حضرت انس بن مالک رضی اللہ عنہ سے روایت ہے، انہوں نے فرمایا: ”رسول اللہ صلی اللہ علیہ وسلم نے اس حاملہ کو جسے اپنی جان کا خطرہ ہو روزہ چھوڑنے کی رخصت دی ہے، اور دودھ پلانے والی اس عورت کو بھی (رخصت دی ہے) جسے اپنے بچے کے بارے میں (نقصان پہنچنے کا) خوف ہو۔“ [سنن ابن ماجه/كتاب الصيام/حدیث: 1668]

ام المؤمنین عائشہ رضی اللہ عنہا سے روایت ہے، انہوں نے فرمایا: ”میرے ذمہ رمضان کے روزے ہوتے تھے تو میں ان کی قضا نہیں کر پاتی تھی حتیٰ کہ شعبان آ جاتا۔“ [سنن ابن ماجه/كتاب الصيام/حدیث: 1669]

ام المؤمنین حضرت عائشہ رضی اللہ عنہا سے روایت ہے، انہوں نے فرمایا: ”نبی صلی اللہ علیہ وسلم کے ہاں رہتے ہوئے ہمیں حیض آتا تو آپ صلی اللہ علیہ وسلم ہمیں روزے کی قضا کا حکم دیتے تھے۔“ [سنن ابن ماجه/كتاب الصيام/حدیث: 1670]

حضرت ابوہریرہ رضی اللہ عنہ سے روایت ہے، انہوں نے فرمایا: ایک آدمی نبی صلی اللہ علیہ وسلم کی خدمت میں حاضر ہوا اور بولا: ”میں تباہ ہو گیا۔“ آپ صلی اللہ علیہ وسلم نے فرمایا: ”تو کیسے تباہ ہو گیا؟“ اس نے کہا: ”میں رمضان میں اپنی بیوی سے ہم بستری کر بیٹھا ہوں۔“ تو نبی صلی اللہ علیہ وسلم نے فرمایا: ”ایک انسان (غلام یا لونڈی) آزاد کرو۔“ اس نے کہا: ”میرے پاس (غلام خریدنے کے لیے مال) نہیں۔“ آپ صلی اللہ علیہ وسلم نے فرمایا: ”مسلسل دو ماہ روزے رکھ لو۔“ اس نے کہا: ”مجھ میں اس کی طاقت نہیں۔“ آپ صلی اللہ علیہ وسلم نے فرمایا: ”ساٹھ مسکینوں کو کھانا کھلا دو۔“ اس نے کہا: ”میرے پاس (اتنا مال بھی) نہیں۔“ آپ صلی اللہ علیہ وسلم نے فرمایا: ”بیٹھ جاؤ۔“ تو وہ بیٹھ گیا۔ اسی اثنا میں آپ صلی اللہ علیہ وسلم کی خدمت میں (کھجوروں کا) ایک ٹوکرا لایا گیا، جسے «الْعَرَقُ» ”عَرَق“ کہا جاتا ہے۔ آپ صلی اللہ علیہ وسلم نے فرمایا: ”جاؤ یہ صدقہ کر دو۔“ اس نے کہا: ”اللہ کے رسول! قسم ہے اس ذات کی جس نے آپ کو حق دے کر مبعوث فرمایا، مدینے میں دونوں پتھریلے علاقوں کے درمیان کوئی گھرانہ ہم سے زیادہ اس کا ضرورت مند نہیں۔“ آپ صلی اللہ علیہ وسلم نے فرمایا: ”جاؤ اور یہ اپنے اہل و عیال کو کھلا دو۔“ [سنن ابن ماجه/كتاب الصيام/حدیث: 1671]

حضرت ابوہریرہ رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”جس نے بغیر عذر کے رمضان کا ایک بھی روزہ چھوڑ دیا، اس کے بدلے زمانے بھر کے روزے بھی کافی نہیں ہوں گے۔“ [سنن ابن ماجه/كتاب الصيام/حدیث: 1672]

حضرت ابوہریرہ رضی اللہ عنہ سے روایت ہے، رسول اللہ صلی اللہ علیہ وسلم نے فرمایا: ”جس نے روزے کی حالت میں بھول کر کچھ کھا لیا، اسے چاہیے کہ اپنا روزہ پورا کرے، اسے اللہ نے کھلایا اور پلایا ہے۔“ [سنن ابن ماجه/كتاب الصيام/حدیث: 1673]

حضرت اسماء بنت ابوبکر رضی اللہ عنہا سے روایت ہے، انہوں نے فرمایا: ”رسول اللہ صلی اللہ علیہ وسلم کے زمانے میں ایک ابر آلود دن میں ہم نے روزہ کھول دیا (یہ سمجھے کہ سورج غروب ہو چکا ہے) لیکن پھر (بادل ہٹ گئے اور) سورج نکل آیا۔“ (ابواسامہ کہتے ہیں:) میں نے ہشام بن عروہ سے کہا: ”کیا انہیں (روزے کی) قضا کا حکم دیا گیا تھا؟“ انہوں نے کہا: ”یہ تو ضروری تھا۔“ [سنن ابن ماجه/كتاب الصيام/حدیث: 1674]

حضرت فضالہ بن عبید انصاری رضی اللہ عنہ سے روایت ہے، انہوں نے فرمایا: ”نبی صلی اللہ علیہ وسلم ایک ایسے دن ان کے پاس تشریف لائے جس دن آپ صلی اللہ علیہ وسلم روزہ رکھا کرتے تھے۔ آپ صلی اللہ علیہ وسلم نے (پانی کا) برتن طلب فرمایا اور پی لیا۔“ ہم نے کہا: ”اے اللہ کے رسول! یہ تو وہ دن ہے جس دن آپ روزہ رکھا کرتے تھے۔“ آپ صلی اللہ علیہ وسلم نے فرمایا: ”ہاں، لیکن مجھے قے آ گئی تھی۔“ [سنن ابن ماجه/كتاب الصيام/حدیث: 1675]

حضرت ابو ہریرہ رضی اللہ عنہ سے روایت ہے کہ نبی صلی اللہ علیہ وسلم نے فرمایا: ”جس کو خود بخود قے آ جائے اس پر قضا نہیں، اور جو قصداً قے کرے، اس پر قضا ضروری ہے۔“ [سنن ابن ماجه/كتاب الصيام/حدیث: 1676]