سیدنا انس بن مالک رضی اللہ عنہ کہتے ہیں کہ رسول اللہ صلی اللہ علیہ وسلم نے فرمایا: ”مجھ پر میری امت کے اجر و ثواب پیش کیے گئے، یہاں تک وہ تنکا بھی جسے کوئی آدمی مسجد سے باہر نکال ڈالتا ہے، اور مجھ پر میری امت کے گناہ پیش کیے گئے تو میں نے اس سے بڑا کوئی گناہ نہیں دیکھا کہ کوئی شخص کوئی آیت یا سورت دیا گیا ہو پھر اس نے اسے بھلا دیا ہو۔“ [معجم صغير للطبراني/كتاب التفسير و فضائل القرآن/حدیث: 1108]

سیدنا ابوہریرہ رضی اللہ عنہ کہتے ہیں کہ رسول اللہ صلی اللہ علیہ وسلم نے فرمایا: ”قرآن میں جھگڑا کرنا کفر ہے۔“ [معجم صغير للطبراني/كتاب التفسير و فضائل القرآن/حدیث: 1109]

سیدنا ابن بن کعب رضی اللہ عنہ کہتے ہیں: اللہ تعالیٰ کے اس فرمان ﴿سِيمَاهُمْ فِي وُجُوهِهِمْ مِنْ أَثَرِ السُّجُودِ﴾ ”ان کی پہچان ان کے چہروں پر سجدے کے نشان سے ہو گی۔“ کے متعلق رسول اللہ صلی اللہ علیہ وسلم کا یہ ارشاد ہے کہ ”اس سے مراد قیامت کے روز نور اور روشنی ہو گی۔“ [معجم صغير للطبراني/كتاب التفسير و فضائل القرآن/حدیث: 1110]

سیدنا ابوسعید خدری رضی اللہ عنہ کہتے ہیں: نبی صلی اللہ علیہ وسلم سے اصحاب اعراف کے متعلق پوچھا گیا تو آپ صلی اللہ علیہ وسلم نے فرمایا: ”وہ لوگ ایسے ہوں گے کہ وہ اللہ کی راہ میں شہید ہو جائیں گے مگر وہ اپنے باپوں کے نافرمان ہوں گے، تو شہادت نے انہیں جہنم میں جانے سے روک دیا، اور ماں باپ کی نافرمانی نے انہیں جنت سے روک دیا، تو وہ جنت اور جہنم کے درمیان ایک دیوار پر ہوں گے، تو جب ان کے گوشت اور چربیاں پگھل جائیں گی اور اللہ تعالیٰ مخلوقات کے حساب سے فارغ ہو جائیں گے، تو جب بغیر حساب والا کوئی نہ باقی ہو گا تو اللہ تعالیٰ انہیں اپنی رحمت میں ڈھانپ لے گا اور اپنی رحمت سے جنت میں داخل کر دے گا۔“ [معجم صغير للطبراني/كتاب التفسير و فضائل القرآن/حدیث: 1111]

سیدنا براء بن عازب رضی اللہ عنہ کہتے ہیں: نبی صلی اللہ علیہ وسلم نے آیت: ﴿قَدْ جَعَلَ رَبُّكِ تَحْتَكِ سَرِيًّا﴾ کے متعلق فرمایا: ”اس میں نہر مراد ہے۔“ [معجم صغير للطبراني/كتاب التفسير و فضائل القرآن/حدیث: 1112]

سیدہ ام سلمہ رضی اللہ عنہا کہتی ہیں: میں نے نبی کریم صلی اللہ علیہ وسلم کو یہ فرماتے ہوئے سنا ہے: ”علی (رضی اللہ عنہ) قرآن کے ساتھ ہے، اور قرآن علی کے ساتھ ہے، یہ دونوں الگ الگ نہیں ہو سکتے یہاں تک کہ میرے پاس حوض پر آ جائیں گے۔“ [معجم صغير للطبراني/كتاب التفسير و فضائل القرآن/حدیث: 1113]

سیدنا علی رضی اللہ عنہ اللہ تعالیٰ کے اس فرمان: ﴿إِنَّمَا أَنْتَ مُنْذِرٌ وَلِكُلِّ قَوْمٍ هَادٍ﴾ (الرعد: 7) ”تم صرف ڈرانے والے ہو، اور ہر قوم کے لیے ایک ہدایت دینے والا ہے۔“ کے متعلق فرماتے ہیں کہ رسول اللہ صلی اللہ علیہ وسلم فرماتے ہیں: ”منذر اور ہاد بنو ہاشم کا ایک آدمی تھا۔“ [معجم صغير للطبراني/كتاب التفسير و فضائل القرآن/حدیث: 1114]

