سیدنا عبداللہ بن ابی اوفی رضی اللہ عنہ بیان کرتے ہیں کہ رسول اللہ صلی اللہ علیہ وسلم جب رکوع سے اپنا سر اٹھاتے تھے تو فرماتے: «سَمِعَ اللّٰهُ لِمَنْ حَمِدَهُ» ”اللہ نے اس کو سن لیا جس نے اس کی تعریف کی!“ «اللّٰهُمَّ رَبَّنَا لَكَ الْحَمْدُ مِلْءَ السَّمَاوَاتِ وَمِلْءَ الْأَرْضِ وَمِلْءَ مَا شِئْتَ مِنْ شَيْءٍ بَعْدُ» ”اے اللہ! اے ہمارے رب! تیری ہی تعریف ہے (اس قدر کہ) اس سے سب آسمان بھر جائیں، زمین بھر جائے اور ان کے علاوہ جو تو چاہے، اس کے بھرنے کے برابر۔“ امام ابوداؤد رحمہ اللہ نے کہا: سفیان ثوری رحمہ اللہ اور شعبہ بن حجاج رحمہ اللہ نے عبید ابوالحسن سے بیان کیا کہ اس حدیث میں ”رکوع کے بعد“ کا ذکر نہیں ہے۔ سفیان رحمہ اللہ کہتے ہیں کہ ہم نے اس کے بعد الشیخ عبید ابوالحسن سے ملاقات کی تو انہوں نے اس روایت میں ”بعد رکوع“ کا ذکر نہیں کیا۔ امام ابوداؤد رحمہ اللہ نے کہا: جبکہ شعبہ رحمہ اللہ نے ابوعصمہ سے، انہوں نے اعمش سے، انہوں نے عبید سے روایت کیا ہے تو انہوں نے «بَعْدَ الرُّكُوعِ» کا ذکر کیا ہے۔ [سنن ابي داود/أبواب تفريع استفتاح الصلاة /حدیث: 846]