سیدنا عبداللہ بن عمرو رضی اللہ عنہما سے روایت ہے کہ رسول اللہ صلی اللہ علیہ وسلم نے فرمایا: ”جو شخص اپنے مال کی حفاظت میں مارا جائے وہ شہید ہے۔“
امام طبرانی رحمہ اللہ فرماتے ہیں: ”یزید بن ابی حبیب سے یہ حدیث ابن لہیعہ کے سوا کسی نے روایت نہیں کی۔“ [المعجم الأوسط/بَابُ الْمِيمِ/حدیث: 8700]

سیدنا ابو ذر رضی اللہ عنہ بیان کرتے ہیں کہ رسول اللہ صلی اللہ علیہ وسلم نے فرمایا: ”تم عنقریب ایک ایسی سرزمین فتح کرو گے جس میں ’قیراط‘ کا ذکر کیا جاتا ہے، تو وہاں کے باشندوں کے ساتھ حسنِ سلوک کی وصیت قبول کرنا، کیونکہ ان کے لیے عہد و ذمہ بھی ہے اور رشتہ داری بھی۔ پھر جب تم دو آدمیوں کو ایک اینٹ کی جگہ پر لڑتے جھگڑتے دیکھو تو وہاں سے نکل جانا۔“
امام طبرانی رحمہ اللہ فرماتے ہیں: ”یہ حدیث ابو ذر رضی اللہ عنہ سے صرف اسی سند سے مروی ہے، اس میں حرملہ بن عمران منفرد ہیں۔“ [المعجم الأوسط/بَابُ الْمِيمِ/حدیث: 8701]

سیدنا عبداللہ بن عمر رضی اللہ عنہما بیان کرتے ہیں: ”ہم رسول اللہ صلی اللہ علیہ وسلم کے صحابہ کے درمیان فضیلت کا درجہ بیان کیا کرتے تھے، چنانچہ ہم کہتے: ابوبکر، پھر عمر، پھر عثمان رضی اللہ عنہم، پھر باقی لوگ برابر ہیں۔ یہ بات رسول اللہ صلی اللہ علیہ وسلم تک پہنچتی تو آپ صلی اللہ علیہ وسلم ہم پر اس کی تردید نہ فرماتے۔“
امام طبرانی رحمہ اللہ فرماتے ہیں: ”نافع سے یہ حدیث روایت کرنے والوں میں سے بکیر کے سوا کسی نے یہ نہیں کہا کہ پھر یہ بات رسول اللہ صلی اللہ علیہ وسلم تک پہنچتی اور آپ صلی اللہ علیہ وسلم ہم پر اس کا انکار نہ فرماتے۔“ [المعجم الأوسط/بَابُ الْمِيمِ/حدیث: 8702]

سیدنا ابن عباس رضی اللہ عنہما، سیدنا ابوہریرہ رضی اللہ عنہ سے روایت کرتے ہیں کہ رسول اللہ صلی اللہ علیہ وسلم نے فرمایا: ”بدکار عورت کی کمائی حرام ہے اور کتے کی قیمت بھی حرام ہے، سوائے شکاری کتے کے۔“
امام طبرانی رحمہ اللہ فرماتے ہیں: ” «سوائے شکاری کتے کے» کے یہ الفاظ صرف اسی حدیث میں مروی ہیں، اس کی روایت میں مثنیٰ بن صباح منفرد ہیں۔“ [المعجم الأوسط/بَابُ الْمِيمِ/حدیث: 8703]

