سیدنا انس بن مالک رضی اللہ عنہ فرماتے ہیں کہ جب بارش برستی تو رسول اللہ صلی اللہ علیہ وسلم اپنی کمر مبارک سے کپڑا ہٹا دیتے تاکہ پشت مبارک پر بارش کے قطرے پڑیں، آپ صلی اللہ علیہ وسلم سے پوچھا گیا: یا رسول اللہ صلی اللہ علیہ وسلم آپ ایسا کیوں کرتے ہیں؟ آپ صلی اللہ علیہ وسلم فرماتے: اس لئے کہ یہ اپنے رب کی بارگاہ سے ابھی ابھی آئی ہے۔ ٭٭ یہ حدیث امام مسلم رحمۃ اللہ علیہ کے معیار کے مطابق صحیح ہے لیکن شیخین نے اس کو نقل نہیں کیا۔ [المستدرك على الصحيحين/كتاب الأدب/حدیث: 7961]

سیدنا ابوہریرہ رضی اللہ عنہ فرماتے ہیں کہ مکہ کے راستے میں، لوگوں پر آندھی آ گئی، اس وقت سیدنا عمر رضی اللہ عنہ سفر حج پر تھے، آندھی بہت سخت ہو گئی، سیدنا عمر بن خطاب رضی اللہ عنہ نے پوچھا: یہ آندھی کیسی ہے؟ لیکن کسی نے بھی کوئی خاطر خواہ جواب نہ دیا، (سیدنا ابوہریرہ فرماتے ہیں) سیدنا عمر نے آندھی کے بارے میں جو بات پوچھی تھی، اس کی اطلاع مجھ تک بھی پہنچی، میں نے اپنی سواری کو تیز کیا اور سیدنا عمر رضی اللہ عنہ کے پاس پہنچ گیا، میں نے ان سے کہا: اے امیرالمومنین! مجھے پتہ چلا ہے کہ آپ نے ”ریح“ (ہوا) کے بارے میں پوچھا ہے، میں نے رسول اللہ صلی اللہ علیہ وسلم کو فرماتے ہوئے سنا ہے کہ ”ریح“ (ہوا) اللہ تعالیٰ کی رحمت بھی لے کر آتی ہے اور یہ عذاب بھی لاتی ہے۔ اس لئے اس کو گالی مت دو، بلکہ اس کی بھلائی مانگو اور اس کے شر سے اللہ تعالیٰ کی پناہ مانگو۔ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح الاسناد ہے لیکن شیخین رحمۃ اللہ علیہما نے اس کو نقل نہیں کیا۔ [المستدرك على الصحيحين/كتاب الأدب/حدیث: 7962]

سیدنا سلمہ بن اکوع رضی اللہ عنہ مرفوعاً روایت کرتے ہیں کہ جب ہوا بہت تیز چلتی (یعنی جب آندھی آتی) تو حضور صلی اللہ علیہ وسلم یہ دعا مانگتے اللھم لقحا لاعقیما اے اللہ! اسے ہمارے لئے فائدہ مند بنا، نقصان دہ نہ بنا۔ ٭٭ یہ اسناد امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اس کو نقل نہیں کیا۔ [المستدرك على الصحيحين/كتاب الأدب/حدیث: 7963]

ام المومنین سیدہ عائشہ رضی اللہ عنہا فرماتی ہیں: رسول اللہ صلی اللہ علیہ وسلم ، سیدہ خدیجہ رضی اللہ عنہا کو اکثر یاد کیا کرتے تھے میں نے کہا: قریش کی ایک بوڑھی خاتون کے وفات پانے کے بعد اللہ تعالیٰ نے آپ کو ایک خوبصورت دوشیزہ سے نوازا ہے۔ یہ سن کر رسول اللہ صلی اللہ علیہ وسلم کے چہرے پر ناراضگی کے آثار نمودار ہوئے، رسول اللہ صلی اللہ علیہ وسلم کی یہ کیفیت نزول وحی کے وقت ہوا کرتی تھی، یا اس وقت ہوتی تھی جب رعد و باراں ہوتی، جب تک حضور صلی اللہ علیہ وسلم کو یہ علم نہ ہو جاتا کہ یہ رعد اور برسات رحمت کی ہے یا عذاب کی ہے اس وقت تک آپ کی کیفیت بدستور وہی رہتی۔ ٭٭ یہ حدیث امام مسلم رحمۃ اللہ علیہ کے معیار کے مطابق صحیح ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كتاب الأدب/حدیث: 7964]

