حضرت اسامہ بن شریک (ثعلبی) رضی اللہ عنہ سے روایت ہے، انہوں نے فرمایا: میں (مجلس میں) موجود تھا جب اعرابی نبی صلی اللہ علیہ وسلم سے سوالات کر رہے تھے: ”کیا فلاں کام کرنے میں ہم پر گناہ ہے؟ کیا فلاں کام کرنے میں ہم پر گناہ ہے؟“ تو آپ صلی اللہ علیہ وسلم نے ان سے فرمایا: ”اللہ کے بندو! اللہ نے حرج (تنگی) کو دور کر دیا ہے مگر جس نے اپنے بھائی کی عزت میں سے ایک حصہ کاٹ لیا، یہی ہے جس نے گناہ کیا۔“ انہوں نے کہا: اے اللہ کے رسول! کیا ہمیں اس بات سے گناہ ہو گا کہ ہم (بیماری سے شفا کے لیے) دوا (استعمال) نہ کریں؟ نبی صلی اللہ علیہ وسلم نے فرمایا: ”اللہ کے بندو! (شفا کے لیے) دوا (استعمال) کیا کرو، اللہ سبحانہ وتعالیٰ نے جو بیماری بنائی ہے، اس کی شفا (کے لیے دوا) بھی بنائی ہے، سوائے شدید بڑھاپے کے۔“ انہوں نے کہا: اللہ کے رسول! بندے کو سب سے بہتر چیز کیا عطا ہوئی ہے؟ فرمایا: ”اچھا اخلاق۔“ [سنن ابن ماجه/كتاب الطب/حدیث: 3436]

حضرت ابو خزامہ رضی اللہ عنہ سے روایت ہے، انہوں نے فرمایا: رسول اللہ صلی اللہ علیہ وسلم سے سوال کیا گیا: ”ہم دواؤں کے ذریعے سے علاج کرتے ہیں، اور دعاؤں کے ساتھ دم کرتے ہیں، اور دفاعی اشیاء کے ذریعے سے اپنا بچاؤ کرتے ہیں، کیا یہ چیزیں اللہ کی تقدیر میں سے کسی چیز کو روک سکتی ہیں؟“ رسول اللہ صلی اللہ علیہ وسلم نے فرمایا: ”یہ بھی اللہ کی تقدیر میں شامل ہیں۔“ [سنن ابن ماجه/كتاب الطب/حدیث: 3437]

حضرت عبداللہ بن مسعود رضی اللہ عنہ سے روایت ہے، نبی کریم صلی اللہ علیہ وسلم نے فرمایا: ”اللہ نے جو بھی بیماری نازل کی ہے، اس کی دوا بھی ضرور نازل کی ہے۔“ [سنن ابن ماجه/كتاب الطب/حدیث: 3438]

حضرت ابو ہریرہ رضی اللہ عنہ سے روایت ہے کہ نبی کریم صلی اللہ علیہ وسلم نے فرمایا: ”اللہ تعالیٰ نے جو بھی بیماری نازل کی ہے، اس کی شفا (دوا) بھی ضرور نازل کی ہے۔“ [سنن ابن ماجه/كتاب الطب/حدیث: 3439]

حضرت عبداللہ بن عباس رضی اللہ عنہما سے روایت ہے کہ نبی صلی اللہ علیہ وسلم نے ایک آدمی کی عیادت فرمائی تو اس سے پوچھا: ”تمہیں کس چیز کی خواہش ہے؟“ اس نے کہا: ”گندم کی روٹی کو جی چاہتا ہے۔“ نبی صلی اللہ علیہ وسلم نے فرمایا: ”جس کے پاس گندم کی روٹی ہو وہ اپنے بھائی کے ہاں بھیج دے۔“ پھر نبی صلی اللہ علیہ وسلم نے فرمایا: ”جب کسی کا مریض کسی چیز کی خواہش ظاہر کرے تو اسے چاہیے کہ وہ اسے کھلا دے۔“ [سنن ابن ماجه/كتاب الطب/حدیث: 3440]

