سیدنا ابوہریرہ رضی اللہ عنہ روایت کرتے ہیں: نبی اکرم صلی اللہ علیہ وسلم نے ارشاد فرمایا ہے: ”اپنی عیدوں کو تکبیر کے ذریعے آراستہ کرو!“۔
یہ روایت امام طبرانی نے معجم صغیر اور معجم اوسط میں نقل کی ہے، اس کی سند میں ایک راوی عمر بن راشد ہے، جسے امام أحمد یحیی بن معین اور امام نسائی رحمہ اللہ نے ضعیف قرار دیا ہے عجلی بیان کرتے ہیں: اس میں کوئی حرج نہیں ہے۔ [مجمع الزاوئد ومنبع الفوائد/أبواب العيدين/حدیث: 3200]

سیدنا شریح بن ابرہہ رضی اللہ عنہ بیان کرتے ہیں: میں نے نبی اکرم صلی اللہ علیہ وسلم کو دیکھا، آپ صلی اللہ علیہ وسلم ایام تشریق میں قربانی کے دن، نماز ظہر سے لے کر منی سے نکلنے تک، ہر فرض نماز کے بعد تکبیر کہا: کرتے تھے۔ شاذکونی بیان کرتے ہیں: اہل مدینہ کا تکبیر کہنے کا طریقہ بھی یہی ہے۔ امام طبرانی نے
یہ روایت معجم اوسط میں نقل کی ہے، اس کی سند میں ایک راوی شرقی بن قطامی ہے، جسے ذکریا ساجی نے ضعیف قرار دیا ہے، ابن حبان نے اس کا تذکرہ کتاب ”الثقات“ میں کیا ہے، ابن عدی نے اس کا ذکر کتاب ”الکامل“ میں کیا ہے۔ [مجمع الزاوئد ومنبع الفوائد/أبواب العيدين/حدیث: 3201]

سیدنا عبداللہ بن مسعود رضی اللہ عنہ کے بارے میں یہ بات منقول ہے: وہ عرفہ کے دن، صبح کی نماز سے لے کر، قربانی کے دن عصر کی نماز تک تکبیر کہا: کرتے تھے۔
یہ روایت امام طبرانی نے معجم کبیر میں نقل کی ہے، اور اس کے رجال کی توثیق کی گئی ہے۔ [مجمع الزاوئد ومنبع الفوائد/أبواب العيدين/حدیث: 3202]

سیدنا عبادہ بن صامت رضی اللہ عنہ نبی اکرم صلی اللہ علیہ وسلم کا یہ فرمان نقل کرتے ہیں: ”جو شخص عیدالفطر کی رات اور عیدالاضحیٰ کی رات عبادت کرتا ہے، اس کا دل اُس دن نہیں مرے گا جب دل مر جائیں گے“۔
یہ روایت امام طبرانی نے معجم کبیر اور معجم اوسط میں نقل کی ہے، اس کی سند میں ایک راوی عمر بن ہارون بلخی ہے، جس پر ضعیف ہونا غالب ہے۔ ابن مہدی اور دیگر حضرات نے اس کی تعریف کی ہے، تاہم ایک بڑی جماعت نے اسے ضعیف قرار دیا ہے، باقی اللہ بہتر جانتا ہے۔ [مجمع الزاوئد ومنبع الفوائد/أبواب العيدين/حدیث: 3203]

محمد بن عبیداللہ، اپنے والد کے حوالے سے، اپنے دادا کے حوالے سے یہ روایت نقل کرتے ہیں: نبی اکرم صلی اللہ علیہ وسلم عیدین کے لئے غسل کرتے تھے۔
یہ روایت امام بزار نے نقل کی ہے، مندل نامی راوی کے بارے میں کلام کیا گیا ہے، اور محمد نامی یہ راوی اور اس سے اوپر کے راویوں سے میں واقف نہیں ہوں۔ [مجمع الزاوئد ومنبع الفوائد/أبواب العيدين/حدیث: 3204]

