حضرت ام رومان رضی اللہ عنہا جو حضرت عائشہ رضی اللہ عنہا کی والدہ ماجدہ ہیں، بیان کرتی ہیں کہ ”جب حضرت عائشہ رضی اللہ عنہا پر تہمت لگائی گئی تو وہ بے ہوش ہو کر گر پڑی تھیں۔“ [صحيح البخاري/كتاب تفسير القرآن/حدیث: 4751]

حضرت ابن ابی ملیکہ سے روایت ہے، انہوں نے کہا: ”میں نے حضرت عائشہ رضی اللہ عنہا سے سنا، وہ مذکورہ بالا آیت اس طرح پڑھ رہی تھیں: ﴿إِذْ تَلِقُونَهُ بِأَلْسِنَتِكُمْ﴾ [سورة النور: 15] ۔“ [صحيح البخاري/كتاب تفسير القرآن/حدیث: 4752]

حضرت ابن ابی ملیکہ رحمہ اللہ سے روایت ہے، انہوں نے کہا: حضرت عائشہ رضی اللہ عنہا کی وفات سے تھوڑی دیر پہلے جبکہ وہ نزع کی حالت میں تھیں، حضرت ابن عباس رضی اللہ عنہما نے ان کے پاس آنے کی اجازت طلب کی۔ حضرت عائشہ رضی اللہ عنہا نے فرمایا: ”مجھے ڈر ہے کہ مبادا میری تعریف کرنے لگیں۔“ کسی نے عرض کی: ”وہ رسول اللہ صلی اللہ علیہ وسلم کے چچا زاد اور عزت دار انسان ہیں!“ انہوں نے اندر آنے کی اجازت دے دی۔ حضرت ابن عباس رضی اللہ عنہما نے ان سے پوچھا: ”آپ کس حال میں ہیں؟“ انہوں نے فرمایا: ”اگر میں اللہ کے ہاں اچھی ہوں تو سب اچھا ہی ہے۔“ حضرت ابن عباس رضی اللہ عنہما نے کہا: ” «إِنْ شَاءَ اللّٰهُ» ”اگر اللہ نے چاہا“ آپ اچھی ہی رہیں گی۔ آپ رسول اللہ صلی اللہ علیہ وسلم کی زوجہ مطہرہ ہیں۔ آپ کے علاوہ رسول اللہ صلی اللہ علیہ وسلم نے کسی کنواری عورت سے نکاح نہیں کیا۔ آپ کی براءت آسمان سے نازل ہوئی۔“ حضرت ابن عباس رضی اللہ عنہما کے بعد آپ کی خدمت میں حضرت ابن زبیر رضی اللہ عنہما حاضر ہوئے تو محترمہ صدیقہ کائنات رضی اللہ عنہا نے ان سے فرمایا: ”ابھی حضرت ابن عباس رضی اللہ عنہما آئے تھے، انہوں نے میری تعریف کی۔ میں تو چاہتی ہوں کاش میں بھولی بسری گمنام ہوتی۔“ [صحيح البخاري/كتاب تفسير القرآن/حدیث: 4753]

حضرت قاسم بن محمد رحمہ اللہ سے روایت ہے، انہوں نے کہا: ”حضرت ابن عباس رضی اللہ عنہما نے حضرت عائشہ رضی اللہ عنہا کے پاس آنے کی اجازت چاہی۔“ پھر راوی نے مذکورہ بالا حدیث کی طرح واقعہ بیان کیا لیکن اس روایت میں راوی نے ﴿نَسْيًا مَّنْسِيًّا﴾ [سورة مريم: 23] کے الفاظ ذکر نہیں کیے۔ [صحيح البخاري/كتاب تفسير القرآن/حدیث: 4754]

