سیدنا قیس بن سعد بن عبادہ سے مروی ہے کہ ان کے والد نے ان کو نبی اکرم صلی اللہ علیہ وسلم کی خدمت میں بھیجا، آپ فرماتے ہیں: نبی اکرم صلی اللہ علیہ وسلم میرے پاس تشریف لائے، میں دو رکعتیں پڑھ چکا تھا، حضور صلی اللہ علیہ وسلم نے اپنا پاؤں مجھے مارا، اور فرمایا: کیا میں جنت کے دروازوں پر تیری راہنمائی نہ کروں؟ میں نے کہا: جی ہاں یا رسول اللہ صلی اللہ علیہ وسلم ، آپ صلی اللہ علیہ وسلم نے فرمایا: لا حول ولا قوۃ الا باللہ۔ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اس کو نقل نہیں کیا۔ اس حدیث کو اس مقام پر ذکر کرنے کا مقصد یہ ہے کہ والد کے لیے یہ جائز ہے کہ وہ اپنے بیٹے سے خدمت لے سکتا ہے، پھر جس کو تحفہ دیا گیا ہے، اس کے لیے بھی جائز ہے کہ وہ اس سے اپنی خدمت بھی کروا سکتا ہے۔ پھر اس میں سیدنا قیس بن سعد رضی اللہ عنہ کی یہ فضیلت بھی ثابت ہو رہی ہے کہ انہوں نے نبی اکرم صلی اللہ علیہ وسلم کی خدمت کی ہے۔ حتی کہ وہ رسول اللہ صلی اللہ علیہ وسلم کے محافظ بن کر رہے۔ پھر یہ امیرالمومنین سیدنا علی ابن ابی طالب رضی اللہ عنہ کے ساتھ تنگی اور کشادگی میں مسلسل رہے، اور جنگ صفین میں سیدنا علی رضی اللہ عنہ کی حمایت میں لڑتے ہوئے شہید ہوئے۔ [المستدرك على الصحيحين/كتاب الأدب/حدیث: 7981]

سیدنا انس بن مالک رضی اللہ عنہ فرماتے ہیں: ایک یہودی لڑکا، نبی اکرم صلی اللہ علیہ وسلم کی خدمت کیا کرتا تھا، ایک دفعہ کا ذکر ہے کہ وہ لڑکا بیمار ہو گیا، نبی اکرم صلی اللہ علیہ وسلم اس کی عیادت کے لیے تشریف لے گئے، اور فرمایا: اے لڑکے، اسلام قبول کر لے اور لا الہ الا اللہ پڑھ لے، لڑکا اپنے باپ کی جانب دیکھنے لگ گیا، اس کے باپ نے کہا: بیٹا محمد صلی اللہ علیہ وسلم جو کچھ تمہیں کہہ رہے ہیں، وہ پڑھ لو، اس نے ”لا الہ الا اللہ“ پڑھا اور فوت ہو گیا، رسول اللہ صلی اللہ علیہ وسلم نے صحابہ سے فرمایا: اس کی نماز جنازہ پڑھو، اور خود رسول اللہ صلی اللہ علیہ وسلم نے اس کی نماز جنازہ پڑھائی۔ [المستدرك على الصحيحين/كتاب الأدب/حدیث: 7982]

سیدنا ابوبکرہ رضی اللہ عنہ فرماتے ہیں کہ نبی اکرم صلی اللہ علیہ وسلم کے پاس ایک شخص نے آ کر ان کی جماعت کے فتحیاب ہونے کی خوشخبری سنائی، اس وقت حضور صلی اللہ علیہ وسلم ، ام المومنین سیدہ عائشہ رضی اللہ عنہا کی گود میں سر رکھ کر لیٹے ہوئے تھے، نبی اکرم صلی اللہ علیہ وسلم فوراً! اٹھ کر کھڑے ہوئے، اور اللہ تعالیٰ کی بارگاہ میں سر بسجود ہو گئے، جب آپ نے سجدے سے سر اٹھایا تو اس خوشخبری سنانے والے سے تفصیلات سننے لگے اور وہ دشمن کے معاملات کی تفصیل حضور صلی اللہ علیہ وسلم کو سنا رہا تھا، اس میں اس نے یہ بھی بتایا کہ دشمنوں کی جانب سے ان کی سربراہ ایک عورت تھی، نبی اکرم صلی اللہ علیہ وسلم نے فرمایا: مرد ہلاک ہو جاتے ہیں جب وہ عورتوں کی اطاعت کرتے ہیں۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كتاب الأدب/حدیث: 7983]

سیدنا ابوبکرہ رضی اللہ عنہ فرماتے ہیں: ایک چیز میں نے رسول اللہ صلی اللہ علیہ وسلم سے سن رکھی تھی اس کی برکت سے اللہ تعالیٰ نے مجھے بچا لیا، واقعہ یہ ہے کہ جب رسول اللہ صلی اللہ علیہ وسلم کو اطلاع ملی کہ ذی یزن کا بادشاہ فوت ہو گیا ہے، اور انہوں نے امور سلطنت ایک عورت کے سپرد کر دئیے ہیں تو نبی اکرم صلی اللہ علیہ وسلم نے ارشاد فرمایا: وہ قوم کبھی کامیاب نہیں ہو سکتی جس کی حکمران عورت ہو۔ ٭٭ یہ حدیث امام بخاری رحمۃ اللہ علیہ اور امام مسلم رحمۃ اللہ علیہ کے معیار کے مطابق صحیح ہے لیکن شیخین رحمۃ اللہ علیہما نے اس کو نقل نہیں کیا۔ [المستدرك على الصحيحين/كتاب الأدب/حدیث: 7984]

