سیدنا خوات بن جبیر رضی اللہ عنہ فرماتے ہیں: دن کے اول میں سونا عقلمندی ہے، درمیان میں سونا مناسب ہے اور دن کے آخری وقت میں سونا بے وقوفی ہے۔ [المستدرك على الصحيحين/كتاب الأدب/حدیث: 7991]

سیدنا عبداللہ بن رواحہ رضی اللہ عنہ کے بارے میں مروی ہے کہ وہ ایک سفر سے واپس آئے، رات کو اچانک (بن بتائے) اپنے گھر آ گئے، انہوں نے اپنی بیوی کے ساتھ کسی کو لیٹے ہوئے پایا، اس کو مارنے کے لیے انہوں نے تلوار نکال لی، ان کی زوجہ کہنے لگی: یہ فلاں خاتون ہے، یہ مجھے کنگھی کرنے آئی تھی، پھر وہ رسول اللہ صلی اللہ علیہ وسلم کی بارگاہ میں حاضر ہوئے اور آپ صلی اللہ علیہ وسلم کو یہ ماجرا سنایا، رسول اللہ صلی اللہ علیہ وسلم نے فرمایا: رات کے وقت سفر سے عوتوں کے پاس مت آیا کرو۔ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اس کو نقل نہیں کیا۔ [المستدرك على الصحيحين/كتاب الأدب/حدیث: 7992]