سیدہ عائشہ رضی اللہ عنہا سے روایت ہے کہ لوگوں نے عرض کی: ”اے اللہ کے رسول صلی اللہ علیہ وسلم ! دیہاتی لوگ ہمارے پاس گوشت لے کر آتے ہیں اور ہمیں یہ معلوم نہیں ہوتا کہ انہوں نے (ذبح کے وقت) اس پر اللہ کا نام لیا ہے یا نہیں؟“ تو آپ صلی اللہ علیہ وسلم نے ارشاد فرمایا: ”تم خود اس پر اللہ کا نام لو اور اسے کھا لو۔“ [مسند أبي يعلى الموصلي/مُسْنَدُ عَائِشَةَ/حدیث: 4447]

شریح رحمہ اللہ سے روایت ہے کہ انہوں نے سیدہ عائشہ رضی اللہ عنہا سے دریافت کیا: ”کیا رسول اللہ صلی اللہ علیہ وسلم چٹائی پر نماز پڑھا کرتے تھے؟ کیونکہ میں نے اللہ تعالیٰ کی کتاب میں یہ پڑھا ہے: ﴿وَجَعَلْنَا جَهَنَّمَ لِلْكَافِرِينَ حَصِيرًا﴾ (اور ہم نے جہنم کو کافروں کے لیے قید خانہ بنا دیا ہے)۔“ تو انہوں نے جواب دیا: ”آپ صلی اللہ علیہ وسلم اس پر نماز نہیں پڑھا کرتے تھے۔“ [مسند أبي يعلى الموصلي/مُسْنَدُ عَائِشَةَ/حدیث: 4448]

سیدہ عائشہ رضی اللہ عنہا سے روایت ہے کہ ”نبی اکرم صلی اللہ علیہ وسلم (بسا اوقات) ہانڈی کے پاس سے گزرتے تو اس میں سے ہڈی (جس پر کچھ گوشت لگا ہوتا) اٹھا کر اسے تناول فرماتے، پھر آپ صلی اللہ علیہ وسلم نماز ادا فرماتے اور (آگ پر پکی ہوئی چیز کھانے کی وجہ سے دوبارہ) وضو نہیں فرماتے تھے۔“ [مسند أبي يعلى الموصلي/مُسْنَدُ عَائِشَةَ/حدیث: 4449]

ام المؤمنین سیدہ عائشہ رضی اللہ عنہا سے روایت ہے، غنیہ بنت الرضی رحمہ اللہ بیان کرتی ہیں کہ میں قبیلہ عبد القیس کی چند خواتین کے ہمراہ سیدہ عائشہ رضی اللہ عنہا کی خدمت میں حاضر ہوئی، پھر ہم نے ان سے نبیذ کے متعلق دریافت کیا تو انہوں نے فرمایا: «لَا نَفَعَكُنَّ اللَّهُ يَا عَبْدَ الْقَيْسِ بِالنَّبِيذِ» ”اے عبد القیس والو! اللہ تمہیں نبیذ کے ذریعے نفع نہ پہنچائے“، (پھر فرمایا کہ) ”رسول اللہ صلی اللہ علیہ وسلم نے حنتم (سبز مٹکے)، دباء (کدو کے برتن) اور نقیر (لکڑی کے کھدے ہوئے برتن) کے استعمال سے منع فرمایا ہے“، نیز سیدہ عائشہ رضی اللہ عنہا نے فرمایا: ”البتہ تم چمڑے کے ہر اس برتن میں (نبیذ) پی لیا کرو جس کا تم منہ بند کر سکو یا جسے تم لٹکا سکو“۔ [مسند أبي يعلى الموصلي/مُسْنَدُ عَائِشَةَ/حدیث: 4450]

سیدہ عائشہ رضی اللہ عنہا سے روایت ہے کہ میں (اپنے والد) سیدنا ابوبکر رضی اللہ عنہ کے پاس آئی تو میں نے ان پر نزع کی کیفیت دیکھی، اس پر میں نے (رنج و غم کے عالم میں یہ شعر) کہا: ”ہائے افسوس! جس شخص کے آنسو ابھی رکے ہوئے ہیں، وہ عنقریب (موت کی شدت سے) بہہ نکلیں گے“، تو انہوں نے فرمایا: ”ایسا نہ کہو، بلکہ یہ آیت پڑھو: ﴿وَجَاءَتْ سَكْرَةُ الْمَوْتِ بِالْحَقِّ ذَلِكَ مَا كُنْتَ مِنْهُ تَحِيدُ﴾ (اور موت کی غشی برحق آ پہنچی، یہی وہ چیز ہے جس سے تو کتراتا تھا)“، پھر انہوں نے پوچھا: ”رسول اللہ صلی اللہ علیہ وسلم کی وفات کس دن ہوئی تھی؟“ میں نے کہا: ”پیر کے دن“، تو انہوں نے فرمایا: ”مجھے بھی (اپنی وفات کی) امید آج دن اور رات کے درمیانی وقت تک ہے“، راوی (عروہ بن زبیر رحمہ اللہ) کہتے ہیں کہ پھر ان کی وفات منگل کی رات ہونے تک نہ ہوئی اور انہیں صبح ہونے سے پہلے ہی دفن کر دیا گیا، سیدہ عائشہ رضی اللہ عنہا فرماتی ہیں کہ اس سے پہلے انہوں نے دریافت کیا تھا: ”رسول اللہ صلی اللہ علیہ وسلم کو کتنے کپڑوں میں کفن دیا گیا تھا؟“ میں نے کہا: ”تین سفید سہولی کپڑوں میں، جن میں نہ قمیص تھی اور نہ ہی عمامہ“، پھر انہوں نے اپنے اس کپڑے کی طرف دیکھا جس میں وہ بیماری کے دوران تیمار داری کیے جا رہے تھے اور اس پر زعفران یا گیرو کے نشانات تھے، تو انہوں نے فرمایا: ”میرے اس کپڑے کو دھو لینا اور اس کے ساتھ دو کپڑے مزید ملا کر مجھے اسی میں کفن دے دینا“، میں نے عرض کیا: ”یہ تو پرانا (بوسیدہ) ہے“، تو انہوں نے فرمایا: ”زندہ شخص نئے کپڑے کا مردے سے زیادہ حق دار ہے، کفن تو محض (جسم سے نکلنے والی) پیپ اور رطوبت کے لیے ہوتا ہے“۔ [مسند أبي يعلى الموصلي/مُسْنَدُ عَائِشَةَ/حدیث: 4451]

