حضرت انس بن مالک رضی اللہ عنہ سے روایت ہے، انہوں نے فرمایا: نبی صلی اللہ علیہ وسلم نے ایک کجاوے پر اور ایک ایسی (معمولی) چادر اوڑھ کر حج ادا کیا جس کی قیمت چار درہم کے برابر بھی نہ تھی اور فرمایا: ”حج (کے فرض کی ادائیگی مقصود) ہے، دکھلاوا اور شہرت (مقصود) نہیں۔“ [سنن ابن ماجه/كتاب المناسك/حدیث: 2890]

حضرت عبداللہ بن عباس رضی اللہ عنہما سے روایت ہے، انہوں نے فرمایا: ”ہم مکے اور مدینے کے درمیان رسول اللہ صلی اللہ علیہ وسلم کے ہمراہ تھے۔ ہم ایک وادی سے گزرے تو نبی صلی اللہ علیہ وسلم نے فرمایا: ”یہ کون سی وادی ہے؟“ صحابہ نے عرض کیا: ”یہ وادئ ازرق ہے۔“ آپ صلی اللہ علیہ وسلم نے فرمایا: ”گویا میں موسیٰ علیہ السلام کو دیکھ رہا ہوں۔“ آپ صلی اللہ علیہ وسلم نے ان کے بالوں کی لمبائی کے بارے میں کچھ فرمایا (جو راوی حدیث) داؤد (بن ابی ہند) کو یاد نہیں رہا۔ ”انہوں نے کانوں میں انگلیاں ڈالی ہوئی ہیں، وہ اللہ سے بلند آواز سے فریاد کرتے ہوئے «لَبَّيْكَ» ”لبیک“ پکارتے ہوئے اس وادی سے گزر رہے ہیں۔“ صحابی نے فرمایا: ”پھر ہم نے سفر جاری رکھا حتیٰ کہ ایک گھاٹی تک پہنچے تو آپ صلی اللہ علیہ وسلم نے فرمایا: ”یہ کون سی گھاٹی ہے؟“ لوگوں نے کہا: ”ہرشیٰ یا لفت کی گھاٹی ہے۔“ آپ صلی اللہ علیہ وسلم نے فرمایا: ”میں گویا یونس علیہ السلام کو دیکھ رہا ہوں جو سرخ اونٹنی پر سوار ہیں، اون کا جبہ اوڑھے ہوئے ہیں، ان کی اونٹنی کی مہار کھجور کی رسی کی ہے اور وہ «لَبَّيْكَ» ”لبیک“ پکارتے ہوئے اس وادی سے گزر رہے ہیں۔““ [سنن ابن ماجه/كتاب المناسك/حدیث: 2891]

حضرت ابو ہریرہ رضی اللہ عنہ سے روایت ہے، رسول اللہ صلی اللہ علیہ وسلم نے فرمایا: ”حج اور عمرہ کرنے والے اللہ تعالیٰ کے ملاقاتی (اور مہمان) ہیں۔ اگر وہ اللہ سے دعا کریں تو اللہ ان کی دعا قبول کرتا ہے اور اگر وہ بخشش مانگیں تو انھیں بخش دیتا ہے۔“ [سنن ابن ماجه/كتاب المناسك/حدیث: 2892]

حضرت عبداللہ بن عمر رضی اللہ عنہما سے روایت ہے کہ نبی صلی اللہ علیہ وسلم نے فرمایا: ”اللہ کی راہ میں جنگ کرنے والا (مجاہد)، حاجی اور عمرہ کرنے والا اللہ کے مہمان ہیں۔ اس نے انہیں بلایا تو انہوں نے تعمیل کی۔ انہوں نے اللہ سے مانگا تو اللہ نے انہیں دے دیا۔“ [سنن ابن ماجه/كتاب المناسك/حدیث: 2893]

حضرت عمر رضی اللہ عنہ سے روایت ہے کہ انہوں نے نبی صلی اللہ علیہ وسلم سے عمرہ کرنے کی اجازت چاہی تو نبی صلی اللہ علیہ وسلم نے اجازت دے دی اور فرمایا: «أَيْ أُخَيَّ، أَشْرِكْنَا فِي دُعَائِكَ، وَلَا تَنْسَنَا» ”بھائی! اپنی کسی دعا میں ہمیں بھی شریک کر لینا اور (دعا میں) ہمیں نہ بھلانا۔“ [سنن ابن ماجه/كتاب المناسك/حدیث: 2894]