حضرت مسروق رحمہ اللہ سے روایت ہے، وہ حضرت عائشہ رضی اللہ عنہا سے بیان کرتے ہیں کہ حضرت حسان بن ثابت رضی اللہ عنہ نے حضرت عائشہ رضی اللہ عنہا سے ملاقات کرنے کی اجازت طلب کی تو میں نے کہا: ”آپ انہیں بھی اجازت دیتی ہیں؟“ اس پر انہوں نے فرمایا: ”کیا انہیں بہتان لگانے کی بڑی سزا نہیں ملی؟“ ان کا اشارہ ان کے نابینا ہونے کی طرف تھا، پھر حضرت حسان رضی اللہ عنہ نے یہ شعر پڑھا: ”عفیفہ اور بڑی زیرک ہیں۔ ان کے متعلق کسی کو شبہ بھی نہیں گزر سکتا۔ وہ غافل اور پاکدامن عورتوں کا گوشت کھانے سے مکمل پرہیز کرتی ہیں۔“ حضرت عائشہ رضی اللہ عنہا نے فرمایا: ”لیکن تم!“ [صحيح البخاري/كتاب تفسير القرآن/حدیث: 4755]

حضرت مسروق رحمہ اللہ سے روایت ہے، انہوں نے کہا: ”حضرت حسان بن ثابت رضی اللہ عنہ، حضرت عائشہ رضی اللہ عنہا کے ہاں حاضر ہو کر اس طرح تعریفی اشعار پڑھنے لگے: ”وہ پاکدامن اور زیرک و دانا ہیں۔ کبھی کسی شک و شبہ سے متہم نہیں ہوئیں۔ آپ بے خبر اور پاکباز عورتوں کا گوشت کھانے سے مکمل پرہیز کرتی ہیں۔“ اس پر حضرت عائشہ رضی اللہ عنہا نے ان سے کہا: ”لیکن حسان! تم تو ایسے نہیں ہو۔“ میں نے عرض کی: ”آپ بھی تو ایسے آدمی اپنے پاس آنے کے لیے چھوڑ دیتی ہیں، حالانکہ اللہ تعالیٰ نے فرمایا ہے: « ﴿وَالَّذِي تَوَلَّىٰ كِبْرَهُ مِنْهُمْ لَهُ عَذَابٌ عَظِيمٌ﴾ » [سورة النور: 11] ”اور جس نے اس واقعہ میں سب سے زیادہ حصہ لیا۔۔““ حضرت عائشہ رضی اللہ عنہا نے فرمایا: ”نابینا ہونے سے بڑھ کر اور کیا عذاب ہو سکتا ہے۔“ پھر انہوں نے فرمایا: ”حضرت حسان رضی اللہ عنہ رسول اللہ صلی اللہ علیہ وسلم کی طرف سے کفار کو جواب دیا کرتے تھے۔““ [صحيح البخاري/كتاب تفسير القرآن/حدیث: 4756]

حضرت عائشہ رضی اللہ عنہا سے روایت ہے، انہوں نے کہا: جب میرے متعلق ایسی باتیں کہی گئیں جن کا مجھے گمان بھی نہیں تھا تو رسول اللہ صلی اللہ علیہ وسلم میرے معاملے میں (لوگوں کا) خطبہ دینے کے لیے کھڑے ہوئے۔ آپ نے کلمہ شہادت پڑھنے کے بعد اللہ کی شایان شان حمد و ثنا کی، پھر فرمایا: «أَمَّا بَعْدُ» ”تم لوگ مجھے ایسے لوگوں کے بارے میں مشورہ دو جنہوں نے میری اہلیہ پر تہمت لگائی ہے۔ اللہ کی قسم! میں نے اپنی اہلیہ میں کوئی برائی نہیں دیکھی۔ اور انہوں نے ایسے شخص کے متعلق تہمت لگائی ہے کہ اللہ کی قسم! اس میں بھی میں نے کوئی برائی نہیں دیکھی۔ وہ میرے گھر میں جب بھی آیا میری موجودگی ہی میں داخل ہوا اور اگر میں کبھی سفر کی وجہ سے مدینے میں نہیں ہوتا تو وہ بھی نہیں ہوتا۔ وہ تو میرے ساتھ ہی رہتا ہے۔“ اس کے بعد حضرت سعد بن معاذ رضی اللہ عنہ کھڑے ہوئے اور عرض کی: ”اللہ کے رسول! ہمیں اجازت دیں، ہم ایسے لوگوں کی گردنیں اڑا دیں۔