سیدنا عیاض بن حمار مجاشعی رضی اللہ عنہ بیان کرتے ہیں: ”میں نے رسول اللہ صلی اللہ علیہ وسلم کو ایک تحفہ پیش کیا تو آپ صلی اللہ علیہ وسلم نے مجھ سے پوچھا: ”کیا تم مسلمان ہو چکے ہو؟“ میں نے عرض کیا: ”نہیں۔“ تو آپ صلی اللہ علیہ وسلم نے فرمایا: ”مجھے مشرکوں کا ہدیہ قبول کرنے سے منع کیا گیا ہے۔“ چنانچہ آپ صلی اللہ علیہ وسلم نے وہ تحفہ واپس کر دیا۔“ [المعجم الأوسط/بَابُ الْأَلِفِ/حدیث: 2524]

اسی سند سے روایت ہے کہ نبی کریم صلی اللہ علیہ وسلم نے فرمایا: ”باہم گالی گلوچ کرنے والے دونوں آدمی جو کچھ کہیں، اس کا گناہ ابتدا کرنے والے پر ہوتا ہے، الا یہ کہ مظلوم حد سے تجاوز کر جائے۔“ [المعجم الأوسط/بَابُ الْأَلِفِ/حدیث: 2525]

سیدنا عیاض بن حمار رضی اللہ عنہ بیان کرتے ہیں کہ میں نے عرض کیا: ”اے اللہ کے رسول! ایک آدمی مجھے گالی دیتا ہے، تو کیا میں بھی اسے گالی دوں؟“ تو رسول اللہ صلی اللہ علیہ وسلم نے فرمایا: ”آپس میں گالی گلوچ کرنے والے دونوں شیطان ہیں، جو ایک دوسرے کے ساتھ بیہودہ گوئی کرتے اور ایک دوسرے سے جھوٹ بولتے ہیں۔“ [المعجم الأوسط/بَابُ الْأَلِفِ/حدیث: 2526]

سیدنا زید بن ثابت رضی اللہ عنہ سے روایت ہے کہ نبی کریم صلی اللہ علیہ وسلم نے یمن کی طرف رخ کر کے دیکھا اور دعا فرمائی: «اللَّهُمَّ أَقْبِلْ بِقُلُوبِهِمْ، وَبَارِكْ لَنَا فِي صَاعِنَا وَمُدِّنَا» ”اے اللہ! ان (اہلِ یمن) کے دلوں کو (ہماری طرف) پھیر دے اور ہمارے صاع اور مد (پیمانوں) میں ہمارے لیے برکت عطا فرما۔“ [المعجم الأوسط/بَابُ الْأَلِفِ/حدیث: 2527]

سیدنا معاویہ لیثی رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”لوگ قحط زدہ حالت میں صبح کرتے ہیں، پھر اللہ تعالیٰ اپنے پاس سے انہیں رزق عطا فرماتا ہے، تو وہ مشرک ہو کر صبح کرتے ہیں، کہتے ہیں: ہم پر فلاں فلاں ستارے (کے طلوع و غروب) کی وجہ سے بارش ہوئی ہے۔“ [المعجم الأوسط/بَابُ الْأَلِفِ/حدیث: 2528]

سیدنا عبداللہ بن مسعود رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”حقیر سمجھے جانے والے (چھوٹے چھوٹے) اعمال (گناہوں) سے بچو، کیونکہ وہ آدمی پر جمع ہوتے رہتے ہیں یہاں تک کہ اسے ہلاک کر دیتے ہیں۔“ رسول اللہ صلی اللہ علیہ وسلم نے ان کی مثال بیان فرمائی کہ جیسے کچھ لوگ ایک بیابان زمین میں اترے، پھر کھانا تیار کرنے کا وقت آ پہنچا، تو ہر آدمی کوئی چیز لے کر آنے لگا اور کوئی آدمی چھوٹی سی لکڑی لے کر آیا، یہاں تک کہ انہوں نے اس طرح ایک بڑا ڈھیر جمع کر لیا، پھر انہوں نے آگ بھڑکائی تو اس نے ان تمام چیزوں کو پکا ڈالا جو اس میں ڈالی گئی تھیں۔ [المعجم الأوسط/بَابُ الْأَلِفِ/حدیث: 2529]

