اسود بن یزید، سیدہ عائشہ رضی اللہ عنہا سے بیان کرتے ہیں کہ بریرہ کو جب آزاد کیا گیا تو اس کا شوہر بھی آزاد تھا اور بریرہ کو اختیار دیا گیا تو وہ کہنے لگی: ”میں اس کے ساتھ رہنا پسند نہیں کرتی خواہ مجھے اس اس قدر (مال) بھی کیوں نہ دے دیا جائے۔“ [سنن ابي داود/كتاب تفريع أبواب الطلاق /حدیث: 2235]

ام المؤمنین سیدہ عائشہ رضی اللہ عنہا سے مروی ہے کہ بریرہ کو آزاد کیا گیا تو وہ مغیث کی زوجیت میں تھی جو کہ آل ابی احمد کا غلام تھا، تو رسول اللہ صلی اللہ علیہ وسلم نے اس کو اختیار دے دیا اور فرمایا: ”اگر وہ تم سے قریب ہو گیا تو تمہارا اختیار باقی نہیں رہے گا۔“ [سنن ابي داود/كتاب تفريع أبواب الطلاق /حدیث: 2236]

ام المؤمنین سیدہ عائشہ رضی اللہ عنہا سے مروی ہے کہ انہوں نے اپنے ایک مملوک جوڑے کو آزاد کرنے کا ارادہ کیا تو انہوں نے نبی کریم صلی اللہ علیہ وسلم سے اس بارے میں پوچھا، آپ نے حکم دیا: ”عورت سے پہلے مرد کو آزاد کرنے سے ابتدا کرنا۔“ نصر بن علی کی سند اس طرح ہے: «أَخْبَرَنِي أَبُو عَلِيٍّ الْحَنَفِيُّ، عَنْ عُبَيْدِ اللَّهِ» ”مجھے ابو علی حنفی نے عبید اللہ سے خبر دی۔“ [سنن ابي داود/كتاب تفريع أبواب الطلاق /حدیث: 2237]

سیدنا ابن عباس رضی اللہ عنہما سے مروی ہے کہ رسول اللہ صلی اللہ علیہ وسلم کے دور میں ایک شخص مسلمان ہو کر آیا، پھر اس کے بعد اس کی بیوی بھی مسلمان ہو کر آ گئی تو اس شخص نے کہا: ”اے اللہ کے رسول! یہ عورت بھی میرے ساتھ ہی مسلمان ہوئی ہے۔“ تو آپ صلی اللہ علیہ وسلم نے اس کو اس (کے شوہر) کی طرف لوٹا دیا۔ [سنن ابي داود/كتاب تفريع أبواب الطلاق /حدیث: 2238]

سیدنا ابن عباس رضی اللہ عنہ سے مروی ہے کہ رسول صلی اللہ علیہ وسلم کے زمانے میں ایک عورت مسلمان ہو گئی اور پھر نکاح کر لیا، بعد ازاں اس کا شوہر بھی نبی کریم صلی اللہ علیہ وسلم کے پاس آ گیا، اس نے کہا: ”اے اللہ کے رسول! میں بھی مسلمان ہو چکا تھا اور اسے میرے اسلام قبول کرنے کا علم تھا۔“ چنانچہ رسول صلی اللہ علیہ وسلم نے اس کو دوسرے شوہر سے چھین کر (اس کا نکاح فسخ کرا کے) پہلے شوہر کی طرف لوٹا دیا۔ [سنن ابي داود/كتاب تفريع أبواب الطلاق /حدیث: 2239]

سیدنا ابن عباس رضی اللہ عنہ نے بیان کیا کہ ”رسول اللہ صلی اللہ علیہ وسلم نے اپنی صاحبزادی زینب کو (ان کے شوہر) ابوالعاص رضی اللہ عنہ پر پہلے نکاح ہی سے لوٹا دیا تھا، اور کوئی نیا (نکاح وغیرہ) نہ کیا تھا۔“ محمد بن عمرو نے اپنی روایت میں کہا کہ ”آپ نے چھ سال بعد (لوٹایا تھا)“ اور حسن بن علی نے کہا: ”دو سال بعد۔“ [سنن ابي داود/كتاب تفريع أبواب الطلاق /حدیث: 2240]

سیدنا حارث بن قیس بن عمیرہ الاسدی رضی اللہ عنہ بیان کرتے ہیں کہ ”جب میں نے اسلام قبول کیا تو میرے ہاں آٹھ عورتیں تھیں، میں نے نبی کریم صلی اللہ علیہ وسلم سے اس کا ذکر کیا تو آپ صلی اللہ علیہ وسلم نے فرمایا: ”ان میں سے چار کو منتخب کر لو۔“” [سنن ابي داود/كتاب تفريع أبواب الطلاق /حدیث: 2241]

احمد بن ابراہیم نے بیان کیا کہ ”ہم سے بکر بن عبدالرحمٰن، قاضی کوفہ نے بیان کیا، انہوں نے عیسیٰ بن مختار سے، انہوں نے ابن ابی لیلیٰ سے، انہوں نے حمیضہ بن شمرذل سے، انہوں نے سیدنا قیس بن حارث رضی اللہ عنہ سے مذکورہ بالا حدیث کے ہم معنی بیان کیا۔“ [سنن ابي داود/كتاب تفريع أبواب الطلاق /حدیث: 2242]

سیدنا فیروز (دیلمی) رضی اللہ عنہ سے مروی ہے، وہ کہتے ہیں کہ میں نے کہا: ”اے اللہ کے رسول! میں نے اسلام قبول کیا ہے اور میری زوجیت میں دو بہنیں ہیں۔“ آپ صلی اللہ علیہ وسلم نے فرمایا: ”ان میں سے کسی ایک کو طلاق دے دو۔“ [سنن ابي داود/كتاب تفريع أبواب الطلاق /حدیث: 2243]

سیدنا رافع بن سنان رضی اللہ عنہ سے روایت ہے کہ انہوں نے اسلام قبول کر لیا مگر ان کی بیوی نے اسلام قبول کرنے سے انکار کر دیا، (جس کی وجہ سے ان دونوں کے درمیان علیحدگی ہو گئی) پس وہ نبی کریم صلی اللہ علیہ وسلم کے پاس آئی اور کہا: ”میری بیٹی نے ابھی ابھی دودھ چھوڑا ہے یا چھوڑنے کے قریب ہے۔“ رافع رضی اللہ عنہ نے کہا: ”بیٹی میری ہے۔“ نبی کریم صلی اللہ علیہ وسلم نے رافع رضی اللہ عنہ سے کہا: ”ایک طرف بیٹھ جاؤ۔“ اور عورت سے کہا: ”دوسری طرف بیٹھ جاؤ۔“ اور بچی کو ان دونوں کے درمیان بٹھا دیا، پھر ماں باپ سے کہا: ”تم دونوں اسے بلاؤ۔“ (انہوں نے بلایا) تو بچی اپنی ماں کی طرف جھک گئی۔ پس نبی کریم صلی اللہ علیہ وسلم نے دعا فرمائی: «اَللّٰهُمَّ اهْدِهَا» ”اے اللہ! اس بچی کو ہدایت دے۔“ چنانچہ بچی باپ کی طرف مائل ہو گئی تو اسی نے اس کو لے لیا۔ [سنن ابي داود/كتاب تفريع أبواب الطلاق /حدیث: 2244]