امام ابوداؤد رحمہ اللہ فرماتے ہیں کہ ”میں نے محمد بن عیسیٰ کو یہ روایت بیان کرتے سنا، وہ اسے بواسطہ معتمر، حکم بن ابان سے روایت کرتے تھے اور اس میں ابن عباس رضی اللہ عنہ کا ذکر نہیں کیا۔ (بلکہ عکرمہ سے روایت کی ہے۔ یعنی سند مرسل ہے۔)“ [سنن ابي داود/كتاب تفريع أبواب الطلاق /حدیث: 2225]

سیدنا ثوبان رضی اللہ عنہ بیان کرتے ہیں کہ رسول اللہ صلی اللہ علیہ وسلم نے فرمایا: ”جو عورت بغیر کسی وجہ کے اپنے شوہر سے طلاق مانگتی ہے، اس پر جنت کی خوشبو حرام ہے۔“ [سنن ابي داود/كتاب تفريع أبواب الطلاق /حدیث: 2226]

عمرہ بنت عبدالرحمٰن رحمہا اللہ، حبیبہ بنت سہل انصاریہ رضی اللہ عنہا کے متعلق بیان کرتی ہیں کہ یہ سیدنا ثابت بن قیس بن شماس رضی اللہ عنہ کی زوجیت میں تھی۔ رسول اللہ صلی اللہ علیہ وسلم فجر کی نماز کے لیے جانے لگے تو آپ صلی اللہ علیہ وسلم نے حبیبہ بنت سہل رضی اللہ عنہا کو اندھیرے میں اپنے دروازے کے پاس کھڑے پایا۔ رسول اللہ صلی اللہ علیہ وسلم نے پوچھا: ”یہ کون ہے؟“ اس نے کہا: ”میں حبیبہ بنت سہل ہوں۔“ آپ صلی اللہ علیہ وسلم نے پوچھا: ”کیا بات ہے؟“ کہنے لگی: ”میں نہیں اور ثابت بن قیس نہیں!“ یعنی اپنے شوہر کے متعلق کہا۔ (مطلب یہ تھا کہ ہم دونوں کا اکٹھا رہنا ممکن نہیں) پھر جب سیدنا ثابت بن قیس رضی اللہ عنہ آئے تو رسول اللہ صلی اللہ علیہ وسلم نے ان سے کہا: ”حبیبہ بنت سہل آئی ہے اور اللہ تعالیٰ کو جو کچھ منظور تھا اس نے مجھ سے بیان کیا۔“ حبیبہ رضی اللہ عنہا نے کہا: ”اے اللہ کے رسول! جو کچھ انہوں نے مجھے دیا ہے وہ سب میرے پاس ہے۔“ تو رسول اللہ صلی اللہ علیہ وسلم نے ثابت بن قیس رضی اللہ عنہ سے فرمایا: ”اس سے وصول کر لو۔“ چنانچہ انہوں نے مال لے لیا اور پھر وہ اپنے گھر والوں کے ہاں بیٹھ رہی۔ [سنن ابي داود/كتاب تفريع أبواب الطلاق /حدیث: 2227]

ام المؤمنین سیدہ عائشہ رضی اللہ عنہا سے مروی ہے کہ حبیبہ بنت سہل رضی اللہ عنہا، سیدنا ثابت بن قیس بن شماس رضی اللہ عنہ کی زوجیت میں تھی تو ثابت رضی اللہ عنہ نے اس کو مارا اور اس کا کچھ توڑ بھی دیا، تب وہ فجر کے بعد رسول اللہ صلی اللہ علیہ وسلم کی خدمت میں آئی اور شوہر کی شکایت کی۔ پس نبی کریم صلی اللہ علیہ وسلم نے ثابت رضی اللہ عنہ کو بلایا اور فرمایا: ”اس سے کچھ مال لے لو اور اس کو علیحدہ کر دو۔“ انہوں نے کہا: ”اے اللہ کے رسول! کیا یہ صحیح ہے؟“ آپ صلی اللہ علیہ وسلم نے فرمایا: ”ہاں۔“ انہوں نے کہا: ”میں نے اس کو مہر میں دو باغ دیے ہیں اور وہ اسی کے قبضے میں ہیں۔“ نبی کریم صلی اللہ علیہ وسلم نے فرمایا: ”وہ دونوں لے لو اور اسے علیحدہ کر دو۔“ چنانچہ انہوں نے ایسے ہی کیا۔ [سنن ابي داود/كتاب تفريع أبواب الطلاق /حدیث: 2228]