“ اس کے بعد قبیلہ خزرج کے ایک صاحب کھڑے ہوئے، حضرت حسان بن ثابت رضی اللہ عنہ کی والدہ اسی آدمی کے قبیلے سے تھیں، انہوں نے کھڑے ہو کر کہا: ”تم غلط کہتے ہو۔ اگر وہ لوگ قبیلہ اوس سے ہوتے تو تم انہیں قتل کرنا کبھی پسند نہ کرتے۔“ نوبت یہاں تک پہنچ گئی کہ مسجد ہی میں قبیلہ اوس اور خزرج میں باہم فساد کا خطرہ پیدا ہو گیا۔ اس فساد کی مجھے کوئی خبر نہ تھی۔ میں اسی دن شام کے وقت قضائے حاجت کے لیے باہر نکلی جبکہ میرے ہمراہ ام مسطح بھی تھیں۔ وہ راستے میں پھسلیں تو ان کی زبان سے نکلا: ”مسطح کو اللہ غارت کرے۔“ میں نے کہا: ”تم اپنے بیٹے کو کوستی ہو؟“ اس پر وہ خاموش ہو گئیں۔ پھر وہ دوبارہ پھسلیں تو ان کی زبان سے وہی الفاظ نکلے کہ ”مسطح کو اللہ مارے۔“ میں نے پھر کہا: ”تم اپنے بیٹے کو کوستی ہو؟“ پھر وہ تیسری دفعہ پھسلیں تو انہوں نے پھر وہی لفظ کہے: ”اللہ مسطح کو غارت کرے۔“ میں نے پھر انہیں جھڑکا تو انہوں نے بتایا کہ ”اللہ کی قسم! میں تو آپ ہی کی وجہ سے اسے کوس رہی ہوں۔“ میں نے کہا: ”میری وجہ سے کیسے؟“ تب انہوں نے مجھ سے اس طوفان کا سارا واقعہ بیان کیا۔ میں نے پوچھا: ”کیا واقعی یہ سب کچھ کہا گیا ہے؟“ انہوں نے کہا: ”ہاں، اللہ کی قسم!“ اس کے بعد میں اپنے گھر واپس آ گئی۔ مجھے کچھ خبر نہ تھی کہ میں کس کام کے لیے باہر گئی تھی اور کہاں سے آئی ہوں۔ ذرہ برابر بھی مجھے اس کا احساس نہیں رہا۔ اس کے بعد مجھے بخار ہو گیا اور میں نے رسول اللہ صلی اللہ علیہ وسلم سے عرض کی: ”مجھے میرے والدین کے گھر پہنچا دیں۔“ آپ نے میرے ساتھ ایک بچہ بھیج دیا۔ میں اپنے (والدین کے) گھر پہنچی تو میں نے دیکھا کہ (میری والدہ) حضرت ام رومان رضی اللہ عنہا نچلے حصے میں ہیں اور میرے والد گرامی حضرت ابوبکر رضی اللہ عنہ بالا خانے میں قرآن مجید کی تلاوت میں مصروف ہیں۔ میری والدہ نے پوچھا: ”پیاری بیٹی! اس وقت کیسے آنا ہوا؟“ میں نے وجہ بتائی اور واقعے کی تفصیلات سے آگاہ کر دیا لیکن ان باتوں کا جتنا غم مجھے معلوم ہوتا تھا کہ انہیں اتنی پریشانی نہیں تھی۔ انہوں نے فرمایا: ”بٹیا! اتنا فکر کیوں کرتی ہو؟ کم ہی کوئی ایسی خوبصورت عورت کسی ایسے مرد کے نکاح میں ہو گی جو اس سے محبت بھی رکھتا ہو اور اس کی سوکنیں بھی ہوں اور وہ اس سے حسد نہ کریں اور اس میں سو عیب نہ نکالیں۔“ وہ اس تہمت سے اتنا متاثر نہیں تھیں جس قدر میں پریشان تھی۔ میں نے پوچھا: ”والد گرامی کے علم میں بھی یہ تمام باتیں آ گئی ہیں؟