سیدنا ابن عباس رضی اللہ عنہما سے روایت ہے کہ رسول اللہ صلی اللہ علیہ وسلم نے فرمایا: ”جس کے ہاں بیٹی پیدا ہو اور وہ اسے (زمانہ جاہلیت کی طرح) زندہ درگور نہ کرے، نہ اسے ذلیل سمجھے اور نہ ہی اپنے بیٹے کو اس پر ترجیح دے، تو اللہ تعالیٰ اس کی وجہ سے اسے جنت میں داخل فرمائے گا۔“
یہ حدیث صحیح الاسناد ہے لیکن شیخین نے اسے روایت نہیں کیا۔ [المستدرك على الصحيحين/كتاب البر والصلة/حدیث: 7535]

سیدنا انس بن مالک رضی اللہ عنہ سے روایت ہے کہ ایک عورت سیدہ عائشہ رضی اللہ عنہا کے پاس کچھ مانگنے آئی اور اس کے ساتھ اس کے دو بچے تھے۔ سیدہ عائشہ رضی اللہ عنہا نے اسے تین کھجوریں عطا کیں، اس عورت نے دونوں بچوں کو ایک ایک کھجور دے دی اور ایک کھجور اپنے (کھانے کے) لیے رکھ لی۔ ان دونوں بچوں نے اپنی کھجوریں کھا لیں، پھر اس عورت نے اپنی کھجور پکڑی اور اسے دو حصوں میں تقسیم کر دیا اور اپنے دونوں بچوں کو آدھی آدھی کھجور دے دی۔ جب نبی کریم صلی اللہ علیہ وسلم تشریف لائے تو سیدہ عائشہ رضی اللہ عنہا نے آپ صلی اللہ علیہ وسلم کو اس واقعے کی خبر دی، تو آپ صلی اللہ علیہ وسلم نے فرمایا: ”تمہیں اس کی اس بات پر کیا تعجب ہے؟ یقیناً اللہ تعالیٰ نے اس کے اپنے بچوں پر رحم کرنے کی وجہ سے اس پر رحم فرمایا ہے۔“
یہ حدیث صحیح الاسناد ہے لیکن شیخین نے اسے روایت نہیں کیا۔ [المستدرك على الصحيحين/كتاب البر والصلة/حدیث: 7536]

سیدنا انس رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”جس نے دو بچیوں کی پرورش کی یہاں تک کہ وہ بلوغت کو پہنچ گئیں، تو میں اور وہ جنت میں اس طرح (ساتھ) داخل ہوں گے“ اور آپ صلی اللہ علیہ وسلم نے اپنی شہادت اور درمیان والی انگلی سے اشارہ فرمایا۔ ”اور دو گناہ ایسے ہیں جن کی سزا دنیا میں جلد دے دی جاتی ہے: ایک «البَغْيُ» (بغاوت و ظلم) اور دوسرا «العُقوقُ» (والدین کی نافرمانی)۔“
یہ حدیث صحیح الاسناد ہے لیکن شیخین نے اسے روایت نہیں کیا۔ [المستدرك على الصحيحين/كتاب البر والصلة/حدیث: 7537]

سیدنا ابن عباس رضی اللہ عنہما سے روایت ہے کہ رسول اللہ صلی اللہ علیہ وسلم نے فرمایا: ”جس مسلمان کی دو بیٹیاں (جوان) ہو جائیں اور وہ ان کے ساتھ بہترین سلوک کرے جب تک وہ اس کے ساتھ رہیں یا وہ ان کے ساتھ رہے، تو وہ دونوں اسے ضرور جنت میں داخل کرائیں گی۔“
یہ حدیث صحیح الاسناد ہے لیکن شیخین نے اسے روایت نہیں کیا۔ [المستدرك على الصحيحين/كتاب البر والصلة/حدیث: 7538]

امام حاکم فرماتے ہیں کہ اس سند میں ایک وہم واقع ہوا ہے کہ راوی شرحبیل بن مسلم نہیں بلکہ یہ شرحبیل بن سعد ہیں جو اہل مدینہ کے ایک شیخ ہیں۔ [المستدرك على الصحيحين/كتاب البر والصلة/حدیث: 7539]