ام المومنین سیدہ عائشہ رضی اللہ عنہا نے عرض کیا: یا رسول اللہ صلی اللہ علیہ وسلم عورت پر سب سے زیادہ کس کا حق ہے؟ آپ صلی اللہ علیہ وسلم نے فرمایا: اس کے شوہر کا۔ میں نے پوچھا: مرد پر سب سے زیادہ کس کا حق ہے؟ آپ صلی اللہ علیہ وسلم نے فرمایا: اس کی ماں کا۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كتاب البر والصلة/حدیث: 7525]

سیدنا انس رضی اللہ عنہ فرماتے ہیں کہ نبی اکرم صلی اللہ علیہ وسلم کے پاس جب کوئی چیز لائی جاتی تو آپ فرماتے: یہ فلاں خاتون کو دے آؤ۔ کیونکہ وہ خدیجہ کی سہیلی تھی۔ یہ فلاں خاتون کو دے آؤ، وہ خدیجہ سے بہت محبت کرتی تھی۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كتاب البر والصلة/حدیث: 7526]

ام المومنین سیدہ عائشہ رضی اللہ عنہا فرماتی ہیں کہ نبی اکرم صلی اللہ علیہ وسلم جب بکری ذبح کرتے تو سیدہ خدیجہ بنت خویلد رضی اللہ عنہا کی سہیلیوں کو اہتمام کے ساتھ گوشت بھجواتے تھے۔ ٭٭ یہ حدیث امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اس کو نقل نہیں کیا۔ [المستدرك على الصحيحين/كتاب البر والصلة/حدیث: 7527]

سیدنا ابوہریرہ رضی اللہ عنہ فرماتے ہیں کہ رسول اللہ صلی اللہ علیہ وسلم نے ارشاد فرمایا: اگر بنی اسرائیل نہ ہوتے تو گوشت خراب نہ ہوتا، اور اگر سیدنا حواء نہ ہوتیں تو کوئی عورت اپنے شوہر سے خیانت نہ کرتی۔ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے لیکن انہوں نے اس کو نقل نہیں کیا۔ [المستدرك على الصحيحين/كتاب البر والصلة/حدیث: 7528]

سیدنا اشعث بن قیس رضی اللہ عنہ فرماتے ہیں: میں سیدنا عمر بن خطاب رضی اللہ عنہ کا مہمان بنا، آپ نے ایک رات اپنی بیوی کو مارنا شروع کر دیا، پھر آپ رضی اللہ عنہ نے مجھے آواز دی، اے اشعث! میں نے کہا: لبیک، آپ رضی اللہ عنہ نے فرمایا: میری تین باتیں ہمیشہ یاد رکھنا، یہ میں نے رسول اللہ صلی اللہ علیہ وسلم سے یاد کی ہیں۔ * کبھی مرد سے یہ نہیں پوچھنا کہ تم نے اپنی بیوی کو کیوں مارا؟ * کبھی یہ نہیں پوچھنا کہ کس بھائی پر اعتماد ہے اور کس پر نہیں۔ * وتر پڑھے بغیر کبھی نہ سونا۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كتاب البر والصلة/حدیث: 7529]

محمد بن طلحہ اپنے والد کا یہ بیان نقل کرتے ہیں کہ ایک عربی شخص اکثر سیدنا ابوبکر رضی اللہ عنہ کے ساتھ ساتھ رہتا تھا، اس کو ” عفیر “ کے نام سے پکارا جاتا تھا، سیدنا ابوبکر رضی اللہ عنہ نے اس سے کہا: اے عفیر! تو نے محبت کے بارے میں رسول اللہ صلی اللہ علیہ وسلم کا کون سا فرمان سن رکھا ہے؟ اس نے بتایا کہ میں نے رسول اللہ صلی اللہ علیہ وسلم کو یہ فرماتے ہوئے سنا ہے کہ ” محبت بھی موروثی چیز ہے اور بغض بھی موروثی چیز ہے “۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ اسی حدیث کو یوسف بن عطیہ نے ابوبکر بن عبداللہ ابن ابی ملیکہ کے حوالے سے بھی بیان کیا ہے۔ [المستدرك على الصحيحين/كتاب البر والصلة/حدیث: 7530]