سیدنا جابر رضی اللہ عنہما بیان کرتے ہیں: جب احد کے دن لوگ رسول اللہ صلی اللہ علیہ وسلم کے پاس سے بکھر گئے تو آپ صلی اللہ علیہ وسلم کے ساتھ انصار کے گیارہ آدمی اور سیدنا طلحہ بن عبید اللہ رضی اللہ عنہ رہ گئے، اور آپ صلی اللہ علیہ وسلم پہاڑ پر چڑھ رہے تھے کہ مشرکین ان کے قریب آ پہنچے۔ آپ صلی اللہ علیہ وسلم نے فرمایا: ”کیا کوئی نہیں جو ان سے نمٹے؟“ سیدنا طلحہ بن عبید اللہ رضی اللہ عنہ نے عرض کیا: ”اے اللہ کے رسول! میں حاضر ہوں۔“ آپ صلی اللہ علیہ وسلم نے فرمایا: ”طلحہ! تم اپنی جگہ ٹھہرے رہو۔“ تو انصار کا ایک آدمی بولا: ”اے اللہ کے رسول! میں حاضر ہوں۔“ چنانچہ وہ ان سے لڑنے کے لیے آگے بڑھا، اور رسول اللہ صلی اللہ علیہ وسلم اپنے باقی ساتھیوں کے ساتھ اوپر چڑھتے گئے۔ پھر وہ انصاری شہید کر دیے گئے اور مشرکین پھر آپ صلی اللہ علیہ وسلم کے قریب آ پہنچے۔ آپ صلی اللہ علیہ وسلم نے پھر فرمایا: ”کیا کوئی نہیں جو ان سے نمٹے؟“ سیدنا طلحہ رضی اللہ عنہ نے پہلے کی طرح عرض کیا اور رسول اللہ صلی اللہ علیہ وسلم نے بھی انہیں پہلے ہی کی طرح جواب دیا۔ پھر انصار کے ایک اور آدمی نے عرض کیا: ”اے اللہ کے رسول! میں حاضر ہوں۔“ آپ صلی اللہ علیہ وسلم نے اسے اجازت دے دی، تو اس نے بھی اپنے پہلے ساتھی کی طرح جان توڑ کر لڑائی کی، اس دوران رسول اللہ صلی اللہ علیہ وسلم اور آپ کے ساتھی اوپر چڑھتے رہے، پھر وہ بھی شہید ہو گئے اور مشرکین ان کے قریب آ گئے۔ اسی طرح رسول اللہ صلی اللہ علیہ وسلم برابر پہلے والی بات فرماتے رہے، سیدنا طلحہ رضی اللہ عنہ عرض کرتے: ”اے اللہ کے رسول! میں حاضر ہوں“ تو آپ صلی اللہ علیہ وسلم انہیں روک لیتے، اور انصار کا ایک آدمی لڑنے کی اجازت مانگتا تو آپ صلی اللہ علیہ وسلم اسے اجازت دے دیتے اور وہ اپنے پیش رو ساتھیوں کی طرح لڑتا (اور شہید ہو جاتا)، یہاں تک کہ آپ صلی اللہ علیہ وسلم کے ساتھ سیدنا طلحہ رضی اللہ عنہ کے سوا کوئی نہ بچا اور مشرکین نے ان دونوں کو گھیر لیا۔ رسول اللہ صلی اللہ علیہ وسلم نے فرمایا: ”ان کے لیے کون ہے؟“ سیدنا طلحہ رضی اللہ عنہ نے عرض کیا: ”میں ہوں۔“ پھر انہوں نے اپنے سب پیش رو ساتھیوں کی مجموعی لڑائی کے برابر لڑائی کی، اور ان کی بعض انگلیوں کے سرے زخمی ہو گئے تو (درد کے مارے) ان کے منہ سے ”حَسِّ“ نکل گیا۔ رسول اللہ صلی اللہ علیہ وسلم نے فرمایا: ”طلحہ! اگر تم «بِسْمِ اللهِ» کہہ دیتے یا اللہ کا ذکر کر لیتے تو فرشتے تمہیں اٹھا لیتے اور لوگ دیکھتے رہتے، یہاں تک کہ وہ تمہیں لے کر آسمان کی فضا میں داخل ہو جاتے۔“ پھر رسول اللہ صلی اللہ علیہ وسلم اور سیدنا طلحہ رضی اللہ عنہ اوپر چڑھ کر اپنے ساتھیوں کے پاس پہنچ گئے جو وہاں اکٹھے ہو چکے تھے۔
امام طبرانی رحمہ اللہ فرماتے ہیں: ”اس حدیث کو ابو زبیر سے عمارہ بن غزیہ کے سوا کسی نے روایت نہیں کیا، اس کی روایت میں یحییٰ منفرد ہیں۔“ [المعجم الأوسط/بَابُ الْمِيمِ/حدیث: 8704]