سیدنا عبداللہ بن مسعود رضی اللہ عنہ بیان کرتے ہیں کہ رسول اللہ صلی اللہ علیہ وسلم خطبے میں یہ کلمات فرمایا کرتے تھے: «الْحَمْدُ لِلهِ نَسْتَعِينُهُ وَنَسْتَغْفِرُهُ، وَنَعُوذُ بِاللهِ مِنْ شُرُورِ أَنْفُسِنَا، مَنْ يَهْدِهِ اللهُ فَلَا مُضِلَّ لَهُ، وَمَنْ يُضْلِلْ فَلَا هَادِيَ لَهُ، وَأَشْهَدُ أَنْ لَا إِلَهَ إِلَّا اللهُ، وَأَشْهَدُ أَنَّ مُحَمَّدًا عَبْدُهُ وَرَسُولُهُ، مَنْ يُطِعِ اللهَ وَرَسُولَهُ فَقَدْ رَشَدَ، وَمَنْ يَعْصِهِمَا فَإِنَّمَا يَضُرُّ نَفْسَهُ، وَلَنْ يَضُرَّ اللهَ شَيْئًا» ”تمام تعریف اللہ کے لیے ہے، ہم اسی سے مدد مانگتے ہیں اور اسی سے بخشش طلب کرتے ہیں، اور ہم اپنے نفسوں کی شرارتوں سے اللہ کی پناہ چاہتے ہیں۔ جسے اللہ ہدایت دے اسے کوئی گمراہ کرنے والا نہیں، اور جسے وہ گمراہ کر دے اسے کوئی ہدایت دینے والا نہیں۔ اور میں گواہی دیتا ہوں کہ اللہ کے سوا کوئی معبود نہیں، اور میں گواہی دیتا ہوں کہ محمد صلی اللہ علیہ وسلم اس کے بندے اور رسول ہیں۔ جو اللہ اور اس کے رسول کی اطاعت کرے وہ ہدایت پا گیا، اور جو ان دونوں کی نافرمانی کرے تو وہ صرف اپنا ہی نقصان کرتا ہے اور اللہ کو ہرگز کچھ نقصان نہیں پہنچا سکتا۔“
امام طبرانی رحمہ اللہ فرماتے ہیں: ”ان احادیث کو قتادہ سے عمران کے سوا کسی نے روایت نہیں کیا۔“ [المعجم الأوسط/بَابُ الْأَلِفِ/حدیث: 2530]

سیدنا ابو موسیٰ اشعری رضی اللہ عنہ سے روایت ہے کہ رسول اللہ صلی اللہ علیہ وسلم جب کسی قوم سے خوف محسوس کرتے تو یہ دعا فرماتے: «اللَّهُمَّ إِنَّا نَجْعَلُكَ فِي نُحُورِهِمْ وَنَعُوذُ بِكَ مِنْ شُرُورِهِمْ» ”اے اللہ! ہم تجھے ان کے مقابل کر دیتے ہیں اور ان کے شر سے تیری پناہ چاہتے ہیں۔“ [المعجم الأوسط/بَابُ الْأَلِفِ/حدیث: 2531]

سیدنا ابوہریرہ رضی اللہ عنہ سے روایت ہے کہ نبی کریم صلی اللہ علیہ وسلم نے فرمایا: ”جنت کی (عمارت) ایک اینٹ سونے کی اور ایک اینٹ چاندی کی ہے۔“ [المعجم الأوسط/بَابُ الْأَلِفِ/حدیث: 2532]

سیدنا ابوہریرہ رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”جب اللہ تعالیٰ نے سیدنا ایوب علیہ السلام کو شفا عطا فرمائی تو ان پر سونے کی ٹڈیاں برسائیں، وہ انہیں اپنے ہاتھ سے پکڑ کر اپنے کپڑے میں ڈالنے لگے، تو ان سے کہا گیا: ”اے ایوب! کیا آپ سیر نہیں ہوئے؟“ انہوں نے عرض کیا: ”تیری رحمت سے بھلا کون سیر ہو سکتا ہے!““
امام طبرانی رحمہ اللہ فرماتے ہیں: ”اس حدیث کو قتادہ سے صرف ہمام نے روایت کیا ہے۔“ [المعجم الأوسط/بَابُ الْأَلِفِ/حدیث: 2533]