سیدنا عبداللہ بن عمر رضی اللہ عنہما فرماتے ہیں: جب رسول اللہ صلی اللہ علیہ وسلم بادلوں کی گرج اور کڑک سنتے تو یہ دعا مانگتے اللھم لا تقتلنا بغضبک ولا تھلکنا بعذابک و عافنا قبل ذلک ” اے اللہ! تو ہمیں اپنے غضب کے ساتھ ہلاک نہ فرما، اور نہ تو ہمیں اپنے عذاب کے ساتھ ہلاک فرما۔ اس سے پہلے ہی ہمیں عافیت عطا فرما۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كتاب الأدب/حدیث: 7965]

ابن سیرین کہتے ہیں: ہم نے اپنے گھر کی چھت پر سیدنا ابوقتادہ کے ہمراہ رات کا کھانا کھایا، ایک ستارہ ٹوٹا، ہم اس کو دیکھنے لگے، سیدنا ابوقتادہ نے ہمیں اس کی جانب دیکھنے سے منع فرما دیا اور فرمایا: تم اس کو مت دیکھو، کیونکہ ہمیں اس سے منع کیا گیا ہے۔ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اس کو نقل نہیں کیا۔ [المستدرك على الصحيحين/كتاب الأدب/حدیث: 7966]

سیدنا عبادہ بن صامت رضی اللہ عنہ فرماتے ہیں کہ ایک دن رسول اللہ صلی اللہ علیہ وسلم اپنی سواری پر سوار ہو کر اپنے صحابہ کرام رضی اللہ عنہم کے ہمراہ باہر نکلے، سیدنا معاذ بن جبل رضی اللہ عنہ نے عرض کی: یا رسول اللہ صلی اللہ علیہ وسلم ! کیا آپ دل کی خوشی سے مجھے اجازت دیتے ہیں کہ میں آپ کے قریب آ جاؤں؟ حضور صلی اللہ علیہ وسلم نے فرمایا: ہاں۔ سیدنا معاذ نبی اکرم صلی اللہ علیہ وسلم کے قریب آ گئے، پورا راستہ سیدنا معاذ، رسول اللہ صلی اللہ علیہ وسلم کے ساتھ ساتھ چلے، اس دوران سیدنا معاذ رضی اللہ عنہ نے عرض کی: یا رسول اللہ صلی اللہ علیہ وسلم میرے ماں باپ آپ پر قربان ہو جائیں، کاش اللہ تعالیٰ ہمارا (وفات کا) دن آپ کے (وفات کے) دن سے پہلے کر دے (یعنی کاش ایسا ہو جائے کہ آپ سے پہلے ہمیں وفات ملے)۔ یا رسول اللہ کچھ چیزیں ایسی ہیں جو آپ دیکھ رہے ہیں اور وہ ہماری نگاہوں سے اوجھل ہیں، یا رسول اللہ صلی اللہ علیہ وسلم ہم آپ کے بعد کیا عمل کریں؟ حضور صلی اللہ علیہ وسلم کچھ دیر خاموش رہے، (سیدنا معاذ نے) عرض کی: جہاد فی سبیل اللہ، حضور صلی اللہ علیہ وسلم نے فرمایا: جہاد بہت اچھی چیز ہے، لیکن لوگوں کو جس چیز کی زیادہ ضرورت ہے وہ اس سے بھی اہم ہے (سیدنا معاذ نے کہا:) روزہ اور صدقہ، آپ صلی اللہ علیہ وسلم نے فرمایا: روزہ اور صدقہ بھی بہت اچھی چیز ہے۔ اس کے بعد سیدنا معاذ نے ان تمام نیک اعمال کا ذکر کیا جو انسان کرتا ہے، رسول اللہ صلی اللہ علیہ وسلم نے فرمایا: اس سے بھی اچھی چیز کی لوگوں کی عادت بناؤ۔ سیدنا معاذ نے پوچھا: یا رسول اللہ صلی اللہ علیہ وسلم ان تمام چیزوں سے بھی اہم چیز کون سی ہے؟ حضور صلی اللہ علیہ وسلم نے ان کے منہ کی جانب اشارہ کرتے ہوئے فرمایا: خاموشی بہتر ہے، ہاں بولنا ہو تو اچھی بات بولو، سیدنا معاذ رضی اللہ عنہ نے پوچھا: یا رسول اللہ صلی اللہ علیہ وسلم ہماری زبانیں جو کچھ بولتی ہیں، کیا اس پر ہمارا مواخذہ ہو گا؟ رسول اللہ صلی اللہ علیہ وسلم نے معاذ کی ران پر ہاتھ مارا اور فرمایا: اے معاذ تیری ماں تجھے روئے، یا (شاید اس موقع پر ان کے لیے کوئی اور الفاظ بولے پھر فرمایا) لوگوں کو اوندھے منہ دوزخ میں جو ڈالا جائے گا، وہ ان کی زبانوں کی گفتگو کی وجہ سے ہو گا۔ اس لیے جو شخص اللہ تعالیٰ پر اور آخرت پر ایمان رکھتا ہے اس کو چاہیے کہ اچھی بات کرے اور بری بات سے خاموشی اختیار کرے، اچھی بات کہو، تم فائدے میں رہو گے، اور بری بات سے خاموش رہو، تم شر سے بچے رہو گے۔ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اس کو نقل نہیں کیا۔ اس حدیث کو اس مقام پر درج کرنے کی وجہ یہ ثابت کرنا ہے کہ اگر طالب علم یہ دعا مانگے کہ اللہ تعالیٰ میرے استاد سے پہلے مجھے وفات عطا کرے تو یہ جائز ہے۔ [المستدرك على الصحيحين/كتاب الأدب/حدیث: 7967]