سیدنا عقبہ بن عامر رضی اللہ عنہ بیان کرتے ہیں کہ میں نے رسول اللہ صلی اللہ علیہ وسلم کو فرماتے سنا: ”جس نے کسی مسلمان میں کوئی قابلِ ستر عیب دیکھا اور اس پر پردہ ڈال دیا تو گویا اس نے زندہ درگور کی گئی بچی کو اس کی قبر سے زندہ کر دیا۔“
امام طبرانی رحمہ اللہ فرماتے ہیں: ”اس حدیث کو واہب بن عبد اللہ سے عیاش کے سوا کسی نے روایت نہیں کیا، اس کی روایت میں یحییٰ بن ایوب منفرد ہیں۔“ [المعجم الأوسط/بَابُ الْمِيمِ/حدیث: 8705]

سیدنا ابوہریرہ رضی اللہ عنہ سے روایت ہے کہ نبی کریم صلی اللہ علیہ وسلم نے فرمایا: ”میں حق بات ہی کہتا ہوں۔“ تو آپ صلی اللہ علیہ وسلم کے آس پاس کے لوگوں نے عرض کیا: ”اے اللہ کے رسول! آپ ہم سے خوش طبعی فرماتے ہیں؟“ آپ صلی اللہ علیہ وسلم نے فرمایا: ”میں حق بات کے سوا کچھ نہیں کہتا۔“
امام طبرانی رحمہ اللہ فرماتے ہیں: ”اس حدیث کو ابن عجلان سے یحییٰ بن ایوب کے سوا کسی نے روایت نہیں کیا، اس کی روایت میں عبد اللہ بن صالح منفرد ہیں۔“ [المعجم الأوسط/بَابُ الْمِيمِ/حدیث: 8706]

سیدنا مستورد رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”آخرت کے مقابلے میں دنیا کی مثال بس ایسی ہے جیسے تم میں سے کوئی اپنی انگلی سمندر میں ڈالے، پھر اسے نکال لے، پھر دیکھے کہ وہ (سمندر میں سے) کتنا پانی لے کر لوٹی ہے؟“
امام طبرانی رحمہ اللہ فرماتے ہیں: ”اس حدیث کو ابو اسحاق سے عبید اللہ بن زحر کے سوا کسی نے روایت نہیں کیا، اور عبید اللہ سے یحییٰ بن ایوب کے سوا کسی نے روایت نہیں کیا۔“ [المعجم الأوسط/بَابُ الْمِيمِ/حدیث: 8707]

سیدنا عمران بن حصین رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ”آدمی کا اللہ کی راہ میں صف میں کھڑا ہونا ساٹھ سال کی عبادت سے افضل ہے۔“
امام طبرانی رحمہ اللہ فرماتے ہیں: ”ہشام سے اس حدیث کو یحییٰ کے سوا کسی نے روایت نہیں کیا، اس میں عبداللہ منفرد ہیں۔“ [المعجم الأوسط/بَابُ الْمِيمِ/حدیث: 8708]

سیدنا عبداللہ بن عباس رضی اللہ عنہما سے روایت ہے کہ رسول اللہ صلی اللہ علیہ وسلم نے فرمایا: ”اسلام تین سو تیرہ شریعتوں (احکام) پر مشتمل ہے، ان میں سے جو شخص بھی کوئی ایک شریعت لے کر اللہ سے ملے گا تو وہ اس کی بدولت جنت میں داخل ہو گا۔“
امام طبرانی رحمہ اللہ فرماتے ہیں: ”اس حدیث کو حنش سے خالد بن ابی عمران کے سوا کسی نے روایت نہیں کیا، اور نہ خالد سے عبیداللہ کے سوا کسی نے، اس میں یحییٰ بن ایوب منفرد ہیں۔“ [المعجم الأوسط/بَابُ الْمِيمِ/حدیث: 8709]