سیدنا ابن عباس رضی اللہ عنہ سے روایت ہے کہ ”ثابت بن قیس رضی اللہ عنہ کی بیوی نے ان سے خلع لیا تو نبی کریم صلی اللہ علیہ وسلم نے اس کی عدت ایک حیض مقرر فرمائی تھی۔“ امام ابوداؤد رحمہ اللہ کہتے ہیں کہ ”اس حدیث کو عبدالرزاق نے معمر سے، انہوں نے عمرو بن مسلم سے، انہوں نے عکرمہ سے، انہوں نے نبی کریم صلی اللہ علیہ وسلم سے مرسل بیان کیا ہے۔“ [سنن ابي داود/كتاب تفريع أبواب الطلاق /حدیث: 2229]

سیدنا ابن عمر رضی اللہ عنہ سے مروی ہے کہ: ”خلع والی عورت کی عدت ایک حیض ہے۔“ [سنن ابي داود/كتاب تفريع أبواب الطلاق /حدیث: 2230]

سیدنا ابن عباس رضی اللہ عنہما سے مروی ہے کہ مغیث غلام تھے۔ کہنے لگے: ”اے اللہ کے رسول! میرے بارے میں اس کو سفارش فرما دیجیے۔“ تو رسول اللہ صلی اللہ علیہ وسلم نے فرمایا: ”اے بریرہ! اللہ سے ڈر، بلاشبہ وہ تیرا شوہر ہے اور تیرے بچے کا باپ بھی ہے۔“ وہ کہنے لگی: ”اے اللہ کے رسول! کیا آپ اس کے بارے میں مجھے حکماً ارشاد فرماتے ہیں؟“ آپ صلی اللہ علیہ وسلم نے فرمایا: ”نہیں، میں صرف سفارشی ہوں۔“ چنانچہ اس (مغیث) کے آنسو اس کے رخساروں پر بہتے تھے (وہ روتا پھرتا تھا) تو رسول اللہ صلی اللہ علیہ وسلم نے عباس رضی اللہ عنہ سے فرمایا: ”کس قدر تعجب کی بات ہے کہ مغیث کو بریرہ سے کتنی محبت ہے اور اس کو اس سے کتنا بغض ہے۔“ [سنن ابي داود/كتاب تفريع أبواب الطلاق /حدیث: 2231]

سیدنا ابن عباس رضی اللہ عنہما سے منقول ہے کہ ”بریرہ رضی اللہ عنہا کا خاوند کالے رنگ کا غلام تھا، جس کا نام مغیث تھا۔ رسول اللہ صلی اللہ علیہ وسلم نے بریرہ رضی اللہ عنہا کو اختیار دیا تھا (اپنے شوہر کی زوجیت میں رہے یا اس سے آزاد ہو جائے) اور اسے حکم دیا تھا کہ عدت گزارے۔“ [سنن ابي داود/كتاب تفريع أبواب الطلاق /حدیث: 2232]

ام المؤمنین سیدہ عائشہ رضی اللہ عنہا بریرہ کے قصے میں بیان کرتی ہیں کہ ”اس کا شوہر غلام تھا۔ رسول اللہ صلی اللہ علیہ وسلم نے بریرہ کو اختیار دیا تو اس نے اپنے آپ کو اختیار کر لیا۔ اگر شوہر آزاد ہوتا تو اس کو اختیار نہ دیتے۔“ [سنن ابي داود/كتاب تفريع أبواب الطلاق /حدیث: 2233]

ام المؤمنین سیدہ عائشہ رضی اللہ عنہا سے مروی ہے کہ ”بریرہ کو رسول اللہ صلی اللہ علیہ وسلم نے اختیار دیا تھا، جبکہ اس کا شوہر غلام تھا۔“ [سنن ابي داود/كتاب تفريع أبواب الطلاق /حدیث: 2234]