سیدہ عائشہ رضی اللہ عنہا سے روایت ہے کہ میں نے عرض کیا: اے اللہ کے رسول! عورت پر سب سے زیادہ کس کا حق ہے؟ آپ صلی اللہ علیہ وسلم نے فرمایا: ”اس کے شوہر کا۔“ میں نے عرض کیا: مرد پر سب سے زیادہ کس کا حق ہے؟ آپ صلی اللہ علیہ وسلم نے فرمایا: ”اس کی ماں کا۔“
یہ حدیث صحیح الاسناد ہے لیکن شیخین نے اسے روایت نہیں کیا۔ [المستدرك على الصحيحين/كتاب البر والصلة/حدیث: 7525]

سیدنا انس رضی اللہ عنہ سے روایت ہے کہ نبی کریم صلی اللہ علیہ وسلم کے پاس جب (تحفہ وغیرہ) کوئی چیز لائی جاتی تو آپ صلی اللہ علیہ وسلم فرماتے: ”اسے فلاں عورت کے پاس لے جاؤ کیونکہ وہ خدیجہ کی سہیلی تھی، اسے فلاں عورت کے پاس لے جاؤ کیونکہ وہ خدیجہ سے محبت کرتی تھی۔“
یہ حدیث صحیح الاسناد ہے لیکن شیخین نے اسے روایت نہیں کیا۔ [المستدرك على الصحيحين/كتاب البر والصلة/حدیث: 7526]

سیدہ عائشہ رضی اللہ عنہا سے روایت ہے کہ نبی کریم صلی اللہ علیہ وسلم جب بکری ذبح فرماتے تو سیدہ خدیجہ بنت خویلد رضی اللہ عنہا کی سہیلیوں کو تلاش کر کے ان کے ہاں (بطور ہدیہ گوشت) بھیجتے تھے۔
یہ حدیث امام مسلم کی شرط پر صحیح ہے لیکن شیخین نے اسے روایت نہیں کیا۔ [المستدرك على الصحيحين/كتاب البر والصلة/حدیث: 7527]

سیدنا ابوہریرہ رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”اگر بنو اسرائیل نہ ہوتے تو گوشت خراب نہ ہوتا، اور اگر حوا نہ ہوتیں تو کوئی عورت اپنے شوہر کی خیانت نہ کرتی۔“
یہ حدیث شیخین کی شرط پر صحیح ہے لیکن انہوں نے اسے روایت نہیں کیا۔ [المستدرك على الصحيحين/كتاب البر والصلة/حدیث: 7528]

اشعث بن قیس رضی اللہ عنہ سے روایت ہے، انہوں نے کہا: میں سیدنا عمر بن خطاب رضی اللہ عنہ کا مہمان ہوا، وہ رات کے کسی حصے میں اٹھے اور اپنی زوجہ کو مارا، پھر مجھے پکارا: اے اشعث! میں نے عرض کیا: میں حاضر ہوں، انہوں نے فرمایا: مجھ سے تین باتیں یاد کر لو جو میں نے رسول اللہ صلی اللہ علیہ وسلم سے یاد کی ہیں: ”کسی مرد سے یہ سوال نہ کرو کہ وہ اپنی بیوی کو کیوں مارتا ہے، اور اس سے اس کے ان بھائیوں (دوستوں) کے بارے میں نہ پوچھو جن پر وہ بھروسہ کرتا ہے یا نہیں کرتا، اور وتر پڑھے بغیر نہ سوؤ۔“
یہ حدیث صحیح الاسناد ہے لیکن شیخین نے اسے روایت نہیں کیا۔ [المستدرك على الصحيحين/كتاب البر والصلة/حدیث: 7529]

محمد بن طلحہ اپنے والد سے روایت کرتے ہیں کہ اہل عرب میں سے ایک شخص جس کا نام عفیر تھا، وہ سیدنا ابوبکر صدیق رضی اللہ عنہ کے پاس کثرت سے آیا جایا کرتا تھا، سیدنا ابوبکر رضی اللہ عنہ نے اس سے دریافت کیا: اے عفیر! تم نے محبت کے بارے میں رسول اللہ صلی اللہ علیہ وسلم کو کیا فرماتے سنا ہے؟ اس نے عرض کیا: میں نے آپ صلی اللہ علیہ وسلم کو یہ فرماتے سنا: ”محبت وراثت میں منتقل ہوتی ہے اور بغض بھی وراثت میں منتقل ہوتا ہے۔“
یہ حدیث صحیح الاسناد ہے لیکن شیخین نے اسے روایت نہیں کیا۔ اور اسے یوسف بن عطیہ نے ابوبکر بن عبداللہ بن ابی ملیکہ سے روایت کیا ہے: [المستدرك على الصحيحين/كتاب البر والصلة/حدیث: 7530]

