حضرت عبداللہ بن عباس رضی اللہ عنہما سے روایت ہے کہ انہوں نے جب لوگوں کو بٹائی پر زمین دینے کے بارے میں بہت باتیں کرتے سنا (کہ یہ منع ہے) تو فرمایا: «سُبْحَانَ اللّٰهِ» ”اللہ پاک ہے! اللہ کے رسول صلی اللہ علیہ وسلم نے تو یہ فرمایا تھا: ”آدمی اپنے بھائی کو زمین کیوں نہیں دے دیتا؟“ آپ صلی اللہ علیہ وسلم نے کرائے پر دینے سے منع نہیں فرمایا تھا۔“ [سنن ابن ماجه/كتاب الرهون/حدیث: 2456]

حضرت عبداللہ بن عباس رضی اللہ عنہما سے روایت ہے، رسول اللہ صلی اللہ علیہ وسلم نے فرمایا: ”آدمی کا اپنے بھائی کو (کاشت کے لیے بلا معاوضہ) اپنی زمین دے دینا اس بات سے بہتر ہے کہ اس پر اتنی اتنی چیز، یعنی مقرر مقدار وصول کرے۔“ حضرت عبداللہ بن عباس رضی اللہ عنہما نے فرمایا: ”اس معاملے کو «حَقْل» کہتے ہیں، اور انصار کی بولی میں یہی «مُحَاقَلَة» کہلاتا ہے۔“ [سنن ابن ماجه/كتاب الرهون/حدیث: 2457]

حضرت حنظلہ بن قیس رحمۃ اللہ علیہ سے روایت ہے، انہوں نے فرمایا: ”میں نے حضرت رافع بن خدیج رضی اللہ عنہ سے مسئلہ دریافت کیا تو انہوں نے فرمایا: ”ہم اس شرط پر زمین کرائے پر دیتے تھے کہ جو کچھ اس ٹکڑے میں پیدا ہو، وہ تیرا ہے اور جو کچھ اس ٹکڑے میں پیدا ہو، وہ میرا ہے، تو ہمیں پیداوار کے عوض (اس انداز سے) زمین کرائے پر دینے سے منع کر دیا گیا۔ چاندی (مقرر رقم) کے عوض زمین کرائے پر دینے سے منع نہیں کیا گیا۔““ [سنن ابن ماجه/كتاب الرهون/حدیث: 2458]

حضرت ابو نجاشی (عطا بن صہیب انصاری رحمہ اللہ) سے روایت ہے، انہوں نے حضرت رافع بن خدیج رضی اللہ عنہ کو اپنے چچا حضرت ظہیر بن رافع رضی اللہ عنہ سے روایت کرتے سنا کہ انہوں نے کہا: ”رسول اللہ صلی اللہ علیہ وسلم نے ہمیں ایک ایسے کام سے منع فرما دیا جس میں ہمارے لیے آسانی تھی۔“ میں نے کہا: ”جو کچھ رسول اللہ صلی اللہ علیہ وسلم نے فرمایا، وہی درست ہے۔“ انہوں نے کہا کہ رسول اللہ صلی اللہ علیہ وسلم نے فرمایا: ”تم اپنے کھیتوں کے ساتھ کیا کرتے ہو؟“ ہم نے کہا: ”ہم انہیں (پیداوار کے) تیسرے حصے یا چوتھے حصے کے عوض یا گندم اور جو کے چند وسق (مقررہ مقدار) کے عوض کرائے پر دے دیتے ہیں۔“ رسول اللہ صلی اللہ علیہ وسلم نے فرمایا: ”ایسے نہ کیا کرو، خود کاشت کرو یا کسی کو کاشت کے لیے دے دو۔“ [سنن ابن ماجه/كتاب الرهون/حدیث: 2459]

حضرت رافع بن خدیج رضی اللہ عنہ سے روایت ہے، انہوں نے فرمایا: ”ہم میں سے کسی کو جب اپنی زمین کی ضرورت نہ ہوتی تو وہ اسے تہائی، چوتھائی یا نصف پیداوار کے عوض (کسی کاشت کے لیے) دے دیتا اور شرط لگا لیتا کہ ندی کے قریب والی زمین (کی پیداوار) میں سے تین چوتھائی، اور گاہی ہوئی گندم کی (گاہے جانے سے بچ رہنے والی) بالیاں، اور (پانی کی چھوٹی) نالی سے سیراب ہونے والی زمین (کی پیداوار) اس کی ہو گی۔ اس زمانے میں گزران بہت مشکل تھی اور زمین میں لوہے (کے آلات کسی اور پھاوڑے وغیرہ) سے اور جیسے اللہ کو منظور ہوتا، سے کام ہوتا تھا۔ وہ اس سے کچھ نفع کما لیتا تھا۔ پھر ہمارے پاس حضرت رافع بن خدیج رضی اللہ عنہ آئے اور کہا: رسول اللہ صلی اللہ علیہ وسلم نے تمہیں ایک کام سے منع فرما دیا ہے جس میں (بظاہر) تمہارا فائدہ تھا۔ (لیکن) اللہ کی اطاعت اور اس کے رسول صلی اللہ علیہ وسلم کی اطاعت میں تمہارا زیادہ فائدہ ہے۔ رسول اللہ صلی اللہ علیہ وسلم تمہیں «الْمُحَاقَلَةِ» ”محاقلہ“ سے منع فرماتے ہیں اور ارشاد فرماتے ہیں: ”جس کو زمین کی ضرورت نہ ہو تو وہ اپنے بھائی کو عطیہ کے طور پر دے دے، یا رہنے دے۔““ [سنن ابن ماجه/كتاب الرهون/حدیث: 2460]