“ انہوں نے کہا: ”ہاں۔“ میں نے پوچھا: ”رسول اللہ صلی اللہ علیہ وسلم بھی ان سے باخبر ہیں؟“ انہوں نے بتایا: ”رسول اللہ صلی اللہ علیہ وسلم بھی (اس سے آگاہ ہیں)۔“ میں یہ سن کر رونے لگی تو حضرت ابوبکر رضی اللہ عنہ نے میرے رونے کی آواز سن لی، وہ گھر کے بالائی حصے میں قرآن پڑھ رہے تھے، اتر کر نیچے آئے اور والدہ سے پوچھا کہ ”اسے کیا ہوا ہے؟“ انہوں نے بتایا کہ ”وہ تمام باتیں انہیں بھی معلوم ہو گئی ہیں جو ان کے متعلق کہی جا رہی ہیں۔“ ان کی بھی آنکھیں بھر آئیں اور انہوں نے فرمایا: ”بیٹی! میں تمہیں قسم دیتا ہوں کہ تم اپنے گھر واپس چلی جاؤ۔“ چنانچہ میں واپس چلی آئی۔ اس وقت رسول اللہ صلی اللہ علیہ وسلم میرے حجرے میں تشریف لائے اور آپ نے میرے بارے میں ہماری خادمہ سے دریافت کیا۔ اس نے کہا: ”اللہ کی قسم! میں ان کے اندر کوئی عیب نہیں جانتی، البتہ بسا اوقات ایسا ہو جاتا ہے کہ وہ سو جایا کرتی ہیں کہ گھر کی بکری ان کا گوندھا ہوا آٹا کھا جاتی ہے۔“ رسول اللہ صلی اللہ علیہ وسلم کے بعض صحابہ نے ڈانٹ کر اس خادمہ سے کہا کہ ”رسول اللہ صلی اللہ علیہ وسلم کو صحیح صحیح بات کیوں نہیں بتا دیتی۔“ پھر انہوں نے کھل کر صاف الفاظ میں ان سے اس واقعے کی تصدیق چاہی۔ اس پر وہ گویا ہوئیں: «سُبْحَانَ اللّٰهِ» ”میں تو حضرت عائشہ رضی اللہ عنہا کو اس طرح جانتی ہوں جس طرح زرگر کھرے سونے کو جانتا ہے۔“ اس تہمت کی خبر جب اس شخص کو ہوئی جس کے ساتھ مجھے متہم کیا گیا تھا تو اس نے کہا: «سُبْحَانَ اللّٰهِ» ”اللہ کی قسم! میں نے آج تک کسی عورت کا کپڑا نہیں کھولا۔“ حضرت عائشہ رضی اللہ عنہا نے فرمایا کہ اس کے بعد انہوں نے اللہ کے راستے میں شہادت پائی تھی۔ الغرض صبح کے وقت میرے والدین میرے پاس آ گئے اور میرے پاس ہی رہے۔ عصر کی نماز پڑھ کر رسول اللہ صلی اللہ علیہ وسلم بھی تشریف لے آئے۔ میرے والدین مجھے دائیں اور بائیں سے پکڑے ہوئے تھے۔ آپ صلی اللہ علیہ وسلم نے اللہ تعالیٰ کی حمد و ثنا کی اور فرمایا: ”اے عائشہ! اگر تم نے واقعی کوئی برا کام کیا ہے اور اپنے اوپر ظلم کیا ہے تو پھر اللہ تعالیٰ سے توبہ کرو کیونکہ اللہ اپنے بندوں کی توبہ قبول کرتا ہے۔“ اس دوران میں ایک انصاری خاتون بھی آ گئیں جو دروازے پر بیٹھی ہوئی ہیں۔ میں نے کہا: ”آپ اس خاتون کا لحاظ بھی نہیں کرتے، مبادا وہ باہر جا کر کوئی بات کہہ دے؟