سیدنا جابر بن عبداللہ رضی اللہ عنہما فرماتے ہیں: سیدنا جریر بن عبداللہ رضی اللہ عنہ رسول اللہ صلی اللہ علیہ وسلم کی بارگاہ میں حاضر ہوئے، اس وقت حضور صلی اللہ علیہ وسلم کے صحابہ کرام رضی اللہ عنہم بھی حضور صلی اللہ علیہ وسلم کے ساتھ تھے، اور ہر شخص مجلس میں اپنی جگہ پر جم کر بیٹھا ہوا تھا، رسول اللہ صلی اللہ علیہ وسلم نے اپنی چادر اس کی طرف پھینکی، انہوں نے رسول اللہ صلی اللہ علیہ وسلم کی چادر مبارک کو چوم کر سینے اور آنکھوں سے لگایا، پھر عرض کی: جیسے آپ نے مجھے عزت بخشی ہے، اللہ تعالیٰ آپ کو بھی عزت بخشے، پھر سیدنا جریر رضی اللہ عنہ نے وہ چادر رسول اللہ صلی اللہ علیہ وسلم کے کندھوں پر ڈال دی، رسول اللہ صلی اللہ علیہ وسلم نے فرمایا: جو شخص اللہ اور اس کے رسول پر ایمان رکھتا ہے، جب اس کے پاس کسی قوم کا باعزت شخص آئے، اس کو چاہیے کہ وہ اس کو عزت دے۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو اس اسناد کے ہمراہ نقل نہیں کیا۔ [المستدرك على الصحيحين/كتاب الأدب/حدیث: 7985]

ابوتمیمہ بیان کرتے ہیں کہ رسول اللہ صلی اللہ علیہ وسلم کے ردیف (پیچھے سواری کرنے والے) کے بارے میں مروی ہے کہ ان کا گھوڑا پھسل گیا انہوں نے کہا: شیطان نے پھسلا دیا۔ رسول اللہ صلی اللہ علیہ وسلم نے ارشاد فرمایا: تم یہ مت کہو شیطان نے پھسلایا ہے کیونکہ اگر تم یہ کہو گے کہ اس کو شیطان نے پھسلایا ہے، تو اس سے شیطان بڑا ہو جاتا ہے، اور کہتا ہے: میں نے اپنی قوت کے ساتھ اس کو پچھاڑ دیا ہے۔ اور جب ”بسم اللہ“ پڑھ لی جائے تو وہ سکڑ کر مکھی کی مثل ہو جاتا ہے۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ یزید بن زریع نے خالد سے روایت کرتے ہوئے رسول اللہ صلی اللہ علیہ وسلم کے جس ردیف کا نام ذکر نہیں کیا تھا، دیگر محدثین نے ان کا نام ”اسامہ بن مالک “ ذکر کیا ہے، وہ ابوالملیح بن اسامہ کے والد ہیں۔ [المستدرك على الصحيحين/كتاب الأدب/حدیث: 7986]

ابوتمیمہ روایت کرتے ہیں کہ ابوالملیح بن اسامہ اپنے والد کا یہ بیان نقل کرتے ہیں (وہ فرماتے ہیں) میں رسول اللہ صلی اللہ علیہ وسلم کے پیچھے سوار تھا، ہمارا اونٹ گر گیا، میں نے کہا: اس کو شیطان نے گرایا ہے، نبی اکرم صلی اللہ علیہ وسلم نے مجھے فرمایا: یہ مت کہو کہ ” اس کو شیطان نے گرایا ہے “ کیونکہ اس سے وہ بڑا ہو جاتا ہے، اور وہ ایک مکان کی طرح ہو جاتا ہے اور طاقتور ہو جاتا ہے، تم کہو ”بسم اللہ“ کیونکہ جب بسم اللہ کہو گے تو یہ چھوٹا ہوتے ہوتے مکھی جتنا ہو جائے گا۔ [المستدرك على الصحيحين/كتاب الأدب/حدیث: 7987]

سیدنا جابر رضی اللہ عنہ فرماتے ہیں: رسول اللہ صلی اللہ علیہ وسلم جب چلتے تو ادھر ادھر نہیں دیکھا کرتے تھے۔ ٭٭ امام حاکم کہتے ہیں: مجھے نہیں معلوم کہ یہ حدیث محمد بن منکدر سے عبدالجبار کے علاوہ کسی نے روایت کی ہو۔ [المستدرك على الصحيحين/كتاب الأدب/حدیث: 7988]

سیدنا انس بن مالک رضی اللہ عنہ فرماتے ہیں کہ رسول اللہ صلی اللہ علیہ وسلم نے ارشاد فرمایا: تم اپنے بچوں کا نام ” محمد “ رکھتے ہو، پھر ان پر لعنت بھی کرتے ہو۔ (ایسا مت کیا کرو، جب نام اتنا اچھا رکھتے ہو تو اس نام کا احترام بھی کرو) عطیہ کے واسطے سے ثابت سے یہ حدیث روایت کرنے میں امام حاکم منفرد ہیں۔ [المستدرك على الصحيحين/كتاب الأدب/حدیث: 7989]

سیدنا ابوہریرہ رضی اللہ عنہ فرماتے ہیں کہ جب نبی اکرم صلی اللہ علیہ وسلم کو چھینک آتی تو آپ صلی اللہ علیہ وسلم کپڑے یا ہاتھ کے ساتھ اپنا چہرہ ڈھانپ لیتے اور اپنی آواز کو پست رکھتے۔ ٭٭ یہ حدیث صحیح الاسناد ہے لیکن امام بخاری رحمۃ اللہ علیہ اور امام مسلم رحمۃ اللہ علیہ نے اس کو نقل نہیں کیا۔ [المستدرك على الصحيحين/كتاب الأدب/حدیث: 7990]