حضرت ابوہریرہ رضی اللہ عنہ سے روایت ہے، وہ نبی صلی اللہ علیہ وسلم سے بیان کرتے ہیں کہ آپ صلی اللہ علیہ وسلم نے فرمایا: ”حضرت موسیٰ علیہ السلام نے حضرت آدم علیہ السلام سے بحث کی اور ان سے کہا: ”آپ ہی نے اپنی غلطی کی وجہ سے لوگوں کو جنت سے نکالا اور مشقت میں ڈالا؟“ حضرت آدم علیہ السلام نے فرمایا: ”اے موسیٰ! آپ کو اللہ تعالیٰ نے اپنی رسالت کے لیے پسند فرمایا اور ہم کلامی کا شرف بخشا ہے، کیا آپ مجھے ایک ایسی بات پر ملامت کرتے ہیں جسے اللہ تعالیٰ نے میری پیدائش سے بھی پہلے میرے لیے مقدر کر دیا تھا۔““ رسول اللہ صلی اللہ علیہ وسلم نے فرمایا: ”حضرت آدم علیہ السلام، حضرت موسیٰ علیہ السلام پر بحث میں غالب آ گئے۔“ [صحيح البخاري/كتاب تفسير القرآن/حدیث: 4738]

حضرت عبداللہ بن مسعود رضی اللہ عنہ سے روایت ہے، انہوں نے فرمایا: ”سورہ بنی اسرائیل، سورہ کہف، سورہ مریم، سورہ طہ اور سورہ انبیاء اول درجے کی عمدہ سورتوں میں سے ہیں اور یہ سورتیں میری پرانی یاد کی ہوئی ہیں۔“ حضرت قتادہ رحمہ اللہ نے کہا: ” «جُذَاذًا» کے معنی ہیں: اس نے بتوں کو ٹکڑے ٹکڑے کر دیے۔“ امام حسن بصری رحمہ اللہ نے «فِي فَلَكٍ» کے متعلق فرمایا: ”وہ چرخے کے تکلے کی طرح ہیں۔“ «يَسْبَحُونَ» کے معنی ہیں: ”گھومتے ہیں“، یعنی ہر ایک چرخے کے تکلے کی طرح اپنے دائرے میں گھومتا ہے۔ حضرت عبداللہ بن عباس رضی اللہ عنہما نے فرمایا: ” «نَفَشَتْ» کے معنی ہیں: وہ بکریاں رات کے وقت چر گئیں۔“ «يُصْحَبُونَ» ﴿يُصْحَبُونَ﴾ [سورة الأنبياء: 43] کے معنی ہیں: ”روکے جائیں گے“، یعنی انہیں کوئی بھی ہمارے عذاب سے نہیں بچائے گا۔ ﴿أُمَّتُكُمْ أُمَّةً وَٰحِدَةً﴾ [سورة الأنبياء: 92] میں «أُمَّة» کے معنی ”دین“ ہیں۔ حضرت عبداللہ بن عباس رضی اللہ عنہما نے فرمایا: ”تم سب کا دین ایک ہے“، یعنی ہر وہ جماعت جو ایک دین پر ہو، اسے امت سے تعبیر کیا گیا ہے۔ حضرت عکرمہ رحمہ اللہ نے کہا: ”حبشی زبان میں ﴿حَصَبُ جَهَنَّمَ﴾ [سورة الأنبياء: 98] کے معنی ہیں: جہنم کا ایندھن۔“ عکرمہ رحمہ اللہ کے علاوہ کسی نے کہا: ” «أَحَسُّوا» کے معنی ہیں: توقع کرنا، محسوس اور مشاہدہ کرنا۔ یہ «أَحْسَسْتُ» سے ماخوذ ہے۔“ «خَامِدِينَ» کے معنی ہیں: ”مرا ہوا، بجھا ہوا۔“ «حَصِيدًا» کے معنی ہیں: ”جڑ سے کٹا ہوا“، یہ لفظ واحد، تثنیہ اور جمع سب کے لیے استعمال ہوتا ہے۔ «لَا يَسْتَحْسِرُونَ» کے معنی ہیں: ”وہ تھکتے نہیں ہیں۔“ لفظ «حَسِيرٌ» ﴿حَسِيرٌ﴾ [سورة الملك: 4] بھی اسی سے ہے، یعنی: ”تھکا ماندہ“، اسی طرح «حَسَرْتُ بَعِيرِي» ہے، یعنی: ”میں نے اپنے اونٹ کو تھکا دیا۔“ «عَمِيقٍ» ﴿عَمِيقٍ﴾ [سورة الحج: 27] کے معنی ”بعید“ ہیں، یعنی وہ ہر دور کے راستہ سے آئیں گے۔ «نُكِسُوا» کے معنی ہیں: ”لوٹا دیے گئے“، یعنی شرمندگی سے اپنے سر نیچے کر لیے۔ «صَنْعَةَ لَبُوسٍ» سے مراد ”زرہیں بنانا“ ہے۔ ﴿تَقَطَّعُوا أَمْرَهُم﴾ [سورة الأنبياء: 93] سے مراد ہے: ”انہوں نے دین میں اختلاف کیا، جدا جدا طریقہ اختیار کیا۔“ «الْحَسِيسُ» کے معنی ”ہلکی سی آواز“ کے ہیں؛ «حَسِيسٌ»، «حَسٌّ»، «جَرْسٌ» اور «هَمْسٌ» ان سب کے ایک ہی معنی ہیں۔ «آذَنْتُكَ» کے معنی ہیں: ”ہم نے تجھ کو اطلاع دی۔“ «آذَنْتُكُمْ»: ”میں نے تمہیں مطلع کر دیا“، یعنی تو اور مخاطب دونوں برابر ہو گئے تاکہ کسی کو دھوکا نہ دیا جا سکے۔ امام مجاہد رحمہ اللہ نے کہا: ” ﴿لَعَلَّكُمْ تُسْأَلُونَ﴾ [سورة الأنبياء: 13] کے معنی ہیں: شاید تم سمجھ جاؤ۔“ «ارْتَضَىٰ» کے معنی ہیں: ”وہ راضی ہوا اور اس نے پسند کیا۔“ «التَّمَاثِيلُ» کے معنی ”بت اور مورتیاں“ ہیں۔ «السِّجِلِّ» سے مراد ”صحیفہ یا نوشتہ“ ہے۔ [صحيح البخاري/كتاب تفسير القرآن/حدیث: 4739]

حضرت عبداللہ بن عباس رضی اللہ عنہما سے روایت ہے، انہوں نے کہا: نبی کریم صلی اللہ علیہ وسلم نے ایک دن خطبہ دیتے ہوئے فرمایا: ”تم سب اللہ کے حضور اس حالت میں اٹھائے جاؤ گے کہ تمہارے پاؤں اور بدن ننگے ہوں گے اور تمہارا ختنہ بھی نہیں کیا ہو گا۔“ ﴿كَمَا بَدَأْنَا أَوَّلَ خَلْقٍ نُعِيدُهُ وَعْدًا عَلَيْنَا إِنَّا كُنَّا فَاعِلِينَ﴾ [سورة الأنبياء: 104] ”جیسے ہم نے پہلی پیدائش کی ابتدا کی تھی (اسی طرح) ہم اسے دوبارہ لوٹائیں گے، یہ ہمارا وعدہ ہے، ہم اسے ضرور پورا کریں گے۔“ پھر قیامت کے دن سب سے پہلے جس کو لباس پہنایا جائے گا وہ حضرت ابراہیم علیہ السلام ہوں گے، آگاہ رہو! میری امت کے کچھ لوگ لائے جائیں گے اور ان کو بائیں جانب سے پکڑا جائے گا تو اس وقت میں کہوں گا: ”اے میرے رب! یہ میرے ساتھی ہیں۔“ مجھ سے کہا جائے گا: ”آپ نہیں جانتے کہ انہوں نے آپ کے بعد کیا کیا تھا۔