سیدنا جابر رضی اللہ عنہ فرماتے ہیں کہ رسول اللہ صلی اللہ علیہ وسلم نے اس بات سے منع فرمایا کہ ایک مرد دوسرے مرد کے ساتھ ایک بستر میں برہنہ لیٹے، اور ایک عورت دوسری عورت کے ساتھ ایک بستر میں برہنہ لیٹے۔ ٭٭ یہ حدیث امام مسلم رحمۃ اللہ علیہ کے معیار کے مطابق صحیح ہے لیکن شیخین نے اس کو نقل نہیں کیا۔ [المستدرك على الصحيحين/كتاب الأدب/حدیث: 7968]

سیدنا جابر رضی اللہ عنہ فرماتے ہیں کہ رسول اللہ صلی اللہ علیہ وسلم نے عورت کو عورت کے ساتھ اور مرد کو مرد کے ساتھ ایک بستر میں برہنہ لیٹنے سے منع فرمایا۔ ابن لیلی فرماتے ہیں ” میرا خیال ہے کہ اس میں تعزیر ہے“۔ (یعنی اگر کوئی شخص اس عمل میں مبتلا پایا جائے تو اس کو تعزیراً سزا دینی چاہیے) اور محمد بن عبدالرحمن بن ابی لیلی بزرگ انصاری صحابہ میں سے ہیں، کوفہ کے فقیہ اور مفتی ہیں۔ اگر انہوں نے اس میں تعزیر سمجھی ہے تو ان کے اس قول کی پیروی کرنی چاہیے۔ [المستدرك على الصحيحين/كتاب الأدب/حدیث: 7969]

سیدنا عبداللہ بن عباس رضی اللہ عنہما فرماتے ہیں کہ رسول اللہ صلی اللہ علیہ وسلم نے ارشاد فرمایا: مرد، مرد کے ساتھ اور عورت، عورت کے ساتھ ایک بستر میں برہنہ نہ لیٹے۔ ٭٭ یہ حدیث امام بخاری رحمۃ اللہ علیہ کے معیار کے مطابق صحیح ہے۔ اور ان دونوں نے اس حدیث کو صحیح قرار دیا ہے۔ [المستدرك على الصحيحين/كتاب الأدب/حدیث: 7970]