سیدنا ابوہریرہ رضی اللہ عنہ روایت کرتے ہیں: نبی اکرم صلی اللہ علیہ وسلم نے ارشاد فرمایا ہے: ”جو شخص رمضان کے روزے رکھے اور پھر (عید کے دن) غسل کرنے کے بعد عید گاہ کی طرف جائے اور صدقہ (یعنی صدقہ فطر) کے ذریعے اس پر مہر لگا دے تو جب وہ واپس آتا ہے، تو اس کی مغفرت ہو چکی ہوتی ہے“۔
یہ روایت امام طبرانی نے معجم اوسط میں نقل کی ہے، اس کی سند میں ایک راوی نصر بن حماد ہے، اور وہ متروک ہے۔ [مجمع الزاوئد ومنبع الفوائد/أبواب العيدين/حدیث: 3205]

سیدنا عبداللہ بن عباس رضی اللہ عنہما بیان کرتے ہیں: ہم لوگ (عیدالفطر کے دن) کھایا اور پیا کرتے تھے، غسل کرتے تھے، اور پھر عیدگاہ کی طرف جانے کے لئے نکلتے تھے۔
یہ روایت امام طبرانی نے معجم کبیر میں نقل کی ہے، اس کی سند میں ایک راوی ابراہیم بن یزید مکی ہے، اور وہ متروک ہے۔ [مجمع الزاوئد ومنبع الفوائد/أبواب العيدين/حدیث: 3206]

ہشیم بیان کرتے ہیں: میں نے یزید بن ابوزیاد سے کہا: کیا جمعہ کے دن کے علاوہ کسی اور دن غسل کیا جائے گا؟ انہوں نے جواب دیا: جی ہاں! عرفہ کا دن عید کا دن ہے، عیدالفطر کے دن عیدالاضحی کے دن، عرفہ کے دن اور جمعہ کے دن (غسل کیا جائے گا)۔
یہ روایت امام ابویعلیٰ نے نقل کی ہے، ہشیم اور یزید، یہ دونوں ”صحیح“ کے راویوں میں سے ہیں۔ [مجمع الزاوئد ومنبع الفوائد/أبواب العيدين/حدیث: 3207]

سیدنا عبداللہ بن عباس رضی اللہ عنہما بیان کرتے ہیں: نبی اکرم صلی اللہ علیہ وسلم عید کے دن سرخ چادر پہنا کرتے تھے۔
یہ روایت امام طبرانی نے معجم اوسط میں نقل کی ہے، اور اس کے رجال ”ثقہ“ ہیں۔ [مجمع الزاوئد ومنبع الفوائد/أبواب العيدين/حدیث: 3208]

عطاء بیان کرتے ہیں: انہوں نے سیدنا عبداللہ بن عباس رضی اللہ عنہما کو یہ فرماتے ہوئے سنا ہے: اگر تم سے ہو سکے، تو تم عیدالفطر کے دن کچھ کھانے سے پہلے (نماز عید کی ادائیگی کے لیے) نہ نکلنا، عطاء فرماتے ہیں: جب سے میں نے سیدنا عبداللہ بن عباس رضی اللہ عنہما کی زبانی یہ بات سنی ہے، میں نکلنے سے پہلے ضرور کچھ کھا لیتا ہوں، یہاں تک کہ میں باریک روٹی کا کنارہ کھا لیتا ہوں، دودھ، یا پانی پی لیتا ہوں، میں نے دریافت کیا: اُن کا اس کے ذریعے مقصد کیا تھا؟ تو انہوں نے بتایا: میرا خیال ہے کہ میں نے انہیں نبی اکرم صلی اللہ علیہ وسلم کے حوالے سے یہ بات نقل کرتے ہوئے سنا ہے: وہ بیان کرتے ہیں: ”وہ لوگ اس وقت تک نہیں نکلتے تھے، جب تک دن چڑھ نہیں جاتا تھا اور وہ لوگ یہ کہتے تھے: ہم کچھ کھا لیتے ہیں، تاکہ ہمیں اپنی نماز کے دوران کوئی پریشانی نہ ہو“۔
یہ روایت امام أحمد نے نقل کی ہے، اور اس کے رجال ”صحیح“ کے رجال ہیں، اسے امام طبرانی نے روایت کیا ہے۔ [مجمع الزاوئد ومنبع الفوائد/أبواب العيدين/حدیث: 3209]