“ اس وقت میں وہی کہوں گا جو اللہ تعالیٰ کے ایک نیک بندے نے کہا تھا: ﴿وَكُنْتُ عَلَيْهِمْ شَهِيدًا مَا دُمْتُ فِيهِمْ فَلَمَّا تَوَفَّيْتَنِي كُنْتَ أَنْتَ الرَّقِيبَ عَلَيْهِمْ وَأَنْتَ عَلَى كُلِّ شَيْءٍ شَهِيدٌ﴾ [سورة المائدة: 117] ”جب تک میں ان میں موجود رہا ان کے حالات سے آگاہ رہا اور جب تو نے مجھے اٹھا لیا تو اس وقت تو ہی ان کے حالات سے آگاہ تھا اور تو ہی ہر چیز کی پوری خبر رکھنے والا ہے۔“ اس وقت کہا جائے گا: ”جب آپ ان سے جدا ہوئے تھے تو بلاشبہ یہ لوگ اپنی ایڑیوں کے بل اسلام سے پھر گئے تھے۔“ [صحيح البخاري/كتاب تفسير القرآن/حدیث: 4740]

حضرت ابو سعید خدری رضی اللہ عنہ سے روایت ہے، انہوں نے کہا: نبی صلی اللہ علیہ وسلم نے فرمایا: ”اللہ تعالیٰ قیامت کے دن حضرت آدم علیہ السلام سے فرمائے گا: ”اے آدم!“ وہ جواب دیں گے: ”جی پروردگار! میں حاضر ہوں جو ارشاد ہو۔“ پھر انہیں ایک آواز آئے گی: ”اللہ تعالیٰ تمہیں حکم دیتا ہے کہ اپنی اولاد میں سے دوزخ میں جانے والوں کا گروہ نکالو۔“ وہ عرض کریں گے: ”پروردگار! دوزخ کے لیے کتنا حصہ نکالوں؟“ حکم ہو گا: ”ہر ہزار میں سے نو سو ننانوے۔“ یہ ایسا سخت وقت ہو گا کہ ﴿تَضَعُ كُلُّ ذَاتِ حَمْلٍ حَمْلَهَا﴾ [سورة الحج: 2] ”حمل والی کا حمل گر جائے گا“ اور بچہ (مارے فکر کے) بوڑھا ہو جائے گا اور ﴿وَتَرَى النَّاسَ سُكَارَى وَمَا هُم بِسُكَارَى وَلَكِنَّ عَذَابَ اللَّهِ شَدِيدٌ﴾ [سورة الحج: 2] ”اور تو لوگوں کو نشے میں (مدہوش) دیکھے گا، حالانکہ وہ نشے میں نہیں ہوں گے لیکن اللہ کا عذاب ہی شدید ہو گا۔““ یہ حدیث لوگوں پر بہت گراں گزری۔ ان کے چہرے بدل گئے۔ تو نبی صلی اللہ علیہ وسلم نے فرمایا: ”یاجوج ماجوج میں سے نو صد ننانوے اور تم میں سے ایک جہنم کے لیے لیا جائے گا۔ تم، لوگوں کی نسبت ایسے ہو جیسے سفید بیل کے جسم پر ایک سیاہ بال ہو یا جیسے کالے بیل کے جسم پر ایک بال سفید ہوتا ہے۔ اور میں امید کرتا ہوں کہ تم لوگ اہل جنت کا چوتھا حصہ ہو گے۔“ یہ سن کر ہم نے نعرہ تکبیر بلند کیا، پھر آپ صلی اللہ علیہ وسلم نے فرمایا: ”تم جنت کا تیسرا حصہ ہو گے۔“ ہم نے پھر «اَللّٰہُ اَکْبَرُ» ”اللہ اکبر“ پکارا۔ پھر آپ صلی اللہ علیہ وسلم نے فرمایا: ”تم اہل جنت کا آدھا حصہ ہو گے۔“ ہم نے پھر «اَللّٰہُ اَکْبَرُ» ”اللہ اکبر“ کا نعرہ لگایا۔ ابو اسامہ نے حضرت اعمش سے یوں روایت کیا: ﴿وَتَرَى النَّاسَ سُكَارَى وَمَا هُم بِسُكَارَى﴾ [سورة الحج: 2] نیز فرمایا: ”ہر ہزار میں سے نو صد ننانوے نکالو۔“ لیکن جریر، عیسیٰ بن یونس اور ابو معاویہ نے یوں نقل کیا: «سَكْرَى وَمَا هُمْ بِسَكْرَى» ۔ [صحيح البخاري/كتاب تفسير القرآن/حدیث: 4741]

