حضرت انس رضی اللہ عنہ نے فرمایا: نبی اکرم صلی اللہ علیہ وسلم کو سب سے پسندیدہ کپڑا دھاری دار چادر تھی۔ [سنن نسائي/كتاب الزاينة (من المجتبى)/حدیث: 5317]

حضرت عبداللہ بن عمرو رضی اللہ عنہما نے بتایا کہ رسول اللہ صلی اللہ علیہ وسلم نے انہیں معصفر کپڑے پہنے ہوئے دیکھا تو فرمایا: ”یہ تو کافروں کا لباس ہے۔ تو نہ پہن۔“ [سنن نسائي/كتاب الزاينة (من المجتبى)/حدیث: 5318]

حضرت عبد اللہ بن عمر رضی اللہ عنہما سے روایت ہے کہ وہ نبی اکرم صلی اللہ علیہ وسلم کی خدمت میں حاضر ہوئے جبکہ انہوں نے معصفر کپڑے پہن رکھے تھے۔ نبی اکرم صلی اللہ علیہ وسلم (دیکھ کر) ناراض ہوئے اور فرمایا: ”جا ان کو اتار پھینک۔“ انہوں نے عرض کی: کہاں پھینکوں؟ آپ صلی اللہ علیہ وسلم نے فرمایا: ”آگ میں۔“ [سنن نسائي/كتاب الزاينة (من المجتبى)/حدیث: 5319]

حضرت علی رضی اللہ عنہ فرمایا کرتے تھے کہ رسول اللہ صلی اللہ علیہ وسلم نے مجھے ”سونے کی انگوٹھی، «القَسِّيِّ» ”قسی“ اور «المُعَصْفَرِ» ”معصفر“ کپڑے پہننے اور دوران رکوع (اور سجود) قرآن مجید پڑھنے“ سے منع فرمایا۔ [سنن نسائي/كتاب الزاينة (من المجتبى)/حدیث: 5320]

حضرت ابو رمثہ رضی اللہ عنہ نے فرمایا: رسول اللہ صلی اللہ علیہ وسلم (ایک دفعہ گھر سے) باہر تشریف لائے جبکہ آپ نے دو سبز چادریں پہن رکھی تھیں۔ [سنن نسائي/كتاب الزاينة (من المجتبى)/حدیث: 5321]

حضرت خباب بن ارت رضی اللہ عنہ نے فرمایا: ہم نے رسول اللہ صلی اللہ علیہ وسلم سے (کفار کی طرف سے پہنچنے والی تکالیف کی) شکایت کی۔ آپ صلی اللہ علیہ وسلم اس وقت کعبہ کے سائے میں ایک سیاہ دھاری دار چادر کو تکیہ بنا کر لیٹے ہوئے تھے۔ ہم نے کہا: آپ ہمارے لیے اللہ تعالیٰ سے مدد و نصرت طلب نہیں فرماتے؟ ہمارے لیے اللہ تعالیٰ سے دعا نہیں فرماتے۔ [سنن نسائي/كتاب الزاينة (من المجتبى)/حدیث: 5322]

حضرت سہل بن سعد رضی اللہ عنہ نے فرمایا: ایک عورت ایک بردہ لے کر آئی ....... پھر حضرت سہل رضی اللہ عنہ نے شاگردوں سے پوچھا: کیا تم جانتے ہو بردہ کیا ہوتا ہے؟ انہوں نے کہا: جی ہاں! یہی سیاہ دھاری دار چادر جس کا کنارہ بھی ساتھ ہی بُنا گیا ہو...... اور کہا: اے اللہ کے رسول! میں نے یہ چادر اپنے ہاتھ سے بُنی ہے، میں آپ کو پہننے کے لیے پیش کرتی ہوں۔ رسول اللہ صلی اللہ علیہ وسلم نے اسے لے لیا جبکہ آپ کو اس کی ضرورت بھی تھی۔ پھر آپ صلی اللہ علیہ وسلم (گھر سے ہوکر) ہماری طرف تشریف لائے تو آپ صلی اللہ علیہ وسلم نے اسے بطور ازار (تہبند) باندھ رکھا تھا۔ [سنن نسائي/كتاب الزاينة (من المجتبى)/حدیث: 5323]

حضرت سمرہ رضی اللہ عنہ سے روایت ہے کہ نبی اکرم صلی اللہ علیہ وسلم نے فرمایا: ”سفید کپڑے پہنا کرو، وہ زیادہ پاکیزہ اور صاف ستھرے رہتے ہیں اور فوت شدگان کو بھی انہی میں کفناؤ۔“ [سنن نسائي/كتاب الزاينة (من المجتبى)/حدیث: 5324]

حضرت سمرہ رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”سفید کپڑے پہنا کرو، زندہ لوگ بھی انہیں پہنیں اور فوت شدگان کو بھی انہی میں کفن دو، یہ بہترین کپڑے ہیں۔“ [سنن نسائي/كتاب الزاينة (من المجتبى)/حدیث: 5325]

حضرت مسور بن مخرمہ رضی اللہ عنہما بیان کرتے ہیں کہ رسول اللہ صلی اللہ علیہ وسلم نے قبائیں تقسیم کیں لیکن (میرے والد) حضرت مخرمہ کو کچھ نہ دیا تو حضرت مخرمہ رضی اللہ عنہ نے کہا: بیٹا! آؤ رسول اللہ صلی اللہ علیہ وسلم کے پاس چلیں۔ میں ان کے ساتھ چل پڑا (وہاں پہنچ کر) انہوں نے کہا: جاؤ آپ صلی اللہ علیہ وسلم کو باہر لاؤ۔ میں نے آپ صلی اللہ علیہ وسلم کو بلایا تو آپ صلی اللہ علیہ وسلم تشریف لے آئے تو آپ صلی اللہ علیہ وسلم پر ان میں سے ایک قبا تھی۔ آپ صلی اللہ علیہ وسلم نے فرمایا: ”میں نے یہ تمہارے لیے چھپا رکھی تھی۔“ والد محترم حضرت مخرمہ رضی اللہ عنہ نے اسے دیکھا اور پہن لیا۔ [سنن نسائي/كتاب الزاينة (من المجتبى)/حدیث: 5326]