سیدہ عائشہ رضی اللہ عنہا سے روایت ہے کہ انہوں نے فرمایا: ”میں نے رسول اللہ صلی اللہ علیہ وسلم کو کبھی اپنے اوپر کیے گئے کسی ظلم کا بدلہ لیتے ہوئے نہیں دیکھا، بجز اس کے کہ اللہ تعالیٰ کی حرام کردہ حدود میں سے کسی چیز کی بے حرمتی کی جائے، چنانچہ جب اللہ کی محارم میں سے کسی چیز کی پامالی ہوتی تو آپ صلی اللہ علیہ وسلم اس پر سب سے زیادہ جلال فرمانے والے ہوتے، اور آپ صلی اللہ علیہ وسلم کو جب بھی دو معاملوں کے درمیان اختیار دیا گیا تو آپ صلی اللہ علیہ وسلم نے ان میں سے ہمیشہ آسان صورت ہی کو پسند فرمایا۔“ [مسند أبي يعلى الموصلي/مُسْنَدُ عَائِشَةَ/حدیث: 4452]

سیدہ عائشہ رضی اللہ عنہا سے روایت ہے کہ میں نے رسول اللہ صلی اللہ علیہ وسلم کو یہ فرماتے ہوئے سنا: ”قیامت کے دن جس کسی کا بھی محاسبہ کیا گیا وہ ہلاک ہو گیا،“ میں نے عرض کی: اے اللہ کے رسول! کیا اللہ تعالیٰ (قرآنِ کریم میں) یہ نہیں فرماتا: ﴿يُحَاسَبُ حِسَابًا يَسِيرًا﴾ ”عنقریب اس سے آسان حساب لیا جائے گا،“ اس پر آپ صلی اللہ علیہ وسلم نے ارشاد فرمایا: ”اے عائشہ! اس سے مراد تو محض (اعمال کی) پیشی ہے، لیکن جس شخص کے حساب میں جرح و باریک بینی کی گئی وہ تو ہلاک ہو گیا۔“ [مسند أبي يعلى الموصلي/مُسْنَدُ عَائِشَةَ/حدیث: 4453]

سیدہ عائشہ رضی اللہ عنہا سے روایت ہے کہ نبی کریم صلی اللہ علیہ وسلم نے ارشاد فرمایا: ”جس شخص نے اس کے خلاف بددعا کی جس نے اس پر ظلم کیا تھا—یا آپ صلی اللہ علیہ وسلم نے فرمایا: ظالم کے خلاف بددعا کی—تو یقیناً اس نے (اپنا) انتقام لے لیا (یعنی اپنا حق وصول کر لیا)۔“ [مسند أبي يعلى الموصلي/مُسْنَدُ عَائِشَةَ/حدیث: 4454]

عبداللہ بن ابی ملیکہ رحمہ اللہ بیان کرتے ہیں کہ میں نے سیدہ عائشہ رضی اللہ عنہا کو فرماتے ہوئے سنا کہ میں نے رسول اللہ صلی اللہ علیہ وسلم کو اپنے صحابہ کے درمیان تشریف فرما ہوتے ہوئے یہ ارشاد فرماتے سنا: ”میں حوضِ کوثر پر تمہارا پیش رو (پہلے پہنچنے والا) ہوں گا اور میں وہاں تم میں سے وارد ہونے والوں کا انتظار کروں گا، پس اللہ کی قسم! کچھ لوگ مجھ تک پہنچنے سے پہلے ہی روک دیے جائیں گے، تو میں عرض کروں گا: «رَبِّ، مِنِّي وَمِنْ أُمَّتِي» ”اے میرے رب! یہ مجھ سے ہیں اور میری امت میں سے ہیں“، تو جواباً کہا جائے گا: بے شک آپ نہیں جانتے کہ انہوں نے آپ کے بعد دین میں کیا کیا نئے فتنے اور تبدیلیاں پیدا کی تھیں، یہ لوگ تو مسلسل اپنے الٹے پاؤں (دین سے) پھرتے رہے۔“ [مسند أبي يعلى الموصلي/مُسْنَدُ عَائِشَةَ/حدیث: 4455]

سیدہ عائشہ رضی اللہ عنہا سے روایت ہے کہ ”نبی اکرم صلی اللہ علیہ وسلم نے مدینہ منورہ میں سیدنا ابن ام مکتوم رضی اللہ عنہ کو اپنا جانشین مقرر فرمایا تھا تاکہ وہ لوگوں کو نماز پڑھائیں۔“ [مسند أبي يعلى الموصلي/مُسْنَدُ عَائِشَةَ/حدیث: 4456]