حضرت ابن عباس رضی اللہ عنہما سے روایت ہے، انہوں نے درج ذیل آیت ﴿وَمِنَ النَّاسِ مَن يَعْبُدُ اللَّهَ عَلَىٰ حَرْفٍ﴾ [سورة الحج: 11] کے متعلق فرمایا: ”بعض لوگ ایسے ہیں جو کنارے (شک) پر عبادت کرتے ہیں۔“ کوئی آدمی مدینہ طیبہ آتا، اگر اس کی بیوی بچہ جنم دیتی یا اس کی گھوڑی کا بچہ پیدا ہوتا تو کہتا: ”یہ دین ٹھیک ہے“ اور اگر بیوی بچہ نہ جنتی اور نہ گھوڑی ہی کو کچھ پیدا ہوتا تو کہتا: ”یہ دین برا ہے۔“ [صحيح البخاري/كتاب تفسير القرآن/حدیث: 4742]

حضرت ابوذر رضی اللہ عنہ سے روایت ہے، وہ قسم اٹھا کر بیان کرتے ہیں کہ یہ آیت: ﴿هَذَانِ خَصْمَانِ اخْتَصَمُوا فِي رَبِّهِمْ﴾ [سورة الحج: 19] ”یہ دو فریق ہیں جنہوں نے اپنے رب کے متعلق جھگڑا کیا“ حضرت حمزہ رضی اللہ عنہ اور آپ کے دونوں ساتھیوں (حضرت عبیدہ بن حارث رضی اللہ عنہ اور حضرت علی رضی اللہ عنہ)، نیز عتبہ اور اس کے دونوں ساتھیوں (شیبہ اور ولید) کے متعلق نازل ہوئی تھی جب انہوں نے بدر کے دن میدان میں آ کر مقابلے کی دعوت دی تھی۔ اس روایت کو سفیان نے بھی ابوہاشم سے بیان کیا ہے، اور عثمان نے جریر سے، انہوں نے منصور سے، انہوں نے ابوہاشم سے، انہوں نے ابومجلز سے ان کا اپنا قول بیان کیا ہے۔ [صحيح البخاري/كتاب تفسير القرآن/حدیث: 4743]

حضرت علی بن ابی طالب رضی اللہ عنہ سے روایت ہے، انہوں نے فرمایا: ”میں پہلا شخص ہوں گا جو رحمٰن کے حضور اپنا دعویٰ پیش کرنے کے لیے قیامت کے دن چہار زانو بیٹھوں گا۔“ حضرت قیس رحمہ اللہ نے کہا: ”آپ ہی کے متعلق یہ آیت نازل ہوئی تھی: ﴿هَذَانِ خَصْمَانِ اخْتَصَمُوا فِي رَبِّهِمْ﴾ [سورة الحج: 19] ”یہ دو فریق ہیں جنہوں نے اپنے رب کے متعلق جھگڑا کیا۔“ یہی وہ لوگ ہیں جنہوں نے بدر کی لڑائی میں دعوتِ مقابلہ دی تھی، یعنی حضرت علی، حضرت حمزہ اور حضرت عبیدہ رضی اللہ عنہم ایک طرف، اور شیبہ بن ربیعہ، عتبہ بن ربیعہ اور ولید بن عتبہ دوسری طرف تھے۔“ [صحيح البخاري/كتاب تفسير القرآن/حدیث: 4744]