“ پھر رسول اللہ صلی اللہ علیہ وسلم نے وعظ و نصیحت فرمائی تو میں اپنے والد کی طرف متوجہ ہوئی اور ان سے عرض کی: ”آپ صلی اللہ علیہ وسلم کو آپ ہی اس کا جواب دیں۔“ انہوں نے کہا: ”میں اس کے متعلق کیا کہوں؟“ پھر میں اپنی والدہ کی طرف متوجہ ہوئی اور انہیں کہا: ”آپ میری طرف سے جواب دیں۔“ انہوں نے بھی یہی کہا کہ ”میں کیا کہوں؟“ جب کسی نے میری طرف سے کوئی بات نہ کی تو میں نے خطبہ پڑھا اور اللہ کی شایان شان حمد و ثنا کی اور کہا: ”اللہ کی قسم! اگر میں آپ لوگوں سے کہوں کہ میں نے اس طرح کا کوئی کام نہیں کیا اور اللہ گواہ ہے کہ میں اپنے اس دعویٰ میں سچی ہوں، تو بھی تمہارے ہاں میری یہ بات مجھے کوئی فائدہ نہیں دے گی کیونکہ آپ لوگوں نے یہ باتیں کی ہیں اور آپ کے دل و دماغ میں یہ باتیں رچ بس گئیں ہیں۔ اور اگر میں یہ بات کہہ دوں کہ میں نے واقعی یہ کام کیا ہے، حالانکہ اللہ خوب جانتا ہے کہ میں نے ایسا کام نہیں کیا ہے تو آپ لوگ کہیں گے کہ اس نے تو اقرار جرم خود کر لیا ہے۔ اللہ کی قسم! میری اور آپ لوگوں کی مثال حضرت یوسف علیہ السلام کے والد جیسی ہے جب انہوں نے فرمایا تھا: ﴿فَصَبْرٌ جَمِيلٌ ۖ وَاللَّهُ الْمُسْتَعَانُ عَلَىٰ مَا تَصِفُونَ﴾ [سورة يوسف: 18] ”صبر ہی اچھا ہے اور تم لوگ جو کچھ بیان کرتے ہو اس پر میری اللہ ہی مدد کرے گا۔“ میں نے ذہن پر بہت زور دیا کہ حضرت یعقوب علیہ السلام کا نام یاد آ جائے لیکن اس وقت یاد نہ آیا۔ اس وقت رسول اللہ صلی اللہ علیہ وسلم پر وحی کا نزول شروع ہو گیا اور ہم سب خاموش ہو گئے۔ پھر آپ سے یہ کیفیت ختم ہوئی تو میں نے دیکھا کہ خوشی آپ کے چہرے سے ظاہر ہو رہی تھی۔ رسول اللہ صلی اللہ علیہ وسلم نے اپنی پیشانی کو صاف کرتے ہوئے فرمایا: ”عائشہ! تمہیں بشارت ہو۔ اللہ تعالیٰ نے تمہاری پاکدامنی نازل کر دی ہے۔“ اس وقت مجھے بہت غصہ آ رہا تھا۔ میرے والدین نے مجھ سے کہا: ”تم رسول اللہ صلی اللہ علیہ وسلم کے سامنے کھڑی ہو جاؤ۔“ میں نے کہا: ”اللہ کی قسم! میں رسول اللہ صلی اللہ علیہ وسلم کے سامنے کھڑی نہیں ہوں گی اور نہ میں آپ کا شکریہ ادا کروں گی اور نہ تمہارا شکریہ ادا کروں گی۔ میں تو صرف اپنے اللہ تعالیٰ کا شکریہ ادا کروں گی جس نے میری براءت نازل کی ہے۔ آپ لوگوں نے تو یہ طوفانِ بدتمیزی سنا، نہ تو آپ اس کا انکار کر سکے اور نہ اسے ختم کرنے ہی کی کوئی کوشش کی۔“ حضرت عائشہ رضی اللہ عنہا فرماتی ہیں کہ حضرت زینب بنت جحش رضی اللہ عنہا کو اللہ تعالیٰ نے ان کی دینداری کی وجہ سے اس تہمت میں پڑنے سے بچا لیا۔ میری بابت انہوں نے خیر کے علاوہ اور کوئی بات نہیں کی، البتہ ان کی بہن حمنہ بنت جحش ہلاک ہونے والوں کے ساتھ ہلاک ہو گئی۔ اس طوفان کو پھیلانے میں مسطح، حسان اور منافق عبداللہ بن ابی نے حصہ لیا تھا۔ عبداللہ بن ابی تو اس کے متعلق بہت کرید کرتا اور اس پر حاشیہ چڑھاتا تھا۔ وہی اس طوفان کا بانی مبانی تھا اور ﴿وَالَّذِي تَوَلَّى كِبْرَهُ﴾ [سورة النور: 11] سے مراد وہ اور حمنہ ہیں۔ حضرت عائشہ رضی اللہ عنہا نے بیان کیا کہ اس کے بعد حضرت ابوبکر رضی اللہ عنہ نے قسم کھائی کہ آئندہ وہ مسطح کو کبھی بھی کوئی فائدہ نہیں پہنچائیں گے۔ اس پر اللہ تعالیٰ نے یہ آیت نازل فرمائی: ﴿وَلَا يَأْتَلِ أُولُو الْفَضْلِ مِنكُمْ وَالسَّعَةِ أَن يُؤْتُوا أُولِي الْقُرْبَىٰ وَالْمَسَاكِينَ وَالْمُهَاجِرِينَ فِي سَبِيلِ اللَّهِ ۖ وَلْيَعْفُوا وَلْيَصْفَحُوا ۗ أَلَا تُحِبُّونَ أَن يَغْفِرَ اللَّهُ لَكُمْ ۗ وَاللَّهُ غَفُورٌ رَحِيمٌ﴾ [سورة النور: 22] ”اور جو لوگ تم میں سے بزرگی والے اور فراخ دست ہیں (اس سے مراد حضرت ابوبکر رضی اللہ عنہ ہیں) وہ قرابت داروں اور مساکین کو نہ دینے کی قسم نہ اٹھائیں (اس سے مراد حضرت مسطح ہیں) کیا تم یہ نہیں چاہتے کہ اللہ تعالیٰ تمہارے قصور معاف کر دے؟ بلاشبہ اللہ تعالیٰ بے حد مغفرت کرنے والا انتہائی مہربان ہے۔“ حضرت ابوبکر رضی اللہ عنہ نے کہا: ”ہاں، اللہ کی قسم! اے ہمارے رب! ہم تو اس بات کے خواہش مند ہیں کہ تو ہماری مغفرت فرما دے۔“ پھر انہوں نے مسطح کا وظیفہ پہلے کی طرح جاری کر دیا۔ [صحيح البخاري/كتاب تفسير القرآن/حدیث: 4757]

حضرت عائشہ رضی اللہ عنہا سے روایت ہے، انہوں نے فرمایا: ”اللہ تعالیٰ ان عورتوں پر رحم کرے جنہوں نے پہلے پہل ہجرت کی! جب یہ آیت کریمہ ﴿وَلْيَضْرِبْنَ بِخُمُرِهِنَّ عَلَىٰ جُيُوبِهِنَّ﴾ [سورة النور: 31] ”اپنے دوپٹے اپنے سینوں پر ڈالے رکھا کریں۔“ نازل ہوئی تو انہوں نے اپنی چادروں کو پھاڑ کر ان کے دوپٹے بنا لیے تھے۔“ [صحيح البخاري/كتاب تفسير القرآن/حدیث: 4758]

حضرت عائشہ رضی اللہ عنہا ہی سے روایت ہے، وہ کہا کرتی تھیں: ”جب یہ آیت ﴿وَلْيَضْرِبْنَ بِخُمُرِهِنَّ عَلَىٰ جُيُوبِهِنَّ﴾ [سورة النور: 31] ”اور اپنی اوڑھنیوں کو اپنے سینوں پر ڈال لیا کریں۔“ نازل ہوئی تو عورتوں نے اپنی چادروں کو لیا اور ان کو کناروں کی جانب سے پھاڑ کر ان کی اوڑھنیاں بنا لیں۔“ [صحيح البخاري/كتاب تفسير القرآن/حدیث: 4759]