حضرت انس بن مالک رضی اللہ عنہ سے روایت ہے کہ نبی صلی اللہ علیہ وسلم ایک بیمار کی عیادت کے لیے اس کے پاس تشریف لے گئے، آپ صلی اللہ علیہ وسلم نے فرمایا: ”کیا تمہیں کسی چیز کی خواہش ہے؟ کیا تمہارا جی کیک کھانے کو چاہتا ہے؟“ اس نے کہا: ہاں، چنانچہ اس کے لیے کیک منگوایا گیا۔ [سنن ابن ماجه/كتاب الطب/حدیث: 3441]

حضرت ام منذر سلمیٰ بنت انصاریہ رضی اللہ عنہا سے روایت ہے، انہوں نے کہا: ”رسول اللہ صلی اللہ علیہ وسلم ہمارے ہاں تشریف لائے۔ آپ صلی اللہ علیہ وسلم کے ہمراہ حضرت علی بن ابی طالب رضی اللہ عنہ بھی تھے۔ حضرت علی رضی اللہ عنہ بیماری کی وجہ سے کمزور ہو گئے تھے۔ ہمارے ہاں نیم پختہ کھجوروں کے خوشے (رسی سے) لٹک رہے تھے۔ نبی صلی اللہ علیہ وسلم ان میں سے لے لے کر (کھجوریں) کھا رہے تھے کہ حضرت علی رضی اللہ عنہ نے بھی کھانے کے لیے کچھ کھجوریں لے لیں۔ نبی صلی اللہ علیہ وسلم نے فرمایا: ”علی! رک جاؤ۔ تم ابھی (بیماری سے اٹھے ہو، اس لیے) کمزور ہو۔“ ام منذر رضی اللہ عنہا نے فرمایا: میں نے نبی صلی اللہ علیہ وسلم کے لیے چقندر اور جو پکائے۔ نبی صلی اللہ علیہ وسلم نے فرمایا: ”علی! اس میں سے کھاؤ، یہ تمہارے لیے زیادہ مفید ہے۔““ [سنن ابن ماجه/كتاب الطب/حدیث: 3442]

حضرت صہیب (بن سنان رومی) رضی اللہ عنہ سے روایت ہے، انہوں نے فرمایا: ”میں نبی صلی اللہ علیہ وسلم کی خدمت میں حاضر ہوا جبکہ نبی صلی اللہ علیہ وسلم نے فرمایا: ”آئیے! تناول کیجیے۔“ میں نے کھجوریں کھانا شروع کر دیں۔ نبی صلی اللہ علیہ وسلم نے فرمایا: ”تم کھجوریں کھا رہے ہو، حالانکہ تمہاری آنکھ دکھتی ہے؟“ میں نے کہا: ”میں دوسری طرف سے چبا رہا ہوں۔“ رسول اللہ صلی اللہ علیہ وسلم مسکرا دیے۔“ [سنن ابن ماجه/كتاب الطب/حدیث: 3443]

حضرت عقبہ بن عامر جہنی رضی اللہ عنہ سے روایت ہے، رسول اللہ صلی اللہ علیہ وسلم نے فرمایا: ”اپنے مریضوں کو کھانے پینے پر مجبور نہ کیا کرو، انہیں اللہ تعالیٰ کھلاتا اور پلاتا ہے۔“ [سنن ابن ماجه/كتاب الطب/حدیث: 3444]

ام المؤمنین حضرت عائشہ رضی اللہ عنہا سے روایت ہے، انہوں نے فرمایا: ”رسول اللہ صلی اللہ علیہ وسلم کے گھر میں جب کسی کو بخار ہوتا تو آپ صلی اللہ علیہ وسلم تلبینہ تیار کرنے کا حکم دیتے۔ اور نبی صلی اللہ علیہ وسلم فرمایا کرتے تھے: ”اس سے غمزدہ انسان کے دل کو سہارا ملتا ہے، اور بیمار کے دل سے رنج کو اس طرح دور کرتا ہے جس طرح کوئی عورت پانی کے ذریعے سے اپنے چہرے سے میل کچیل دور کرتی ہے۔“” [سنن ابن ماجه/كتاب الطب/حدیث: 3445]