حضرت ابو ہریرہ رضی اللہ عنہ سے روایت ہے، نبی صلی اللہ علیہ وسلم نے فرمایا: ”جب کوئی شخص اپنی جگہ سے اٹھے، پھر واپس آ جائے تو وہ اس (جگہ) کا زیادہ حق رکھتا ہے۔“ [سنن ابن ماجه/كتاب الأدب/حدیث: 3717]

حضرت جودان رضی اللہ عنہ سے روایت ہے، رسول اللہ صلی اللہ علیہ وسلم نے فرمایا: ”جس نے اپنے بھائی سے (کسی غلطی پر) معذرت کی، اور اس نے قبول نہ کی، اس پر (ناجائز) ٹیکس وصول کرنے والے جتنا گناہ ہے۔“ [سنن ابن ماجه/كتاب الأدب/حدیث: 3718]

ام المؤمنین حضرت ام سلمہ رضی اللہ عنہا سے روایت ہے، انہوں نے فرمایا: ”نبی صلی اللہ علیہ وسلم کی وفات سے ایک سال پہلے (کا واقعہ ہے کہ) حضرت ابوبکر رضی اللہ عنہ تجارت کے لیے بصریٰ روانہ ہوئے۔ ان کے ساتھ حضرت نعیمان اور حضرت سویبط بن حرملہ رضی اللہ عنہما بھی تھے۔ یہ دونوں حضرات غزوہ بدر میں شریک تھے۔ حضرت سویبط رضی اللہ عنہ زادِ راہ (کھانے پینے کے سامان) کے ذمہ دار تھے۔ نعیمان رضی اللہ عنہ بہت مزاحیہ طبیعت کے تھے۔ انہوں نے سویبط رضی اللہ عنہ سے کہا: ”مجھے کھانا دیجیے۔“ انہوں نے کہا: ”حضرت ابوبکر رضی اللہ عنہ آ جائیں (ان کی اجازت سے دوں گا۔)“ نعیمان رضی اللہ عنہ نے کہا: ”(تم نے مجھے کھانا نہیں دیا، اس لیے) میں آپ کو پریشان کروں گا۔“ (اس کے بعد سفر کے دوران میں) ان کا گزر کچھ لوگوں کے پاس سے ہوا۔ نعیمان رضی اللہ عنہ نے ان لوگوں سے کہا: ”کیا تم لوگ مجھ سے میرا ایک غلام خریدو گے؟“ انہوں نے کہا: ”ہاں۔“ انہوں نے کہا: ”وہ غلام ذرا باتونی ہے، وہ تم سے کہے گا: میں آزاد ہوں۔ اگر اس کی یہ بات سن کر تم نے اسے چھوڑ دینا ہے تو (ابھی سے خریدنے سے انکار کر دو اور) میرے غلام کا معاملہ خراب نہ کرو۔“ انہوں نے کہا: ”نہیں، ہم آپ سے وہ غلام خریدیں گے (اور سودا منسوخ نہیں کریں گے۔)“ چنانچہ ان لوگوں نے دس اونٹنیوں کے عوض ان (نعیمان رضی اللہ عنہ) سے انہیں (سویبط رضی اللہ عنہ کو غلام سمجھ کر) خرید لیا۔ پھر آ کر ان کے گلے میں پگڑی یا رسی ڈال دی (اور انہیں قابو کر لیا۔) سویبط رضی اللہ عنہ نے کہا: ”یہ شخص (نعیمان رضی اللہ عنہ) آپ لوگوں سے مذاق کر رہا ہے، میں تو آزاد ہوں، غلام نہیں۔“ انہوں نے کہا: ”اس نے ہمیں (پہلے ہی) یہ بات بتا دی تھی (کہ تم آزاد ہونے کا دعویٰ کرو گے۔)“ چنانچہ وہ لوگ انہیں پکڑ کر لے گئے۔ حضرت ابوبکر رضی اللہ عنہ آئے اور لوگوں نے انہیں یہ واقعہ بتایا۔ انہوں نے قافلے والوں کے پیچھے جا کر ان کی اونٹنیاں واپس کیں اور سویبط رضی اللہ عنہ کو (ان سے) واپس لیا۔ جب یہ حضرات نبی صلی اللہ علیہ وسلم کی خدمت میں پہنچے تو آپ کو بھی یہ پورا قصہ سنایا، چنانچہ نبی صلی اللہ علیہ وسلم اور صحابہ کرام رضی اللہ عنہم ایک سال تک اس واقعہ کو یاد کر کے ہنستے تھے۔“ [سنن ابن ماجه/كتاب الأدب/حدیث: 3719]

حضرت انس بن مالک رضی اللہ عنہ سے روایت ہے، انہوں نے فرمایا: ”رسول اللہ صلی اللہ علیہ وسلم ہمارے ساتھ بے تکلفی کا اظہار فرماتے تھے حتیٰ کہ میرے چھوٹے بھائی سے فرماتے: ”اے ابو عمیر! «نُغَيْرُ» کا کیا بنا؟““ امام وکیع رحمہ اللہ کہتے ہیں: ” «نُغَيْرُ» ایک پرندہ تھا جس سے وہ بچہ کھیلتا تھا۔“ [سنن ابن ماجه/كتاب الأدب/حدیث: 3720]

حضرت عبداللہ بن عمر رضی اللہ عنہ سے روایت ہے، انہوں نے فرمایا: رسول اللہ صلی اللہ علیہ وسلم نے بڑھاپے کے (سفید) بال اکھاڑنے سے منع فرمایا اور فرمایا: ”وہ مومن کا نور ہے۔“ [سنن ابن ماجه/كتاب الأدب/حدیث: 3721]

حضرت بریدہ بن حصیب اسلمی رضی اللہ عنہ سے روایت ہے، نبی صلی اللہ علیہ وسلم نے ”کچھ سائے اور کچھ دھوپ میں بیٹھنے سے منع فرمایا۔“ [سنن ابن ماجه/كتاب الأدب/حدیث: 3722]

حضرت طخفہ بن قیس غفاری رضی اللہ عنہ سے روایت ہے، انہوں نے فرمایا: رسول اللہ صلی اللہ علیہ وسلم نے مجھے مسجد میں پیٹ کے بل سوئے ہوئے پایا تو مجھے قدم مبارک سے ٹہوکا دیا اور فرمایا: ”اس انداز سے کیوں سوتے ہو؟ سونے کا یہ انداز اللہ تعالیٰ کو ناپسند ہے۔“ [سنن ابن ماجه/كتاب الأدب/حدیث: 3723]

حضرت ابوذر رضی اللہ عنہ سے روایت ہے، انہوں نے فرمایا: ”میں پیٹ کے بل لیٹا ہوا تھا، میرے پاس سے نبی صلی اللہ علیہ وسلم گزرے تو مجھے قدم مبارک سے ٹھوکا دے کر فرمایا: ”پیارے جندب! یہ اہل جہنم کے لیٹنے کا انداز ہے۔“” [سنن ابن ماجه/كتاب الأدب/حدیث: 3724]

حضرت ابو امامہ رضی اللہ عنہ سے روایت ہے، انہوں نے فرمایا: ”نبی صلی اللہ علیہ وسلم ایک آدمی کے پاس سے گزرے جو مسجد میں چہرے کے بل لیٹ کر سو رہا تھا۔ رسول اللہ صلی اللہ علیہ وسلم نے اسے قدم مبارک سے ٹھوکا دیا اور فرمایا: ”اٹھ کر بیٹھ! یہ جہنمیوں کے انداز کی نیند ہے۔“” [سنن ابن ماجه/كتاب الأدب/حدیث: 3725]