حضرت صفوان بن عبداللہ بن صفوان رحمہ اللہ سے روایت ہے کہ حضرت ابودرداء رضی اللہ عنہ کی بیٹی ان (صفوان) کے نکاح میں تھیں۔ وہ ان کے ہاں آئے تو ام الدرداء رضی اللہ عنہا سے ملاقات ہوئی، حضرت ابودرداء رضی اللہ عنہ (گھر میں) نہ ملے۔ ام الدرداء رضی اللہ عنہا نے کہا: ”آپ کا اس سال حج کا ارادہ ہے؟“ انہوں نے کہا: ”جی ہاں۔“ فرمایا: ”تو ہمارے لیے بھی دعائے خیر کرنا کیونکہ نبی صلی اللہ علیہ وسلم فرمایا کرتے تھے: ”آدمی کی اپنے بھائی کے حق میں اس کی عدم موجودگی میں کی ہوئی دعا مقبول ہے۔ دعا کرنے والے کے سر کے قریب ایک فرشتہ اس کی دعا پر آمین کہتا ہے۔ جب بھی وہ اس (غیر موجود بھائی) کے حق میں دعا کرتا ہے فرشتہ کہتا ہے: «آمِينَ، وَلَكَ بِمِثْلٍ» ”آمین اور تجھے بھی یہ کچھ نصیب ہو۔“““ انہوں نے فرمایا: ”پھر میں بازار گیا تو حضرت ابودرداء رضی اللہ عنہ سے ملاقات ہو گئی تو انہوں نے بھی مجھے نبی صلی اللہ علیہ وسلم کا یہی فرمان سنایا۔“ [سنن ابن ماجه/كتاب المناسك/حدیث: 2895]

حضرت عبداللہ بن عمر رضی اللہ عنہما سے روایت ہے، انہوں نے فرمایا: ایک شخص اٹھ کر نبی صلی اللہ علیہ وسلم کے قریب گیا اور کہا: ”اے اللہ کے رسول صلی اللہ علیہ وسلم ! کس چیز سے حج واجب ہوتا ہے؟“ آپ صلی اللہ علیہ وسلم نے فرمایا: ”سفر خرچ اور سواری سے۔“ اس نے کہا: ”اے اللہ کے رسول صلی اللہ علیہ وسلم ! حاجی کون ہوتا ہے؟“ آپ صلی اللہ علیہ وسلم نے فرمایا: ”پراگندہ بالوں والا، سادہ لباس والا۔“ ایک اور شخص نے اٹھ کر کہا: ”اے اللہ کے رسول صلی اللہ علیہ وسلم ! حج کیا ہوتا ہے؟“ فرمایا: ”آواز بلند کرنا اور خون بہانا۔“ امام وکیع رحمہ اللہ نے فرمایا: ”آواز بلند کرنے سے مراد بلند آواز سے لبیک پکارنا ہے اور خون بہانے سے مراد اونٹ قربان کرنا ہے۔“ [سنن ابن ماجه/كتاب المناسك/حدیث: 2896]

حضرت عبداللہ بن عباس رضی اللہ عنہ سے روایت ہے کہ رسول اللہ صلی اللہ علیہ وسلم نے اللہ تعالیٰ کے فرمان ﴿مَنِ اسْتَطَاعَ إِلَيْهِ سَبِيلًا﴾ [سورة آل عمران: 97] ”جس کو بیت اللہ تک راستہ طے کرنے کی طاقت ہو۔“ کی وضاحت میں فرمایا: (اس طاقت سے مراد ہے) ”سفر خرچ اور سواری۔“ [سنن ابن ماجه/كتاب المناسك/حدیث: 2897]

حضرت ابوسعید خدری رضی اللہ عنہ سے روایت ہے، رسول اللہ صلی اللہ علیہ وسلم نے فرمایا: ”کوئی عورت تین دن یا زیادہ کا سفر نہ کرے مگر اپنے باپ، بھائی، بیٹے، خاوند یا کسی اور محرم کی معیت میں۔“ [سنن ابن ماجه/كتاب المناسك/حدیث: 2898]

حضرت ابوہریرہ رضی اللہ عنہ سے روایت ہے، نبی صلی اللہ علیہ وسلم نے فرمایا: ”جو عورت اللہ اور قیامت کے دن پر ایمان رکھتی ہے اس کے لیے ایک دن کا سفر کرنا حلال نہیں جب کہ اس کے ساتھ محرم نہ ہو۔“ [سنن ابن ماجه/كتاب المناسك/حدیث: 2899]