حضرت عبداللہ بن زبیر رضی اللہ عنہما نے فرمایا: اپنی عورتوں کو ریشم نہ پہنایا کرو۔ میں نے حضرت عمر رضی اللہ عنہ کو فرماتے ہوئے سنا کہ رسول اللہ صلی اللہ علیہ وسلم نے فرمایا: ”جو شخص دنیا میں ریشم پہنے گا آخرت میں نہیں پہنے گا۔“ [سنن نسائي/كتاب الزاينة (من المجتبى)/حدیث: 5307]

حضرت عمران بن حطان سے مروی ہے کہ انہوں نے حضرت عبد اللہ بن عباس رضی اللہ عنہما سے ریشم پہننے کے بارے میں پوچھا تو انہوں نے فرمایا: حضرت عائشہ رضی اللہ عنہا سے پوچھو۔ میں نے حضرت عائشہ رضی اللہ عنہا سے پوچھا تو انہوں نے فرمایا: حضرت عبد اللہ بن عمر رضی اللہ عنہما سے پوچھو۔ میں نے ابن عمر رضی اللہ عنہما سے پوچھا تو انہوں نے فرمایا: مجھے حضرت ابو حفص (عمر بن خطاب رضی اللہ عنہ) نے بیان فرمایا کہ رسول اللہ صلی اللہ علیہ وسلم نے فرمایا: ”جو دنیا میں ریشم پہنے گا اس کا آخرت میں کوئی حصہ نہیں۔“ [سنن نسائي/كتاب الزاينة (من المجتبى)/حدیث: 5308]

حضرت ابن عمر رضی اللہ عنہما سے روایت ہے کہ رسول اللہ صلی اللہ علیہ وسلم نے فرمایا: ”ریشم تو وہ لوگ پہنتے ہیں جن کا آخرت میں کوئی حصہ نہیں۔“ [سنن نسائي/كتاب الزاينة (من المجتبى)/حدیث: 5309]

حضرت علی بارقی رحمہ اللہ بیان کرتے ہیں کہ میرے پاس ایک عورت مسئلہ پوچھنے آئی، میں نے اسے کہا: یہ حضرت ابن عمر رضی اللہ عنہما تشریف فرما ہیں (ان سے پوچھ)، وہ ان کی طرف مسئلہ پوچھنے چلی اور میں بھی اس کے ساتھ چلا تاکہ حضرت ابن عمر رضی اللہ عنہما کا جواب سن سکوں، وہ ان سے کہنے لگی: مجھے ریشم کے بارے میں فتویٰ دیجیے، انہوں نے فرمایا: ”رسول اللہ صلی اللہ علیہ وسلم نے اس سے منع فرمایا ہے۔“ [سنن نسائي/كتاب الزاينة (من المجتبى)/حدیث: 5310]

حضرت براء بن عازب رضی اللہ عنہ سے روایت ہے، انہوں نے فرمایا: رسول اللہ صلی اللہ علیہ وسلم نے ہمیں سات کاموں کا حکم دیا اور سات سے منع فرمایا، آپ نے ہمیں ”سونے کی انگوٹھیوں، چاندی کے برتنوں، ریشمی گدیلوں، قسی کپڑوں، موٹے، باریک اور عام ریشم پہننے سے منع فرمایا۔“ [سنن نسائي/كتاب الزاينة (من المجتبى)/حدیث: 5311]

حضرت انس رضی اللہ عنہ سے روایت ہے کہ رسول اللہ صلی اللہ علیہ وسلم نے حضرت عبدالرحمن بن عوف اور حضرت زبیر بن عوام رضی اللہ عنہما کو خارش کی بنا پر ریشم کی قمیص پہننے کی اجازت دے دی تھی۔ [سنن نسائي/كتاب الزاينة (من المجتبى)/حدیث: 5312]

حضرت انس رضی اللہ عنہ سے روایت ہے کہ نبی اکرم صلی اللہ علیہ وسلم نے حضرت عبد الرحمن اور حضرت زبیر رضی اللہ عنہما کو خارش کی وجہ سے ریشم کی قمیص پہننے کی اجازت دی۔ [سنن نسائي/كتاب الزاينة (من المجتبى)/حدیث: 5313]

حضرت ابو عثمان نہدی بیان کرتے ہیں کہ ہم حضرت عتبہ بن فرقد رضی اللہ عنہ کے ساتھ تھے کہ ہمارے پاس (امیر المومنین) حضرت عمر رضی اللہ عنہ کی تحریر پہنچی کہ رسول اللہ صلی اللہ علیہ وسلم نے فرمایا: ”ریشم تو وہی شخص پہنتا ہے جس کا آخرت میں اس (ریشم) سے کوئی حصہ نہیں، البتہ اتنا پہن سکتا ہے۔“ حضرت ابو عثمان نے انگوٹھے کے ساتھ والی دو انگلیوں کے ساتھ اشارہ کیا ہے۔ میں نے سمجھا کہ اس سے مراد چادروں کے کناروں والی پٹیاں ہیں، حتیٰ کہ جب میں نے طیلسان کی چادریں دیکھیں تو مجھے یقین آیا۔ [سنن نسائي/كتاب الزاينة (من المجتبى)/حدیث: 5314]

حضرت عمر رضی اللہ عنہ سے روایت ہے کہ (مردوں کو) ”ریشم پہننے کی اجازت نہیں مگر چار انگلیوں کے برابر پٹی۔“ [سنن نسائي/كتاب الزاينة (من المجتبى)/حدیث: 5315]

حضرت براء رضی اللہ عنہ بیان کرتے ہیں کہ میں نے نبی اکرم صلی اللہ علیہ وسلم کو سرخ حلہ پہنے ہوئے دیکھا، آپ نے بالوں کو کنگھی کر رکھی تھی، میں نے کوئی شخص آپ سے بڑھ کر خوبصورت نہیں دیکھا، نہ آپ سے پہلے اور نہ ہی آپ کے بعد۔ [سنن نسائي/كتاب الزاينة (من المجتبى)/حدیث: 5316]