حضرت عروہ بن زبیر رضی اللہ عنہ سے روایت ہے کہ حضرت زید بن ثابت رضی اللہ عنہ نے فرمایا: ”اللہ تعالیٰ حضرت رافع بن خدیج رضی اللہ عنہ کی غلطی معاف فرمائے۔ قسم ہے اللہ کی! یہ حدیث مجھے ان سے زیادہ معلوم ہے۔ دو آدمی نبی صلی اللہ علیہ وسلم کی خدمت میں حاضر ہوئے جو آپس میں لڑ پڑے تھے۔ تب آپ صلی اللہ علیہ وسلم نے فرمایا: ”اگر تم لوگوں کا یہی حال ہے تو کھیت بٹائی پر نہ دیا کرو۔“ حضرت رافع بن خدیج رضی اللہ عنہ نے اتنا جملہ سن لیا: ”کھیت بٹائی پر نہ دیا کرو۔“” [سنن ابن ماجه/كتاب الرهون/حدیث: 2461]

حضرت عمرو بن دینار رحمہ اللہ سے روایت ہے، انہوں نے فرمایا: میں نے حضرت طاوس (بن کیسان) رحمہ اللہ سے کہا: ”اے ابو عبدالرحمٰن! کاش آپ «الْمُخَابَرَةُ» (بٹائی پر زمین دینا) چھوڑ دیں کیونکہ لوگ کہتے ہیں کہ رسول اللہ صلی اللہ علیہ وسلم نے اس سے منع فرمایا۔“ انہوں نے فرمایا: ”اے عمرو! میں ان کی مدد کرتا ہوں اور انہیں دیتا ہوں اور حضرت معاذ بن جبل رضی اللہ عنہ نے ہمارے ہاں اس پر عمل کرایا ہے“ اور ان کے بڑے عالم، یعنی حضرت عبداللہ بن عباس رضی اللہ عنہما نے فرمایا کہ ”رسول اللہ صلی اللہ علیہ وسلم نے اس سے منع نہیں فرمایا لیکن یہ فرمایا تھا: ”کوئی اپنے بھائی کو (بلا معاوضہ زمین) دے دے تو یہ اس پر مقرر معاوضہ لینے سے بہتر ہے۔““ [سنن ابن ماجه/كتاب الرهون/حدیث: 2462]

حضرت طاوس رحمہ اللہ سے روایت ہے، (انہوں نے فرمایا): ”حضرت معاذ بن جبل رضی اللہ عنہ نے نبی صلی اللہ علیہ وسلم کے عہد مبارک میں، حضرت ابوبکر، حضرت عمر اور حضرت عثمان رضی اللہ عنہم کے زمانہ خلافت میں تہائی اور چوتھائی کی شرط پر زمین کرائے پر دی اور آج تک اسی پر عمل ہوتا آ رہا ہے۔“ [سنن ابن ماجه/كتاب الرهون/حدیث: 2463]

حضرت عبداللہ بن عباس رضی اللہ عنہما سے روایت ہے، انہوں نے فرمایا کہ رسول اللہ صلی اللہ علیہ وسلم نے یہی فرمایا تھا: ”اگر کوئی اپنے بھائی کو زمین بلا معاوضہ دے دے تو یہ کام اس کے لیے مقرر کردہ ٹھیکہ لینے سے بہتر ہے۔“ [سنن ابن ماجه/كتاب الرهون/حدیث: 2464]

حضرت رافع بن خدیج رضی اللہ عنہ سے روایت ہے، انہوں نے فرمایا: ”لوگ رسول اللہ صلی اللہ علیہ وسلم کے زمانے میں محاقلہ کرتے تھے۔“ انہوں نے بیان کیا کہ پھر ان کے ایک چچا (حضرت ظہیر بن رافع رضی اللہ عنہ) نے آ کر انہیں کہا: رسول اللہ صلی اللہ علیہ وسلم کا ارشاد ہے: ”جس کے پاس زمین ہو تو وہ اسے غلے کی مقرر مقدار کے عوض کرائے پر نہ دے۔“ [سنن ابن ماجه/كتاب الرهون/حدیث: 2465]