نبی صلی اللہ علیہ وسلم کی زوجہ محترم، ام المومنین حضرت عائشہ رضی اللہ عنہا سے روایت ہے، وہ نبی صلی اللہ علیہ وسلم سے بیان کرتی ہیں کہ آپ صلی اللہ علیہ وسلم نے فرمایا: ” «الرَّحِمُ» ( «الرَّحْمٰنِ» سے ملی ہوئی) ایک شاخ ہے، جو شخص اس سے ملے، میں اس سے ملتا ہوں اور جو اس سے قطع تعلق کرے، اس سے قطع تعلق کرتا ہوں۔“ [صحيح البخاري/كتاب الأدب/حدیث: 5989]

حضرت عمرو بن عاص رضی اللہ عنہ سے روایت ہے، انہوں نے کہا کہ میں نے نبی صلی اللہ علیہ وسلم سے کسی قسم کی مداہنت کے بغیر علانیہ طور پر یہ کہتے سنا: ”آلِ ابی (فلاں)۔۔۔“ عمرو بن عباس نے کہا کہ محمد بن جعفر کی کتاب میں اس جگہ بیاض ہے۔۔۔ ”میرے دوست نہیں ہیں۔ میرا مددگار تو بس اللہ تعالیٰ ہے اور نیک مومن بندے میرے دوست ہیں۔“ عنبسہ بن عبدالواحد نے عن بیان، عن قیس، عن عمرو بن عاص رضی اللہ عنہ کے طریق سے یہ الفاظ مزید بیان کیے ہیں: ”لیکن ان سے میری قرابت ہے میں اسے رشتے اور قرابت کی تری سے تازہ رکھتا ہوں یعنی میں ان کے ساتھ صلہ رحمی کی وجہ سے تعلق رکھوں گا۔“ ابو عبداللہ (امام بخاری رحمہ اللہ) نے فرمایا: ” «بِبَلَاهَا» کے الفاظ اسی طرح مروی ہیں، لیکن (ان کے بجائے) «بِبَلَالِهَا» کے الفاظ عمدہ اور صحیح ہیں کیونکہ «بِبَلَاهَا» کی کوئی معقول وجہ میں نہیں سمجھتا۔“ [صحيح البخاري/كتاب الأدب/حدیث: 5990]

حضرت عبداللہ بن عمرو رضی اللہ عنہ سے روایت ہے، وہ نبی صلی اللہ علیہ وسلم سے بیان کرتے ہیں کہ آپ صلی اللہ علیہ وسلم نے فرمایا: ”بدلہ چکانے والا صلہ رحمی کرنے والا نہیں ہے، بلکہ صلہ رحمی کرنے والا وہ شخص ہے کہ جب اس کے ساتھ صلہ رحمی کا تعلق ختم کر دیا جائے تو وہ پھر بھی صلہ رحمی کرے۔“ [صحيح البخاري/كتاب الأدب/حدیث: 5991]

حضرت حکیم بن حزام رضی اللہ عنہ سے روایت ہے، انہوں نے عرض کی: ”اے اللہ کے رسول! مجھے ان امور کے متعلق آگاہ کریں جو میں دورِ جاہلیت میں صلہ رحمی، غلام آزاد کرنے اور صدقہ وغیرہ کرنے کی صورت میں کرتا تھا، کیا مجھے ان کا ثواب ملے گا؟“ حضرت حکیم رضی اللہ عنہ کہتے ہیں کہ رسول اللہ صلی اللہ علیہ وسلم نے فرمایا: ”تم ان اعمالِ خیر سمیت مسلمان ہوئے ہو، جو تم قبل ازیں کر چکے ہو۔“ ابو یمان راوی سے «أَتَحَنَّتُ» (تا کے ساتھ) بھی مروی ہے، لیکن معمر، صالح اور ابن مسافر نے «أَتَحَنَّثُ» (ثا کے ساتھ) نقل کیا ہے، ابن اسحاق نے کہا: «تَحَنُّث» کے معنی ”نیکی کرنا“ ہیں، ہشام نے اپنے والد سے روایت کرنے میں ان حضرات کی متابعت کی ہے۔ [صحيح البخاري/كتاب الأدب/حدیث: 5992]

