے نبی اکرم صلی اللہ علیہ وسلم کو یہ ارشاد فرماتے ہوئے سنا ہے: ”روئے زمین پر موجود کوئی کچا یا پکا گھر ایسا نہیں رہے گا جس میں اللہ تعالیٰ اسلام کے کلمے کو داخل نہ کر دے، خواہ وہ (گھر) کسی طاقت ور شخص کا ہو یا کسی کم تر شخص کا ہو۔“ [صحیح ابن حبان/كتاب التاريخ/حدیث: 6701]

سیدنا ابوواقد لیثی رضی اللہ عنہ جو نبی اکرم صلی اللہ علیہ وسلم کے اصحاب میں سے ہیں، وہ بیان کرتے ہیں: جب نبی اکرم صلی اللہ علیہ وسلم نے مکہ فتح کر لیا تو آپ صلی اللہ علیہ وسلم ہمیں ساتھ لے کر ہوازن کی طرف روانہ ہوئے، یہاں تک کہ جب ہم کفار کے بیری کے درخت کے پاس سے گزرے، یہ وہ بیری کا درخت تھا جس کے اردگرد وہ لوگ اعتکاف کیا کرتے تھے اور وہ لوگ اسے «ذَاتُ أَنْوَاطٍ» ”ذاتِ انواط“ کہتے تھے، تو ہم نے عرض کی: یا رسول اللہ صلی اللہ علیہ وسلم ! آپ ہمارے لیے بھی کوئی «ذَاتُ أَنْوَاطٍ» ”ذاتِ انواط“ مقرر کر دیں جس طرح کفار کا «ذَاتُ أَنْوَاطٍ» ”ذاتِ انواط“ ہے، تو نبی اکرم صلی اللہ علیہ وسلم نے ارشاد فرمایا: ”اللہ اکبر! یہ تو وہی ہو گیا جس طرح بنی اسرائیل نے سیدنا موسیٰ علیہ السلام سے کہا تھا: ﴿اجْعَل لَّنَا إِلَٰهًا كَمَا لَهُمْ آلِهَةٌ ۚ قَالَ إِنَّكُمْ قَوْمٌ تَجْهَلُونَ﴾ [سورة الأعراف: 138] ”آپ ہمارے لیے بھی کوئی معبود بنا دیں جس طرح ان لوگوں کا معبود ہے۔ سیدنا موسیٰ علیہ السلام نے کہا تھا: تم لوگ ایک ایسی قوم ہو جو جاہل ہو۔““ پھر نبی اکرم صلی اللہ علیہ وسلم نے ارشاد فرمایا: ”تم لوگ اپنے سے پہلے لوگوں کے طریقے پر ضرور عمل کرو گے۔“ [صحیح ابن حبان/كتاب التاريخ/حدیث: 6702]

سیدنا ابوسعید خدری رضی اللہ عنہ، نبی اکرم صلی اللہ علیہ وسلم کا یہ فرمان نقل کرتے ہیں: ”تم لوگ اپنے سے پہلے لوگوں کی بالشت کے ساتھ بالشت اور گز کے ساتھ گز کے مطابق ضرور پیروی کرو گے، یہاں تک کہ اگر وہ لوگ گوہ کے بل تک گئے تھے تو تم بھی وہاں ضرور جاؤ گے۔“ ہم نے عرض کی: یا رسول اللہ صلی اللہ علیہ وسلم ! کیا یہودیوں اور عیسائیوں (کی ہم پیروی کریں گے)؟ نبی اکرم صلی اللہ علیہ وسلم نے فرمایا: ”اور کس کی؟“ [صحیح ابن حبان/كتاب التاريخ/حدیث: 6703]

سیدنا ابوہریرہ رضی اللہ عنہ روایت کرتے ہیں، نبی اکرم صلی اللہ علیہ وسلم نے ارشاد فرمایا ہے: ”ایسے فتنوں کے آنے سے پہلے (نیک) اعمال میں جلدی کرو جو تاریک رات کے ٹکڑوں کی مانند ہوں گے، جن میں آدمی صبح کے وقت مومن ہو گا اور شام کے وقت کافر ہو گا، یا صبح کے وقت کافر ہو گا اور شام کے وقت مومن ہو گا۔ وہ دنیا کے ساز و سامان کے عوض میں اپنے دین کو فروخت کر دے گا۔“ [صحیح ابن حبان/كتاب التاريخ/حدیث: 6704]

سیدنا ابوہریرہ رضی اللہ عنہ بیان کرتے ہیں کہ نبی اکرم صلی اللہ علیہ وسلم نے ذکر کرتے ہوئے ارشاد فرمایا: ”عربوں کے لیے اس شر کی وجہ سے بربادی ہے جو قریب آ چکا ہے، وہ اندھے، گونگے اور بہرے فتنے کی شکل میں ہے، جس میں بیٹھا ہوا شخص کھڑے ہونے والے سے بہتر ہو گا، کھڑا ہونے والا شخص چلنے والے سے بہتر ہو گا، چلنے والا شخص دوڑنے والے سے بہتر ہو گا اور اس میں دوڑنے والے کے لیے قیامت کے دن اللہ تعالیٰ کی طرف سے بربادی ہے۔“ [صحیح ابن حبان/كتاب التاريخ/حدیث: 6705]

سیدنا ابوہریرہ رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”اگر تم وہ بات جان لو جو میں جانتا ہوں، تو تم لوگ تھوڑا ہنسا کرو اور زیادہ رویا کرو۔ نفاق ظاہر ہو جائے گا۔ امانت کو اٹھا لیا جائے گا۔ رحمت کو قبض کر لیا جائے گا۔ امین شخص پر تہمت لگائی جائے گی اور جو شخص امین نہیں ہو گا اسے امین بنایا جائے گا اور شرفِ جون تم لوگوں کو بٹھا دیں گے۔“ انہوں نے دریافت کیا: یا رسول اللہ صلی اللہ علیہ وسلم ! شرفِ جون سے مراد کیا ہے؟ نبی اکرم صلی اللہ علیہ وسلم نے فرمایا: ”ایسے فتنے جو تاریک رات کے ٹکڑوں کی مانند ہوں گے۔“ [صحیح ابن حبان/كتاب التاريخ/حدیث: 6706]

سیدنا ابوہریرہ رضی اللہ عنہ، نبی اکرم صلی اللہ علیہ وسلم کا یہ فرمان نقل کرتے ہیں: ”قیامت اس وقت تک قائم نہیں ہوگی، جب تک کوئی شخص قبر کے پاس سے گزرتے ہوئے یہ نہیں کہے گا کہ کاش (اس مردے) کی جگہ میں ہوتا۔“ [صحیح ابن حبان/كتاب التاريخ/حدیث: 6707]