سیدنا عبدالرحمن بن ابی بکر فرماتے ہیں: سیدنا ابوبکر صدیق رضی اللہ عنہ کی ملاقات ایک عفیر نامی عربی شخص سے ہوئی، سیدنا ابوبکر رضی اللہ عنہ نے اس سے پوچھا: تو نے رسول اللہ صلی اللہ علیہ وسلم کی زبان مبارک سے محبت کے حوالے سے کیا سن رکھا ہے؟ اس نے بتایا کہ میں نے رسول اللہ صلی اللہ علیہ وسلم کو یہ فرماتے ہوئے سنا ہے کہ ” محبت اور عداوت دونوں موروثی چیزیں ہیں۔ [المستدرك على الصحيحين/كتاب البر والصلة/حدیث: 7531]

سیدنا سراقہ بن مالک رضی اللہ عنہ فرماتے ہیں کہ رسول اللہ صلی اللہ علیہ وسلم نے ارشاد فرمایا: کیا میں تمہیں سب سے بڑے صدقے کے بارے میں تمہاری رہنمائی نہ کروں، (تیرے لئے سب سے بڑا صدقہ) تیری وہ بیٹی ہے جو (شادی کے بعد شوہر کے فوت ہو جانے یا طلاق دینے کی وجہ سے) واپس تیرے پاس آ گئی ہو، تیرے سوا اس کا کوئی سہارا نہ ہو۔ ٭٭ یہ امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اس کو نقل نہیں کیا۔ [المستدرك على الصحيحين/كتاب البر والصلة/حدیث: 7532]

سیدنا ابوہریرہ رضی اللہ عنہ فرماتے ہیں کہ رسول اللہ صلی اللہ علیہ وسلم نے ارشاد فرمایا: جس کے ہاں تین بیٹیاں ہوں، اور وہ ان کے خرچہ وغیرہ پر صبر اختیار کرے، اللہ تعالیٰ ان بیٹیوں پر رحم کرنے کی بناء پر اس آدمی کو جنت میں داخل فرمائے گا۔ راوی کہتے ہیں: ایک آدمی نے پوچھا: یا رسول اللہ صلی اللہ علیہ وسلم جس کی دو بیٹیاں ہوں؟ آپ صلی اللہ علیہ وسلم نے فرمایا: وہ بھی جنتی ہے، ایک آدمی نے کہا: یا رسول اللہ صلی اللہ علیہ وسلم اور ایک والا؟ اور ایک والا بھی جنتی ہے۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كتاب البر والصلة/حدیث: 7533]

سیدنا انس رضی اللہ عنہ فرماتے ہیں: نبی اکرم صلی اللہ علیہ وسلم کچھ صحابہ کے پاس سے گزرے، ایک بچہ گزرگاہ میں موجود تھا، جب اس کی ماں نے سواریوں کو آتے دیکھا تو اس کے کچلے جانے کا خوف اس کو دامن گیر ہوا، وہ میرا بیٹا، میرا بیٹا پکارتی ہوئی بے ساختہ دوڑی اور آ کر اپنے بچے کو گود میں اٹھا لیا، لوگوں نے کہا: اے اللہ کے نبی! یہ اپنے بچے کو کسی بھی طور پر آگ میں ڈالنا گوارا نہیں کر سکتی، رسول اللہ صلی اللہ علیہ وسلم نے فرمایا: نہیں، اللہ کی قسم! اللہ تعالیٰ اپنے دوست کو کبھی بھی آگ میں نہیں ڈالے گا، راوی کہتے ہیں کہ اللہ تعالیٰ کے نبی صلی اللہ علیہ وسلم اس بات پر ان سے بحث کی۔ ٭٭ یہ امام بخاری رحمۃ اللہ علیہ اور مسلم رحمۃ اللہ علیہ کے معیار کے مطابق صحیح ہے لیکن انہوں نے اس کو نقل نہیں کیا۔ [المستدرك على الصحيحين/كتاب البر والصلة/حدیث: 7534]