سیدنا ابن عباس رضی اللہ عنہما کہتے ہیں: قریش نے نبی صلی اللہ علیہ وسلم کو اتنا مال دینے کی پیشکش کی کہ وہ مکہ کے امیر ترین بن جائیں، اور جس عورت سے آپ چاہیں آپ کے ساتھ اس کا نکاح کر دیتے ہیں، اور ہمیشہ آپ کے پیچھے پیچھے چلیں گے، تو کہنے لگے: اے محمد! ہم آپ کو یہ سب کچھ دیتے ہیں اگر ہمارے معبودوں کو برا بھلا کہنے سے باز آ جائیں، انہیں گالیاں نہ دیں، اگر آپ یہ بات ناپسند کرتے ہیں تو ہم آپ پر ایک ضروری بات لازم کرتے ہیں جس میں آپ کی بھی بھلائی ہے۔ آپ صلی اللہ علیہ وسلم نے پوچھا: ”وہ کیا ہے؟“ وہ کہنے لگے: ایک سال آپ ہمارے بتوں لات اور عزیٰ کی بندگی کریں، اور ایک سال ہم آپ کے معبود کی پرستش کرتے ہیں۔ آپ صلی اللہ علیہ وسلم نے فرمایا: ”میں دیکھتا ہوں میرا رب مجھے کیا فرماتا ہے؟“ تو اللہ تعالیٰ کی طرف سے لوح محفوظ سے وحی آ گئی: ﴿قُلْ يَا أَيُّهَا الْكَافِرُونَ﴾ آخر سورت تک، نیز یہ آیت بھی نازل ہوئی: ﴿قُلْ أَفَغَيْرَ اللّٰهِ تَأْمُرُونِّي أَعْبُدُ أَيُّهَا الْجَاهِلُونَ﴾ ... ﴿بَلِ اللّٰهَ فَاعْبُدْ وَكُنْ مِنَ الشَّاكِرِينَ﴾ (الزمر: 64، 66) یعنی ”کہہ دیں کہ اے جاہلو! کیا تم مجھے یہ کہتے ہو کہ میں اللہ کو چھوڑ کر کسی دوسرے کی پرستش کرنے لگوں، بلکہ اللہ کی بندگی کرو اور اللہ تعالیٰ کے شکر گزار بن جاؤ۔“ [معجم صغير للطبراني/كتاب التفسير و فضائل القرآن/حدیث: 1115]

سیدنا انس بن مالک رضی اللہ عنہ کہتے ہیں: جب حجاب کی آیت نازل ہوئی تو سب سے پہلے مجھے اس کا علم ہوا، مجھے رسول اللہ صلی اللہ علیہ وسلم نے فرمایا: ”عورتوں کے پاس نہ جایا کرو“، تو اس دن سے زیادہ مشکل دن مجھ پر کبھی نہیں آیا۔ [معجم صغير للطبراني/كتاب التفسير و فضائل القرآن/حدیث: 1116]

سیدنا ابن عباس رضی اللہ عنہما ﴿وَمَا كَانَ لِنَبِيٍّ أَنْ يَغُلَّ﴾ ”اور کسی نبی کا یہ حق نہیں کہ وہ خیانت کرے۔“ پڑھنے سے انکار کرتے تھے، اور کہتے: یہ کیسے ہو سکتا ہے کہ ان کو جکڑا نہ جائے، حالانکہ انہیں تو قتل بھی کیا جاتا تھا، چنانچہ اللہ تعالیٰ فرماتے ہیں: ﴿وَيَقْتُلُونَ الْأَنْبِيَاءَ بِغَيْرِ حَقٍّ﴾ یعنی ”وہ نبیوں کو ناحق مار ڈالتے تھے۔“ بلکہ منافقوں نے نبی صلی اللہ علیہ وسلم کو غنیمتوں میں سے چوری کی تہمت لگائی، تب اللہ تعالیٰ نے یہ آیت نازل فرمائی: ﴿وَمَا كَانَ لِنَبِيٍّ أَنْ يَغُلَّ﴾ یعنی ”کسی نبی کی یہ شان نہیں کہ وہ خیانت کرے۔“ [معجم صغير للطبراني/كتاب التفسير و فضائل القرآن/حدیث: 1117]