سیدنا عبدالرحمن بن ابوبکر رضی اللہ عنہ سے روایت ہے کہ سیدنا ابوبکر صدیق رضی اللہ عنہ کی ملاقات اہل عرب کے ایک شخص سے ہوئی جسے عفیر کہا جاتا تھا، تو سیدنا ابوبکر رضی اللہ عنہ نے اس سے دریافت فرمایا: تم نے محبت کے بارے میں رسول اللہ صلی اللہ علیہ وسلم کو کیا فرماتے سنا ہے؟ اس نے عرض کیا: میں نے رسول اللہ صلی اللہ علیہ وسلم کو فرماتے سنا: ”بے شک محبت اور دشمنی وراثت میں منتقل ہوتے ہیں۔“ [المستدرك على الصحيحين/كتاب البر والصلة/حدیث: 7531]

سیدنا سراقہ بن مالک رضی اللہ عنہ سے روایت ہے، انہوں نے کہا کہ رسول اللہ صلی اللہ علیہ وسلم نے مجھ سے فرمایا: ”کیا میں تمہیں صدقہ کے بارے میں نہ بتاؤں - یا (فرمایا) سب سے بڑے صدقے کے بارے میں - (وہ یہ ہے کہ) تمہاری وہ بیٹی جو (طلاق یا بیوہ ہو کر) تمہاری طرف لوٹا دی گئی ہو اور تمہارے سوا اس کا کوئی کمانے والا نہ ہو۔“
یہ حدیث امام مسلم کی شرط پر صحیح ہے لیکن شیخین نے اسے روایت نہیں کیا۔ [المستدرك على الصحيحين/كتاب البر والصلة/حدیث: 7532]

سیدنا ابوہریرہ رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”جس کی تین بیٹیاں ہوں اور وہ ان کی سختی و نرمی (تنگی و آسانی) پر صبر کرے، تو اللہ تعالیٰ ان (بیٹیوں) پر اپنی رحمت کی وجہ سے اسے جنت میں داخل فرمائے گا۔“ ایک شخص نے عرض کیا: اے اللہ کے رسول! اور اگر دو ہوں؟ آپ صلی اللہ علیہ وسلم نے فرمایا: ”اور دو (بیٹیوں پر بھی)۔“ پھر ایک شخص نے عرض کیا: اے اللہ کے رسول! اور اگر ایک ہو؟ آپ صلی اللہ علیہ وسلم نے فرمایا: ”اور ایک (پر بھی)۔“
یہ حدیث صحیح الاسناد ہے لیکن شیخین نے اسے روایت نہیں کیا۔ [المستدرك على الصحيحين/كتاب البر والصلة/حدیث: 7533]

سیدنا انس رضی اللہ عنہ سے روایت ہے کہ نبی کریم صلی اللہ علیہ وسلم اپنے صحابہ کی ایک جماعت کے پاس سے گزرے، وہاں راستے میں ایک بچہ تھا، جب اس کی ماں نے جانوروں (کے غول) کو دیکھا تو اسے اپنے بیٹے کے پاؤں تلے کچلے جانے کا خوف ہوا، وہ دیوانہ وار گھبرا کر دوڑی اور پکارنے لگی: ہائے میرا بچہ، ہائے میرا بچہ! پھر اس نے اپنے بیٹے کو اٹھا لیا، لوگوں نے عرض کیا: اے اللہ کے نبی! یہ ماں ایسی نہیں ہے کہ اپنے بچے کو آگ میں پھینک دے، تو رسول اللہ صلی اللہ علیہ وسلم نے فرمایا: ”نہیں اللہ کی قسم! اللہ بھی اپنے محبوب کو آگ میں نہیں پھینکے گا۔“ راوی کہتے ہیں: پس اللہ کے نبی صلی اللہ علیہ وسلم نے (ان کی بات سے اپنی بات ثابت کر کے) ان پر دلیل قائم کر دی۔
یہ حدیث شیخین کی شرط پر صحیح ہے لیکن انہوں نے اسے روایت نہیں کیا۔ [المستدرك على الصحيحين/كتاب البر والصلة/حدیث: 7534]