حضرت ام خالد بنت سعید رضی اللہ عنہا سے روایت ہے، انہوں نے کہا: ”میں اپنے والد کے ہمراہ رسول اللہ صلی اللہ علیہ وسلم کی خدمت میں حاضر ہوئی جبکہ میں نے زرد رنگ کی قمیض پہن رکھی تھی۔ رسول اللہ صلی اللہ علیہ وسلم نے «سَنَهْ سَنَهْ» کے الفاظ کہے، (راوئ حدیث) عبداللہ نے کہا کہ یہ حبشی زبان میں ”خوب“ کے معنی میں ہے۔ ام خالد بیان کرتی ہیں کہ میں مہر نبوت سے کھیلنے لگی تو میرے والد گرامی نے مجھے ڈانٹ پلائی لیکن رسول اللہ صلی اللہ علیہ وسلم نے فرمایا: ”اسے کھیلنے دو۔“ پھر رسول اللہ صلی اللہ علیہ وسلم نے فرمایا: ”تو ایک زمانے تک زندہ رہے، اللہ تعالیٰ تیری عمر لمبی کرے، تمہاری زندگی دراز ہو۔“ عبداللہ بن مبارک نے کہا کہ انہوں نے بہت طویل عمر پائی حتیٰ کہ لوگوں میں ان کا چرچا ہونے لگا۔“ [صحيح البخاري/كتاب الأدب/حدیث: 5993]

ابن ابی نعم سے روایت ہے، انہوں نے کہا: میں اس وقت حضرت عبداللہ بن عمر رضی اللہ عنہ کے پاس موجود تھا جبکہ ایک آدمی نے ان سے مچھر مارنے کے متعلق سوال کیا۔ حضرت ابن عمر رضی اللہ عنہ نے پوچھا: ”تم کہاں کے ہو؟“ اس نے بتایا: عراق کا باشندہ ہوں۔ انہوں نے فرمایا: ”اس شخص کو دیکھو، مچھر مارنے کے متعلق سوال کرتا ہے حالانکہ ان لوگوں نے نبی صلی اللہ علیہ وسلم کے نواسے کو شہید کر ڈالا جبکہ میں نے خود نبی صلی اللہ علیہ وسلم سے سنا، آپ صلی اللہ علیہ وسلم فرما رہے تھے: «هُمَا رَيْحَانَتَايَ مِنَ الدُّنْيَا» ”حسن اور حسین رضی اللہ عنہما دونوں دنیا میں میرے دو پھول ہیں۔““ [صحيح البخاري/كتاب الأدب/حدیث: 5994]

نبی صلی اللہ علیہ وسلم کی زوجہ محترمہ حضرت عائشہ رضی اللہ عنہا سے روایت ہے، انہوں نے کہا کہ میرے پاس ایک عورت آئی جس کے ساتھ دو بچیاں تھیں، وہ مجھ سے کچھ مانگ رہی تھی۔ اس نے ایک کھجور کے علاوہ میرے پاس کچھ نہ پایا، چنانچہ میں نے اسے وہی ایک کھجور دے دی۔ اس نے وہ کھجور انہی دونوں کے درمیان تقسیم کر دی، پھر اٹھ کر چلی گئی، اس کے بعد نبی صلی اللہ علیہ وسلم تشریف لائے تو میں نے آپ سے سارا ماجرا بیان کیا، آپ نے فرمایا: ”جو شخص بھی ان بیٹیوں کی پرورش کرے گا اور ان کے ساتھ اچھا برتاؤ کرے گا تو یہ اس کے لیے جہنم کی آگ سے بچاؤ کا ذریعہ بن جائیں گی۔“ [صحيح البخاري/كتاب الأدب/حدیث: 5995]

حضرت ابو قتادہ رضی اللہ عنہ سے روایت ہے، انہوں نے کہا کہ: ”ایک مرتبہ نبی صلی اللہ علیہ وسلم ہمارے پاس تشریف لائے تو حضرت امامہ بنت ابی العاص رضی اللہ عنہا آپ کے شانے مبارک پر تھیں، پھر آپ نے نماز ادا فرمائی، جب رکوع کرتے تو اسے اتار دیتے اور جب کھڑے ہوتے تو اسے اٹھا لیتے۔“ [صحيح البخاري/كتاب الأدب/حدیث: 5996]

حضرت ابو ہریرہ رضی اللہ عنہ سے روایت ہے، انہوں نے کہا کہ رسول اللہ صلی اللہ علیہ وسلم نے حضرت حسن بن علی رضی اللہ عنہما کا بوسہ لیا جبکہ آپ کے پاس حضرت اقرع بن حابس تمیمی رضی اللہ عنہ بھی بیٹھے ہوئے تھے، حضرت اقرع رضی اللہ عنہ نے کہا: ”میرے دس بیٹے ہیں، میں نے ان میں کبھی کسی کا بوسہ نہیں لیا۔“ رسول اللہ صلی اللہ علیہ وسلم نے ان کی طرف دیکھا، پھر فرمایا: ”جو کسی پر رحم نہیں کرتا اس پر رحم نہیں کیا جاتا۔“ [صحيح البخاري/كتاب الأدب/حدیث: 5997]